Read Mokpwe Ròmànì 2 Bible Online

Ròmànì 2 - Mokpwe bible

Ròmànì 2

¹O èŋgànɛ̀lɛ̀ rzɔ, tɔ̀ ima mɔ̀ hwa anyu ema a kàyìrzɛ̀ɛ hwahvɛhvɛ hwatò, tɔ̀ ò hwɛ ndi njɛnɛ, ò rza òhvì tɔ̀ lìtìŋga ema ò rza lùhwànà lì làkìrzɛ̀. Èhwanja ò kàyìrzɛ̀ tɛ hwahvɛhvɛ hwatò, rzìi ò wà witi ò hwɛ ndi ò lì gbèeyà hwèŋge hweyà ema ò hwa kàyìrzɛ̀, nanù òma ò wa hvɛ ò a tùulɛ̀ ŋmàŋgò.

²I hwi na e tɛ̀ɛ̀tɛ̀ɛ nanù ema, e mbàkò ema Lohwɛ̀ a akɛlɛ lì teŋgɛ̀nɛ̀ hwatò ema hwa gbeyà iŋgi nyayi ja hweyà e hwa lòŋgàmɛnɛyi.

³Ndi ò wa mbunda ami, ò gbeyà tɛ ndi hwèŋge hweyà mɛnɛ ema hwe gbeyà ò kàyìrzɛ̀ hwahvɛhvɛ hwatò ò ɔ̀ŋgɛ̀lɛ̀yi nanù ema ò tànɛyi ò wàŋga lì anjiya ò hwèkàyìrzèlèlì hwe ama Lohwɛ̀ e?

⁴Ŋgà na òma Lohwɛ̀ a hwɛnì ŋmèma mò gbamù rzayi-rzayi rzi a e ŋgbelì hvɛ mɔ̀ɔ̀lì ema mò wawi rzayi-rzayi, rzi a e àjùlɛ̀nɛ̀, inyɔ e rze e wò nàa tɔ̀ eyà. È hwɛni lì hwiya nanù ema ŋmèma mò gbamu ema Lohwɛ̀ à è hwɛnelì mò hwèlì ndi nanù ema a e ŋgbee hvònda ema e tikòhwè hwɛ̀ɛ̀mɛ̀ hwe anyu hwe wòhwe ndɛnɛ wò ama Lohwɛ̀.

⁵Ndi ò wa ò òhvi ŋmèma ema mò eti ndèŋgàna ò rza arza lì timbeya Lohwɛ̀, ò eŋgànɛ̀lɛ̀ ò a òmbɛlɛlɛ ndi ò wà witi ò è kɔ̀kìrzɛ̀ ya ama Lohwɛ̀. À è kɔ̀kìrzɛ̀ ò Wùnyà wò hwèkàyìrzèlì. O wòŋgò Wùnyà, Lohwɛ̀ a ò uŋmɛ̀lɛ̀ hwetàtò wa eni, ndèŋgànɛ̀lɛ̀ mɔ̀ à uŋmɛ̀lɛ̀ nanù ema hwèkàyìrzèlì hwe eni hwe hvòmɛ̀nɛ̀yi.

⁶Lohwɛ̀ a ò rzaweyà tɔ̀ ima mòtò lì hvòmɛ̀nɛ̀ èwòlò ema tɔ̀ ima mòtò a gbèyi.

⁷Hwàŋga hwatò ema hwa rza ɔ̀tɔ̀ ò lì gbeyà hweyà hwe gbamù, na lì arze èluhwe na lì kàrzɛhwɛ, hwa ò hwɛ ò lòŋgɛ ò gbìndèyà. Lohwɛ̀ a ò ŋgbà inì nyayi ja hwatò lòŋgɛ la gbìndèyà.

⁸Hwahvɛhvɛ hwatò hwa hwèlì ikuka ndèŋgànɛ̀lɛ̀ hwa rza gbeyà hweyà hwe jɔ̀kɛ̀, wɔ hwa gbeyà ndi hweyà hwe wòhwe. Inì nyayi ja hwatò Lohwɛ̀ a ò hwa uŋmɛ̀lɛ̀ hwètàtò hwe eni ò lì hwa kɔ̀kìrzɛ̀.

⁹O ò hwɛ mòtàkà na mòrziyò ò hwaŋga hwatò hwa arzɛ ema hwa gbeyà mamɛ ema e hwèlì wòhwe, ò lìwòteya na hwatò ema hwa hwèlì wònyà Yudà lì uka na hwaŋga ema hwa rza enje wònyà Yudà.

