Read Mokpwe Hwègbèèlì 27 Bible Online

Hwègbèèlì 27 - Mokpwe bible

Hwègbèèlì 27

¹È hvònda ema hwà mà kulɛ nanù ema i kpèeyà ò tenì ya melì me ŋmànja ò lì ɛndɛ o èkòmè ya Itàlì, hwà mà akɛlɛlɛ Pàwolò na hwahvɛhvɛ hwatò hwa hwèwòwà ò ma e mòkànèlì wa hwààna njuma ema à mà hwɛ̀lɛ̀hwɛ̀ Jùlìyɔ̀rzì. Jùlìyɔ̀rzì mɔ̀ à mà hwɛ lì kànèyà lìtuta la hwààna njuma ema hwà mà hwɛ lì hwɛlɛ nanù ema, “Lìtuta la hwààna njuma hwa ama Kàyìrzà.”

²Irzɔ i ma kpèeyà ò tenì ya melì me ŋmànja ò mbòwa ya Adramitiyumi. Meŋge melì me ŋmànja me ma wòŋgirzɛnɛ ò lì ɛndɛ lì uka ò e rzàawà ya ŋmànja mò erzòòkà ya Èrzìyà. Rzìi i wòteyà lì ɛndɛ yɔ̀ndɔ ya ŋmànja. Ndèŋgana irzɔ je anjiya aŋga, i ma wòwa Arìrztàkùrzì. Arìrztàkùrzì à mà hwɛ ndi mòtò wa erzòòkà ya Màrzèdonìyà, ema à mà uwɛ̀lɛ̀lɛ̀yi ò mbòwa ndɛnɛ ya Tɛ̀rzàlònìkà.

³O wònɛyi wùnyà irzɔ i ma uka ò mbòwa ndɛnɛ ya Rzidònì. Jùlìyɔ̀rzì à mà hwɛneya Pàwolò ŋmèma mò gbamù. Rzìi à mò hwɛmɛ nanù ema a ɛndɛ a ɛnɛ imbunda ja eni, òma hwà mà mò ŋgba tɔ̀ mamɛ ema a arza.

⁴Irzɔ i ma anjiya aŋga rzi i wòteyà lì ɛndɛ ndi kànatɛ̀ e mbɛ̀hvɛ̀nì ya ŋginyà e ma hwɛ lì uŋgɛlɛ ò wòrzò wò arzu, ò eŋgànɛlɛ i ma akeyà ndi ò tòŋgòŋgò, ya erzòòkà ya Rzàyìprɔ̀rzì ò èhvàrzù ema e mbɛ̀hvɛ̀nì e rzi imbamɛ. Rzàyìprɔ̀rzì à mà hwɛ ndi yòndi.

⁵Rzìi i hwɛmɛ e rzàawà ya hwèrzòòkà hwe Rzìlirzìyà na Pàmhvilìyà rzìi ja aka ŋmàanja ndèŋgànà irzɔ je uka e mbòwa ndɛnɛ ya Mila ò erzòòkà ya Lìrzìyà.

⁶Aŋga ndi òŋgò mòkànèlì wa hwàànà njuma a ɛnɛ melì me ŋmànja ema me ma uwɛ̀lɛ̀lɛ̀yi ò mbòwa ndɛnɛ ya Alɛ̀rzàndrìyà ema me ma hwɛ lì ɛndɛ ò èkòmè ya Itàlì, rzìi a jò kpɛɛlɛ ò tenì ya meŋge melì me ŋmànja.

