Read Mokpwe Hwègbèèlì 4 Bible Online

Hwègbèèlì 4 - Mokpwe bible

Hwègbèèlì 4

¹Pètrò nà Yòwanìrzɛ̀ hwà mà hwɛ lì òhwirzɛnɛ hwatò. Nà òma hwà mà hwɛ lì gbeyà nanù, lòŋgò la ipilìrzi na e mòkànèlì wa ipòlìrzi hwa e ndawò yà Lohwà, na lòŋgò la Rzàdòrzi hwà mà hwa jèeya.

²Hwà mà tata rzayi-rzayi èhwanja Pètrò nà Yòwanìrzɛ̀ hwà mà hwɛ lì òkòlɛ̀ hwatò nanù ema, Yerzù à mà hvùmùwà. Ène ŋgàna e òhwa ndi nanù ema e wɔ̀ hwa ŋwelì hwa ò hwɛ ò lòŋgɛ̀ hvɛ.

³Aŋga ndi hwa a ŋgbaŋgɛ Petrò na Yòwanìrzɛ̀ rzìi hwa hwà umbana ò hwèwòwà. Nà òma wùùnya wò ma hwɛ wò ma kɔ̀ɔ, hwà mà hwɛ̀ɛ aŋga natɛ̀ɛ na ò enɛyi eka ya elele.

⁴Ndi tɔ̀ nɛ hwà mà ŋgbaŋgɛ Petrò na Yòwanìrzɛ̀, rzayì-rzayì ja hwatò ema hwà mà hweya ŋmɛ̀ndì mò awu hwà mà lòkɛ̀. Mɔ̀rzɔ̀ŋgi mò hwàlòkèlì mò ma uka hwekòlì hweta hwe hwatò.

⁵Ènɛyi eka ya elele, hwàkànèlì hwa wònyà Yudà, hwàmbaki hwa mbòwa na hwà-òkòlèlì hwa mbenda hwà mà arzàŋgànɛ ò mbòwa ya Jèrurzalɛ̀mù.

⁶Anàrzì ema mɔ̀ ndi à mà hwɛ e Pìlìrzì è Kàrzamì mɔ̀ hvɛ à mà hwɛ aŋga. Nànù mɛnɛ na Kàyìhvàrzì, Yòwanìrzɛ̀ Àlɛ̀rzanda na hwahvɛhvɛ ema wɔ̀ hvɛ hwa hwèlì ò lìtumba la ama e Pìlìrzì e Kàrzami.

⁷Hwà mà tɛmirzɛ Pètrò nà Yòwanìrzɛ̀ ò wòrzò wa awu, rzìi hwaa hwà ijòwa nanù ema, “Ima ŋginyà na ima lìna ema inyɔ e ma gbeyàne ò lì wɔ̀wìrzɛ̀ ònò mòtò ema à mà hwɛ mbòkò e?”

⁸Pètrò rzɔ, ema ama ònda na Èlìŋgɛ̀ yà Wòtani à mà hwa alàhwɛ̀ nanù ema, “Hwàkànèlì na hwàmbaki hwa arzu hwa e mbòwa,

⁹Irzɔ i kàyìrzɛ̀hwɛ tɛ yàwònò èhwànja ò gbamù ema i gbèelì ònò mòtò ema à mà ɔ̀kirzɛ̀ e nyàmbɛ ya mbòkò ndèŋgànɛ̀lɛ̀ nɛ mɔ̀ à mà wɔ̀wìrzɛ̀hwɛ,

¹⁰inyɔ hwatò hwa arzɛ hwa Irzàyɛ̀lì e hwiye rzɔ ndi nanù ema, ònò mòtò ema a e tɛmelì ò wòrzò à mà wɔ̀wìrzɛ̀hwɛ ndi na e ŋginyà ema e hwèlì ò lìna la ama Yerzù Krirztò, mòtò wa Nàrzàrɛ̀tì. È ma wòmeyà ò mbarza, ndi Lohwɛ̀ à mà mò hvùmùlɛ ò kpelì.