¹⁰Ndi hwatò ema hwa gbeyà gbamù, Lohwɛ̀ a ò hwa ŋgba e ŋginyà, èluhwe, na ɛ̀yɔ̀lɛ̀ ya eni, ò lìwòteya na wònyà Yudà, ndèŋgànɛ̀lɛ̀ hwaŋga hwatò ema hwa rza enje wònyà Yudà.

¹¹È hwi nanù ema Lohwɛ̀ a rza gbeyà ndandò.

¹²Hwàŋga hwatò ema hwa rza òhvɛ e mbenda ya ama Mòrzè hwa gbeyà wòhwe. Lohwɛ̀ a ò hwa kàyìrzɛ̀ e rzi hwɛ lì gbeyàna e mbenda, ndèŋgànɛ̀lɛ̀ wɔ̀ hwa ò nyɔ̀ŋgɔ̀, ndèŋgàna hwatò hwa Wònya Yuda ema hwa òhvi e mbenda ya ama Mòrzè rzi hwa gbeyà wòhwe, Lohwɛ̀ a ò gbeyàna èŋge mbenda ò lì hwa kàyìrzɛ̀hwɛ.

¹³Rzeketɛ ò lì hweyà e mbenda yɔ ndi e gbèeyà hwatò hwa tɛ̀mɛ̀ ehve-ehve na Lohwɛ̀, ndi ò lì gbèeyà mamɛ ema e mbenda e arza yɔ ndi e gbeyà hwatò hwa tɛ̀mɛ̀ ehve-ehve ò wòrzò wò ama Lohwɛ̀.

¹⁴Hwatò ema hwa rza enje wònyà Yudà hwa rza òhvi e mbenda ya ama Mòrzè, ndi tɔ̀ ima hvònda hwa gbeyàna mɔ̀ŋgɛ̀lɛ̀ ma awu na òma e mbenda e arza, eŋge ŋgàna e uŋmɛ̀lɛ̀ nanù ema, tɔ̀ nɛ hwa rza òhvɛ e mbenda ndi ò mèèmà me awu, wɔ̀ hwa hwi mamɛ ema e hwèlì gbaamù na mamɛ hvɛ ema e hwèlì wòhwe.

¹⁵Hwègbèèlì hwe awu hwe uŋmɛ̀lɛ̀ ndi ema màmɛ ema e mbenda e kànèyà e tìlahwi ò mèèmà me awu. Meemà me awu hvɛ me uŋmɛ̀lɛ̀ ema ene eyà e hwèlì ndi e jɔ̀kɛ̀, kanatɛ màrzakò màlùtèyà ma awu ma hwa kàyìrzɛ̀, ndèŋgànà màrzakò ma hwa embɛ.

¹⁶O èŋgànɛ̀lɛ̀ lì hvòmɛ̀nɛ̀ Ŋmɛ̀ndì mò gbamù ema imba na òhwa, nanù ndi e ò hwɛ̀ɛ ò wòŋgò Wùnyà ema Lohwɛ̀ a ò ŋgbàà Yerzù Krirztò e ŋginyà ò lì kàyìrzɛ̀ɛ hwatò, lì hvòmɛ̀nɛ̀ màlùtèyà ma ìwùndɛ̀ ja mèèmà me awu na mamɛ hwa gbeyà ò jututa.

¹⁷O nàŋgɛ rzɔ, inyɔ ema e ahwɛ̀lɛ̀hwɛ̀ wònyà Yudà, e ikayi ndi mèèmà me anyu ò e mbenda ya ama Mòrzè ndeŋgànɛ̀lɛ̀ e kumbà iŋgèŋgè ja anyu ò lì ayèkirzɛ̀ nanù ema inyɔ ndi e hwɛni Lohwɛ̀.

¹⁸Inyɔ wònyà Yudà, e hwi mamɛ Lohwɛ̀ a arza nanù ema e gbeye ndèŋgànà e mbendà e ma e òkòlɛ ò lì hvɔ̀rzɔ̀ mamɛ ema e lɔ̀wu.

¹⁹È ma a wòwɛ inyɔ hwiti nanù ema inyɔ ndi e hwèlì hwatimbelì hwa indima ja hwatò ema hwa rza hwiyɛ Lohwɛ̀. È lòkɛ̀ nanù ema inyɔ ndi e hwèlì etùlù ya hwatò ema hwa hwèlì ò jìtìtì.

