Read Mokpwe Hwègbèèlì 3 Bible Online

Hwègbèèlì 3 - Mokpwe bible

Hwègbèèlì 3

¹Wùnyà wɔ̀kɔ̀ Pètrò nà Yòwanìrzɛ̀ hwà mà hwɛ lì ɛ̀ndɛ ò Ndawò yà Lohwà ò e hvònda ya màkanɛ̀. Èŋge hvònda e ma hwɛ ndi ŋgɛ̀ŋgì iyàwò ja ŋmerze.

²Nàŋgɛ rzɔ munyanà mɔ̀kɔ à mà hwɛ ò hwèkpèèlì hwe lìyòhva la kɔ̀tɔ hwe e ndawò yà Lohwà. Liŋgi lìyòhva la kɔ̀tɔ lì ma hwɛ̀lɛ̀hwɛ̀ ndi nanù ema, Liyòhva la Mòlòŋgà. Oŋgò mòtò à mà ŋyahwa ndi mbòkò. Hwà mà hwɛ lì mò hwanɛ wùnyà tɛ, rzìi hwa mò ika ò lìŋgi lìyòhva la kɔ̀tɔ̀ ò lì ɔmbɔ wòlì ò hwatò ema hwà mà hwɛ lì kpèeyà ò ndawò yà Lohwà.

³Nà òma à mà ɛnɛ Pètrò nà Yòwanìrzɛ̀ hwà mà arze lì kpèeyà rzi a hwa ɔmbɔ jàhwèyà.

⁴Pètrò nà Yòwanìrzɛ̀ hwa mò rzɛ mìirzɔ̀, Pètrò rzìi a mò òhweyà nanù ema, “O jò ɔ̀ŋgɔ!”

⁵Oŋgò mòtò rzìi a hwa rzòkɛ mìirzɔ̀ a ɔ̀ŋgɛ̀lɛ̀ nanù ema a ò wa lùwàna jùùmɛ̀.

⁶Ndi Pètrò à mà mò òhweyà nanù ema, “Nà rza òhvi tɔ̀ kahvà ò lì ò ŋgba. Ndi na ò ŋgbà mamɛ ema imba na òhvi. O lìna la ama Yerzù Krirztò mòtò wa Nàrzàrɛ̀tì tɛ̀mɛ̀nɛ ò ŋmanyu ò ɛ̀ndɛ!”

⁷Pètrò rzìi a mò lɛmbɛ ò lìiya la eni la mòme a mò òŋgòwànà ò lì tɛ̀mɛ̀. O ŋgelì hvɔ̀kɔ mɛnɛ, òŋgò mòtò meende na hwèkɛ̀ŋgɛ̀ hwe eni hwe màtàŋgà hwe ma wɔ̀wɔ̀ rzìi hwe enyòhwɛ̀nɛ̀.

⁸Oŋgò mòtò rzìi a tɛ̀mɛ̀nɛ ò ŋmanyu, a hvanja rzìi a wòteya lì kɔ̀kɔ̀ mèendè ma eni aŋga. Rzìi mɔ̀ à kpèeyà ò Ndawò yà Lohwà na Petrò na Yòwanìrzɛ̀, a à hvanja a eka Lohwɛ̀.

⁹Hwàtò hwa arzɛ ema hwà mà hwɛ aŋga hwà mà mò ɛnɛ na òma a ɛ̀ndɛ na lì eka Lohwɛ̀.

¹⁰Hwà mà mò emba ema mɔ̀ ndi à mà hwɛ lì lìya ò lì ɔmbɔ hwèèmà ò hwèkpèèlì ema hwe hwɛ̀lɛ̀hwɛ̀ mòlòŋgà hwe e kɔ̀tɔ̀ ya e Ndawò ya Lohwà. Wɔ̀ hwà mà ònda na hwètàmìrzèlì na lì jèja lì hvòmɛ̀nɛ̀ eyà ya gbamù ema e ma mò gbèyɛnɛ.