¹¹Yerzù ndi à hwèlì e mɔ̀ ema e kààtì ya Lohwà e òhwani nanù ema, ‘Lìnyayi ema hwà-òŋgèlì hwà mà tinde lɔ ndi lì timbi lìŋyayi ema lì endahwɛlɛ.’

¹²“Lì òŋgirzɛhwɛ lì rza uwɛ̀lɛ̀lɛ̀yi na ohvɛhvɛ mòtò lì aka tɛ Yerzù, èhwanja ò rza enje tɔ̀ lì hvɛhvɛ lìnà ò tenì ya ene rze ema Lohwɛ̀ à mà ŋgbe hwatò hwa hwènàmà ema lì àŋgàmɛ̀nɛyi lì jò rzùŋgà.”

¹³Hwèlìyèlì hwe hwàkàyirzèlì hwe ma tàmà ò lì ɛnɛ nanù ema Pètrò nà Yòwanìrzɛ̀ hwà mà hwɛ lì òhwa e rzi hwɛ lì òka wɔ̀ŋgɔ̀. Èhwanja hwà mà ayembɛ nanù ema, hwa rzi rzɔŋgɔ̀ hwèyòkòwèlì ndèŋgànà hwà mà hwɛ hvɛ ndi hwatò hwa ŋgundu. Aŋga ndi hwa a ayèmbɛ nanù ema hwanu hwatò hwà mà hwɛ ndi na Yerzù ò ihvònda ja arzɛ.

¹⁴Mòŋgò ŋmèmba mò hwàkàyìrzèlì mò rzi tanɛ lì òhwa hvɛ tɔ̀ eyà hvɛ èhwanja òŋgò mòtò ema Petrò na Yòwanìrzɛ̀ hwà mà wɔ̀wìrzɛ̀ à mà tɛ̀mɛ̀ aŋga na wɔ̀.

¹⁵O èŋgànɛ̀lɛ̀ hwà mà òhweyà Pètrò nà Yòwanìrzɛ̀ ò lì anjiya ò ilùkù ja hwàkàyirzèlì, rzìi hwaŋga hwàkàyirzèlì hwa wòteyà lì chakùmɛ̀lɛ̀ eŋge mbɔrzi wɔ̀ na wɔ̀.

¹⁶Hwà mà àyijòwànɛ̀ wɔ̀ na wɔ̀ nanù ema, “Mamɛ i tànɛyi lì gbeyàna hwanù hwatò e? Hwatò hwa arzɛ ò Jèrurzalɛ̀mù hwa hwi nanù ema wɔ̀ ndi hwa hwèlì e wɔ̀ ema hwa gbèyi ene eyà ndɛnɛ ya mànyakà. Irzɔ i rza tànɛyi lì unà tɔ̀ hvenda nanù ema hwa rza e gbèyi.

¹⁷O lì arza nanù ema mònò ŋmɛ̀ndì mò rzi nyàla ò ekì ya arzɛ, inyɛ i hwa kòkòhwɛ̀lɛ̀ kɔ̀yi-kɔ̀yi nanù ema, hwa rzi keka lì òhweyà tɔ̀ mòtò eyà lì hvòmɛ̀nɛ̀ Yerzù.”

¹⁸Aŋga ndi hwa a hwa hwɛlìrzɛ hvɛ rzìi hwa hwà kòkòwɛ̀lɛ̀ kɔ̀yi-kɔ̀yi nanù ema, hwa rzi keka tɔ̀ e hwɛ ndi mamɛ lì òhwa tɔ̀ lì òkòlɛ̀ eyà hvɛ ò lìna la ama Yerzù.

