Read Mokpwe Ròmànì 3 Bible Online

Ròmànì 3 - Mokpwe bible

Ròmànì 3

¹Mamɛ rzɔ e hwèlì mɔ̀rzɛ̀ŋgì mò lì hwɛ mòtò wa wònyà Yudà e? Mamɛ e hwèlì mɔ̀rzɛ̀ŋgì mò lì enda mòtò e? O lì uŋmɛ̀lɛ̀ nanù ema a hwèlì ndi mòtò wa Lohwɛ̀.

²Ɛ̀ɛ ò hwèlì mɔ̀rzɛ̀ŋgì rzayi-rzayi. Eyà ya wòrzò e hwèlì ndi nanù ema, ò màà mà ama wònyà Yudà ɔndi Lohwɛ̀ à mà ŋgbe ŋmɛ̀ndì mò eni.

³Nà òma e hwèlì nanù lòŋgò la awu hwa rzi hwɛ lì gbeyà na òma Lohwɛ̀ a òhwi nanù ema hwa gbèyè, ene ŋgàna e hwèlì ndi nanù ema Lohwɛ̀ a rza ò gbeyà na òma a òhwi nanù ema a gbeyà e?

⁴Ò jɔ̀kɛ̀ rzeketɛ nanù. Tɔ ima mòtò wa hwènàmà anu rze ya mɔ̀nyɛ̀ a tànɛyi lì òhwa hweyà ema hwe rza enje jɔ̀kɛ̀. Ndi Lohwɛ̀ mɔ̀ à hwèlì jɔ̀kɛ̀ ò ihvònda ja arzɛ. Nà òma e tìlahwì ò kààtì ya Lohwà nanù ema, “A òhwi tɛ eyà, hwatò hwa àŋgàmɛ̀nɛ̀yi lì hwiya nanù ema màmɛ ema a òhwa e hwèlì ndi e jɔ̀kɛ̀. Hwa ò kàyìrzɛ̀ tɛ, ò hwɛni lì kaya mòŋgò ŋmàŋgò ŋgàna ema e hvòmɛ̀nɛ̀.”

⁵Ndi e hwèlì tɛ nanù ema hwegbèèlì hwe arzu hwe wòhwe hwe uŋmɛ̀lɛ̀ gbamù nanù ema Lohwɛ̀ a rza timbana tɔ̀ mòtò mburza, mamɛ irzɔ i tànɛyi ò lì òhwa e? Irzɔ i tànɛyi rzɔ ò lì òhwa nanù ema Lohwɛ̀ a gbèyi lùurzè, ò lì jò kɔ̀kìrzɛ̀ ò wòhwe ema i ma gbeyɛ e? (Nà gbeyàna ndi màlùtèyà mà è mòtò wa hwènàmà ò lì òhwa nanù.)

⁶Jàyɛ̀ rzeketɛ nanù. È ma hwɛ tɛ nanù ema hwèkàyìrzèlèlì hwe ama Lohwɛ̀ hwe hwɛni lùurzè, nɛ rzɔ mɔ̀ à tànɛyi lì kàyìrzɛ̀ e rze e?

⁷È ma hwɛ tɛ nanù ema hweyà hwe mòlàŋgà ema imba nà mà òhwe e uŋmɛ̀lɛ̀ nɛ Lohwɛ̀ a hwèlì jɔ̀kɛ̀ ŋgàna ema hwatò hwa rza mò ŋgba èluhwe, mamɛ rzɔ ndèŋgàtɛ̀ Lohwɛ̀ a nò kàyìrzɛ̀ nanù mɛnɛ nàa mòtò ema a gbeyà wòhwe e?

⁸Mamɛ ndèŋgàtɛ irzɔ, i rza tanɛ jò òhwa nanù ema, “Inyɛ̀ i gbeye wòhwe aŋga nanù gbaamù wò ò ɛneya e?” Ò jɔ̀kɛ̀ lòŋgò la hwatò hwa òhwa hweyà hwe wòhwe lì jò teŋgɛ̀nɛ nanù ema jò òhwi eŋge eyà. Lohwɛ̀ a ò kɔ̀kìrzɛ̀ hwaŋga hwatò ema hwa òhwa nanù ŋgàna ema e hvòmɛ̀nɛ̀yi.

