Read Mokpwe Ròmànì 12 Bible Online

Ròmànì 12 - Mokpwe bible

Ròmànì 12

¹O eŋgànɛ̀lɛ̀ rzɔ, wònyàmòwe kòkò, èhwanja ò ììlì ndɛnɛ ja ama Lohwɛ̀ ema a jò uŋmɛ̀lɛ̀, na e atɛkɛ nanù ema, ya aŋgbɛ inyɔ hwiti ò ma Lohwɛ̀ nàa jàhwèyà ema i hwèlì lòŋgɛ. Ini jàhwèyà i hwɛni lì hwɛ wòrzàŋgi na lì emeyàhwa na Lohwɛ̀. Nànù ndi inyɔ e hwɛni ò lì kànɛ.

²È rzi keka lì òŋgama hwɛ̀ɛ̀mɛ̀ hwe hwatò hwa ene rze ya mɔ̀nyɛ̀, ndi e hwɛmɛ Lohwɛ̀ a tikòwe mèèmà me anyu, aŋga nanù e luwa mèèmà me hvènya. Èŋge ye e gbeyà e rzɔ̀ŋgìtɛ̀nɛ̀ na ò lì òŋgama hweyà na òma Lohwɛ̀ a àrzeyà. Inyɔ e hwi gbamù hweyà ema Lohwɛ̀ a lìŋgàni ndèŋgànà e òŋgama hweyà ema hwe hvòmɛ̀nɛ̀yi.

³O e ndèli ya ama Lohwɛ̀ a nò ŋgbelì, na òhweyà tɔ̀ ima mɔ̀kɔ wa anyu nanù ema, tɔ̀ mòtò a rza àŋgàmɛ̀nɛ̀ lì awòwɛ̀ mɔ̀ ŋmìti lì aka mamɛ ema mɔ̀ à hwèlì. Ndi ò arzihwirzɛ ò màlùtèyà ma aŋgɔ̀. Ndeŋgànɛ̀lɛ̀ hvɛ ò àkàyìrzɛ̀ ò wà witi ò lìmɛni la lìlòkɛ̀ ema Lohwɛ̀ à mà màa lì ò ŋgbà.

⁴I òhvi hwènàmà hwe nyò rzayi-rzayi ò nyò hvɔ̀kɔ ndèŋgàna hwenè hwènàmà hwe arzɛ hwe gbeyà ihvɛhvɛ nyayi ja hwèwòlò.

⁵Ŋgàna hvɔ̀kɔ mɛnɛ, tɔ̀ nɛ irzɔ i kòki, i hwèlì ndi nyò hvɔ̀kɔ, ò lì ahvìyànɛ̀ na Krirztò, ndèŋgàna ja ahwiyanɛ mɔ̀kɔ na ɔ̀nɛyi nàa rzayi-rzayi ja hwènàmà ò nyò hvɔ̀kɔ.

⁶O èŋgànɛ̀lɛ̀ i hwɛni lì gbeyàna màhwèyà ma arzu ma nyayi na nyayi lì hvòmɛ̀nɛ̀ e ndèli ema Lohwɛ̀ a jò ŋgbelì. È hwèlì tɛ nanù ema Lohwɛ̀ à mà ŋgba mòtò jàhwèyà ja lì òhwa hweyà ò lìna la ama Lohwɛ̀, òŋgò mòtò a òhwa hweŋge hweyà lì hvòmɛ̀nɛ̀ lì lòkɛ̀ ema mɔ̀ à òhvi.

⁷È hwèlì tɛ nanù ema mòtò a òhvi tɛ jàhwèyà ja lì gbèeyà hwatò, inyɛ a hwa gbèeyà. Ndeŋgànɛ̀lɛ̀ hvɛ mòtò a òhvi tɛ jàhwèyà ja lì òkòlɛ, inyɛ a hwɛ ò lì òkòlɛ hwatò.

⁸Mòtò ema a hwɛni jàhwèyà ja lì kɔ̀mɛlɛ hwatò, inyɛ mɔ̀ à hwa kɔ̀mɛlɛ. Tɔ̀ njɛnɛ hvɛ ema a ŋgba hwatò hwema, a hwa ŋgbaane na eenji. È mɔ̀ hvɛ ema a hwɛni jàhwèyà ò lì timba hwatò, inyɛ a hwa timbe kɔ̀yi-kɔ̀yi. È mòtò hvɛ ema a òhvi jàhwèyà ja lì uŋmɛ̀lɛ̀ hwatò ììlì, inyɛ a uŋmɛ̀lɛ̀ hwatò ììlì na màlìŋgò.