¹⁹Pètrò nà Yòwanìrzɛ̀ hwà mà hwa a alàhwɛ̀ nanù ema, “Inyɔ hwiti e òhwe mamɛ e hvòmɛ̀nɛ̀ ò wòrzò wò ama Lohwɛ̀, ò lì e hwèyàna ŋga lì hwèyàna Lohwɛ̀ e?

²⁰Irzɔ i rza tànɛyi lì hwɛmɛ ò lì òhwa lì hvòmɛ̀nɛ̀ mamɛ irzɔ hwiti je ɛni na mìirzɔ̀ ma arzu na lì hwèyàna hvɛ màatò ma arzu.”

²¹Hwelìyelì hwe hwàkàyìrzèlì hwe ma timba lì hwa kòkòwɛ̀lɛ̀ na ŋginyà rzi hwa hwà hwɛmɛ ema hwa ɛndɛ. Hwa rzi tànɛyi lì hwa kɔ̀kìrzɛ̀ èhwanja hwatò hwa arzɛ hwà mà hwɛ lì eka Lohwɛ̀ lì hvòmɛ̀nɛ̀ mamɛ ema e ma gbèyɛ̀nɛ.

²²Oŋgò mòtò ema mànyakà mà hweyà ma mà wɔ̀wìrzɛ̀ à mà aka mènìmenì me meya.

²³Nà òma hwatò hwa kòtì hwà mà hwɛmɛ Pètrò nà Yòwanìrzɛ̀, lìwòkimɛnɛ Pètrò nà Yòwanìrzɛ̀ hwà mà tìmba lì ùŋmànɛ̀lɛ̀ mòndeŋge mò awu mò hwatò hwa Lohwà rzìi hwa hwà òhweyà mamɛ ipilìrzi ndɛnɛ na hwèwàŋgì hwe kòtì hwà mà hwa òhweyà.

²⁴Nà òma hwàlòkèlì hwa mà hwèye nanù rzi hwa gbeyàna lìlò lɔ̀kɔ̀ ò lì kànɛ. Rzìi hwa òhweyà Lohwɛ̀ nanù ema, “Ìi Tatɛ̀ ò wà ema ò hwèki è ŋmanyu yà lohwà, è rze yà mɔ̀nyɛ̀ nà ŋmàànjà nà hwèèmà hwe arzɛ ema hwe hwèlì ò tènì yà awu,

²⁵ò mà òma Èlìŋgɛ̀ yà Wòtani ò è mbamba yà arzu Dàhwitì, è mògbèèlì wà aŋgɔ̀ nanù ema Èlìŋgɛ̀ yà Wòtani è mò gbeye à òhwe hwene hweyà nanù ema, ‘Mamɛ ndèŋgàtɛ hwatò ema hwa rza enje wònyà Yudà hwe tàtìrzɛ̀ rzayi-rzayi e? Mamɛ ndeŋgatɛ hwatò hwa tɛ̀yirzɛ̀ hwètɛ̀yirzèlèlì hwe ŋgundu e?

²⁶Ì Kìŋgɛ jà anu rze ì wòŋgirzɛnɛ, ndèŋgànɛ̀lɛ̀ hwàkànèlì hwa arzɛ wɔ̀ hvɛ hwa hwà arzaŋganɛ ò hwèlìyelì ò lì teŋgɛ̀nɛ̀ Rzàŋgò Lohwɛ̀ nà ò lì teŋgɛ̀nɛ̀ è Mɔ̀ ema à Ɔ̀kirzɛ̀hwɛ̀yi.’

²⁷È ma gbèyɛ̀nɛ nanù. Hɛ̀rɔ̀dì na Pòntìyùrzì Pìlatò hwà mà taneya ò ene mbòwà nàa hwatò ema hwa rza enje wònyà Yudà na hwàtimbelì hwa wònyà Irzàyɛ̀lì. Wɔ̀ hwà mà gbeyà ndi nanù, ò lì gbeyà hwètɛ̀yìrzèlèlì lì teŋgɛ̀nɛ̀ Yerzù, e mògbèèlì wa aŋgɔ̀ ema a hwèlì Wòtani, ndèŋgànà mɔ̀ ema ò wa ò ma Ɔ̀kirzɛ̀yi.