⁷Lìwòteya aŋga, yɔ̀ndɔ ya meŋge melì me ŋmànja e ma hwɛ ndi hviyayi-hviyayi ndèŋgànɛlɛ rzàyi-rzàyi ja mèenyà me ma aka ndèŋgana je òhwa nanù ema i ma uka ò e mbòwa ndɛnɛ ya Rznìdùrzì. Kànàtɛ e mbɛ̀hvɛ̀nì e ma hwɛ ndi lì jò uŋgɛlɛlɛ ò wòrzò, i rzi tànɛ lì ɛndɛ ò wòrzò ò eŋge èhvàrzù. O eŋgànɛlɛ, i ma akeyà ndi ò tòŋgòŋgò ò lì ɔ̀ndɔ̀ ò èhvàrzù ema e mbɛ̀hvɛ̀nì e rzi imbamɛ. I ma akeyà lì akeyà ò Kepi Rzàlmɔ̀nì ò lì uka ò erzòòkà ya Klɛti ema e ma hwɛ ndi yòndi.

⁸I ma àyinɛ̀lɛ̀ ndi yɔ̀ndɔ ya e rzàawà ya ŋmànja ndèŋgana je òhwa nanù ema i ma uka èki ema e hwɛ̀lɛ̀hwɛ̀ Rzèhvì Hàbɔ̀rzì. Èŋge èki e rzi rzɔ̀lɛnɛ na e mbòwa ndɛnɛ ya Làrzìyà.

⁹Ì ma hvàŋga hvònda rzayi-rzayi aŋga, natɛ̀ɛ e ma jà ndi màwɔ̀ŋgɔ̀ ò lì ɛ̀ndɛ̀nɛ̀ yɔ̀ndɔ ò wòrzò. Èhwànja ò eŋge hvònda òma ŋmàa mò ma uka ò lìrzùkù, Wùùnyà wò e ndèma ya lì ŋgba màhwèyà ò lì làkìrzɛ la wòhwe wò ma hwɛ wò ma aka. O eŋgànɛlɛ Pàwolò à mà hwa kòkòwɛ̀lɛ̀ nanù ema,

¹⁰“Ìi wùnyànà kòkò, na ɛnɛ nàa e tànɛyi lì jò ambeya ò lì ɛ̀ndɛ̀nɛ̀ ene yɔ̀ndɔ̀ ò wòrzò. Èrzàŋgò e hwɛni lì hvàŋgeyà rzàyi-rzàyi, melì me ŋmànja me hwɛni lì wuhweyà ndeŋgàna e mbɔ̀lɔ̀ni e ò hwɛ ò mòŋgɛ ma hwatò.”

¹¹Ndi e mòkànèlì wa rzònja a rzi lòkɛ̀ mamɛ ema Pàwolò à mà òhwe ndi à mà lòkɛ̀ ndi mamɛ ema e mòlukelì na e mòhwɛnɛ wa meŋge melì me ŋmànja hwa mò òhwe.

¹²Èŋge èki ema melì me ŋmànja me ma hwɛ e rzi hwɛ ndi èki ema hwatò hwà mà kànɛyi lì hwɛ e hvònda ema e mbɛ̀hvɛ̀nì e uŋgɛlɛ. O eŋgànɛ̀lɛ̀ rzɔ̀, hwatò ema hwà mà kòka hwà mà hwɛ ndi hwaŋga ema hwà mà lìŋgàna nanù ema hwa ɛ̀ndɛ̀nɛ̀ ndi yɔ̀ndɔ ò wòrzò ò lì keka lì uka ò e mbòwa ndɛnɛ ya Hvɔ̀nìrzì. Hvɔ̀nìrzì à mà hwɛ ndi èki ema hwà mà hwɛ lì rzɛ̀lɛ melì me ŋmànja ò erzòòkà ya Klɛ̀tì. Klɛ̀tì ema à mà hwɛ lì ɔ̀ŋgɔ e rzàawà ya lɛlu na e ya mbɛ̀ŋgɛ. Aŋga ndi hwà mà tànɛyi lì lìya ò e hvònda ya yùulùlì ndɛnɛ.

