Read Mokpwe Hwègbèèlì 22 Bible Online

Hwègbèèlì 22 - Mokpwe bible

Hwègbèèlì 22

¹“Hwa tatɛ̀ na wònyànyàŋgò hwa ami, e nò òkànèyà na òma na kàya mònò ŋmàŋgò ema na rza òhvɛ tɔ̀ njɔ̀mi ò màrzò ma anyu.”

²Nà òma hwà mà hweye na òma Pàwolò à mà hwa òhwirzɛnɛ ò e mbɔrzi ya Hibrù, wɔ hwà mà lìya ŋmɛɛ. Rzìi mɔ̀ à ɛ̀ndɛ̀nɛ̀ jòòhwì ja eni ò wòrzò nanù ema,

³“Nà hwèlì ndi mòtò wà Yudà, na ŋyàhwɛlɛyi ndi ò mbòwa ya Tàrzɔ̀rzì ò erzòòkà ya Rzìlìrzìyà, ndi na kòkèlì ndi ò tenì ya Jèrurzalɛ̀mù. Nà òkòlɛ̀hwɛyi ndi na Gàmàlìyɛ̀lì ndèŋganɛlɛ mɔ̀ ndi à mà nò òkòlɛ̀ kɔ̀yi-kɔ̀yi lì hvòmɛ̀nɛ̀ imbenda ja ama imbamba ja arzu. Nà ma hwɛnɛ nyɔ̀ŋgi ndɛnɛ ò lì gbèeyà Lohwɛ̀ na òma inyɔ hwa arzɛ hvɛ ema e hwèlì anu òma yawònò e hwèlì e gbèeyà Lohwɛ̀.

⁴Nà mà tàkirzɛ hwatò ema hwa mà òŋgama è njiya yà ama Yerzù rzayi-rzayi natɛ̀ɛ lòŋgò hwa ŋwa. Nà mà hwɛ lì ŋgbaŋgɛ wunyanà nà hwalanà rzi nà hwa aŋgɛ ò hwèwòwà.

⁵È pìlìrzì è karzamì nà hwàmbàkì hwa arzɛ hwa lìkànèyà là mbòwà, hwa tanɛyi lì imànɛlɛ nanù ema nà òhwa ndi è jɔ̀kɛ̀. Nà mà hwa wòwànà hwètìtà ema hwa mà tìleya wònyanyàŋgò hwa ami hwa wònyà Yudà ema hwa hwèlì ò mbòwa ndɛnɛ yà Dàmàrzkɔ̀rzì. Ò eŋgànɛlɛ rzɔ imba nà mà ɛndɛ aŋga ò lì ŋgbaŋgɛ hwaŋga hwatò, lì hwa kàka, rzìi nà hwa tìmbànà ò Jèrurzalɛ̀mù aŋga nanù hwa kɔ̀kìrzɛ̀hwɛ.”

⁶“Nà òma nà mà hwɛ ò yɔ̀ndɔ̀ rzìi nà uka ò lì kòmbɛ̀nɛ̀ è mbòwa ndɛnɛ yà Dàmàrzkɔ̀rzì, eyàà yà kɔ̀rzi yà ŋmèrze, ŋmàye mò ŋginyà rzi mò nò hvàyeyà è nyò yà arzɛ ema mò mà uwɛ̀lɛ̀lɛ̀yì ò lìwòhwɛ là ŋmanyu.

⁷Nà mà kpa ò rze, rzìi nà hweyà lìlò ema lì nò òhweyà nanù ema, ‘Rzàwòlò, ìi Rzàwòlò! Mamɛ ndèŋgàtɛ ò nò tàkìrzɛ̀ e?’

⁸Nà mà ijòwa nanù ema, ‘Ìi Rzàŋgò, ò wà ò hwèlì ndi njɛnɛ e?’ À mà nò alàhwɛ nanù ema, ‘Imba nà hwèlì ndi Yerzù wà Nàrzàrɛ̀tì ema ò tàkìrzɛ̀.’

⁹Hwàtò ema hwa mà hwɛ nà imba ò mòndèŋge, hwa mà ɛnɛ mòŋgò ŋmàye, ndi hwa rzi hweye lìlò là ama è mɔ̀ ema à mà hwɛ lì nò òhwìrzɛ̀nɛ̀.

¹⁰Nà mà mò ijòwa nanù ema, ‘Ìi Rzàŋgò mamɛ nà aŋgàmɛ̀nɛ̀yi lì gbeyà e?’ Rzàŋgò rzìi è nò alàhwɛ̀ nanù ema, ‘Tɛ̀mɛ̀nɛ̀ ò ŋmanyu, ò ɛndɛ ò kpèeyà ò mbòwà ndɛ̀ɛ̀ndɛ̀ yà Dàmàrzkɔ̀rzì. Aŋga ndi ò òhwàhwɛ̀lɛ̀ hweyà hwe arzɛ ema Lohwɛ̀ à mà ò rzekeya nanù ema ò gbeye.’