²⁸Hwà mà òhva wòlìya ò lì gbeyà hweyà ema ò ma hwɛ ò ma tɛ̀yirzɛ na e ŋginyà ya aŋgɔ̀ ò e hvònda ema e ma aka.

²⁹Ìi Rzàŋgò, naŋgɛ ò wà witi ò hwɛni lì hwiya nanù ema, ò wòwe wòhwiya lì hvòmɛ̀nɛ̀ lì kimeya la awu, ndèŋgànà ò jò gbeye irzɔ hwàgbèèlì hwa aŋgɔ̀ ò lì òhwa ŋmɛ̀ndì mò aŋgɔ̀ e rzi hwɛ lì òka wɔ̀ŋgɔ̀.

³⁰O uŋmɛ̀lɛ̀ e ŋginyà ya aŋgɔ̀ ò lì wɔ̀wìrzɛ̀ hwatò. Ndeŋgana ò jò gbeye irzɔ ò lì tanɛ lì gbeyà hwembànèlì na hweyà hwe mànyakà lì akeyà na lìinà la ama Yerzù, e mògbèèlì wa aŋgɔ̀ wa Wòtani.”

³¹Nà òma hwà mà kulɛ ò lì kanɛ̀, èki ema hwà mà taneya e ma nyiŋgà. Wɔ̀ hwa arzɛ hwà mà òndìrzɛ̀hwɛ na Èlìŋgɛ̀ yà Wòtani rzìi hwa wòteyà lì òhwa eyà ya Lohwà e rzi hwɛ lì òka wɔ̀ŋgɔ̀.

³²Hwàlòkèlì hwa arzɛ hwà mà òhva ŋmèma nà màlùtèyà mɔ̀kɔ. Tɔ̀ mɔ̀kɔ wa awu a rza òhwe nanù ema lìrzaŋgò la ami lì hwèlì ndi e la ami, ndi wɔ̀ hwà mà akahwanɛ mamɛ ema hwà mà òhve.

³³Nà ŋginyà ndɛnɛ i àpɔ̀rzìtòlò i ma hwɛ lì òhwa nanù ema hwa hwèlì ndi i mbòŋgi nanù ema Lohwɛ̀ à mà hvùmùlɛ̀ Rzàŋgò Yerzù. Lohwɛ̀ à mà hwa ŋgba wɔ̀ hwa arzɛ mònàmɛ̀ mò ndɛnɛ.

³⁴Tɔ̀ mɔ̀kɔ wà awu à rzi tàkeyà tɔ̀ yòma ò ìtììtènì jà awu. Ò hvònda nà hvònda tɛ, hwaŋga ema hwa mà òhva hwètò tɔ̀ màwòŋgì hwà ma mà àhwirzɛ̀, rzìi hwa jànà wòŋgò wòlì ema hwa mà àhwirzɛ̀ eŋge erzaŋgò,

³⁵rzìi hwa wò tɛtirzɛ i àpɔ̀rzìtòlò. Wòŋgò wòlì hwà mà wò kahweyà tɔ̀ ima mòtò ema à mà endeya.

³⁶Nànù ndi Jòrzɛ̀hvù mòtò wa lìtumba la ama Lɛ̀hvì, ema à mà uwɛ̀lɛ̀lɛ̀yi ò èkòmè ya Rzàyìprɔ̀rzì à mà gbeye. I àpɔ̀rzìtòlò i ma mò hwɛlɛ ndi Bànàbàrzì (jànda ja lìni lìna lì hwèlì ndi “Mòtò ema, a Kɔ̀mɛlɛ”).

³⁷A ma àhwirzɛ̀ etò ya eni rzìi a jànà wòlì wò arzɛ a wò ŋgba I àpɔ̀rzìtòlò.