Read Mokpwe Ròmànì 15 Bible Online

Ròmànì 15 - Mokpwe bible

Ròmànì 15

¹Irzɔ ema jò imbami ò lìlòkɛ̀ inyɛ jò òŋgòwane e wɔ̀ ema hwa rza imbamɛ ò màlòkɛ̀ ma awu. I rza alìŋgìrzɛ irzɔ hwiti.

²Tɔ̀ ima mɔ̀ wa arzu a àŋgàmɛ̀nɛ̀ ndi ò lì gbeyà hweyà nyayi ema hwe lìŋgirzɛ ŋmanyàŋgò wa eni aŋga nanù òma lì lòkɛ̀ la ama òŋgò ŋmanyàŋgò wa aŋgɔ̀ lì ma òŋwa.

³Tɔ̀ Krirztò ŋmìti a rzi hwɛ lì gbeye hweyà ò lì alìŋgìrzɛ mɔ̀ ŋmìti. Ndi à mà gbeyà ndi na òma e tìlahwì ò kààtì ya Lohwà nanù ema, “Hweyòlì hwe arzɛ ema hwà mà ò hwɛnyɛ, hwe ma nò timbeya ndi imba.”

⁴Hweya hwe ya arzɛ ema hwe ma tìlahwa ò kààtì ya Lohwà ò e hvònda kòòhwa, hwe ma tìlahwa ndi ò lì jò òkòlɛ̀. Èŋge ŋgàna e ma hwɛ ndi nanù ema jò òhve lìhvìtà ema e uwɛ̀lɛ̀lɛ̀yi ò eyà ya ama Lohwɛ̀ ema lì jò gbeyà ò lì àjùlɛ̀ na lì jò kɔ̀mɛ̀lɛ̀.

⁵Inyɛ̀ Lohwɛ̀ ema a jò ŋgbà la àjùlɛ̀ na lì kɔ̀mɛ̀lɛ̀, a e òŋgòwane ò lì ahweyànɛ mɔ̀kɔ na ɔ̀nɛyi, na òma e òŋgama Yerzù Krirztò.

⁶Àŋga nanù lì a àrzàŋgànɛ̀ lì anyu lì gbeyà e òhwa ndi eyà yɔ̀kɔ ò lì eka Lohwɛ̀, e Tatɛ̀ ya ama e Rzàŋgò ya arzu Yerzù Krirztò.

⁷Imanɛlɛ mɔ̀kɔ na ɔ̀nɛyi, na òma Krirztò a e imanɛlɛ inyɔ, aŋga nanù hwatò hwa tanɛyi ò lì eka Lohwɛ̀.

⁸Nà e òhweyà nanù ema, Krirztò à mà timba ndi mògbèèlì wa wònyà Yudà ò lì uŋmɛ̀lɛ̀ nanù ema Lohwɛ̀ a hwèlì jɔ̀kɛ̀, ò lì òndìrzɛ̀ lì kàkɛ̀nɛ̀ ema à mà ika na imbamba ja awu jò ò gbèyɛ̀nɛ na e jɔ̀kɛ̀.

⁹A ma jà aŋga nanù, hwatò ema hwa rza enje wònyà Yudà hwa ò ŋgba Lohwɛ̀ jeka lì hvòmɛ̀nɛ̀ ììlì ema Lohwɛ̀ à mà hwa uŋmɛ̀lɛ̀. Ɔ̀ndeŋgàtɛ̀ nanù ndi e tìlahwì ò e kààtì ya Lohwà nanù ema, “O eŋgànɛ̀lɛ̀ rzɔ, imba na ò eka ò ìtììtènì ja hwaŋga hwatò ema hwa rza enje wònyà Yudà, nà ò embeya mɛ̀rzɔkɔ ò lì eka lìinà là aŋgɔ̀.”

¹⁰È tìlahwì hvɛ ò kààtì ya Lohwà nanù ema, “Inyɔ ema e rza enje wònyà Yudà, e òke mɔ̀nyɛ̀ŋgì, na hwatò hwa ama Lohwɛ̀.”

¹¹Rzìi e tìlahwì hvɛ nanù ema, “È eke e Rzàŋgò, inyɔ hwa arzɛ ema e rza enje hwatò hwa wònyà Yudà, Inyɔ hwatò hwa arzɛ hwa e rze ya mɔ̀nyɛ̀, e mò eke.”

¹²È mòòhwèlì wà èlìŋgɛ̀ Àyìrzayà rzìi mɔ̀hvɛ a òhwi na òma e tìlahwì nanù ema, “O ò wurza mòtò ò mòtende mò ama Jɛ̀rzɛ̀, a ò jà ò lì kànèyà hwaŋga hwatò ema hwa rza enje wònyà Yudà. Ndeŋgànɛ̀lɛ̀ wɔ̀ hwa ika màhvìtà mà awu na mɔ̀.”

