Read Mokpwe Hwègbèèlì 5 Bible Online

Hwègbèèlì 5 - Mokpwe bible

Hwègbèèlì 5

¹O mà hwɛ mùnyanà mɔ̀kɔ à ma hwɛ̀lɛ̀hwɛ̀ Ànàniyarzì, e jòjìyɛ̀ ya eni ema hwɛ̀lɛ̀hwɛ̀ ndi Rzàhvilàrzì. Wɔ̀ hvɛ hwà mà àhwirzɛ̀ lòŋgò la erzàŋgò ya awu.

²Ndi mɔ̀ à mà uta lòŋgò la wòŋgò wòlì ndèŋgànà e jòjìyɛ̀ wa eni mɔ̀ à mà hwiya lì hvòmɛ̀nɛ̀ wòŋgò wòlì ema à mà ute, rzìi Ànàniyarzì a ŋgba I àpɔ̀rzìtòlò wɔ̀nɛyi wòlì.

³Aŋga ndi Pètrò à mà mò ijòwa nanù ema, “Ìi Ànàniyarzì mamɛ ndèŋgàtɛ ò imanɛlɛ nanù ema mòkarzɛ̀ a ò kànèyà. Nàŋgɛ rzɔ mòkarzɛ̀ à mà ò gbeyà ò ma kɔ̀yeyà Èlìŋgɛ̀ yà Wòtani eyà na òma ò wa ò ma utɛ lòŋgò la wòŋgò wòlì ema ò ma àhwirzɛ̀ eŋge etò.

⁴Ndeŋgana ò e àhwirzɛ̀ èŋge erzàŋgò rzeke e mà hwɛ ndi e ya aŋgɔ e? O mburzà hvònda ema ò ma àhwirzɛ̀ eŋge etò, wòŋgò wòlì wò rzi hwɛ ndi ò wa aŋgɔ e? Mamɛ rzɔ e ma gbeyà ema ò lùtèyà ene nyayi eyà e? Rzeketɛ mòtò wa hwènàmà mɛnɛ ndi ò kɔ̀yelì hweyà ò kɔ̀yelì ndi Lohwɛ̀ hweyà!”

⁵Liwòkimɛnɛ na òma Ànàniyarzì ama hweye ene eyà ama kpàa, rzi a ŋwa. Hwàtò hwa arzɛ ema hwà mà hwèya nanù hwà mà lɛmbeya mòkambiya.

⁶Meleka me hwàna me ma kpèeyà ò tenì ya ndawò rzi hwa lìŋgɛ̀lɛ̀ ŋmìimbà mò eni hwa mò wurzana ò èwòka hwa ɛ̀ndɛ lì mò imeya.

⁷O mburza ya awa iyàwò rzìi jòjìyɛ̀ wa eni hvɛ a kpèeyà ò eŋge èki ema Pètrò à mà hwɛ, e rzi hwɛ mɔ̀ lì hwiya mamɛ ema e ma gbèyɛ̀nɛ na mòjòmɛ̀ mò eni.

⁸Pètrò rzìi a mò ijòwa nanù ema, “O nò òhweyà tɛ, wòlì wò arzɛ wò arzɛ wònò ema ò wa na mòjòmɛ̀ wà aŋgɔ̀ ema mà àhwirzɛ̀ erzàŋgò ya anyu e?” Rzàhvilàrzì rzìi a mò alàhwɛ̀ nanù ema, “Ɛ̀ɛ, wòlì wòŋgò.”

⁹Aŋga ndi Pètrò a à mò ijòwa nanù ema, “Mamɛ ndèŋgàtɛ ò wa na mòjòmɛ̀ wà aŋgɔ̀ e kèkirzɛ Èlìŋgɛ̀ ya ama Rzàŋgò e? Onò òkànèyà tɛ, meŋge meleka ema me imelì mòjòmɛ̀ wà aŋgɔ̀ meeŋge me hwèlì nàŋgɛ ò lìyòhva meyɔhvɛ̀ ndi me ò hwanɛ̀ ŋmìimbà mò aŋgɔ̀ ò ewòka.”

¹⁰Liwòkimɛnɛ òŋgò mòlanà a kpa ò wòrzò wò ama Petrò rzi a ŋwa. Mèŋge meleka me kpeya hwà mà ɛnɛ nanù ema à mà ŋwa, rzi hwa wurzana ŋmìimbà mò eni ò èwòka rzìi hwa ɛ̀ndɛ hwa mò imeya ò tòŋgòŋgò ya ama mòjòmɛ̀ mò eni.

¹¹Mìitelì me arzɛ na hwanɛ̀yi hwa arzɛ ema hwà mà hwèya hwenè hweyà hwà mà lɛ̀mbeya mòkambiya.

¹²I àpɔ̀rzìtòlò i ma gbeyà hweyà hwe mànyakà na hwembànèlì hwe rzayì-rzayì ò tenì ya hwatò. Hwàlòkèlì hwa arzɛ hwà mà hwɛ ndi lì taneya nàa mòtò mɔ̀kɔ ò ihvònda ja arzɛ ò marzɛrzɛ ma ama Rzòlòmɔ̀nì ò e ndawò yà Lohwà.

¹³Tɔ̀ nɛ hwatò hwà mà hwa hwɛlɛ miinà mà gbamù, hwaŋga hwà mà òka wɔ̀ŋgɔ̀ ò lì hwa lata nanù mɛnɛ.

¹⁴Ndi tɔ̀ nanù rzayì-rzayì ja wunyanà na hwalana ema hwà mà lòkɛ̀ e Rzàŋgò Yerzù, hwà mà hwɛ lì kpèeyà ò ehvehva ya awu ndèŋgànɛ̀lɛ̀ mɔ̀rzɔ̀ŋgi mò hwatò ema mò ma lòkɛ̀ mò ma hwɛ lì ahwàtɛ.

¹⁵Nàa e mbakò ya mamɛ ema i àpɔ̀rzìtòlò i ma hwɛ lì gbeyà, hwatò hwà mà hwanɛ hwaŋga ema hwà mà ɔ̀kirzɛ̀ ò lì hwa ika ò tòŋgòŋgò jà mà njiya, rzìi hwa hwà nàŋgirzɛ ò mànɔ̀ŋgɔ̀ na ò hwèrzarzì aŋga. Hwà mà hwɛ lì gbeyà nanù na màlùtèyà nanù ema Pètrò à aka tɛ èlìŋgɛ̀ ya eni e hwa undeya ndèŋgànà hwa ò wɔ̀wìrzɛ̀hwɛ.

¹⁶Ŋgindi ya hwatò ema e ma uwɛ̀lɛ̀lɛ̀yi ò màmbowà ema mà kòmbɛ̀nɛ̀ Jèrurzalɛ̀mù, hwa jànà hwà-òkèlì hwe awu, na hwaŋga ema hwà mà tàkìrzɛ̀hwɛ na hwèlìŋgɛ̀ hwe wòhwe. I àpɔ̀rzìtòlò i ma hwa wɔ̀wìrzɛ̀ wɔ̀ hwa arzɛ.

¹⁷O eŋge hvònda, e Pìlìrzì e Kàrzàmi na hwèyòrzà hwe eni hwe arzɛ, hwatò hwa ehvehva ya Irzàdùrzì, hwà mà nòneyà i àpɔ̀rzìtòlò na ŋginyà.

¹⁸Hwà mà ŋgbaŋgɛ I àpɔ̀rzìtòlò rzìi hwa hwà ika ò hwèwòwà ema e ma hwɛ ò mbòwa.

¹⁹Ndi ò wòŋgò wuu mɛnɛ, e aŋgèlì ya ama e Rzàŋgò e ma hwa lìhvòweya mawòhvà mà e ndawò ya hwèwòwà rzi e hwa wurzirzɛ. È aŋgèlì e ma hwa òhweyà nanù ema,

²⁰“È ɛ̀ndɛ e tɛ̀mɛ̀ ò Ndawò yà Lohwà e òhweyà hwatò hweyà hwe arzɛ lì hvòmɛ̀nɛ̀ lòŋgɛ̀ la anyu lì hvènya.”

²¹Iŋgi àpɔ̀rzìtòlò i ma hweyàna rzìi ò eka ya elele hwà mà ɛ̀ndɛ rzìi hwa kpèeyà ò Ndawò yà Lohwà rzìi hwa wòteya lì òkòlɛ̀ hwatò. Nà òma e Pìlìrzì e karzami na hweyòrza hwe eni hwà mà kpèeyà hwà mà hwɛlɛ hwàmbaki hwa arzɛ hwa wònyà Yudà ò wòlìya wò hwatò hwa arzɛ hwa lìkànèyà la mbòwa. Rzìi hwa òma lìlò ò ndawò ya hwèwòwà nanù ema hwa hwà jàneyà I àpɔ̀rzìtòlò.

