Read Mokpwe Ròmànì 16 Bible Online

Ròmànì 16 - Mokpwe bible

Ròmànì 16

¹Nà e òhweyà nanù ema e ndòmɛ ya arzu ema e hwɛ̀lɛ̀hwɛ̀ Hvòbe, ema a òŋgòwàna lì gbeyà èwòlò ò ŋmèmba ema mò hwèlì ò mbòwa ya Rzɛ̀nkrèyà, a gbèeyà èwòlò ya gbamù.

²È mò karzɛ ò lìna la ama e Rzàŋgò, na òma hwatò hwa ama Lohwɛ̀ hwa àŋgàmɛ̀nɛ̀yi lì gbeyà. Ndeŋgànɛ̀lɛ̀ e mò ŋgbe tɔ̀ ima lòŋgòwanɛ ema mɔ̀ à tànɛyi lì e arzana. È hwiye nanù ema mɔ̀ ŋmìti hvɛ à mà lòma lì òŋgòwàna lòŋgò la hwatò ndèŋgànɛ̀lɛ̀ mò à mà nò òŋgòwànà tɔ̀ imba mbiti.

³Inyɔ e nò kɔmèya Prìrzìlà na mòjòmɛ̀ wa eni Akwìlà, ema irzɔ na wɔ̀ i gbeyà èwòlò ya ama Yerzù Krirztò.

⁴Wɔ̀ hwà mà emeyà ò lì nò ŋwèeyà. Nà hwa èki. Rzeketɛ imba mbiti mɛnɛ ndi na hwa eka, ndi ŋmèmba mò arzɛ mò hwatò ema hwa rza enje wònyà Yudà, mɔ̀ hvɛ mò hwa eka.

⁵È nò kɔmèya hvɛ ŋmèmba ema mò taneya ò ndawò ya awu. È nò kɔmèya hvɛ e mbunda ya ami ya mèrziŋge Èpànɛ̀tùrzì, ema mɔ̀ ndi à mà hwɛ, e mòtò wa wòrzò ò lì lòkɛ̀ Krirztò ò erzòòkà ya Èrzìyà.

⁶È kɔmè Màlìyɛ̀, ema à mà gbèèyɛ̀ èwòlò rzayi-rzayi ò ìtììtènì ja anyu.

⁷È kɔmè hvɛ Andrɔ̀nìkùrzì na Jùnìyà wònyànyàŋgò hwa ami hwa wònyà Yudà, ema i ma aŋgɛhwɛnɛ ò hwèwòwà. Hwa hwiyahwi kɔ̀yi-kɔ̀yi ò ìtììtènì ja àpɔ̀rzìtòlò. Ndeŋgànɛ̀lɛ̀ wɔ̀ hwà mà lòma lì hwɛ hwàlòkèlì hwa ama Krirztò ndèŋgàna imba na e lòkɛ̀.

⁸È kɔmè Amplìyàtùrzì, e mbunda ya ami ya ndìŋgɛ ya màlìŋgò ema na lìŋgàni ò lìinà la ama e Rzàŋgò.

⁹È kɔmè Ubànùrzì, ema mɔ̀ hvɛ a hwèlì ndi mɔ̀kɔ wa arzu ema i gbèeyɛnɛ èwòlò ya ama Krirztò. È kɔmè hvɛ e mbunda ya ami ya ndìŋgɛ ya màlìŋgò Rztàkìrzì.

¹⁰È kɔmè Apɛ̀lɛ̀rzì, ema hwɛ̀ɛ̀mɛ̀ wa eni hwe gbamù hwe uŋmɛ̀lɛ̀ nanù ema a emànɛ̀lɛ̀hwɛ̀yì na Krirztò. È kɔmè hvɛ lìtumba la ama Arìrztòbulùrzì.

¹¹È kɔmè Hɛ̀ròdìyɔ̀nì, ŋmanyàŋgò wa arzu wa wònyà Yudà. O lìna la ama e Rzàŋgò e kɔmè hwaŋga hwatò ema hwa lòkɛ̀ Krirztò ò lìtumba la ama Nàrzìrzùrzì.

¹²È kɔmè Trìhvàyènà na Trìhvòrza, hwaŋga hwalanà ema hwa gbèeyà e Rzàŋgò èwòlò ya màyìmbì. È kɔmè Pɛ̀rzìrzì e mbunda ya ami ya màlìŋgò, òhvɛhvɛ mòlanà ema à mà gbèyɛ èwòlò rzayi-rzayi ò lìna la ama e Rzàŋgò.

¹³È nò kɔmèya Lùhvɔ̀rzì, ema e Rzàŋgò e hvɔ̀rzì ò lì mò gbèeyà, e kɔmè hvɛ e nyàŋgò ya eni, ema mɔ̀ à nò wò ndi nàa e ŋmanà wa eni.

¹⁴È kɔmè Arzìnkrìtùrzì, Hvlɛ̀gɔ̀nì, Hɛ̀mɛ̀rzì, Pàtròbàrzì, Hɛ̀màrzì, na hwanɛ wònyanyàŋgò hwa arzu na indòmɛ̀ ja arzu ema hwa hwèlì na wɔ̀.