¹³Nà kànɛ nanù ema, Lohwɛ̀ ema mɔ̀ ndi à ŋgbàà lìhvìtà, a e gbeye e ònde na mɔ̀nyɛ̀ŋgì mò arzɛ na ò lì hwɛ na ɛ̀yɔ̀lɛ̀ ò nyòla lì lòkɛ̀ ema e lòkɛ̀. Ène eyà e gbeyà e ŋginyà ya Èlìŋgɛ̀ yà Wòtani e gbeyà lì lòkɛ̀ la anyu lì nyàla rzayi-rzayi.

¹⁴Wònyàmòwe kòkò imba mbiti ò tɛ̀ɛ̀tɛ̀ɛ na hwi nanù ema inyɔ hwiti e òhvi mèèmà me gbamù ò lì gbeyà hweyà ema Lohwɛ̀ a arza nanù ema e gbeye, e rzɔ̀ŋgìtɛ̀nɛ̀ hweyà gbamù, ndeŋgànɛ̀lɛ̀ e tànɛyi lì àwòkòlɛ̀nɛ̀ mɔ̀kɔ na ɔ̀nɛyi.

¹⁵Ndi tɔ̀ nanù, ò hwèlì lòŋgò la hweyà ema nà mà e tìleya ò tenì ya ene kààtì. Nà ma hwe tìla ò lì e ɔ̀ŋgɛ̀lɛ̀nɛ hwene hweyà hwe arzɛ na òma imba na rza òka tɔ̀ eyà wɔ̀ŋgɔ̀. È ndèli ema Lohwɛ̀ a nò ŋgbelì yɔ̀ ndi e gbèyi na tìlì hwene hweyà.

¹⁶Lohwɛ̀ à mà nò ŋgba e ndèli ya eni ò lì hwɛ e mògbèèlì wa ama Yerzù Krirztò, ò lì òhweyà hwatò ema hwa rza enje wònyà Yudà, ŋmɛ̀ndì mò gbamù. Nà gbèeyà ndi ene èwòlò nàa pìlìrzì ò lì òhwa Ŋmɛ̀ndì mò Gbamù ema mò uwɛ̀lɛ̀lɛ̀yi ò ma Lohwɛ̀, aŋga nanù hwatò ema hwa rza enje wònyà Yudà hwa ò hwɛ ndi nàa jàhwèyà ema nà mà ŋgbɛ ema je imayɛnɛhwɛ na Lohwɛ̀. Lohwɛ̀ a ò hwe emeyà èhwanja Èlìŋgɛ̀ yà Wòtani e ma hwa gbeyà ema hwa emàyɛ̀lɛ̀hwɛ̀ ò wòrzò wò ama Lohwɛ̀.

¹⁷O hwehwɛ̀ɛlì hwe ami na Yerzù Krirztò, na tanɛyi lì kumba e ŋgeŋge ya ami na kumba ò nyòla èwòlò ema na gbèeya Lohwɛ̀.

¹⁸Nà rza tànɛlì ò lì òhwa tɔ̀ ehvɛhvɛ eyà hvɛ lì aka tɛ ò lì òhwa lì hvòmɛ̀nɛ̀ èwòlò ema Krirztò a gbèyi ema na atànɛ̀yi ò lì gbeyà, ema e hwèlì ndi ò lì gbeyà nanù ema hwatò ema hwa rza enje wònyà Yudà hwa gbeye ndi na òma Lohwɛ̀ a arza nanù ema hwa gbeye. Hweya ema nà mà òhwɛ̀ɛ, na hweyà ema nà mà gbeyɛ hwe hwèlì ndi hweyà ema wɔ̀ hwa hwɛni lì òhwa na hweyà ema wɔ̀ hwa àŋgàmɛ̀nɛ̀ lì gbeyà.

¹⁹Nà ma gbeyà ndi hwene hweyà ò ŋginyà ya hweembànèlì na mànyakà na e ŋginyà ya Èlìŋgɛ̀ ya ama Lohwɛ̀. O eŋgànɛ̀lɛ̀ rzɔ, lì anjiya ò e mbòwa ya Jèrurzalɛ̀mù natɛ̀ɛ na ò erzòòkà ya Ilìlìkumi, nà mà òhwa Ŋmɛ̀ndì mò Gbamù mò ama Krirztò gbamù.

²⁰Ɛkɔ̀ɔ̀nji ya ami e hwèlì ndi ò lì òhwa Ŋmɛ̀ndì mò Gbamù ò hwèki ema hwatò hwa rzi hweyi lì hvòmɛ̀nɛ̀ Krirztò. Nà ò gbeyà nanù aŋga nanù na rza ò ɛndɛ ò ekì ema òhvɛhvɛ mòtò à mà tòma èwòlò.

²¹Nà òma e tìlahwì ò e kààtì ya Lohwà nanù ema, “Hwàŋga ema hwa rzi òhwahwɛlɛyi lì mò hvòmɛ̀nɛ̀, hwa ò ɛnɛ, rzìi hwaŋga hvɛ ema hwa rzi hweyi lì mò hvòmɛ̀nɛ̀, hwa ò rzɔ̀ŋgìtɛ̀nɛ̀.”

