Read Mokpwe Hwègbèèlì 25 Bible Online

Hwègbèèlì 25 - Mokpwe bible

Hwègbèèlì 25

¹Hvɛ̀rzìtùrzì à mà uka ò erzòòkà ya Kàyìrzèrìyà rzi a lìya ò mbòkò ya lìkànèyà, ò mburza mèenyà meyawò à mà anjiya ò erzòòkà ya Kàyìrzèrìyà rzìi a ɛ̀ndɛ ò Jèrurzalɛ̀mù.

²Aŋga ò Jèrurzalɛ̀mù, ema ipìlìrzì ndɛnɛ na hwàmbaki hwa hwatò hwa wònyà Yudà wɔ hwà mà òhweyà Hvɛ̀rzìtùrzì hweyà ema hwa òhwa nanù ema Pàwolò à mà gbeya. Wɔ̀ hwà mà rzòrzòmeya Hvɛ̀rzìtùrzì,

³nanù ema, a hwa òŋgòwane ò lì hwa jàneyà Pàwolò ò Jèrurzalɛ̀mù. Wɔ hwà mà mò òhweyà ndi nanù ehwànja hwà mà kima ò lì òŋwa Pàwolò ò njiya.

⁴Hvɛ̀rzìtùrzì rzìi a hwa alàhwɛ̀ nanù ema, “Pàwolò a hwèlì ò hwèwòwà ò erzòòkà ya Kàyìrzèrìyà ndi imba mbiti na tìmba aŋga ŋmanà mbɔ.

⁵Inyɛ̀ hwàtìmbèlì hwa anyu hwa nò òŋgame ò Kàyìrzèrìyà, e hwèlì tɛ nanù ema Pàwolò a gbèyi tɛ eyà ya wòhwe hwa mò rzɔ̀mɔ̀nɔ̀ aŋga.”

⁶Hvɛ̀rzìtùrzì à mà lìya hvɛ ò Jèrurzalɛ̀mù eyà ya wàmbi tɔ̀ lìyòmɛ la mèenyà ndèŋgana a e timba ò erzòòkà ya Kàyìrzèrìyà. O wònɛyi wùnyà, à mà lìya ò hwèkàyìrzèlì rzìi a òhwa nanù ema hwa mò jàneya Pàwolò ò ndawò ya hwèkàyìrzèlì.

⁷È hvònda ema hwà mà jàne Pàwolò aŋga, hwatò hwa wònyà Yudà ema hwà mà uwɛ̀lɛ̀lɛ̀yi ò Jèrurzalɛ̀mù hwà mà mò tɛmeya ò tòŋgòŋgò. Wɔ̀ hwà mà wòteyà lì òhwa hweyà hwe wòhwe ema wɔ hwà mà òhwe nanù ema à mà gbeyà. Ndi hwa rzìi tànɛ lì uŋmɛ̀lɛ̀ tɔ̀ lìtiŋga tɔ̀ lɔ̀kɔ nanù ema mɔ̀ à mà gbeyà hwene hweyà.

⁸Pàwolò mɔ̀ à mà òhwa nanù ema, hweyà ema hwa òhwa ò lì mò teŋgɛ̀nɛ̀ hwe rza enje e jɔ̀kɛ̀. Mɔ̀ à mà òhwa nanù ema, “Imba na rzi gbèyi tɔ̀ eyà ema e uŋmɛ̀lɛ̀ nanù ema na teŋgɛ̀nɛ̀ e mbenda ya hwatò hwa wònyà Yudà tɔ̀ lì teŋgɛ̀nɛ̀ e Ndawò yà Lohwà tɔ̀ lì teŋgɛ̀nɛ̀ Kàyìrzà hwa Ròmànì.”

⁹Hvɛ̀rzìtùrzì à mà arza lì luwa lìna la gbamù ò wòrzò wò hwatò hwa wònyà Yudà, ò eŋgànɛ̀lɛ̀ à mà ijòwa Pàwolò nanù ema, “O lìŋgàni lì ɛ̀ndɛ ò Jèrurzalɛ̀mù ò lì kàyìrzɛ̀hwɛ ò wòrzò wò amì aŋga e? O lì hvòmɛ̀nɛ̀ hwenè hweyà ema hwa òhwa lì ò teŋgɛ̀nɛ̀ e?”