⁹Mamɛ rzɔ ema irzɔ i tànɛyi lì òhwa e? È lòkɛ̀ nanù ema irzɔ ema i hwèlì wònyà Yudà ja akayi hwaŋga hwatò ema hwa rza enje wònyà Yudà e? Jàyɛ̀, rzeketɛ nanù. Imba nà mà màa lì uŋmɛ̀lɛ̀ nanù ema màyìmbì mà wòhwe mɔ̀ ndi è kànèyà hwaŋga ema hwa hwèlì wònyà Yudà na hwaŋga ema hwa rza enje wònyà Yudà ŋgàna hvɔ̀kɔ.

¹⁰Nà òma e tìlahwi ò kààtì ya Lohwà nanù ema, “O rza enje tɔ̀ mòtò tɔ̀ mɔ̀kɔ ema a tɛmì ehve-ehve na Lohwɛ̀. O rza enje tɔ̀ mòtò tɔ̀ mɔ̀kɔ.

¹¹O rza enje tɔ̀ mòtò tɔ̀ mɔ̀kɔ ema a rzɔ̀ŋgìtɛ̀nɛ̀ e jɔ̀kɛ̀ lì hvòmɛ̀nɛ̀ Lohwɛ̀, ò rza enje tɔ̀ mòtò tɔ̀ mɔ̀kɔ ema a keka ò lì hwiya Lohwɛ̀.

¹²Hwatò hwa arzɛ hwà mà kumbɛ Lohwɛ̀ e mburzà. Wɔ̀ hwa arzɛ hwà mà eŋgama. O rza enje tɔ̀ mòtò tɔ̀ mɔ̀kɔ wa awu ema a gbeyà gbamù. Ò jɔ̀kɛ̀ ò rza enje tɔ̀ mɔ̀kɔ wa awu.

¹³È mbɔrzi ema e wurza ò i wàna ja awu e uŋgba ndi nàa erzunju ya rzɔ̀ŋgɔ̀ ema e hvuluwahwi. Hwa gbeyàna jɛ̀ɛ̀mɛ̀ ja awu ò lì lukɛlɛ hwatò. Jòòhwì ema i wurza ò iwàna ja awu i gbèyi ndi nàa e kɛ̀mbi ya hvèyi.

¹⁴Jòòhwì ja mòjèmà na e me wòhwe ndi i wurza ò i wàna ja awu.

¹⁵Wɔ̀ hwa ahwèŋgɛ̀ ò lì hwìirzɛ̀ hwatò mòrziyò na lì hwa òŋwa.

¹⁶Tɔ̀ ima èki ema hwa ɛ̀ndɛ, wɔ̀ hwa hvaŋgà ndi hweyà na lì ŋgbàà hwatò mòtàkà.

¹⁷Hwanù hwatò hwa rza hwi ɛ̀yɔ̀lɛ̀.

¹⁸Hwa rza ohvanì Lohwɛ̀ tɔ̀ wɔ̀ŋgɔ̀ tɔ̀ wɔ̀kɔ.”

¹⁹O nàŋgɛ nanù irzɔ i hwi nanù ema tɔ̀ ima eyà ema e tìlahwì ò tenì ya e kààtì ya mbenda, e ɔ̀ŋgɔ ndi hwaŋga hwatò hwa arzɛ ema hwa ŋgbàahwì eŋge mbenda. O èŋgànɛ̀lɛ̀ rzɔ tɔ̀ mòtò a rza tànɛyi a òhwa nanù ema a rzu ŋmàŋgò. Tɔ a hwɛ ndi wònyà Yudà tɔ̀ hwaŋga ema hwa rza enje wònyà Yudà, tɔ̀ ima mòtò a ò tɛ̀mɛ̀ ò wòrzò wò ama Lohwɛ̀.

²⁰O èŋgànɛ̀lɛ̀ rzɔ ò rza enje tɔ̀ mòtò tɔ̀ mɔ̀kɔ ema a tɛ̀mɛ̀ ehve-ehve ò wòrzò wò ama Lohwɛ̀ èhwanja, a gbeyà mamