Read Mokpwe Ròmànì 10 Bible Online

Ròmànì 10 - Mokpwe bible

Ròmànì 10

¹Wònyamòwè kòkò, na lìŋgàni na ŋmèma mò ami mò arzɛ nanù ema, hwatò hwa ami hwa Irzàyɛ̀lì hwa rzùŋgàhwe, ndèŋgànɛ̀lɛ̀ na hwa kanɛ̀lɛ̀lɛ̀ ndi nanù ema e gbèyɛ̀nɛ̀ ndi nanù.

²Nà hwa tɛ̀mèlì mbòŋgi nanù ema wɔ̀ hwa hwɛni ekɔ̀njì ò ma Lohwɛ̀. Ndi wɔ̀ hwa rza rzɔ̀ŋgìtɛ̀nɛ̀ nɛ wɔ̀ hwa hwɛni lì hwɛnɛ èkɔ̀njì na mɔ̀.

³Hwa rza rzɔ̀ŋgìtɛ̀nɛ̀ nɛ Lohwɛ̀ a tɛ̀yìrzɛ̀ hwatò ehve-ehve na mɔ̀. Wɔ̀ hwa arza ndi e ya awu njiya aŋga nanù ò ma hwà mà tɛ̀mɛ̀ ehve-ehve ò wòrzò wò ama Lohwɛ̀. O èŋgànɛ̀lɛ̀ rzɔ hwa rzi arzìirzɛ̀ wɔ hwiti ò lì òŋgama e njiya ema Lohwɛ̀ à mà rzekeya aŋga nanù hwatò hwa hwɛ ehve-ehve.

⁴Krirztò mɔ̀ à mà gbeyà èwòlò ema e mbenda e ma àŋgàmɛ̀nɛ̀ lì gbeyà, ò èŋgànɛ̀lɛ̀ rzɔ, tɔ̀ njɛnɛ ema a mò lòkɛ̀, a hwɛ ehve-ehve ò wòrzò wò ama Lohwɛ̀.

⁵O mòlòmɛ̀ Mòrzè à mà tìla lì hvòmɛ̀nɛ̀ mòtò ò lì hwɛ ehve-ehve ò wòrzò wò ama Lohwɛ̀, ehwànja à mà òŋgama e mbenda. Mɔ̀ à mà òhwa nanù ema, “Tɔ̀ njɛnɛ ema a hweyàni hwèkànèlì hwe e mbenda a ò luwa lòŋgɛ ema lì rza kuwa.”

⁶Ndi eyà ema e kààtì ya Lohwà e òhwa lì hvòmɛ̀nɛ̀ lì ikahwa la ehve-ehve na Lohwɛ̀ lì akeyà na lìlòkɛ̀ la eni lì hwèlì ndi nanù ema, “O wa ò rza hwɛni ò lì àyijòwɛ̀ nanù ema njɛ̀nɛ a ò agbɛ ò ŋmanyu yà lohwà e?” (Èŋge ŋgàna e hwèlì ndi ò lì ulɛ Krirztò ò ŋmanyu ò lì mò rziirzɛ ò rze).

⁷Tɔ̀ “Njɛnɛ a ò rzìhwɛ ò ehvɔ̀ndi ema e rza hwɛnɛ lìrzùkù e?” (Èŋge ŋgàna e hwèlì ndi ò lì rzìima Krirztò ò èhvɔ̀ndì ema e rza hwɛnɛ lìrzùkù ò lì mò timbirzɛ ò lòŋgɛ).

⁸Mamɛ ema e kààtì ya Lohwà e òhwi, e hwèlì ndi nanù ema, “Ŋmɛ̀ndì mò ama Lohwɛ̀ mò ò kòmbɛnɛyi. O wa ò hwèlì ò mò òhwa ndèŋgànà mò hwèlì ndi ò ŋmèma mò aŋgɔ̀.” Mòŋgò ŋmɛ̀ndì mòŋgò ema irzɔ jò òhwa nanù ema e hwɛni lì hwɛnɛ lì lòkɛ̀.

⁹O wa ò purzɛlɛyi tɛ nanù ema Yerzù a hwèlì ndi Rzàŋgò, rzi ò lòkɛ̀ hvɛ nanù ema Lohwɛ̀ à mà mò hvùmùlɛ̀ ò kpelì, o ò rzùŋgàhwa.

¹⁰Èhwanja ò lì akeyà na lì lòkɛ̀ la arzu ɔ̀ndi irzɔ ji ikahwa ehve-ehve na Lohwɛ̀. I rzùŋgàhwa ndi ò lì akeyà na lì purzɛlɛ la arzu.

¹¹È kààtì ya Lohwà e òhwa nanù ema, “Tɔ̀ njɛ̀nɛ ema a mò lòkɛ̀yì a rza ò timba màa matò.”

