Read Mokpwe Ròmànì 11 Bible Online

Ròmànì 11 - Mokpwe bible

Ròmànì 11

¹Nàŋgɛ rzɔ na ijòwa nanù ema, Lohwɛ̀ à mà kìnyɛ̀lɛ̀ hwatò hwa eni e? Ò jɔ̀kɛ̀ jàyɛ̀! Imba hvɛ na hwèlì ndi mòtò wa Irzàyɛ̀lì ò mòtende mò ama Abràhamù. Nà uwɛ̀lɛ̀lɛ̀yi ò lìtumba la ama Bènjàmɛ̀nì.

²Lohwɛ̀ a rzi kìnyɛ̀lɛ̀yi hwatò hwa eni, ema mɔ̀ à mà lòme lì hvɔ̀rzɔ̀, natɛ̀ɛ na ò hwewòtelì. Inyɔ e hwi mamɛ ema e tìlahwì ò e kààtì ya Lohwà nɛ Èlàyijà à mà hwɛ lì rzòrzòmeya Lohwɛ̀ ò lì mò òhweyà hweyà ema hwatò hwa Irzàyɛ̀lì hwà mà hwɛ lì gbeyà.

³À mà òhweyà Lohwɛ̀ nanù ema, “Ìi Rzàŋgò hwanu hwatò hwa mà òŋwa hwà-òhwèlì hwa aŋgɔ̀ hwa hwèlìŋgɛ̀ hwa arzɛ, ndeŋgànɛ̀lɛ̀ hwa mà wùùlɛ̀ hwètàwò hwe aŋgɔ̀ hwe màkanɛ̀. Imba mbiti mɛnɛ ndi nà lìyelì ndèŋgàna wɔ̀ hwa arza lì nò òŋwa.”

⁴Nɛ Lohwɛ̀ à mà mò alàhwɛ̀ e? À mà mò alàhwɛ̀ nanù ema, “Nà mà uta hwekòlì lìrzamba hwe hwatò ò lì hwɛ hwatò hwa ami. Hwa hwèlì ndi hwatò ema wɔ̀ hwa rza kànɛ Bààlì lòòhwà là mòlàŋgà.”

⁵Ò èŋgànɛ̀lɛ̀ rzɔ tɔ̀ ò lìni lìrzakò là nàŋgɛ ò hwèlì ŋgurzu ja hwatò hwa Irzàyɛ̀lì ema hwa hvɔ̀rzɔ̀hwì ò è ndèli ya eni.

⁶Mɔ̀ à mà hwa hvɔ̀rzɔ̀ ò nyòla e ndèli ya eni ndi rzeketɛ ò nyòla hweyà ema wɔ̀ hwà mà gbeyɛ. È ma hwɛ tɛ nanù ema Lohwɛ̀ a hvɔ̀rzɔ̀ ndi hwatò ò nyòla hweyà ema hwa gbeyà, nanù ò ma e ndèli ya eni ndi à gbeyànì ò lì hwa hvɔ̀rzɔ̀.

⁷Mamɛ rzɔ ene e uŋmɛ̀lɛ̀ e? Hwàtò hwa Irzàyɛ̀lì hwa rzi luwe mamɛ ema wɔ̀ hwà mà hwɛ lì arza. Hwàtò ema hwà mà hvɔ̀rzè hwà mà luwa mamɛ ema hwà mà hwɛ lì arza. Ndi hwanɛyi mèèmà me awu me ma eta ò kòkò.

⁸È tìlahwi ò e kààtì ya Lohwà nanù ema, “Lohwɛ̀ à mà hwa gbeyà ò lì hwɛ èèti. Nàtɛ̀ɛ na tɔ̀ yàwònò, wɔ̀ hwa rza ɛnɛ ndèŋga hwa rza hweyà.”

⁹Dàhwitì mɔ̀ hvɛ à mà òhwa nanù ema, “Nà kànɛ nanù ema ò gbeyà hweyà ema hwe hwa lìŋgirzɛ ò lì hwɛ nàa iŋgundèli ja awu. Nà kànɛ nanù ema hwa kpe, Lohwɛ̀ à hwa kɔ̀kìrzɛ̀ ò nyòla hweyà ema hwa gbeyà.

¹⁰Nà kànɛ nanù ema Lohwɛ̀ a gbeye hwa hwɛ ndima aŋga nanù hwa rza ɛnɛ hvɛ. Nà kànɛ nanù ema mɔ̀ à gbeye ema hwa hwànɛ miyuna ema me hwa nùnàmìrzɛ̀ imburza ja awu ihvònda ja arzɛ.”

