Read Mokpwe Hwègbèèlì 26 Bible Online

Hwègbèèlì 26 - Mokpwe bible

Hwègbèèlì 26

¹Kìŋgɛ̀ Agrìpa rzìi a òhweyà Pàwolò nanù ema, “O ŋgbàahwì wònjà ò lì òhwa eyà lì hvòmɛ̀nɛ̀ hweyà ema hwa òhwa lì ò teŋgɛ̀nɛ̀.” Pàwolò rzìi a enyòwa mɔɔ mò eni rzìi a wòteya lì kaya. A òhwa nanù ema,

²“Ìi Kiŋgɛ Agrìpa kòkò, imba na a ɛnɛ nàa na nàmìrzɛ̀hwɛ ò lì tɛ̀mɛ̀ ò wòrzò wò aŋgɔ̀ ò lì kàya ò wònò wùnyà lì hvòmɛ̀nɛ̀ hweyà hwe arzɛ ema hwàtimbelì hwa wònyà Yudà hwa òhwa lì nò teŋgɛ̀nɛ̀.

³Imba na nàmìrzɛ̀hwɛyi tòwòtòwò ehwànja ò wa ò hwèlì ndi mòtò ema ò rzɔ̀ŋgìtɛ̀nɛ̀ ɛ̀ɛ̀mɛ̀ ya arzɛ ya hwatò hwa wònyà Yudà ndèŋgànɛ̀lɛ̀ èki ema e kanjɛ-kànjɛ ya awu e uwɛ̀lɛ̀lɛ̀yì. O eŋgànɛlɛ na ò atɛkɛ ò lì nò àjùlɛ̀nɛ̀ lì nò òkànèyà kɔ̀yi-kɔ̀yi.

⁴O eŋgànɛ̀lɛ rzɔ hwatò hwa arzɛ hwa wònyà Yudà hwa hwi lòŋgɛ la ami lì wòteya nà mà hwɛ erzɔ̀mbɛ. Wɔ̀ hwa hwi lòŋgɛ la ami, lì wòteya nà mà hwɛ mberza ema nà mà hwɛ lì lìya ò ìtììtènì ja hwatò wa ami, rzɛ̀hvɔ̀nì e hvònda ema nà mà hwɛ ò Jèrurzalɛ̀mù.

⁵Wɔ̀ hwà mà nò hwiya hvòka hvònda ema e wawi ndeŋgànɛlɛ wɔ̀ hwa lìŋgànì tɛ, wɔ̀ hwa tànɛyi lì nò tɛmeya mbòŋgi nanù ema natɛ̀ɛ na ò hwèwòtelì nà mà hwɛ ndi mòtò wa ehvahve ema a òŋgama hweyà hwe ama Lòohwà la arzu ò mburza nyàyi ema e hvòmɛ̀nɛ̀ kɔ̀yi-kɔ̀yi. Nà hwe òŋgama ndi nàa e mòtò ema a hwèlì ò ehvehva ya Hvàlìrzàyì a àŋgàmɛ̀nɛ̀yi lì gbeyà.

⁶O yàwònò imba na tɛmi ndi anù ò lì kàyìrzɛ̀hwɛ na ò wa ehwànja na lòkɛ̀ nanù ema Lohwɛ̀ a òndìrzɛ lì kàkɛ̀nɛ la eni ema à mà kàkɛ̀nɛ imbamba ja arzu.

⁷Ène eyà ndi lìyòmɛ̀ la matumba nà mà hwàkɛ ma arzu ma mà àhvìtɛ̀ nanù ema mà luwa na òma hwa kànɛ Lohwɛ̀ ŋmerze na wuu. Ìi Kiŋgɛ kòkò, ndi lìni lì àhvìtɛ̀ lɔ̀ ndi lì gbèyi ema hwatò hwa wònyà Yudà hwa òhwa hweyà hwe wòhwe ò lì nò teŋgɛ̀nɛ̀.

