Read Mokpwe Ròmànì 13 Bible Online

Ròmànì 13 - Mokpwe bible

Ròmànì 13

¹Inyɛ̀ tɔ̀ ima mɔ̀ wa anyu a hweyàne hwaŋga ema hwa hwèlì ò lìkànèyà. Èhwànja ò rza tanɛ lì hwɛ lìkànèyà e rzi hwɛ ema Lohwɛ̀ a emelì, ndèŋgànɛ̀lɛ̀ e wɔ̀ ema hwa hwèlì hwàkànèyà, Lohwɛ̀ mɔ̀ ndi à ika hwàkànèlì hwa arzɛ ò mbòkò.

²Tɔ̀ njɛnɛ ema a tèŋgɛ̀nɛ̀yi hwàkànèlì ema hwa hwèlì ò lìkànèyà, ò ma a tèŋgɛ̀nɛ̀yi ndi hwètɛ̀yìrzèlì hwe ama Lohwɛ̀. Ndèŋgànɛ̀lɛ̀ hvɛ, tɔ̀ njɛnɛ ema a gbèyi nanù, ò ma a àyèrzɛ̀lɛ̀ ndi e kɔ̀kìrzɛ̀ na mɔ̀ ŋmìti.

³Hwàŋga hwatò ema hwa gbeyà gbamù hwa rza hwɛni lì òka hwàkànèlì wɔ̀ŋgɔ̀. Ndi e wɔ̀ ema hwa gbeyà wòhwe, wɔ̀ ndi hwa hwɛni lì òka hwàkànèlì wɔ̀ŋgɔ̀. O lìŋgàni tɛ nanù ema ò rza òka hwàkànèlì wɔ̀ŋgɔ̀, ò gbeye rzɔ hweyà hwe gbamù. O wa ò gbèyi tɛ nanù wɔ̀ hwa ò eka.

⁴Èhwànja e mɔ̀ ema a hwèlì ò lìkànèyà a hwèlì ndi e mògbèèlì wa ama Lohwɛ̀, ema Lohwɛ̀ a rzekelì ò lì òŋgòwànà. Ndi ò gbeyà tɛ hweyà hwe wòhwe, ò aŋgàmɛ̀nɛ lì mò òka wɔ̀ŋgɔ̀, ehwànja e ŋginyà ema a òhvi ò lì kɔ̀kìrzɛ̀ hwatò e rza enje ŋgundu. Hwàkànèlì hwa hwèlì ndi hwàgbèelì hwa ama Lohwɛ̀, ndèŋgànɛ̀lɛ̀, mɔ̀ à hwèlì ndi e mògbèèlì hwa ama Lohwɛ̀ ema Lohwɛ̀ a ikayi nanù ema a kɔ̀kìrzɛ̀ hwatò ema hwa gbeyà hweyà hwe wòhwe.

⁵O lìni lìtiŋga rzɔ mòtò a hwɛni lì hweyàna hwàkànèlì, rzeketɛ ehwànja ema a òka ndi e kɔ̀kìrzɛ̀ wɔ̀ŋgɔ̀, ndi ehwànja ŋmèma mò eni mo mò òhweyà nanù ema a hwɛni lì gbeyà nanù.

⁶Litiŋga lìini, ɔ̀ndeŋgàtɛ̀ e rzàawà e njaŋge yà lìkànèyà, ehwànja hwaŋga hwatò ema hwa rzàŋgìrzɛ̀ è njàŋge yà lìkànèyà wɔ̀ hvɛ hwa gbèeyà ndi Lohwɛ̀.

⁷Tɔ̀ ima mɔ̀ hwa anyu rzɔ a hwa rzaweya mamɛ aŋgàmɛ̀nɛ̀yi lì hwa rzaweya. Tɔ̀ ima wòlì ema hwa e ijò ò lì rzàawà, ò erzàŋgò ema e hwɛni. È òke hwatò ema e hwɛni lì òka wɔ̀ŋgɔ̀, ndèŋgànà e ŋgbe hvɛ èluhwe ò hwatò ema e hwɛni lì ŋgba èluhwe.

⁸È rzi keka, ò lì òhvana tɔ̀ mòtò tɔ̀ lìyɛmɛ. Liyɛmɛ mɛnɛ ema e hwɛni, lì hwèlì ndi ò lì lìŋgàna mɔ̀kɔ na ɔ̀nɛyi. Tɔ̀ ima mòtò ema a gbèyi nanù, nanù ò ma a ika e mbenda ya arzɛ.

⁹Imbenda i hwèlì ndi nanù ema, “Ò rzi gbeyà mòrzònje ò ndawò ya lìhwa. Ò rzi òŋwa mòtò. Ò rzi ihwa, ò rzi òkeyà mamɛ ema è hwèlì è yà ama òhvɛhvɛ mòtò.” Ini mbenda nà inɛyi mbenda ja arzɛ ndi i làti ò lì hwɛ mbenda hvɔ̀kɔ. Èŋge mbenda è hwèlì ndi nanù ema, “O lìŋgàne ŋmanyàŋgò wà aŋgɔ̀ nà òma ò alìŋgànɛ̀yi ò wà hwìti.”

¹⁰Mòtò à lìŋgàni tɛ ŋmanyàŋgò wà eni à rza tànɛyi à mò gbeyà wòhwe. Ò eŋgànɛ̀lɛ rzɔ, è ndìŋgɛ yɔ̀ ndi è òndìrzɛ̀yi imbenda ja arzɛ.

¹¹Ndeŋgànɛlɛ è hwi nanù ema è hvònda è mà uka ema inyɔ è hwɛni lì imòwa ò ijɔ. È hwɛni lì imòwa ò ijɔ èhwanja ò naŋgɛ hwèkɔ̀tèlì hwe arzu hwe mà kòmbɛnɛ lì aka eŋge hvònda ema i mà lòme lì lòkɛ̀ Krirztò.

¹²Jììtìtì i mà lìŋga ŋmanà mbɔ̀ òma wùùnya wò ma yahwa ò eŋgànɛ̀lɛ̀ rzɔ, inyɛ i rzɔ̀njɛ̀lɛ hweyà hwe wòhwe ema i ma hwɛ lì gbeyà. Inyɛ̀ i wɔ̀te màwɔ̀ti ma njuma ò lì ana e njuma ya ŋmàye.

¹³Inyɛ̀ i hwɛnɛ hwɛ̀ɛ̀mɛ̀ hwe gbamù nàa hwatò ema hwa hwèlì ò ŋmàye. È rzi ɛndɛ ò indèma ema hwatò hwa nyɔ mimba rzi hwa wòma, i rzi hwɛnɛ nyìrzɛ̀ ya mòrzònje. È rzi gbeyà hweyà hwe ndɔ̀ki. È rzi tɔ̀wɔ ndèŋgànà e rzi hwɛnɛ inòna.

¹⁴Inyɛ̀ e hwɛnɛ ɛ̀ɛ̀mɛ̀ ya ama e Rzàŋgò Yerzù Krirztò. È hwɛmɛ lì alɛ̀mbɛnɛ la anyu la hweyà hwe e nyàmà nyò. È rzi keka lì gbeyà na òma e nyàmà nyò ya anyu ema ye e kànèyà ò lì gbeyà wòhwe e arza.