¹¹O èŋgànɛ̀lɛ̀ rzɔ na ijòwa nanù ema, e hvònda ema hwatò hwa Irzàyɛ̀lì hwà mà ayirzɛ mataŋgà mà awu wɔ̀ hwa arzɛ ndi hwà mà kpa e? Jàyɛ̀, e rzi hwɛ nanù. Nà òma wɔ̀ hwà mà gbeye wòhwe, eŋge e ma gbeyà ema Lohwɛ̀ à mà ŋgba hwaŋga hwatò ema hwa rza enje wònyà Yudà e hvòlò ya lì kɔtɔwɔ, aŋga nanù wònyà Yudà hwa ò hwɛnɛ inòna.

¹²Wòhwe wò wònyà Yudà wò ma jàneyà hwanɛ hwatò hwa arzɛ hwa e rze ya arzɛ mònàmɛ̀ mò ndɛnɛ. Ndèŋgàna na òma wònyà Yudà hwà mà òhve lìtake la hweyà hwe hwèlìŋgɛ̀, hwà mà jàneyà hwaŋga hwatò ema hwa rza enje wònyà Yudà e ndèli ya ama Lohwɛ̀. È hwèlì tɛ ema Lohwɛ̀ a tanɛyi lì nàmìrzɛ̀ hwaŋga hwatò ema hwa rza enje wònyà Yudà nanù, ema wònyà Yudà wɔ̀ hwa gbèyi tɛ wòhwe ŋgèlì iti ema mòŋgò mònàmɛ̀ mò ò hwɛ, e hvònda ema wònyà Yudà wò ò kɔ̀tɔ̀wɛ.

¹³Inyɔ hwatò ema e rza enje wònyà Yudà, inyɔ ndi na òhwìrzɛ̀nɛ̀ naŋgɛ. Imba na hwèlì ndi àpɔ̀rzìtòlò ya hwatò ema hwa rza enje wònyà Yuda, na ŋgbelì èwòlò ya ami èluhwe ya arzɛ.

¹⁴Aŋga mɛnɛ na tanɛ lì gbeyà lòŋgò la wònyànyàŋgò hwa ami hwa Irzàyɛ̀lì ò lì hwɛnɛ inòna, ndèŋgàna lòŋgò la awu hvɛ ò lì luwa mɔ̀kɔtèlì.

¹⁵È hvònda ema Lohwɛ̀ à mà rzɔ̀njɛlɛ wònyà Yudà, e ma gbeyà Lohwɛ̀ ò lì rzeeya na hwatò hwa arzɛ hwa e rze ya arzɛ. O nàŋgɛ rzɔ nɛ e ò hwɛ e hwèlì tɛ nanù ema Lohwɛ̀ a ò emeyà wònyà Yudà hvɛ nàa hwatò hwa eni e? È ò hwɛ ndi nàa hwatò ema hwà mà ŋwɛɛ rzi hwa hvùmùwà hvɛ ò lòŋgɛ.

¹⁶È hwèlì tɛ nanù ema, ŋmanà mbumbu wa èhvòòtò e kàkòwàhwi ò èhvòòtò rzurzu ò lì ŋgba Lohwɛ̀ nàa jàhwèyà, nanù òma Lohwɛ̀ ndi à hwɛni èhvòòtò ya arzɛ. Ndèŋgàna meyàŋga me gbee me ŋgbàahwi tɛ Lohwɛ̀, nanù òma mɔ̀ ndi à hwɛni hvɛ hwèkɔ̀kɔ̀.

¹⁷Lòŋgò la hwèkɔ̀kɔ̀ hwe màyi ma Njàhwɛ̀ ema mà ònahwi ma mà rzenjòwahwa, ò lì ikahwa ò mayi ma Njàhwɛ̀ ema mà rza ònahwɛ. Inyɔ hwatò ema e rza enje wònyà Yudà, e gbeye ndi nàa hweŋge hwèkɔ̀kɔ̀ hwe mayi ma Njàhwɛ̀ ema mà rza ònahwɛ ema hwe ɔhvɛ hwe luwa ndi maŋga malìhwa mɛnɛ ema meŋge meyaŋga me mayi ma Njàhwɛ̀ ema me ònahwi ma luwa.