⁸Mamɛ ndèŋgàtɛ inyɔ hwatò hwa wònyà Yudà e rza tànɛyi lì lòkɛ̀ nanù ema Lohwɛ̀ a tànɛyi lì hvùmùlɛ hwatò ema hwà mà ŋwɛɛ ò lì hwɛ o lòŋgɛ e?

⁹Imba mbiti nà mà keka ò lì arza ŋmànò ò lì hvàŋga lìinà la ama Yerzù mòtò wa Nàrzàrɛ̀tì.

¹⁰Ò jɔ̀kɛ̀, nanù ndi nà mà gbeye ò Jèrurzalɛ̀mù. Nà ma luwa wònjà na e pìlìrzì ndɛnɛ ò lì aŋgɛ rzàyi-rzàyi ja hwatò hwa ama Lohwɛ̀ ò hwèwòwà. È ma hwɛ tɛ nanù ema hwà mà akɛlɛ tɛ e mbàkò nanù ema hwa hwɛni lì ŋwa, imba hvɛ mbiti nà mà emeyà.

¹¹O ŋgèlì rzayì-rzayì hvɛ imba nà mà hwɛ lì hwa kɔ̀kìrzɛ̀ ò tenì ya indawò ja màkanɛ̀ ja wònyà Yudà ja arzɛ, ndeŋgànɛlɛ nà mà hwɛ hvɛ lì arza nanù ema hwa òhwe hweyà hwe wòhwe ò lì teŋgɛ̀nɛ̀ Yerzù. Imba nà mà hwa tàtàna rzàyi-rzàyi nyàyi ema nà mà hwɛ lì ɛndɛ ò màhvɛhvɛ mambòwà nà ò hwehvɛhvɛ hwèkòmè ò lì hwa tàkirzɛ.”

¹²“Ò ene ŋgàna ɔ̀ndeŋgàtɛ̀ imba nà mà ɛ̀ndɛ ò mbòwa yà Dàmàrzkɔ̀rzì nà è wònjà nà lìkànèyà là ama ipìlìrzì ndɛnɛ ema hwa mà nò ŋgbe.

¹³Ìi kìŋgɛ kòkò, ò eyàà yà kɔ̀rzi yà ŋmèrze, nà òma nà mà hwɛ ò yɔ̀ndɔ, nà ɛnɛ ŋmàye ema mò mà uwɛ̀lɛ̀lɛ̀yi ò ŋmanyu yà lohwà ema mò mà hvànya lì aka tɔ̀ ŋmàye mò igbe, ema mò mà nò tòŋga imba nà hwaŋga ema ì mà ɛ̀ndɛ̀lɛ̀nɛ̀.

¹⁴Irzɔ hwa arzɛ ì mà kpa ò rze. Aŋga ndi nà à hweyà lìlò lì nò òhweyà ò mbɔrzi yà Hibrù nanù ema, ‘Rzàwòlò, ìi Rzàwòlò, mamɛ ndeŋgatɛ ò nò tàkìrzɛ̀ e? È njuma ema ò nò anana e gbèyi ndi nàa ŋmanà ema a nyɔ̀ŋgɔ rzìi a à kòka lìhwɛ la ama nyàŋgɛ. A agbeyɛ ndi mɔ̀ ŋmìti wòhwe.’

¹⁵Rzìi nà mò ijòwa nanù ema, ‘Ìi Rzàŋgò ò wà ò hwèlì ndi njɛ̀nɛ e?’ Rzàŋgò rzìi à alàhwɛ̀ nanù ema, ‘Imba ndi nà hwèlì Yerzù ema ò hwèlì ò tàkìrzɛ̀.

¹⁶Ndi ò naŋgɛ tɛ̀mɛ̀nɛ̀ ò ŋmanyu, ehwànja imba nà ò wurzelì ndi ò lì ò hvɔ̀rzɔ̀ nàa è mògbèèlì wà ami ndèŋgànà nàa mbòŋgi ò hwahvɛhvɛ hwatò, ò lì hvòmɛ̀nɛ̀ hweyà ema ò mà ɛnɛ yawònò, nà hweŋge ema o ò ɛnɛ ò hvònda ema è ò jɛ̀ɛ̀.