¹¹Nà òma òŋgò mòtò à mà alɛ̀mbɛ̀nɛ Pètrò nà Yòwanìrzɛ̀, hwatò hwa arzɛ hwà mà tàmà rzìi hwa wòteyà lì hwaŋga ò lì ɛndɛ lì hwa ùŋmànɛ̀lɛ̀ ò e hvàlandà ema e hwɛ̀lɛ̀hwɛ̀ e hvàlandà ya ama Rzòlòmɔ̀nì. O eŋge hvònda e mòtò ema Petrò na Yòwanìrzɛ̀ hwà mà wɔ̀wìrzɛ̀ à mà hwɛ lì hwa òŋgama nanù mɛnɛ.

¹²Nà òmà Pètrò à mà ɛnɛ hwanu hwatò, rzìi a hwa òhweyà nanù ema, “Ìi wònyà Irzàyɛ̀lì mamɛ ndèŋgàtɛ ene eyà ye tàmìrzɛ̀ nanù e? Mamɛ ndèŋgàtɛ e jò ɔ̀ŋgɔ nanù e? È ɔ̀ŋgɛ̀lɛ̀ ndi nanù ema ò e ŋginyà ya arzu tɔ̀ èhwanja i rzaŋgi ò wòrzò wò ama Lohwɛ̀, ɔ̀ndeŋgàtɛ̀ i wɔ̀wìrzɛ̀ ònò mòtò ema a ɛndɛ e?”

¹³Lòohwà là ama, Abràhamù, Irzàkì nà Jèkɔ̀bù, Lòohwà là ama hwà tàatɛ̀, lɔ̀ ndi lì ŋgbèlì è mògbèèlì hwa eni Yerzù èluhwe. Inyɔ è mà mò akɛ̀lɛ̀lɛ̀ ò màà mà hwàkànèlì nanù ema à òŋwahwe, rzìi è mò rzɔ̀rzɔ̀ ò wòrzò wò ama Pìlatò. Tɔ̀ nɛ Pìlatò mɔ̀ à mà ɔ̀ŋgɛ̀lɛ̀ nanù ema à rzòlòwàhwè inyɔ è mà tìmba lì mò rzɔ̀rzɔ̀.

¹⁴È mà rzɔ̀rzɔ̀ è mɔ̀ wà Wòtani nà Èhve-ehve, rzìi inyɔ è timba ndi lì rzòrzòmeyà Pìlatò nanù ema à è rzòlòhweyà ndi è mòtò ema à òŋwa hwatò.

¹⁵O eŋgànɛ̀lɛ̀ rzɔ inyɔ e ma gbeyà e mòtò ema a jànà hwatò lòŋgɛ la jɔ̀kɛ̀ à mà òŋwahwa ndi Lohwɛ̀ à mà mò hvùmùlɛ̀ ò kpelì. Irzɔ hwiti i ma ɛnɛnɛ hweŋge hweyà na mìirzɔ̀ ma arzu.

¹⁶Onò mòtò ema e ɛnɛ nanù ema e hwi gbamù. È ŋginyà ema lìinà la ama Yerzù lì hwɛni na lì lòkɛ̀ ema mɔ̀ à hwɛni, na lì lòkɛ̀ hvɛ ema mɔ̀ à hwɛni na lìŋgi lìna lɔ ndi lì ŋgbelì ònò mòtò ema à mà hwɛ mbòkò e ŋginyà na lì mò wɔ̀wìrzɛ̀. Ndeŋgana inyɔ hwiti e ma ɛnɛ.

¹⁷“Ìi wònyàmòwe kòkò hwa Irzàyɛ̀lì, na hwi nanù ema tɔ̀ ima lìtumba la eyà ema inyɔ na hwàtìmbèlì hwa anyu e ma gbeyàne Yerzù, e ma e gbeyà ndi ehwànja e rzi hwiye mamɛ e ma hwɛ lì gbèeyà.