²²Ndi na òma iŋgi rzònja i ma ùke ò hwèwòwà, hwa rzìi ùŋmanɛlɛ iŋgi àpɔ̀rzìtòlò aŋga, ò èŋgànɛ̀lɛ̀ wɔ̀ hwà mà tìmba ò lì òhweyà wòlìya nanù ema,

²³“Nà òma irzɔ jò uki ò hwèwòwà, jò ùŋmanɛlɛ e ndawò ya hwèwòwà e umbahwi kilìkòtò. Hwà-ɔ̀ŋgèlì hwa arzɛ ema hwà mà hwɛ lì tɛ̀mɛ̀ ò mawòhvà mà arzɛ ò lì ɔŋgeya hwèwòwà, hwà mà tɛ̀mɛ̀ ò mawòhvà mà arzɛ. Ndi na òma irzɔ i lìhvò mawòhva, i rza ùŋmanɛlɛ tɔ̀ mòtò ò tenì.”

²⁴È hvònda rzɔ ema Ipìlìrzì ndɛ̀nɛ na òŋgò mòkànèlì wa pòlìrzi ema a kànèyà hwàɔŋgèlì hwa e Ndawò yà Lohwà hwà mà hweye nanù, hwà mà hwɛ lì tàmà rzi hwa a ijòwa nanù ema, “Mamɛ e hwèlì jànda ja ene eyà e?”

²⁵Mòtò mɔ̀kɔ rzìi a kpèeyà lì jà lì hwa òhweyà nanù ema, “È ò kànèyà tɛ! Hwatò ema e ma ika ò hwèwòwà wɔ̀ hwaŋga ò Ndawò yà Lohwà hwa òkòlɛ̀ hwatò.”

²⁶Rzìi òŋgò mòkànèlì hwa pòlìrzi ya e ndawò yà Lohwà à mà ɛndɛ na hwatò hwa eni, a ɛndɛ lì ŋgbaŋgɛ iŋgi àpɔ̀rzìtòlò rzìi a hwa jànà. Ndi hwa rzi gbeyàne ŋginyà ò lì hwa ŋgbaŋgɛ, èhwanja hwà mà òka wɔ̀ŋgɔ̀ nanù ema hwatò ema hwà mà hwɛ aŋga hwà mà tànɛyi lì hwa aŋgba màŋyàyi.

²⁷Hwà mà kpeyane iŋgi àpɔ̀rzìtòlò ò tenì ya wòlìya rzìi hwa hwà tɛmirzɛ ò wòrzò wò wòlìya. Aŋga ndi e Pìlìrzì ema è kàrzamì ya hwa kàyìrzɛ̀ na lì hwa òhweyà nanù ema,

²⁸“I ma e kòkòwɛ̀lɛ̀ nanù ema, e rzi keka lì òkòlɛ̀ eyà ò lìna lì ama ònò mòtò, ndi inyɔ e ma òndìrzɛ̀ e mbòwà ya Jèrurzalɛ̀mù na hwèyòkòlèlì hwe anyu. Ndeŋgànɛ̀lɛ̀ inyɔ ya arza lì òhwa nanù ema irzɔ ndi jò òŋwi ònò mòtò.”

²⁹Pètrò nà inɛyi àpɔ̀rzìtòlò rzìi hwa alàhwɛ̀ nanù ema, “I hwɛni lì hweyàna Lohwɛ̀ rzeketɛ hwatò hwa hwènàmà.

³⁰È hvònda ema inyɔ e ma kulɛ lì wòmeyà Yerzù ò mbarza, e ma mò òŋwa, Lòohwà la ama i mbamba ja arzu i ma mò hvùmùlɛ̀.

³¹Lohwɛ̀ à mà mò kàrzɛ, rzìi à mò ika ò lìya là eni là mòmɛ̀ nàa Mòtìmbèlì nà è Mòrzùŋgèlì. À mà gbeyà ndi nanù èhwanja, à uŋmɛ̀lɛ̀ hwatò hwa Irzàyɛ̀lì è njiya yà lì hwɛ̀mɛ̀ hwɛ̀ɛ̀mɛ̀ hwe awu hwe wòhwe aŋga nanù, Lohwɛ̀ à ò hwa làkìrzɛ̀ wòhwe wò awu.

³²Irzɔ ì hwèlì ndi mbòŋgi ò hwenè hweyà hwe arzɛ ema hwe mà gbèyɛ̀nɛ̀. Èlìŋgɛ̀ yà Wòtani yɔ̀ hvɛ è hwèlì ndi mbòŋgi. Ndeŋgànɛ̀lɛ̀ yɔ̀ ndi è hwèlì làhweyà ema Lohwɛ̀ à ŋgba hwatò ema hwa mò hweyàna.”