¹⁷Nà ò rzùŋgà ò màà mà hwatò hwa aŋgɔ hwa wònyà Irzàyɛ̀lì na ò hwaŋga hwatò ema hwa rza enje wònyà Yudà, ema imba na ò òma.

¹⁸O wa ò hwa lìhvòhwa mìirzɔ̀ ma awu aŋga nanù hwa anjiya ò ìtììtènì ja jìtìtì, hwa luwa ŋmàye rzìi hwa anjiya ò tenì ya e ŋginyà ya ama Mòkarzɛ̀ rzìi hwa ɛndɛ ò rze ya e ŋginyà ya ama Lohwɛ̀, eŋge eyà e gbeyà wɔ hwa luwa mèlàkìrzɛnɛ ò wòhwe wò awu, rzìi hwa hwɛ èki yɔ̀kɔ na hwatò ema Lohwɛ̀ à mà rzàŋgìrzɛ̀ ehwànja hwa nò lòkɛ̀.’”

¹⁹“O èŋgànɛ̀lɛ̀ rzɔ, Kiŋgɛ Agrìpa kòkò, jɛ̀ɛ̀nɛ̀nì ema nà mà ɛnɛ ema i ma uwɛ̀lɛ̀lɛ̀yi ò ŋmanyu yà lohwà na rzi òke wɔ̀ŋgɔ̀ ò lì jò òŋgama.

²⁰Lì wòteyà aŋga nà mà wòteyà lì òhwa ŋmɛ̀ndì mò gbamù. Nà ma wòteyà ò mbòwa ndɛnɛ ya Dàmàrzkɔ̀rzì, rzìi na ɛndɛ o Jèrurzalɛ̀mù, ndèŋgànà na ɛndɛ ò hwèrzòòkà hwe arzɛ hwe Irzàyɛ̀lì na ò erzòòkà ya hwatò ema hwa rza enje wònyà Yudà. Nà ma hwɛ lì hwa òhweyà nanù ema hwa hwɛmɛ lì gbeyà wòhwe hwa timbeya Lohwɛ̀, ndeŋga nanù ema hwa gbèye hweyà ema hwe uŋmɛ̀lɛ̀ nanù ema wɔ̀ hwà mà hwɛmɛ wòhwe wò awu.

²¹Ŋmɛ̀ndì mò gbamù ema nà mà hwɛ lì òhwa mɔ̀ ndi mò ma gbeyà hwatò hwa Wònyà Yudà hwà mà nò lɛmbɛ, e hvònda ema nà mà hwɛ ò Ndawò yà Lohwà, ndeŋgànɛlɛ hwà mà arza lì nò òŋwa.

²²Ndi tɔ̀ nanù natɛ̀ɛ na ò wònò wùnyà wò yawònò, Lohwɛ̀ ndi à hwèlì a nò òŋgòwàna. O eŋgànɛlɛ nà tɛmi ndi ànu ò lì e òhweyà inyɔ hwa arzɛ e jɔ̀kɛ̀. Tɔ̀ e hwɛ ndi hwatò ema hwa hwɛni wòlìtò tɔ̀ hwatò ema hwa rza hwɛnɛ wòlìtò. Hweya ema na òhwa hwe hwèlì ndi nyàyi hvɔ̀kɔ ya hweyà ema hwà-òhwèlì hwa hwèlìŋgɛ̀ na Mòrzè hwà mà òhwe nanù ema hwe ò gbèyɛ̀nɛ.

²³Wɔ̀ hwà mà òhwa nanù ema è Mɔ̀ ema à Ɔ̀kirzɛ̀hwɛ̀yi a hwɛnì lì taka rzìi a hwɛ e mòtò hwa wòrzò ò lì hvùmùwà ò kpelì. A ò òhweyà hwatò nanù ema ŋmàye mò hvànyeya hwatò hwa wònyà Yudà na ò hwaŋga hwatò ema hwa rza enje wònyà Yudà nàŋgɛ.”