¹⁸Tɔ̀ nɛ e ma gbèyɛnɛ nanù, Lohwɛ̀ ŋmìti ndi à mà òndìrzɛ̀ e mbɔrzi ya eni na òma à mà òhweyà hwà-òhwèlì hwa eni hwa arzɛ hwa hwèlìŋgɛ̀ ema hwa òhwe nanù ema è Mɔ̀ ema à Ɔ̀kirzɛ̀hwɛ̀yi a ò taka.

¹⁹È àyèŋgòwɛ̀ rzɔ nàŋgɛ̀, ò wòhwe wò anyu e tìmbèyà Lohwɛ̀, aŋga nanù à è làkirzɛ̀ wòhwe wò anyu.

²⁰È gbèyi tɛ nanù, e hvònda e ò jà ema Rzàŋgò à ye lɔ̀kɛ̀ mèèmà me anyu. O eŋge hvònda ndi mɔ̀ à e òmeya è Mɔ̀ ema à Ɔ̀kirzɛ̀hwɛ̀yi ema a hwɛ̀lɛ̀hwɛ̀ Yerzù ema a e hvɔ̀rzèlì.

²¹Yerzù a lòma lì lìya hvɔni ò ŋmanyu yà lohwà natɛ̀ɛ e hvònda e ɔlɛ ema Lohwɛ̀ a tikòwa hweyà hwe arzɛ rzi hwe timba hwe hvènya. Nànù ndi Lohwɛ̀ à mà gbeye natɛ̀ɛ na e kòhwa nanù ema hwà-òhwèlì hwa hwèlìŋgɛ̀ hwa Wòtani hwa òhweyà hwatò.

²²Mòrzè à mà òhwa nanù ema, ‘Rzàŋgò Lohwɛ̀ là anyu à è òmèya mòòhwèlì wà èlìŋgɛ̀, ema à ò uwɛ̀lɛ̀lɛ̀yi ndi ò ìtììtènì jà anyu, nyayi hvɔ̀kɔ nà òma à nò òmi. Inyɔ è gbèyè tɔ̀ mamɛ ema à è òhwèlì nanù ema è gbeye.

²³Tɔ̀ njɛ̀nɛ ema a rza hweyàna òŋgò mòòhwèlì wà èlìŋgɛ̀, Lohwɛ̀ a mò ulɛ ò ìtììtènì ja hwatò hwa Lohwɛ̀ ndèŋgànɛ̀lɛ̀ a hvaŋgahwa.’

²⁴Hwanɛyi hwà-òhwèlì hwa hwèlìŋgɛ hvɛ lì wòteyà Rzamùwɛlì na hwaŋga hvɛ ema hwà mà jà ò mburza ya eni wɔ̀ hwa arzɛ hwà mà òhva ŋmɛ̀ndì, ndèŋgànɛ̀lɛ̀ hwà mà òhwa hweyà ema hwe ò gbèyɛ̀nɛ ò mene mèenyà.

²⁵Eyà ema Lohwɛ̀ à mà òhwe lì akeyà na hwà-òhwèlì hwa hwèlìŋgɛ̀, e ma hwɛ ndi lì e hvòmɛ̀nɛ̀, inyɔ hvɛ e hwɛni lìkayi ò yòòmbò ema Lohwɛ̀ à mà aàtɛ na imbamba ja anyu ja kòhwa. Lohwɛ̀ à mà òhweyà Abràhamù nanù ema, ‘Nà ò nàmìrzɛ̀ hwatò hwa arzɛ ò rze ya mɔ̀nyɛ̀ lì akeyà na e nyɔ̀ŋgɔ̀ni ya aŋgɔ.’

²⁶Nànù rzɔ ndi Lohwɛ̀ à mà hvɔ̀rzè e Mògbèèlì wa eni rzìi a lòma lì e òmeya e mɔ̀ ò lì e nàmìrzɛ̀, ò lì eŋgòwa inyɔ hwa arzɛ ò lì anjiya ò hwègbèèlì hwe anyu hwe wòhwe.”