¹⁸O eŋgànɛ̀lɛ̀ rzɔ, e rza hwɛni lì ayèkirzɛ̀ rzi e a ɛnɛ hwenɛyi hwèkɔ̀kɔ̀ ema hwe ma rzenjòwahwɛ nàa hwe hwèlì ndi hwema hwe ŋgundu. È òhvi tɛ kumba e rzi hvòŋga ò lì hwiya nanù ema rzeketɛ inyɔ ndi e òhvi meyaŋga me gbee, ndi meyaŋga me gbee ndi me òhvi.

¹⁹Ndi inyɔ e tanɛyi ya a kumba i ŋgeŋge ja anyu nanù ema, hwa rzenjò ndi hweŋge hwèkɔ̀kɔ̀ aŋga nanù hwa e lateya e hweyɔ.

²⁰Àŋga mɔ̀ e hwèlì ndi e jɔ̀kɛ̀. Hwe ma rzenjòwahwa èhwanja hwe rzi lòkɛ̀. Inyɔ e ma ikahwa aŋga èhwanja inyɔ e lòkɛ̀yi. Ndi e rzi òhva kumba. Ndi inyɛ inyɔ e òke wɔ̀ŋgɔ̀.

²¹Nà òma Lohwɛ̀ à rzi hvàŋgɛ̀ hvònda ò lì kɔ̀kìrzɛ̀ wònyà Yudà, wɔ̀ ema hwa hwèlì ndi nàa hwèkɔ̀kɔ̀ ema hwe ma lòmɛ lì hwɛ aŋga, inyɔ e ɔ̀ŋgɛ̀lɛ̀yi nanù ema a òka wɔ̀ŋgɔ̀ ò lì e kɔ̀kìrzɛ̀ e?

²²Anù ndi i ɛnɛ ììlì na lì ambirzɛnɛyi la ama Lohwɛ̀. A ambirzɛnɛyi ò hwaŋga hwatò ema hwà mà kpɛɛ. Ndi mɔ̀ à ò òkeya ììlì, e hwèlì tɛ nanù ema ò wa ò lìya lòŋgɛ ema lì kànɛ̀yi ììlì ja eni. Ndi ò rza gbèyi tɛ nanù ò wa hvɛ ò rzenjòwahwa.

²³Ndeŋgànɛ̀lɛ̀ wònyà Yudà wɔ̀ hvɛ hwa rza rzɔ̀rzi tɛ maniyà mà awu ò lì timbeya Lohwɛ̀, Lohwɛ̀ a hwa emeyà hvɛ. A hwɛni e ŋginyà ò lì gbeyà nanù.

²⁴Inyɔ hwatò ema e rza enje wònyà Yudà, e gbèyi ndi nàa hwèkɔ̀kɔ̀ hwe mayi ma Njàhwɛ̀ ema mà rza ònahwɛ, e hwèlì tɛ nanù ema Lohwɛ̀ a tanɛyi a e ulɛ ò gbee ema wò rza ònahwɛ ò waŋga, rzìi a e kukɛ ò gbee ema wò ònahwi, inyɔ e ɔ̀ŋgɛ̀lɛ̀ nanù ema mɔ̀ à rza tanɛyi lì wòwa wònyà Yudà rzi a hwa timbirzɛ aŋga hvɛ e? Wònyà Yuda hwa hwèlì ndi nàa ɛkɔ̀kɔ ema wò ma lòma lì hwɛ ò wòŋgò gbee.

²⁵Ìi wònyànyàŋgò wa ami kòkò, na arza nanù ema e rzɔ̀ŋgìtɛ̀nɛ̀ eyà ema natɛ̀ɛ na nàŋgɛ tɔ̀ mòtò a rzi rzɔ̀ŋgìtɛ̀nɛ̀, aŋga nanù e rzi lùteyà nanù ema e òhvi lìhwiyè rzayi-rzayi. Nà arza nanù ema e rzɔ̀ŋgìtɛ̀nɛ̀ nanù ema, maniyà mà lòŋgò la hwatò hwa Irzàyɛ̀lì ma ò hwɛ natɛ̀ɛ na ò hwaŋga hwatò hwa arzɛ ema hwa rza enje wònyà Yudà ema hwa rza lòkɛ̀ hwa ò lòkɛ̀.

²⁶Ène eyà e ò gbèyɛ̀nɛ aŋga nanù hwatò hwa arzɛ hwa Irzàyɛ̀lì hwa ò rzùŋgàhwa. È tìlahwì ò e kààtì ya Lohwà nanù ema, “È mɔ̀kɔtèlì a ò uwɛ̀lɛ̀lɛ̀yi ndi ò Rzàyɔ̀nì. Ndeŋgànɛ̀lɛ̀ mɔ̀ à ò ulɛ wòhwe wò arzɛ ema wò hwèlì ò e nyɔ̀ŋgɔ̀nì ya ama Jèkɔ̀bù.