¹³Ŋmanà mbɛ̀hvɛ̀nì ema e ma uwɛ̀lɛ̀lɛ̀yi mbɛŋgɛ e ma wòteyà lì aka. Rzìi hwaŋga hwatò hwa lùtèyà nanù ema hwa tànɛyi hwa ɛndɛ ò wòrzò na ŋmànò mò awu. O eŋgànɛlɛ wɔ̀ hwà mà rzìima mìiyò ma awu ò tenì ya melì me ŋmànja rzìi hwa ɛ̀ndɛ̀nɛ̀ yɔ̀ndɔ̀ ya awu ya màlìhwa lì akeyà ò tòŋgòŋgò ò lì uka ò erzòòkà ya Klɛti.

¹⁴Hwa rzi ɛndɛ hvòò rzìi mbɛ̀hvɛ̀nì ndɛnɛ ema e hwɛ̀lɛ̀hwɛ̀ “Mbɛhvɛni ya lɛlu” e ma uwɛ̀lɛ̀lɛ̀yi ò Klɛti rzìi e wòteyà lì uŋgɛlɛ na ŋginyà.

¹⁵Èŋge mbɛ̀hvɛ̀nì e ma tìndɛ̀lɛ melì me ŋmànja. Melì me ŋmànja me rzi tànɛ lì ɛndɛ ò wòrzò ò èhvàrzù ema e mbɛ̀hvɛ̀nì e ma uwɛ̀lɛ̀lɛ̀yi. O eŋgànɛ̀lɛ̀ i ma hwɛmɛ ò lì arza, lì keka lì ɛ̀ndɛ̀nɛ̀ melì me ŋmànja ò eŋgànɛ̀lɛ̀ rzɔ i ma hwɛmɛ e mbɛ̀hvɛ̀nì ò lì ìnɛ̀lɛ̀ melì me ŋmànja, ò lì me ɛ̀ndɛ̀nɛ̀ tɔ̀ òne.

¹⁶Nà òma i ma aka e mbɛŋgɛ ya e ŋmanà yòndi ema a hwɛ̀lɛ̀hwɛ̀ Kawuda, i ma luwa ŋmanà ehvòlò ò lì akeyà èki ema e mbɛ̀hvɛ̀nì e rzi imbamɛ. Aŋga ndi i ma keke natɛ̀ɛ rzìi i rzeeya ehvòlò ya wɔ̀lɔ̀ ema i ma hwɛ lì rzìima ò mburza aŋga nanù wò rzi wuhweyà. Je e hwiya lì gbeyà nanù ò ma i ma taka rzàyi-rzàyi.

¹⁷Hwà mà rzìima wɔ̀ɔ̀lɔ̀ rzìi hwa wò kpɛlɛ ò melì me ŋmànja aŋga ndi hwa a wòwa meyɔ̀lì ema me ma hwɛ ò tenì ya melì me ŋmànja ò lì kànyàna wòŋgò wɔ̀lɔ̀. Hwà mà òka wɔ̀ŋgɔ̀ nanù ema meŋge melì me ŋmànja me ma tànɛ lì ɛndɛ lì àyɛ̀rzɛ̀ lìtuta la nyàŋga ema lì ma hwɛ ò e rzàawà ya mòkòkò mò èkòmè ya Lìbiya. O eŋgànɛ̀lɛ̀ rzɔ wɔ hwà mà rziirzɛ e ahvala ema e gbèeyà ema melì me ŋmànja me rza hvinjɛlɛ yɔ̀ndɔ̀, rzìi hwa hwɛmɛ nanù ema e mbɛ̀hvɛ̀nì yɔ̀ ndi e ɛ̀ndɛ̀nɛ̀ melì me ŋmànja.

¹⁸Èŋge mbɛ̀hvɛ̀nì ya ŋginyà e ma ɛndɛ ndi ò wòrzò, ò eŋgànɛ̀lɛ̀ ò wònɛyi wùnyà wɔ hwà mà wòteyà ò lì ulɛ lòŋgò la erzàŋgò ema e ma hwɛ ò tenì ya melì me ŋmànja lì e hvimba ò tenì ya ŋmànja.

