Read Mokpwe Hwègbèèlì 23 Bible Online

Hwègbèèlì 23 - Mokpwe bible

Hwègbèèlì 23

¹Pàwolò à mà ɔ̀ŋgɔ hwatò hwa hwèlìyelì hwe lìkànèyà la mbòwa kòò rzìi a òhwa nanù ema, “Ìi wònyànyàŋgò hwa ami kòkò hwa wònyà Yudà! Nàtɛ̀ɛ na ò wònò wùnyà wò yawònò èlìŋgɛ̀ ya ami e hwèlì gbamù, ò lì hvòmɛ̀nɛ̀ lòŋgɛ la ami ò wòrzò wa ama Lohwɛ̀.”

²Ànàniyarzì e pìlìrzì ema e kàrzàmi rzìi a àka hwaŋga hwatò ema hwà mà tɛ̀mɛ̀ ò lì kòmbɛnɛ Pàwolò nanù ema, hwa mò hvahve e wàna.

³Pàwolò rzìi a mò òhweyà nanù ema, “Lohwɛ̀ mɔ̀ hvɛ a ò hvahva. O wa èhwèlèlè ya yòma! O wa ema o lìyayi aŋga nanù rzìi wa a gbeyàna e mbenda ò lì nò kàyìrzɛ ndi tɔ̀ nanù ò wà witi ò gba e mbenda ò lì òhwa nanù ema hwa nò hvahve.”

⁴Hwàŋga hwatò ema hwà mà kòmbɛnɛ Pàwolò rzìi hwa mò òhweyà nanù ema, “O wa ò hwɛnyɛ ndi e pìlìrzì e kàrzàmi ya ama Lohwɛ̀!”

⁵Pàwolò rzìi a hwa alàhwɛ̀ nanù ema, “Wònyànyàŋgò hwa ami hwa wònyà Yudà kòkò, na rzi hwiye nanù ema mɔ̀ ndi à hwèlì e pìlìrzì e kàrzàmi òma na rza òhwe nanù. Èhwànja Eyà ya Lohwà e òhwi nanù ema, ‘O rza hwɛni lì òhwa wòhwe ò lì hvòmɛ̀nɛ̀ e mòtìmbèlì hwa hwatò hwa aŋgɔ̀.’”

⁶Nà òma Pàwolò à mà ayèmbɛ nanù ema lòŋgò la hwaŋga hwatò hwa eŋge ŋgindi hwà mà hwɛ ndi hwatò hwa ehvehva ya Rzàdùrzì ndèŋgànà hwànɛ̀yi hvɛ Ihvàlìrzàyì, mɔ̀ à mà kàrzɛ lìlò la eni rzi a òhweyà hwatò hwa lìkànèyà la mbòwa nanù ema, “Ìi wònyànyàŋgò wa ami hwa wònyà Yudà kòkò! Nà hwèlì ndi hvàlìrzàyì, ndèŋganɛlɛ na hwèlì ndi e ŋmanà wa mòtò ema a hwèlì ò ehvehva ya Hvàlìrzàyì. Nà hwèlì ndi ò hwèkàyìrzèlèlì anu ehwànja na lòkɛ̀yi nanù ema Lohwɛ̀ a ò hvùmùlɛ hwatò ema hwà mà ŋwɛɛ ò lòŋgɛ.”

⁷Nà òma Pàwolò à mà kulɛ lì òhwa nanù, hwatò hwa ehvehva ya Ihvàlìrzàyì na e wɔ hwa ehvehva ya Rzàdùrzì hwa wòteyà lì tɔ̀wɔ mòtàŋgò. O eŋgànɛ̀lɛ̀ wòlìya wò ma kàhwahwa.

⁸(Litiŋga la eŋge hvenda lì ma hwɛ ndi nanù ema, hwatò hwa ehvehva ya Rzàdùrzì hwa lòkɛ̀yi nanù ema, mòtò a ŋwelì tɛ a rza hvùmùwà. Wɔ̀ hwa lòkɛ̀yi hvɛ nanù ema ò rza enje tɔ̀ aŋgèlì tɔ̀ hwèlìŋgɛ̀. Ndi hwatò hwa ehvehva ya Hvàlìrzàyì hwa lòkɛ̀yi nanù ema hwene hweyà hwe ayɛ hwe hwèlì).