¹⁰Pàwolò rzìi a mò alàhwɛ̀ nanù ema, “Jàyɛ̀ imba na tɛmi ndi ò wòrzò wò kònda hvɔ̀kɔ ya hwèkàyìrzèlì hwe lìkànèyà la ama Kàyirza, èki ya jɔ̀kɛ̀ ema imba na àŋgàmɛ̀nɛ̀yi lì kàyìrzɛ̀hwɛ. Nà rzi gbèyi hwatò hwa wònyà Yudà tɔ̀ eyà ya wòhwe na òma ò wà witi hvɛ ò hwi kɔ̀yi-kɔ̀yi.

¹¹O eŋgànɛlɛ rzɔ, na undi tɛ mbenda ema e nò kànɛyi e mbàkò ya kpelì, nanù òma na emelì e kpelì. Ndi ò rza enje tɛ eyà ya jɔ̀kɛ̀ ò mamɛ ema hwanu hwatò hwa òhwa ò lì nò teŋgɛ̀nɛ̀, nanù òma tɔ̀ mòtò a rza hwɛni tɔ̀ wònja ò lì nò akɛlɛlɛ e wɔ̀ ò màà ma awu. O eŋgànɛlɛ na atɛ̀kɛ̀yi nanù ema Kàyìrzà mɔ̀ ŋmìti ndi à nò kàyìrzɛ.”

¹²Hvɛ̀rzìtùrzì rzìi a atòòwanɛ meyòhvò na hwèwàŋgì wa eni ema hwe mò eyeya, rzìi a alàhwɛ̀ nanù ema, “Nà òma ò ma òhwɛ nanù ema Kàyìrzà ndi à hwɛni lì ò kàyìrzɛ, ò eŋgànɛlɛ ò aŋgàmɛ̀nɛ̀yi lì ɛndɛ ò ma Kayirzà.”

¹³O mburzà ŋgurzu ja mèenyà, Kìŋgɛ̀ Agrìpa na Bɛ̀nìrzì hwà mà jà ò erzòòkà ya Kàyìrzèrìyà ò lì kàrzɛ Hvɛ̀rzìtùrzì ema à mà hwɛ e mòkànèlì.

¹⁴O mburza ya lì hvàŋga la ŋgurzu ja mèenyà aŋga, Hvɛ̀rzìtùrzì à mà òhweyà Kiŋgɛ Agrìpa lì hvòmɛ̀nɛ̀ ŋmàŋgò ema mò teŋgɛ̀nɛ̀ Pàwolò. Mɔ̀ à mà mò òhweyà nanù ema, “O hwèlì mòtò anu ema e hvònda ema Hvɛlìkrzi à mà hwɛmɛ lìkànèyà a mà lìye ò hwèwòwà.

¹⁵È hvònda ema nà mà uke ò Jèrurzalɛ̀mù, ipìlìrzì ndɛnɛ na hwàmbaki hwa hwà wònyà Yudà hwà mà jànà hvòtɛ ò lì mò teŋgɛ̀nɛ̀, rzìi wɔ hwa nò atɛkɛ nanù ema imba na mò tùulɛ̀ mòŋgò ŋmàŋgò.

¹⁶Ndi imba nà mà hwa òhweyà nanù ema hwatò hwa Ròmànì hwa òhvi ɛ̀ɛ̀mɛ̀ ema e hwèlì ndi nanù ema ò rza tànɛ lì akɛlɛ e mbàkò ema mòtò a tùu ŋmàŋgò e rzi hwɛ nanù ema mɔ̀ à kayirzɛ̀hwɛyi ò marzò ma hwaŋga hwatò ema hwa mò rzɔ̀mɔ̀ni. Hwa àŋgàmɛ̀nɛ̀yi lì mò ŋgba ehvòlò ò lì kaya ŋmàŋgò mò eni.

¹⁷O eŋgànɛlɛ rzɔ̀, e hvònda ema hwàtimbelì hwa wònyà Yudà hwà mà jèe, na rzi hvàŋge tɔ̀ hvònda, ò wònɛyi wùnyà ò mburza hwèyùkèlì hwe arzu hwe anu, nà mà lìya ò ndawò ya hwèkàyìrzèlì rzìi na àka nanù ema hwa mò jàne.

¹⁸Ndi e hvònda ema hwatò ema hwa mò teŋgɛ̀nɛ̀ hwà mà tɛ̀mɛ̀ ò lì òhwa hweyà ema mɔ̀ à mà gbeyɛ, wɔ̀ hwa rzi òhwe nanù ema a gbèyi tɔ̀ eyà yɔ̀kɔ ya wòhwe, ema imba nà mà hwɛ lì ɔ̀ŋgɛ̀lɛ̀ nanù ema wɔ̀ hwa òhwa nanù ema a gbèyi.