²⁴È ŋgànà ema Pàwolò à mà kaye, e ma gbeyà Hvɛ̀rzìtùrzì a mò lòmeya nanù ema, “Ìi Pàwolò ò ma kpànyà e? Lì òkòwa la aŋgɔ̀ là rzàyi-rzàyi ndi lì ò kpànyìrzɛ e?”

²⁵Pàwolò rzìi a alàhwɛ̀ nanù ema, “Kìŋgɛ wa èluhwe kòkò, na rza kpànyi. Mamɛ na òhwa e hwèlì ndi e jɔ̀kɛ̀ ndèŋgànɛ̀lɛ̀ e òndi lìhwiyè.

²⁶Kìŋgɛ̀ Agrìpa kòkò, na tànɛyi na ò òhwìrzɛ̀nɛ̀ na e kumba ehwànja na hwi nanù ema ò rzɔ̀ŋgitɛ̀nɛyi hwene hweyà hwe arzɛ. Nà lòkɛ̀ nanù ema ò rzɔ̀ŋgìtɛ̀nɛ̀ hweyà hwe arzɛ ema hwe ma gbèyɛ̀nɛ. Èhwànja hweyà ema hwe gbèyɛ̀nɛyi hwe rza gbèyɛ̀nɛyi ndi ò jututa.

²⁷Ìi kìŋgɛ̀ Agrìpa ò lòkɛ̀yi hweyà ema hwà-òhwèlì hwa hwèlìŋgɛ̀ hwà mà tile e? Nà hwi nanù ema ò hwe lòkɛ̀yi.”

²⁸Kiŋgɛ Agrìpa rzìi a alàhwɛ̀ Pàwolò nanù ema, “O lòkɛ̀ nanù ema ò tanɛ lì nò umbɛlɛ ò ònò ŋmanà hvòka wa hvònda ò lì emeyà lì hwɛ e mòlòkèlì wa ama Krirztò e?”

²⁹Pàwolò rzìi a mò timbirzɛlɛlɛ nanù ema, “Nà kànɛ Lohwɛ̀ nanù ema, ŋga ò ŋmanà hvòka wa hvònda tɔ̀ ò hvònda ema e wawi, rzeketɛ ò wà witi ndi tɔ̀ njɛnɛ hvɛ ema a nò òkànèyà yawònò mɔ̀ hvɛ a tànɛ lì hwɛ na òma imbahvɛ na hwèlì. Nà rza kanɛ̀ ndi nanù ema hwa e kake ŋgɔ̀kɔ̀hwì na òma hwa nò kaki e jɔ nàŋgɛ nanù.”

³⁰Nà òma Pàwolò à mà kulɛ lì òhwa nanù, Kìŋgɛ̀ Agrìpa, Hvɛ̀rzìtùrzì e mòkànèlì, Bɛ̀nìrzì na hwanɛ̀yi ema hwà mà lìya na wɔ̀, rzìi hwa tɛ̀mɛ̀nɛ ò lì wurza.

³¹È hvònda ema hwà mà anjiye ò e tumba ndawò ya hwèkàyìrzèlì hwà mà àwòhwànɛ̀lɛ̀ lì hvòmɛ̀nɛ̀ Pàwolò nanù ema, “Onò mòtò a rza gbèye tɔ̀ eyà ema e mò kànɛyi e kpelì tɔ̀ lì aŋgɛhwɛ ò hwèwòwà.”

³²Agrìpa rzìi a òhweyà Hvɛ̀rzìtùrzì nanù ema, “Oma ònò mòtò a rzòlòwahwi a rzi atɛkɛ tɛ ndi nanù ema hwa mò ɛ̀ndɛnɛ ò ma Kàyìrzà.”