¹⁹O wònɛ̀yi wùnyà wɔ̀ hwitɛ-hwitɛ hwà mà wòteyà ò lì hvimba lòŋgò la hwema ema hwe ma gbeyànɛhwɛ ò melì me ŋmànja na màà ma awu ò tenì ya ŋmànja.

²⁰O tenì ya rzayi-rzayi ja mèenyà ema me ma aka irzɔ i rzi tànɛ tɔ̀ lì ɛnɛ igbe tɔ̀ irzòmbe, ndeŋgànɛlɛ e mbɛ̀hvɛ̀nì yɔ hvɛ e ma inyàmɛnɛ na ŋginyà. O lìrzùku irzɔ i mà wɔ̀lɛnɛ lìhvìta la lì rzùŋgàhwà.

²¹O mburza ya hvònda ema e wawi ema hwatò hwa rzi lɛɛ tɔ mòlelì, Pàwolò rzi a tɛ̀mɛ̀ ò ìtììtènì ja hwaŋga hwatò hwa arzɛ rzìi a òhwa nanù ema, “Ìi wònyàmòwe kòkò, e ma kànɛyi lì nò hweyàna e hvònda nà mà òhwe nanù ema e rza anjiya ò Klɛti. È ma nò hweyàna tɛ ò ma i rza luu mònò mòtàkà na ene mbɔ̀lɔ̀ni ema i ma luwɛ nàŋgɛ.

²²Ndi ò naŋgɛ na e rzòrzòmelì e kake mèèmà. Èhwànja tɔ̀ mɔ̀kɔ wa anyu a rza ò wɔ̀lɛnɛ lòŋgɛ la eni anu, ndi melì me ŋmànja mɛnɛ ndi me ò hvàŋgahwɛ̀.

²³Nà òhwa ndi nanù ehwànja ò tenì ya wònò wuu ema wò akayi nanù, aŋgèlì ya ama Lohwɛ̀, Lòohwà ema lì nò hwɛni, ndèŋgànà imba na gbèeyà e nò jèeyayi. Èŋge aŋgèlì e nò òhweyàyi nanù ema,

²⁴‘Ìi Pàwolò ò rzi òka tɔ wɔ̀ŋgɔ̀! O wa ò hwɛni lì tɛ̀mɛ̀ ò wòrzò wa ama Kàyìrzà e mòkànèlì ò lì kàya. O nyòla e ndèli ema Lohwɛ̀ a ò hwɛnelì, mɔ̀ à ò rzùŋgà hwaŋga hwatò hwa arzɛ ema hwa ɛndɛlɛnɛ na ò wa ò ene yɔ̀ndɔ ya malìhwa.’

²⁵O eŋgànɛlɛ rzɔ, ìi wònyàmòwe e kake mèèmà. Èhwanja imba na lòkɛ̀yì Lohwɛ̀ nanù ema hweyà hwe arzɛ hwe ò gbèyɛ̀nɛ ndi na òma e aŋgèlì e nò òhweyàyi.

²⁶Ndi e mbɛ̀hvɛ̀nì e ò jò tìndɛ̀lɛ̀ ò rzàawà hvɔ̀kɔ ya yòndi yɔ̀kɔ.”

²⁷O wuu ema wò ma òndìrzɛ̀ lìyòme la mèenyà na mèni, ema i ma hwɛ nanù mɛnɛ ò tenì ya ŋmànja mò Adrìya, eyà ya kɔ̀rzi ya wuu ɔndi hwatò ema hwà mà hwɛ lì luka melì me ŋmànja hwà mà ayèmbɛ nanù ema ja a amba lì uka ò rzàawà.