⁹Malò ma awu ma mà hwɛ ndi lì agba ò ŋmanyu. O eŋgànɛ̀lɛ̀ lòŋgò la hwà-òkòlèlì hwa e mbenda ema hwà mà hwɛ ndi ò ehvehva ya Hvàlìrzàyì, hwà mà tɛ̀mɛ̀nɛ̀ ò ŋmanyu, rzìi hwa tɛɛ na ŋginyà nanù ema, “Irzɔ i rza lùwànì ònò mòtò tɔ̀ njɔ̀mi. È tànɛyi lì hwɛ nanù ema, èlìŋgɛ̀ tɔ̀ aŋgèlì ndi e ma mò òhweyà eyà!”

¹⁰Mòtàŋgò mò ma òlòwa nyayi ema e mòkànèlì wa hwààna njuma à mà òka wɔ̀ŋgɔ̀ nanù ema, wɔ hwa tànɛyi lì tàawa Pàwolò. O eŋgànɛ̀lɛ̀ rzɔ, mɔ̀ à mà àka hwàanèlì wa eni hwa njuma ò lì rzihwa ò tenì ya e ŋgindi, ò lì wòwa Pàwolò ò ìtììtènì ja awu, lì ɛndɛ lì mò uta ò ndawò ya ŋguhwa.

¹¹O wòŋgò wuu, Rzàŋgò à mà tɛmeya Pàwolò ò tòŋgòŋgò rzìi a mò òhweyà nanù ema, “O rza òka wɔ̀ŋgɔ̀! Èhwànja e ŋgànà ema ò nò tɛmelì e mbòŋgi ò ene mbòwa ya Jèrurzalɛ̀mù, nanù mɛnɛ hvɛ ndi ò hwɛni lì nò tɛmeya e mbòŋgi ò èkòmè ya Ròmànì.”

¹²O enɛyi eka ya elele, lòŋgò la hwatò hwa wònyà Yudà hwà mà arzàŋganɛ rzìi hwa weka ŋmànò. Hwà mà aàtɛ hwèyi nanù ema wɔ̀ hwa rza ò laa tɔ̀ lì nyɔ tɔ̀ yòma natɛ̀ɛ hwa òŋwa Pàwolò.

¹³Wɔ hwà mà hwɛ lì aka mènìmenì me hwatò, ema hwà mà wòndɛ ene wùndɛ̀.

¹⁴Rzìi wɔ hwa ɛndɛ ò ma ipìlìrzì ndɛnɛ na hwàmbaki hwa mbòwa rzìi hwa òhwa nanù ema, “Irzɔ i ma aàtɛ hwèyi ya ŋginyà nanù ema, i rza laa tɔ̀ yòma natɛ̀ɛ jò òŋwa Pàwolò.

¹⁵O eŋgànɛlɛ rzɔ, inyɔ na hwatò hwa wòlìya wò lìkànèyà la mbòwa e òmeya e mòkànèlì hwa hwàànà njuma ŋmɛ̀ndì nanù ema a jo jàneyà Pàwolò. È àhwàŋgɛ̀lɛ nanù ema e arza ndi lì mò hweyàna kɔ̀yi-kɔ̀yi. Ndi irzɔ i wòŋgirzɛnɛ ò lì mò òŋwa ndèŋgàna a e uka anu.”

¹⁶Ndi e ŋmanà wa ama e ndòmɛ̀ ya ama Pàwolò à mà hweyà mòŋgò mundɛ. O eŋgànɛ̀lɛ̀ à mà ɛ̀ndɛ lì kpèeyà ò tenì ya e ndawò ya ŋguhwa ò lì òhweyà Pàwolò ene eyà.