¹²Ène e hwèlì rzɔ ò hwatò hwa arzɛ èhwanja ò rza enje hwekàhweli ema hwanu hwa hwèlì ndi wònyà Yudà, hwanu hvɛ hwa rza enje wònyà Yudà. Lohwɛ̀ a hwèlì ndi e Rzàŋgò ya hwatò hwa arzɛ, ndeŋgànɛ̀lɛ̀ hvɛ à nàmìrzɛ̀ rzayi-rzayi hwaŋga ema hwa mò hwɛlɛ.

¹³È kààtì ya Lohwà e òhwi nanù ema, “Tɔ̀ njɛ̀nɛ ema a hwɛ̀lɛ̀yi Rzàŋgò nanù ema à mò òŋgòwane, à ò rzùŋgàhwà.”

¹⁴Nɛ rzɔ wɔ̀ hwa tànɛyi lì mò hwɛlɛ nanù ema a hwa òŋgòwane, e hwèlì tɛ nanù ema wɔ̀ hwa rzi mò lòkɛ̀ e? Ndèŋgàna nɛ wɔ̀ hwa tànɛyi lì mò lòkɛ̀ e hwèlì tɛ nanù ema wɔ̀ hwa rzi òkanelì ŋmɛ̀ndì mò eni e? Ndeŋgànɛ̀lɛ̀ nɛ wɔ̀ hwa tànɛyi lì hweyà e hwèlì tɛ nanù ema tɔ̀ mòtò a rza hwa òhwèlì lì hvòmɛ̀nɛ̀ mònò ŋmɛ̀ndì e?

¹⁵Nɛ rzɔ mònò ŋmɛ̀ndì mò tànɛyi lì òhwahwa e hwèlì tɛ ema irzuhwɛlɛ i rza òmahwi e? È tìlahwì ò e kààtì ya Lohwà nanù ema, “Mòtò a jàni tɛ ŋmɛ̀ndì mò gbamù, mò jànà màlìŋgò.”

¹⁶Rzeketɛ hwatò hwa arzɛ wɔ̀ ndi hwa mà emeyà Ŋmɛ̀ndì mò Gbamù. È mòòhwèlì wà èlìŋgɛ̀ Àyìrzayà mɔ̀ ŋmìti à mà òhwa nanù ema, “Ìi Rzàŋgò njɛnɛ hwa awu à lòkɛ̀ mònò ŋmɛ̀ndì ema jò òhwa e?”

¹⁷O èŋgànɛ̀lɛ̀ rzɔ lì lòkɛ̀ lì jà ndi, ema mòtò a òkanelì tɛ ŋmɛ̀ndì, ndeŋgànɛ̀lɛ̀ hwatò hwa àŋgàmɛ̀nɛyi lì òhwa ŋmɛ̀ndì mò ama Krirztò aŋga nanù òma hwatò hwà mà mò lòkɛ̀.

¹⁸Ndi na ijòwa nanù ema, e hwèlì ndi e jɔ̀kɛ̀ ema wɔ̀ hwa rzi hweyi mòŋgò ŋmɛ̀ndì e? Jàyɛ̀, hwà mà mò hweyà. Nà òma e tìlahwì ò e kààtì ya Lohwà nanù ema, “Màalò ma hwatò ema mà ma hwɛ lì òhwa mòŋgò ŋmɛ̀ndì mà ma hwɛ̀ɛnɛ e rze ya arzɛ. Eyà ya awu e ma uka ò marzuku ma e rze ya arzɛ.”

¹⁹Nà ijòwa hvɛ nanù ema, hwatò hwa Irzàyɛ̀lì hwa rzi rzɔŋgìtɛ̀nɛ̀ mòŋgò ŋmɛ̀ndì e? Mòrzè mɔ̀ ndi à mà lòma lì òhwa nanù ema Lohwɛ̀ a òhwi nanù ema, “Nà ò nàmìrzɛ̀ hwaŋga hwatò ema hwa rza enje ò èkòmè aŋga nanù e hwa nòneyà. Nà ò nàmìrzɛ̀ hvɛ hwèeti hwe hwatò aŋga nanù wɔ̀ hwa ò tàtà.”

²⁰Ndeŋgànɛ̀lɛ̀ e mòòhwèlì wà èlìŋgɛ̀ Àyìrzayà mɔ̀ hvɛ à mà emeyà ò lì alàhwɛ̀ na òma Lohwɛ̀ à mà òhwe. Mɔ̀ a òhwa ò mòte nanù ema, “Nà mà lùwahwa na hwaŋga hwatò ema hwa rzi hwɛ lì nò arza. Nà ma àwùlùhwɛlɛ imba mbiti ò hwaŋga hwatò ema hwa rzi hwɛ lì nò ijòwa.”

²¹Ndi Àyìrzayà à mà òhwa lì hvòmɛ̀nɛ̀ hwatò hwa Irzàyɛ̀lì nanù ema Lohwɛ̀ à mà òhwa nanù ema, “Nà ma òma màà mà ami wùnyà wò arzɛ aŋga nanù hwatò hwa ami hwa nò timbeya. Ndi hwa hwèlì maniya ndèŋgànà hwa rza nò hweyàna.”