²⁸Rzìi hwa wòwa mòrziŋga ema mò ma kakahwa yòma ema e ma òhva mòrzimbɔ rzìi hwe e aŋgba ò tenì ya ŋmànja ò lì ɛnɛ lì rzɔ̀ŋgɔ la màlìhwa la èki ema i ma hwɛ. Aŋga ndi hwa a ayèmbɛ nanù ema, lìmɛni lì ma hwɛ ndi meni menii me meta. O mburza ŋmanà hvòkà wa hvònda hvɛ ema è ma aka, rzi hwa timba lì aŋgba hvɛ mòŋgò mòrzimbɔ ò ŋmànja rzìi hwa ɛnɛ nanù ema lì rzɔ̀ŋgɔ̀ lì ma hwɛ ndi rzàyiyàwò ya meta.

²⁹Hwà mà kpèeyà wɔ̀ŋgɔ̀ nanù ema mèelì me awu me ŋmànja me ò hwaŋga ò ŋmanyu ya ewòmɛ ya lìŋyàyi. O eŋgànɛ̀lɛ̀ hwà mà rziirzɛ miyò manii ema me lɛmbɛ mèelì me ŋmànja ò mburza ya melì me ŋmànja ò lì tɛmirzɛ mèelì me ŋmànja, rzìi hwa wòteyà lì kànɛ nanù ema wùùnya wò yahwe kàrzi-kàrzi.

³⁰Rzìi hwàgbèelì hwa melì me ŋmànja hwa wòteyà lì arza ŋmanò mò lì hwaŋga lì anjiya ò tenì ya meŋge melì me ŋmànja. Hwà mà rziirzɛ wɔ̀ɔ̀lɔ̀ ò malìhwa rzi hwa àhwàŋgɛ̀lɛ̀ nanù ema hwa ɛndɛ ndi ò lì rziirzɛ mahvɛhvɛ miyò ò wòrzò wò meŋge melì me ŋmànja.

³¹Ndi Pàwolò à mà òhweyà òŋgò mòkànèlì wa rzònja na irzònja nanù ema, “Hwanu hwàgbèelì hwa melì me ŋmànja hwa rza enje tɛ anu tenì inyɔ e rza tànɛyi lì kàrzòwà.”

³²O eŋgànɛ̀lɛ̀ i rzònja i ma kɛ meyɔlì ema me ma tiŋgɛ wɔ̀ɔ̀lɔ̀, rzìi wɔ̀ɔ̀lɔ̀ wò ɛndɛ e ya eni.

³³Wùùnyà wò ma kòmbɛnɛ lì yahwa, Pàwolò rzìi a hwa rzòrzòmeya wɔ hwa arzɛ nanù ema hwa le mòlelì. A ma òhwa nanù ema, “O nàŋgɛ nanù inyɔ e ma lìya ò tenì ya lìyòme la mèenyà na meni ema e rzi lelì tɔ mòlelì.

³⁴Nà e rzòrzòmeya nàŋgɛ rzɔ, nanù ema e lee mòlelì. È mòtò wa hwènàmà a hwɛni lì laa ò lì kàrzòwà. Tɔ̀ rzòwe tɔ̀ hvɔ̀kɔ ò mahvumbu ma anyu e rza tanɛyi lì wɔ̀ɔ.”

³⁵Nà òma Pàwolò à mà kulɛ lì òhwa nanù, rzi a wòwa èhvòòtò, a ŋgbàà Lohwɛ̀ jeka ò wòrzò wò wɔ̀ hwa arzɛ, à mà e kanda, rzi a wòteyà lì laa.

³⁶Wɔ hwà mà ètìrzɛ̀hwɛ mèèmà nyayi ema tɔ ima mɔ̀ wa awu mɔhvɛ à mà laa mòlelì.

³⁷I ma hwɛ hwègbe hwehwakɛ mèni lìrzamba na mòtòhwa me hwatò ò tenì ya mene melì me ŋmànja.