²²Hwene hweyɔ̀ndɔ ema nà mà hwɛ lì ɛndɛ hweyɔ ndi hwe ma gbeyà ema na rzi tànɛyi lì e jèeyà.

²³Ndi ò nàŋgɛ ema nà mà kulɛ èwòlò ya ami ò ene erzòòkà, na hwɛni eŋge nyɔ̀ŋgi ò lì e jèeya na òma nà mà hwɛnɛ ò meya ema me ma aka.

²⁴Nà ikayi lìhvìtà ò lì gbèeyà nanù nàŋgɛ. Nà ò lìŋgàna ò lì e ɛnɛ ò yɔ̀ndɔ̀ ya ami ya lì ɛndɛ ò Rzìpenì. Nà ò lìŋgàna hvɛ ò lì e ɛnɛ na a arza tɛ lì ɛndɛ aŋga, aŋga nanù òma inyɔ hvɛ e ma nò òŋgòwànà ema na ɛndɛ aŋga. Ndi na ò hwɛ na inyɔ ò ŋmanà hvòka hvònda ò lì alɔ̀kɔ̀nɛyi mèèmà me arzu ndèŋgànà na e ɛndɛ.

²⁵Ndi tɔ̀ nanù ò nàŋgɛ, imba na ɛndɛ ò mbòwa ya Jèrurzalɛ̀mù ò lì ɛndɛ lì òŋgòwàna hwatò hwa ama Lohwɛ̀ ema hwa hwèlì aŋga.

²⁶Hwàtò hwa ama Krirztò ema hwa hwèlì ò erzòòkà ya Màrzèdonìyà na ò erzòòkà ya Àkayiyà, wɔ̀ hwà mà ɛnɛ nanù ema hwa gbeye mòrzàŋgɛ̀ rzìi hwa òmeya mèlìrza me hwatò ema me hwèlì ò ìtììtènì ja hwatò hwa ama Lohwɛ̀ ema hwa hwèlì ò mbòwa ya Jèrurzalɛ̀mù.

²⁷Wɔ̀ hwà mà ɛnɛ nanù ema ò lɔ̀wu nanù ema hwa gbeye nanù ò lì hwa òŋgòwàna. Kanatɛ e hwèlì nanù ema mònàmɛ̀ ema Lohwɛ̀ a ŋgbelì wònyà Yudà wɔ̀ hwa hwèlì lì mò gbeyàna na hwatò ema hwa rza enje wònyà Yudà, ò lɔ̀wu nanù ema hwatò ema hwa rza enje wònyà Yudà, wɔ̀ hvɛ hwa òŋgòwane wònyà Yudà ò lì hwa ŋgba hwèèmà nàa mòlelì, wòlì na mààtu.

²⁸È hvònda ema na ò kulɛ ene èwòlò ò Jèrurzalɛ̀mù, na lì hwa akɛlɛlɛ wòlì wò arzɛ ema wò rzàŋgahwi lì hwa hvòmɛ̀nɛ̀, ò ma nà mà anjiya aŋga lì ɛndɛ ò èkòmè ya Rzìpenì. O eŋge hvònda ndi na ò tɛ̀mɛ̀ ò lì e ɛnɛ.

²⁹Nà hwi nanù ema na jelì tɛ, hwejèelì hwe ami hwe gbeyà e ò luwa mònàmɛ̀ mò ama Krirztò ema mò òndi.

³⁰Ìi wònyamòwè kòkò, ò lìna la ama e Rzaŋgò Yerzù Krirztò, ndèŋgànà lì hvòmɛ̀nɛ̀ e ndòlo ema e uwɛ̀lɛ̀lɛ̀yi ò èlìŋgɛ̀ ya eni, imba na e atɛkɛ nanù ema i late màa ò lì nò kànɛ̀lɛlɛ na ŋginyà nanù ema Lohwɛ̀ a nò òŋgòwane.

³¹È nò kanɛ̀lɛ̀lɛ̀ nanù ema na ò rzùŋgàhwà ò màà mà hwatò ema hwa rza lòkɛ̀yì Krirztò ò erzòòkà ya Jùdeyà nanù ema hwa rzi nò gbeyà tɔ̀ wòhwe. Ndèŋgànɛ̀lɛ̀ e kànɛ hvɛ nanù ema wòlì ema na ò ɛndɛneya mèlìrza me hwatò ema me hwèlì ò mòndeŋge mò hwatò hwa Lohwà ò Jèrurzalɛ̀mù, hwa wò emeyà.

³²O mburza nanù, Lohwɛ̀ a emelì tɛ, na e jèeya na mɔ̀nyɛ̀ŋgì ò lì arziyòlɛ na inyɔ.

³³Inyɛ̀ Lòohwà la arzu la ɛ̀yɔ̀lɛ̀ lì hwɛ na inyɔ hwa arzɛ. Inyɛ̀ wò lìya nanù.