¹⁹Ndi wɔ̀ hwà mà òhva ndi mbùnakɛ̀ na mɔ̀ ò lì hvòmɛ̀nɛ̀ lì lòkɛ̀ la awu na mòtò mɔ̀kɔ ema a hwɛ̀lɛ̀hwɛ̀ Yerzù, ema à mà màa lì ŋwa, ndi mɔ̀ Pàwolò a òhwa nanù ema òŋgò mòtò a e hwèlì lòŋgɛ̀.

²⁰Imba na rzi hwiye nɛ nà mà tànɛ lì arzirzɛ ò lì hvòmɛ̀nɛ̀ hwene hweyà, ò eŋgànɛlɛ nà mà ijòwa Pàwolò ŋga a emeyà lì ɛndɛ ò Jèrurzalɛ̀mù nanù ema hwa mò kàyìrzɛ aŋga lì hvòmɛ̀nɛ̀ hweyà ema hwa òhwa nanù ema mɔ̀ à gbèyi.

²¹Ndi Pàwolò à mà òhwa nanù ema inyɛ a timbirzɛhwɛ hvɛ ò hwèwòwà natɛ̀ɛ na e hvònda ema Kàyìrzà a ò akɛlɛ e mbàkò ya ŋmàŋgò mò eni. O èŋgànɛ̀lɛ̀ nà mà akɛlɛ lìlò nanù ema hwàànà njuma hwa mò ɔŋgeya natɛ̀ɛ na e hvònda ema na ò mò òmɛ ò ma Kàyìrzà.”

²²Kìŋgɛ̀ Agrìpa rzìi a òhweyà Hvɛ̀rzìtùrzì nanù ema, “Imba mbiti na lìŋgàna lì hweyà mamɛ ema ònò mòtò a òhwa.” Hvɛ̀rzìtùrzì rzìi a mò timbirzɛlɛlɛ nanù ema, “O ò mò òkànèyà ŋmɛlɛ ema wò jàa.”

²³O wònɛyi wùnyà Kìŋgɛ̀ Agrìpa na Bɛ̀nìrzì hwà mà jà na èluhwe na eyàyè ya arzɛ. Hwà mà kpèeya ò tenì ya e tumba ndawò ema hwatò hwà mà arzàŋganɛ na hwa ndɛnɛ hwa hwààna njuma na hwàmbaki hwa mbòwa. O mburza hwèlìyelì hwe awu Hvɛ̀rzìtùrzì rzìi a àka nanù ema hwa ɛndɛ hwa wòwe Pàwolò hwa mò jàne. O eŋgànɛlɛ hwà mà mò jànà ò wòrzò wò awu.

²⁴Hvɛ̀rzìtùrzì rzìi a òhwa nanù ema, “Kìŋgɛ̀ Agrìpa kòkò, na hwatò hwa arzɛ ema i hwèlì anù. Onò mòtò ema ye ɛnɛ anu nanù, a hwèlì ndi mòtò ema hwatò hwa wònyà Yudà ema hwa hwèlì anu, na e wɔ̀ ema hwa hwèlì ò Jèrurzalɛ̀mù hwa jelì lì nò òhweyà nanù ema à mà gbeyà hweyà hwe wòhwe, wɔ̀ hwa tɛɛ nanù ema mɔ̀ à rza kànɛyi lì hwɛ ò lòŋgɛ.

²⁵Ndi ò hweyàrzìrzèlì hwe ami, na ɛni nanù ema, a rza gbèyi tɔ̀ eyà ema e mò kànɛyi e kpelì. Ndi ehwànja à mà wunduwa nanù ema ŋmàŋgò mò eni mò kàyàwe ndi na Kàyìrzà, ò eŋgànɛlɛ imba na mo òma aŋga.

²⁶Ndi ò jɔ̀kɛ̀ na rza òhvi tɔ̀ lìtiŋga la eyà ò lì tìla ò itita ò lì òmeya Kàyìrzà ò lì teŋgɛ̀nɛ̀ Pàwolò. O èŋgànɛ̀lɛ̀ ò naŋgɛ na e jànelì e mɔ̀ ò marzò ma anyù, rzɛ̀hvɔ̀nì ò wòrzò wò aŋgɔ̀ Kìŋgɛ̀ Agrìpa, aŋga nanù ò mburza hweyàrzìrzèlì hwe anyu, na ò hwɛnɛ eyà ya lì tìleya Kàyìrzà.

²⁷Nà lùteyà nanù ema e rza enje gbamù ò lì òma mòtò wa hwèwòwà ò ma Kàyìrzà e rzi hwɛ lì uŋmɛ̀lɛ̀lɛ kɔ̀yi-kɔ̀yi eyà ya wòhwe ema mɔ̀ à gbèyi.”