²⁷È hvònda ema na ò ulɛ wònò wòhwe wò awu ɔ̀ndi na ò jɛ̀ɛ̀ ò màrzèèlì na wɔ̀.”

²⁸Wònya Yudà hwa hwèlì ndi hwàkɔ̀yèlì hwa ama Lohwɛ̀ nàŋgɛ èhwanja hwa rza lòkɛ̀ Ŋmɛ̀ndì mò Gbamù, ndèŋgànɛ̀lɛ̀ ene e gbèyɛ̀nɛ ndi nanù aŋga nanù inyɔ hwatò ema e rza enje wònyà Yudà e luwa lì kɔ̀tɔ̀wɔ. Tɔ̀ nɛ e hwèlì nanù, Lohwɛ̀ à mà hvɔ̀rzɔ̀ wònyà Yudà ndèŋgànà a hwa lìŋgàni hvɛ nanù mɛnɛ èhwanja ò yòmbò ema à mà ààtɛ̀ na imbamba ja awu.

²⁹È hwèlì ndi nanù èhwanja Lohwɛ̀ a hvɔ̀rzì tɛ mòtò rzi a mò nàmìrzɛ̀ nanù òma mɔ̀ à mà mò hvɔ̀rzɔ̀ ndèŋgànà à mà mò nàmìrzɛ̀.

³⁰O màrzalɛ̀ inyɔ ndi e mà hwɛ̀neyà Lohwɛ̀, ndi ò nàŋgɛ nà òma wònyà Yudà hwa hwɛnelì Lohwɛ̀ màniya, e mà gbeyà nanù ema Lohwɛ̀ à è hwɛ̀neyà ììlì, ndèŋgànɛ̀lɛ̀ mɔ̀ à mà è òŋgòwànà ò lì mò hweyànà.

³¹O èŋgànɛ̀lɛ̀ rzɔ ò nàŋgɛ, rzayi-rzayi ja wònyà Yudà hwa hwèlì maniya na Lohwɛ̀. Lohwɛ̀ a ò hwa òkeya ììlì ndèŋgànà a ò hwa òŋgòwàna ò lì mò hweyàna a ò gbeyà nanù, aŋga nanù mɔ̀ à ò hwɛni ììlì na wɔ̀ nyayi hvɔ̀kɔ na òma à mà e hwɛneya inyɔ ema e rza enje wònyà Yudà ììlì.

³²Lohwɛ̀ à mà gbeyà maniyà mà hwatò ò lì hwa gbeyà ò a ɛnɛ ò ma hwa hwèlì ndi ò hwèwòwà, aŋga nanù a hwa hwɛneya wɔ̀ hwa arzɛ ììlì.

³³È ɔŋgɔ̀ tɛ mònàmɛ̀ mò ndɛnɛ mò ama Lohwɛ̀! È ɔŋgɔ̀ tɛ nɛ mɔ̀ à hwi hweyà hwe arzɛ, ndèŋgànà a òhvi lìhwiyè lì ndɛnɛ. Tɔ̀ mòtò a rza tanɛyi lì rzɔ̀ŋgìtɛ̀nɛ̀ nɛ Lohwɛ̀ a gbèeyà hweyà.

³⁴Nà òma è tìlàhwì ò è kààtì yà Lohwà nanù ema, “Njɛnɛ à hwi màlùtèyà mà ama Rzàŋgò e? Njɛnɛ à tànɛ lì mò ŋgba màyòwà e?

³⁵Njɛnɛ à mà ŋgbɛ Lohwɛ̀ yòma aŋga nanù Lohwɛ̀ à mò timbirzɛlɛlɛ etaŋgi.”

³⁶Lohwɛ̀ ndi à wèkì hwèèmà hwe arzɛ. Mɔ̀ ndi à gbèyi ndèŋgànà hweŋge hwèèmà hwe arzɛ hwe hwèlì lòŋgɛ. Ndèŋgànɛ̀lɛ̀ mɔ̀ ndi à hwɛni hweŋge hwèèmà hwe arzɛ. Èluhwe è hwɛ nà Lohwɛ̀ ò gbìndèyà nà ò gbìndèyà. Inyɛ̀ wò lìya nanù.