¹⁷Pàwolò rzìi a hwɛlɛ ŋmànelì wa njuma mɔ̀kɔ rzìi a mò òhweyà nanù ema, “Ɛndɛnɛ ene mberza òma e mòkànèlì wa hwàànà njuma, a òhvi eyà ò lì mò òhweyà.”

¹⁸Oŋgò ŋmànelì wa njuma à mà ɛ̀ndɛ̀nɛ̀ eŋge mberza òma e mòkànèlì wa hwàànà njuma rzìi a mò òhweyà nanù ema, “È mòtò wa hwèwòwà ema a hwɛ̀lɛ̀hwɛ̀ Pàwolò a nò òhwèlì à mà nò ò jàneyà ene mberza, èhwanja e hweni eyà ò lì ò òhweyà.”

¹⁹Oŋgò mòkànèlì wa hwàanà njuma à mà lɛmbɛ èŋge mberza ò lìya rzìi a mò ɛ̀ndɛnɛ tòŋgòŋgò hvɔ̀kɔ rzìi a mò ijòwa nanù ema, “Mamɛ ò arza lì nò òhweyà e?”

²⁰Èŋge mberza rzìi e mò alàhwɛ̀ nanù ema, “Lòŋgò la hwàtimbelì hwa wònyà Yudà hwà mà kaka mundɛ ò lì ò akòhwana nanù ema ò jàne Pàwolò ŋmɛlɛ ò hwèlìyelì, ò lì àhwàŋgɛ̀lɛ nanù ema hwèlìyelì hwe mbòwa hwe arza lì arzìirzɛ kɔ̀yi-kɔ̀yi hwehvɛhvɛ hweyà lì hvòmɛ̀nɛ̀ Pàwolò.

²¹Ndi ò rzi hwa òkànèyà ehwànja ò hwèlì lì aka mènìmenì me hwatò ema hwa ò utàmà ò lì ambɛlɛlɛ lì mò òŋwa. Hwà mà aàtɛ hweyi nanù ema hwa rza laa tɔ̀ lì nyɔ tɔ̀ yòma natɛ̀ɛ hwa òŋwa Pàwolò. Hwà mà màa lì wòŋgirzɛnɛ ò lì òkànèyà mamɛ ò wa ò òhwa.”

²²Òŋgò mòkànèlì wa hwàànà njuma rzìi a mò òhweyà nanù ema, “O rzi òhweyà tɔ̀ mòtò nanù ema ò nò òhwèlì ene wùndɛ̀.” Nà òma à mà kulɛ lì mò òhweyà nanù, rzìi a mò òhweyà nanù ema a ɛndɛ.

²³Òŋgò mòkànèlì wa hwàanà njuma rzìi a hwɛlɛ hwaànelì hwa njuma hwa eni hwa hwàkɛ rzìi a hwa òhweyà nanù ema, “È wòwe hwègbe hwehwakɛ hwe hwàànèlì hwa njuma, e hwa wòŋgirzɛnɛ ò lì ɛndɛ ò Kàyìrzèrìyà, e late hvɛ menì lìrzamba me hwàànèlì hwa njuma ema hwa ɛ̀ndɛnɛ iwɔ̀rzi, na ègbe ya hwàànèlì hwa njuma ema hwa anana na màwɔ̀ŋgɔ̀. O wa na wɔ̀ e wòŋgirzɛnɛ e anjiye eyà ya lùuwa la ŋgɛ̀ŋgì la wùu.

²⁴È àrzeyà Pàwolò iwɔ̀rzi ema i mò ɛ̀ndɛnɛ. È mò timbe e mò ɛ̀ndɛ̀nɛ̀ ò ma e mòkànèlì Hvɛlìkrzi e rzi hwɛ nanù ema eyà ya wòhwe e mò gbèyɛ̀nɛ.”

²⁵È mòkànèlì wa hwàanà njuma rzìi a tìla itita ema i ma òhwa nanù ema,

²⁶“Imba Klàwùdìyùrzì Lìrzìyàrzì ndi na ò tilelì ini itita ò wa Hvɛlìkrzi e mòkànèlì wa èluhwe ndɛnɛ. Nà ò kɔ̀mi.