⁹Tɔ̀ ima mòtò a hwɛni lì hwɛnɛ e ndìŋgɛ na hwatò na e jɔ̀kɛ̀. È kɔ̀ mamɛ ema e hwèlì wòhwe. È akakumɛnɛ ò lì gbeyà mamɛ ema e hwèlì gbamù.

¹⁰Inyɛ̀ tɔ̀ ima mòtò a lìŋgàne ŋmanyàŋgò wa eni na ŋmèma mò eni mò arzɛ. Inyɛ̀ tɔ̀ ima mòtò a ŋgbe ŋmanyàŋgò wa eni èluhwe lì aka mamɛ ema a aŋgbɛ mɔ̀ ŋmìti.

¹¹È rzi keka ò lì hwɛ rziŋga. Inyɛ̀ tɔ̀ ima mòtò a hwɛnɛ e nyɔ̀ŋgi ya lì gbèeyà e Rzaŋgò na ŋmèma mò eni mò arzɛ.

¹²Inyɛ̀ tɔ̀ ima mòtò a hwɛnɛ mɔ̀nyɛ̀ŋgì na lìhvìtà ema a hwɛni. Inyɛ̀ tɔ̀ ima mòtò a àjùlɛ̀ ò tenì ya mètàkà. Tɔ̀ ima mòtò àjùlɛ̀ ò tenì ya màkanɛ̀.

¹³O ìtììtènì ja anyu ja hwatò hwa ama Krirztò, e hwèlì tɛ ema mɔ̀kɔ wa anyu a endèli tɛ yòma, e mɔ̀ ema a e òhvi inyɛ a mò ŋgbe e yɔ. Tɔ̀ njɛnɛ ema a e jɛlɛlɛ nàa ŋmɛ̀nì e mò karzɛ gbamù.

¹⁴È kànɛ nanù ema, Lohwɛ̀ a nàmìrzɛ̀ hwaŋga hwatò ema hwa e tàkìrzɛ̀. È rzi kanɛ̀ nanù ema hwa jemahwe ndi e kànɛ ndi nanù ema Lohwɛ̀ a hwa nàmìrzɛ̀.

¹⁵È òke mɔ̀nyɛ̀ŋgì na hwaŋga hwatò ema hwa hwèlì hwa òka mɔ̀nyɛ̀ŋgì. È ɛhwɛ na hwaŋga hwatò ema hwa ɛhwɛ.

¹⁶È awòhwànɛ̀ wàna hvɔ̀kɔ mɔ̀kɔ na ɔ̀nɛyi. È rzi ayèkirzɛ̀. È hwɛ mbunda na hwatò ema hwa rza òhvɛ hwetɛmelì ema hwe kàrzamì. Inyɛ̀ tɔ̀ mòtò a rzi ɔ̀ŋgɛ̀lɛ̀ nanù ema mɔ̀ à hwɛni lìhwiyè rzayi-rzayi.

¹⁷È hwèlì tɛ nanù ema, mòtò a e gbèyi tɛ wòhwe, e rzi mò timbirzɛlɛlɛ wòhwe. Inyɔ e àŋgàmɛ̀nɛ̀ ndi lì keka ò lì gbeyà gbamù ò mirzɔ̀ ma hwatò hwa arzɛ.

¹⁸È keke e gbèye nanù ema e hwɛ ò ɛ̀yɔ̀lɛ̀ na hwatò hwa arzɛ.

¹⁹Ìi wònyamòwè kòkò, e hwèlì tɛ nanù ema mòtò a e gbèyi tɛ eyà ya wòhwe, inyɛ inyɔ e rzi keka ò lì mò timbirzɛlɛlɛ. È hwɛmɛ Lohwɛ̀ mɔ̀ ŋmìti a mò kɔ̀kìrzɛ̀. È tìlahwì ò e kààtì ya Lohwɛ̀ nanù ema, “Lohwɛ̀ a òhwi nanù ema, ‘Imba ndi na timbirzɛlɛlɛ wòhwe ema tɔ̀ ima mòtò a gbèyi. Imba e Rzaŋgò ndi na òhwi.’”

²⁰È tìlahwì ò ehvɛhvɛ èki ò e kààtì yà Lohwà nanù ema, “È hwèlì tɛ ema hwàkɔ̀yèlì hwa aŋgɔ̀ hwa hweyà tɛ e njàwò, ò hwa lìrzɛ. Hwa hweyà tɛ e nyìrzɛ̀, ò hwa ŋgbe yòma ya lì nyɔ. Èhwanja ò gbèyi tɛ nanù, òma hwà mà enya.”

²¹Tɔ̀ mòtò a rzi keka lì emeyà nanù ema wòhwe wò mò kànèyà. Ndi inyɛ gbaamù wò anyu wò rzuwane wòhwe.