¹⁵È kɔmè Hvìlòlògùrzì na Jùlìyà. È nò kɔmèya wònyanyàŋgò wa ami hwa ama Krirztò ema hwa hwɛ̀lɛ̀hwɛ̀ Olìmpàrzì na Nɛ̀rìyùrzì na e ndòmɛ ya eni, na hwatò hwa arzɛ hwa ama Lohwɛ̀ ema hwa hwèlì na wɔ̀.

¹⁶È arzàŋgànɛ̀lɛ̀ mɔ̀kɔ nà ɔ̀nɛyi ò lìnà là ama Yerzù. Ŋmèmbà me arzɛ mè è òmelì ikɔ̀mi.

¹⁷Ìi wònyamòwè kòkò, nà è kòkòwɛ̀lɛ̀ nanù ema, è aŋgòhweya hwaŋga hwatò ema hwa jànà yùnànelì ò ìtììtènì ja anyu nà lì eŋgìrzɛ̀ hvɛ hwahvɛhvɛ hwatò. Wɔ̀ hwa teŋgɛ̀nɛ̀yi hwèyòkòlèlì ema è ma luwɛ. È rzi keka lì hwa òŋgama.

¹⁸È rzi keka lì hwa òŋgama èhwanja hwa rza gbèeyà ndi e Rzàŋgò ya arzu Krirztò, ndi hwa gbèeyà ndi nanù ò lì òndìrzɛ̀ e nyɔ̀ŋgi ya awu. Hwa gbeyàna e mbɔrzi ya awu ya gbamù na jòòhwì ja gbamù ò lì lukɛlɛ hwatò ema hwa rza rzɔ̀ŋgɔ lì rzɔ̀ŋgìtɛ̀nɛ̀.

¹⁹Tɔ̀ ima mòtò à mà hweyà lì hvòmɛ̀nɛ̀ lì hweyàna la anyu la ŋmɛ̀ndì mò gbamù, ò lìni lìtìŋga, ò eŋgànɛ̀lɛ̀ na e òkani mɔ̀nyɛ̀ŋgì. Ndi imba na arza nanù ema inyɔ e gbèèye hweyà hwe gbamù, ndi e rzi keka lì ika mèèmà ò lì rzɔ̀ŋgìtɛ̀nɛ̀ mamɛ ema e hwèlì wòhwè.

²⁰Lohwɛ̀ la ɛ̀yɔ̀lɛ̀ ŋmanà mbɔ à hwɛni lì rzììkà Mòkarzɛ̀ ò rze yà matàŋga mà anyu. Inyɛ̀ è ndèli yà ama è Rzàŋgò hwa arzu Yerzù Krirztò è hwɛ nà inyɔ hwa arzɛ.

²¹Tìmòtì, ema irzɔ nà mɔ̀ i gbèèyɛ̀nɛ̀ èwòlò à è òmelì ikɔ̀mi. Lùrzìyùrzì, Jèrzɔ̀nì nà Rzòrzìpàtà, wònyanyàŋgò wà ami wà wònyà Yudà, wɔ̀ hvɛ hwa e òmelì ikɔ̀mi.

²²Imba Tɛ̀tìyùrzì, ema na tìlelì Pàwolò ini itita, imba hvɛ na e òmelì ikɔ̀mi nàa ŋmanyàŋgò wa anyu wa ama Krirztò.

²³Gàyiyùrzì, e mòtò ema ò ndawò ya eni ndi na hwèlì, ema ò ndawò ya eni ɔ̀ndi ŋmèmba mò wònya Krirztò mò tàneyà, mɔ̀ hvɛ a e òmelì ikɔ̀mi. Ɛ̀ràrztùrzì, ema mɔ̀ ndi à uta malì ma e mbòwa, na ŋmanyàŋgò hwa arzu Kwàtùrzì wɔ̀ hvɛ hwa e òmelì ikɔ̀mi.[1]

²⁵Inyɛ̀ i ŋgbe Lohwɛ̀ èluhwe èhwanja a òhvi màyìmbì ma lì ètìrzɛ̀ lìlòkɛ̀ la anyu. Ndeŋgànɛ̀lɛ̀ nanù ndi nà mà e òhweyà e hvònda ema nà mà e òhweyà Ŋmɛ̀ndì mò Gbamù mò ama Yerzù Krirztò. Mòŋgò Ŋmɛ̀ndì mò hwèlì ndi e jɔ̀kɛ̀ ema Lohwɛ̀ à mà ute natɛ̀ɛ na e hvònda kòòhwa, ema a rzi uŋmɛ̀lɛ̀ hwatò.

²⁶Ndi ò nàŋgɛ eŋge jɔ̀kɛ̀ e ma jò wuluhwàhwɛlɛ. Mɔ̀ à mà e wuluhwa nàŋgɛ na hweyà ema hwà-òhwèlì hwa hwèlìŋgɛ̀ hwà mà tile ò e kààtì ya ama Lohwɛ̀. Mɔ̀ à mà gbeye ndi nanù, aŋga nanù hwatò hwa arzɛ̀ hwa hwèkòmè hwe ya arzɛ hwa mò lòkɛ̀ na lì mò hweyàne.

²⁷Lohwɛ̀ mɔ̀ ŋmìti mɛnɛ ndi à hwɛni lìhwiyè la arzɛ. Inyɛ̀ i mò ŋgbe èluhwe èhwanja eyà ema Yerzù Krirztò à mà gbeyɛ, ò gbìndèyà na ò gbìndèyà. Inyɛ̀ wò lìya nanù.