²⁰È ma awòwɛ̀ inyɔ hwiti nàa hwatò ema hwa kòkòwɛ̀lɛ̀ hwèètì hwe hwatò ndèŋgànà hwatò ema hwa òkòlɛ hwatò ema hwa rza hwiyɛ tɔ̀ eyà. È ma awòwɛ̀ inyɔ hwiti nanù èhwanja na òma e ɔ̀ŋgɛ̀lɛ̀ ema e hwi i mbenda ja ama Lohwɛ̀ gbamù, e hwi hweyà hwe arzɛ ndèŋgàna e hwi e jɔ̀kɛ̀.

²¹Nàŋgɛ rzɔ, inyɔ ema e òkòlɛ̀ hwahvɛhvɛ hwatò, mamɛ ndèŋgàtɛ e rza awòkòlɛ̀ inyɔ hwiti è? È òhweyà hwatò nanù ema hwa rzi ìhwa, rzeke inyɔ hwiti e ihwa è?

²²Inyɔ ema e òhweyà hwatò nanù ema, hwa rzi gbeyà mòrzònje mò lìhwa, rzeke inyɔ hwiti e gbeyà mòrzònje mò lìhwa e? È tɔ̀kirzɛnɛ nanù ema e kɔwu ò lì gbèeyà mahvɛhvɛ mòhwa, ndi inyɔ hwiti e ihwa ò hwèŋge hwetawò hwe màkanɛ̀ ema hwatò hwa gbèeyà mahvɛhvɛ mòohwà e?

²³È ayèkirzɛ nanù ema e òhvi e mbenda ya ama Mòrzè, ndi rzeke e jàneyà Lohwɛ̀ erzàmbò èhwanja e unda iŋgi mbendà ja eni e?

²⁴È kààtì ya Lohwɛ̀ e òhwi nanù ema, “Hwàŋga hwatò ema hwa rza enje wònyà Yuda, hwa òhwàna Lohwɛ̀ ìrzìlàkò ò nyòla hweyà ema inyɔ wònyà Yudà e gbeyà.”

²⁵È ikayi tɛ imbenda, na òma e endà hwatò nanù òma e hvòmɛ̀nɛ̀yi ò wòrzò wò ama Lohwɛ̀. Ndi e undi tɛ e mbenda, nanù òma gbèendàkò hwa anyu wò hwèlì ŋgundu.

²⁶È hwèlì tɛ nanù ema e mòtò ema a rza enje wònyà Yudà ema a rza endàhwɛ̀, a ika tɛ e mbenda, Lohwɛ̀ a mò emeyà na mòtò ema a endàhwi.

²⁷O èŋgànɛ̀lɛ̀ hwaŋga hwatò ema hwa ika e mbenda tɔ̀ nɛ hwa rza endàhwɛ̀, hwa e uŋmɛ̀lɛ̀ inyɔ wònyà Yudà nanù ema hweyà ema e gbeyà hwe rza hvòmɛ̀nɛ̀. È ma endàhwa ndèŋgàna e òhvi mbenda ema e tìlahwì ò kaàtì ndi e rza e òŋgama.

²⁸È hwɛnì lì hwiya nanù ema, rzeketɛ hwatò ema hwa e kàrzɛ ò lì awuŋmɛ̀lɛ̀ ndi hwa hwèlì Wònyà Yudà. Ndèŋgànɛ̀lɛ̀ rzeketɛ lì endàhwa la e nyò ya e mòtò wa hwènàmà ema lì ɛneya ò mirzɔ̀ lɔ ndi lì hwèlì eyà ema e òndìrzɛ̀ mòtò ò lì hwɛ e mòtò wà Yudà.

²⁹Jàyɛ̀, ò tɛ̀ɛ̀tɛ̀ɛ e wònja ya wònyà Yudà e hwèlì ndi òŋgò mòtò ema a hwèlì wònyà Yuda ò tenì ya ŋmèma, ene ŋgàna e hwèlì ndi nanù ema, mòtò ema à mà endàhwɛ̀ ò ŋmèma, ndèŋgàna ene èwòlò e gbeyàhwa ndi na Èlìŋgɛ̀ ya ama Lohwɛ̀, rzeketɛ e ya e mbenda ema e tìlahwì. Èŋge tumba mòtò e ekàhwà na Lohwɛ̀ rzeketɛ ò hwatò hwa hwènàmà.