³³Nà òma hwatò hwa wòŋgò wòlìya hwa mà hweye nanù hwà mà tata natɛ̀ɛ hwà mà arza nanù ema hwa òŋwe iŋgi àpɔ̀rzìtòlò.

³⁴Ndi mɔ̀kɔ wà awu wà Hvàlìrzàyì ema à mà hwɛ̀lɛ̀hwɛ̀ Gàmàlìyɛ̀lì ema à mà hwɛ ndi Mòòkòlèlì wà è mbenda ema hwatò hwa mà ŋgbe èluhwe ndɛnɛ à mà tɛ̀mɛ̀nɛ ò ŋmanyu rzi à òhweyà wòlìya nanù ema inyɛ hwa lòme lì wurzirzɛ I àpɔ̀rzìtòlò ò èwòka.

³⁵Aŋga ndi à mà òhweyà wòlìya nanù ema, “Wònyàmòwe kòkò hwa wònyà Irzàyɛ̀lì, è aŋgòwe ò mamɛ ema è arza lì gbeyàna hwanù hwatò.

³⁶O ŋmanà hvòka hvònda ema e ma aka, Tèwùdàrzì à mà jà, rzìi a ekirzɛ ò lì hwɛ yumɛ. Eyà ya hwègbe hweni hwe hwatò hwà mà mò òŋgama. A ma òŋwahwa, hwànɔ̀ŋgèlì hwe eni hwa arzɛ hwà mà kuwa lì bùweyà, ndèŋgànɛ̀lɛ̀ ehvehva ya eni yɔ hvɛ e ma ŋwa.

³⁷O mburzà nanù, ò èŋge hvònda ema hwà mà hwɛ lì tìla mìinà, òma hwɛ mòtò à mà hwɛ̀lɛ̀hwɛ̀ Jùdàrzì mòtò ema a uwɛ̀lɛ̀lɛ̀yi ò Gàlìlì. A ma kòòhwa hwatò ò lì mò òŋgama. Mɔ̀ hvɛ à mà òŋwahwa, ò èŋgànɛ̀lɛ̀ hwànɔ̀ŋgèlì hwa eni hwa arzɛ hwà mà bùweyà.

³⁸O èŋgànɛ̀lɛ̀ rzɔ, ò naŋgɛ ò tenì ya mònò ŋmaŋgò, na e kòkòwɛ̀lɛ̀ nanù ema e hwɛmɛ hwanu hwatò. È hwa hwɛmɛ hwa ɛndɛ. È hwèlì tɛ nanù ema lìtiŋga tɔ̀ hwègbèèlì hwe awu hwe uwɛ̀lɛ̀lɛ̀yi ndi ò hwatò, hwe hwɛni lì kpa.

³⁹Ndi e hwèlì tɛ nanù ema Lohwɛ̀ mɔ̀ ndi à hwa ŋgbelì e ŋginyà, inyɔ e rza tanɛyi ò lì tɛmirzɛ hwanu hwatò. Rzìi ò lìrzùkù inyɔ e ò ayembɛ nanù ema yà ana ndi lì teŋgɛ̀nɛ̀ Lohwɛ̀.” Wòlìya wò ma emeyà mayòwà mà ama Gàmàlìyɛ̀lì.

⁴⁰Hwà mà hwɛlɛ I àpɔ̀rzìtòlò ò lì kpèeyà ò tenì ya e ndawò. Rzìi hwa hwà gbìiyɛ̀ hvònji, rzìi hwa hwà kànèyà nanù ema hwa rza arza lì hweyà nanù ema hwa gbeyànì lìinà la ama Yerzù hvɛ. Rzìi hwà hwa hwɛmɛ nanù ema hwa ɛndɛ.

⁴¹Nà òma iŋgi àpɔ̀rzìtòlò ima wurze ò wòŋgò wòlìya, hwà mà hwɛ ò mɔ̀nyɛ̀ŋgì èhwanja, Lohwɛ̀ à mà hwa wòwa nàa hwatò ema hwa kanɛ̀yi ò lì lùwa erzambò ò nyòla lìinà la ama Yerzù.

⁴²Wùnyà na wùnyà tɛ hwà mà hwɛ lì ɛndɛ ò Ndawò yà Lohwà na ò indawò ja hwatò, hwà mà hwɛ lì òkòlɛ̀ hwatò na lì hwa òhwèyà ŋmɛ̀ndì mò gbamù mò ama Yerzù, è Mɔ̀ ema à Ɔ̀kirzɛ̀hwɛ̀yi.