¹¹Nà ma kpèeyà ndima ehwànja mòŋgò ŋmàye mò ma inyàmɛnɛ, ò eŋgànɛ̀lɛ̀ hwatò ema i ma hwɛ ò mòndeŋge, hwà mà nò lɛ̀mbɛ̀ lìya la ami rzi hwa nò timba ò lì kpèeyà ò mbòwa ndɛnɛ ya Dàmàrzkɔ̀rzì.

¹²“O ma hwɛ munyanà mɔ̀kɔ ò eŋge mbòwa ndɛnɛ ya Dàmàrzkɔ̀rzì ema à mà hwɛ̀lɛ̀hwɛ̀ Ànàniyarzì. A ma hwɛ ndi mòtò ema à mà òŋgama Lohwɛ̀ ehve-ehve, ema à mà ika imbenda ja arzu ja wònyà Yudà. Ndeŋgànɛ̀lɛ̀ à mà ŋgbààhwà èluhwe rzayi-rzayi na hwatò hwa arzɛ hwa wònyà Yudà ema hwà mà hwɛ lì lìya ò eŋge mbòwa.

¹³Ànàniyarzì à mà nò jèeya, a tɛ̀mɛ̀ ò tòŋgòŋgò ya ami rzìi a òhwa nanù ema, ‘Ŋmanyàŋgò wa ami Rzàwòlò kòkò, wòteyà lì ɛnɛ hvɛ!’ O lìŋgi lìrzàkò mɛnɛ na mà ɛnɛ hvɛ rzìi na a mò ɔŋgɔ̀.

¹⁴O mburza nanù, Ànàniyarzì rzìi à òhwa nanù ema, ‘Lohwɛ̀ la ama imbamba ja arzu à mà màà lì ò hvɔ̀rzɔ̀ ò lì hwiya lì emeyà la eni, na ò lì ɛnɛ e Mɔ̀ ema a hwèlì Èhve-ehve na ò lì hweyà imbɔrzi ema jò uwɛ̀lɛ̀lɛ̀yì ò wàna ya eni.

¹⁵O wa o ò nò tɛ̀meyà mbòŋgi ò lì òhweyà hwatò hwa arzɛ mamɛ ema ò wa ò ɛni na lì hweyà.

¹⁶O naŋgɛ rzɔ, mamɛ ò wa ò hwèlì ò lì ambɛ̀lɛ̀ e? Tɛ̀mɛ̀nɛ̀ ò ŋmanyu ò emeyà nanù ema Yerzù a hwèlì ndi Rzàŋgò ya aŋgɔ̀, ndèŋgànɛlɛ hwa ò lùhwìrzɛ̀. Ène eyà e gbeyà Lohwɛ̀ a ò rzòrza wòhwe wò àŋgɔ.’”

¹⁷“Nà ma timba ò Jèrurzalɛ̀mù. È hvònda ema nà mà hwɛ lì kànɛ, ò ndawò yà Lohwà, nà mà ɛnɛ jɛ̀nɛ̀ni.

¹⁸O tenì ya ini jɛ̀nɛ̀ni imba nà mà ɛnɛ Rzàŋgò. A ma nò òhweyà nanù ema, ‘Ahweŋgɛ ò anjiye ò Jèrurzalɛ̀mù ehwànja hwatò hwa ene mbòwa hwa rza ò emeyà hweyòhwèlì hwe aŋgɔ̀ ò lì nò hvòmɛ̀nɛ̀.’

¹⁹Nà mà mò alàhwɛ̀ nanù ema, ‘Ìi Rzàŋgò hwanu hwatò hwa hwi gbamù nanù ema imba nà mà hwɛ lì kpèeyà ò tenì yà indawò jà màkanɛ̀ jà wònyà Yudà, ò lì ŋgbaŋgɛ nà lì gbiyɛ̀ hwaŋga hwatò ema hwa mà ò lòkɛ̀ hvònji.

²⁰È hvònda ema hwa mà òŋwe Rzìtehvànɛ ema à mà hwɛ lì òhwa hweyà lì ò hvòmɛ̀nɛ̀, imba mbiti nà mà hwɛ aŋga. Nà mà emeyà nanù ema à òŋwahwe ndèŋgànɛlɛ imba ndi nà mà òhva mààtù mà hwaŋga hwatò ema hwa mà mò òŋwa.’

²¹Rzàŋgò Yerzù rzìi à nò òhweyà nanù ema, ‘Ɛ̀ndɛ, ehwànja nà hwɛni lì ò òma hvòò ò hwaŋga hwatò ema hwa rza enje wònyà Yudà.’”