³⁸Nà òma hwaŋga hwatò hwa melì me ŋmànja hwà mà kulɛ lì laa ò hweyàrzèlì hwe awu, hwà mà undirzɛ mùùnà ema mò ma hwɛ mbàrzi ò tenì ya ŋmànja, hwà mà gbeyà ndi nanù ò lì arza nanù ema mòrzimbɔ̀ mò melì me ŋmànja mò wàmeyà.

³⁹Nà òma wùnyà wò ma yahwe, hwatò ema hwà mà hwɛ lì lukà mèelì me ŋmànja hwa rzi embe e rzàawà ema hwà mà hwɛ. Ndi hwà mà ɛnɛ e rzàawa ema mèelì me ŋmànja me ma tanɛ lì rzilɛ̀wɛ̀ aŋga. Wɔ̀ hwà mà kaka nanù ema e hwèlì tɛ nanù ema meŋge melì me ŋmànja me tànɛyi tɛ lì uka aŋga wɔ̀ hwa me hwɛmɛ ò lì àyɛ̀rzɛ̀ ò eŋge rzàawà.

⁴⁰O eŋgànɛ̀lɛ̀ wɔ hwà mà kɛ meyɔlì ema me ma kakahwa miiyò rzi meŋge miiyò me inda ò tenì ya ŋmànja, wɔ̀ hwà mà indirzɛ hvɛ hwewambò hwendɛnɛ ema hwà mà gbeyàne ò lì ɛ̀ndɛ̀nɛ̀ melì me ŋmànja. Rzìi hwa lìhvòhwa èhvàrzù ya e hvala ò lì arza nanù ema e mbɛ̀hvɛ̀nì e tindɛlɛ melì me ŋmànja ò wòrzò. Aŋga ndi i ma wòteyà lì ɛndɛ ò rzàawà.

⁴¹Ndi na òma i ma hwɛ lì ɛndɛ nanù, ɔndi mèelì me ŋmànja me a àyɛ̀rzɛ̀ lìtuta la nyàŋga ò tenì ya màlìhwa. Nà òma èhvàrzù ya wòrzò ya melì me ŋmànja e ma kakùmɛ̀nɛ̀ melì me ŋmànja me rzi tànɛ lì ɛndɛ hvɛ. Aŋga ndi ehvàrzu ya mburza e ma wòteyà lì kɛrzeya ehwànja màlìhwà ma mà jànà mùumbàni rzìi ma àyɛ̀rzɛ̀ aŋga.

⁴²Irzònja rzìi i kaka wùndɛ̀ ò lì òŋwa hwatò hwa arzɛ hwa hwèwòwà ema hwà mà hwɛ ò tenì ya meŋge melì me ŋmànja, aŋga nanù wɔ hwa rza ò tanɛ lì nyɔ̀keyà ò lì uka ò rzàawà rzi hwa hwaŋga.

⁴³Ndi òŋgò mòkànèlì wa rzònja, à mà arza ò lì kàrzòlɛ Pàwolò, ò eŋgànɛ̀lɛ̀ à mà aya irzònja ema hwa rzi gbeyà nanù. Mɔ̀ à mà kànèyà nanù ema hwaŋga hwatò ema hwa tànɛyi lì nyɔ̀keyà hwa hvànje ò malìhwa hvɔ̀ni hwa nyɔ̀keyà ò lì uka ò rzàawà.

⁴⁴Rzìi à òhweyà hvɛ hwànɛ̀yi hwatò ema hwa lɛmbɛ hwèrzùŋgù hwe hwèhwàmbò tɔ̀ hwehvɛhvɛ hwèmà ema hwe ma kɛrzeya ò melì me ŋmànja ò lì hwa òŋgàma o mburza. Ndèŋgànɛlɛ nanù ndi irzɔ hwa arzɛ i ma gbèyi ò lì uka ò rzàawà ema tɔ̀ eyà e rzi jò gbèyɛ̀nɛ.