²⁷Hwatò hwa wònyà Yudà, hwà mà lɛmbɛ ònò mòtò, ndèŋgànà hwa arza lì mò òŋwa. Ndeŋgànɛ̀lɛ̀ na rzɔ̀ŋgìtɛ̀nɛ̀ nanù ema, a hwèlì ndi wònja ya Èkòmè ya Ròmànì, ɔndi imba na hwàànèlì wa ami hwa njuma jɛ̀ɛ̀ ɛndi lì mò ulɛ ò màà ma awu.

²⁸Nà ma arza lì hwiya mamɛ ema wɔ̀ hwa òhwa nanù ema a gbèyi. O èŋgànɛ̀lɛ̀ nà mà mò ɛ̀ndɛ̀nɛ̀ ò wòlìya wò mbòwa.

²⁹Nà ma arzìirzɛ̀ ndi na rza luwa tɔ̀ eyà ema e òhwa nanù ema mɔ̀ à aŋgàmɛ̀nɛ̀yi lì ŋwa tɔ̀ lì aŋgɛhwɛ ò hwèwòwà. Hweya hwe arzɛ ema hwa òhwa nanù ema mɔ̀ à gbèyi, hwe hwèlì ndi hweyà ema hwe ɔŋgeya e mbenda ya awu.

³⁰Nà òma nà mà hwilɛ̀hwɛ nanù ema ò hwèlì wùndɛ̀ ya lì mò òŋwa, ɔndi na a òmeya e mɔ̀ ŋgèlì hvɔ̀kɔ. Nà kòkòwɛ̀lɛ̀ hwaŋga ema hwa òhvi hweyà ò lì mò teŋgɛ̀nɛ̀ nanù ema hwa jèe hwa ò òhweyà eyà ema wɔ hwa òhwa nanù ema a gbèyi.”

³¹Hwàŋga hwààna njuma hwà mà gbeyà na òma wɔ̀ hwà mà òhwahwɛlɛ ò lì gbeyà. Hwà mà wòwa Pàwolò wòŋgò wuu rzìi hwa mò jànà natɛ̀ɛ ò mbòwa ndɛnɛ ya Antìpàtrìrzì.

³²O wònɛ̀yi wùnyà hwààna njuma ema hwà mà ɛ̀ndɛnɛ matàŋga hwà mà tìmba ò ndawò ya awu ya ŋguhwa, rzìi hwa hwɛmɛ hwààna njuma ema hwà mà ɛ̀ndɛ̀nɛ̀ iwɔ̀rzi ò lì ɛ̀ndɛ̀nɛ̀ Pàwolò.

³³Wɔ hwà mà ɛ̀ndɛ̀nɛ̀ Pàwolò ò mbòwa ndɛnɛ ya Kàyìrzèrìyà. Nà òma hwà mà uke aŋga hwà mà tɛtirzɛ e mòkànèlì itita rzìi hwa mò akɛlɛlɛ Pàwolò.

³⁴Nà òma e mòkànèlì à mà làaŋge iŋgi itita rzìi a ijòwa Pàwolò ima erzòòkà ema à mà uwɛ̀lɛ̀lɛ̀yi. Nà òma à mà hwiye nanù ema a uwɛ̀lɛ̀lɛ̀yi ndi ò erzòòkà ya Rzìlirzìyà,

³⁵rzìi a mò òhweyà nanù ema, “Imba na ò òkànèyà ŋmàŋgò mò aŋgɔ e hvònda ema hwatò ema hwa ò teŋgɛ̀nɛ̀ hwa ò uka anu.” Mɔ̀ à mà kànèyà hwààna njuma nanù ema hwa ɛ̀ndɛ̀nɛ̀ Pàwolò ò ndawò ya ama Kiŋgɛ. È ndawò ema Kiŋgɛ Hɛ̀rɔ̀di à mà òŋge. Aŋga ndi hwà mà hwɛ lì mò ɔŋgeya.