²²Hwàtò hwa mà òkànèyà Pàwolò natɛ̀ɛ è hvònda ema mɔ̀ à mà òhwe nanù ema Lohwɛ̀ à mà mò òma ò lì ɛndɛ ò hwatò ema hwa rza enje wònyà Yudà. Nà òma hwa mà hweye nanù, rzìi hwa wòteyà lì tɛ̀ɛ̀ ò ŋmanyu nà màlò mà kàrzàmi, lì òhwa nanù ema, “È mò ɛ̀ndɛ̀nɛ̀! È mò òŋwe! À rza kànɛ̀yì ò lì hwɛ lòŋgɛ!”

²³Hwa mà hwɛ lì tɛ̀ɛ̀, lì hvɛhvɛ mààtù mà awu ò ŋmanyu, nà ò lì hvimba è rzɔ̀hwɛ ò ŋmanyu ò lì uŋmɛ̀lɛ̀ hwètàtò hwe awu nà Pàwolò.

²⁴È mòkànèlì wà hwàànèlì hwa njuma rzìi à àka hwàànèlì hwa eni hwa njuma ò lì kpeyàneyà Pàwolò ò tenì yà è ndawò yà ŋguhwa. Rzìi à hwa àka nanù ema hwa gbiyɛ Pàwolò hvònji aŋga nanù à òhwa lìtiŋga mamɛ ndeŋgatɛ wònyà Yudà hwa mò lòrzòwà.

²⁵Ndi è hvònda ema wɔ̀ hwa mà hwɛ ò lì kàka Pàwolò ò lì mò gbiyɛ è hvònji, Pàwolò rzìi à ijòwa è ŋmànèlì wà njuma ema à mà mò kòmbɛ̀nɛ̀ nanù ema, “È hvòmɛ̀nɛ̀ nanù ema inyɔ è gbiyɛ wònja yà Ròmànì, ema è rzìi è kàyìrzɛ̀ e?”

²⁶Nà òma òŋgò ŋmànèlì wà njuma à mà hweye nanù, rzi à ɛ̀ndɛ̀ òma è mòkànèlì wà hwàànèlì hwa njuma rzìi a mò ijòwa nanù ema, “O aŋgòwa, ò hwi mamɛ ema ò arza lì gbeyà nanù e? Ò nò munyanà à hwèlì ndi wònja yà Ròmànì!”

²⁷Ò eŋgànɛ̀lɛ̀ rzɔ è mòkànèlì wà hwàànèlì wà njuma à mà ɛndɛ ò mà Pàwolò rzìi à mò ijòwa nanù ema, “Ò nò òhweyà tɛ̀, ò wà ò hwèlì ndi wònjà yà Ròmànì e?” Pàwolò à mà mò alàhwɛ̀ nanù ema, “Ɛ̀ɛ̀.”

²⁸È mòkànèlì wà hwàànèlì wà njuma rzìi à òhwa nanù ema, “Imba nà hvàŋgèlì lìkànèyà là Ròmànì wòlì rzayi-rzayi ò wɔ̀ lì emeyà nanù ema nà hwèlì ndi wònjà yà Ròmànì.” Pàwolò rzìi à mò alàhwɛ̀ nanù ema, “Imba nà hwèlì ndi wònjà yà Ròmànì natɛ̀ɛ nà ò hwèŋyàhwèlì.”

²⁹Nà òma hwatò ema hwa mà arza lì anana Pàwolò hwa mà hwèye nanù, ò lìwòkimɛnɛ hwa mà mò hwɛmɛ rzìi hwa akòòwɛ̀ ò mbùrza. Nà òma òŋgò mòkànèlì wà hwàànà njuma à mà àyèmbɛ̀ nanù ema Pàwolò à hwèlì ndi è wònja yà Ròmànì ndèŋgana mɔ̀ à mà mò kàka ema à rzi àŋgàmɛ̀nɛ̀ lì mò kaka, wɔ̀ɔ̀ŋgɔ wò ma mò lɛ̀mbɛ̀.

³⁰È mòkànèlì wà hwàànèlì wà njuma à mà arza ò lì hwiya kɔ̀yi-kɔ̀yi mamɛ wònyà Yudà hwa òhwa nanù ema Pàwolò à gbèyi. Ò eŋgànɛ̀lɛ̀ ò wònɛyi wùnyà à mà òhwa ama hwa rzòlòhwè Pàwolò iŋgi ŋgɔ̀kɔ̀hwì. Rzìi à yòwɛ̀ ipìlìrzì ndɛ̀nɛ nà wòlìya wò arzɛ wò mbòwà wò wònyà Yudà nanù ema wɔ̀ nà mɔ̀ hwa hwɛnɛ wòlìyà. Rzìi à wòwa Pàwolò à hwa tɛ̀mìrzɛ̀lɛ̀lɛ̀ è mɔ̀ ò màrzò mà awu.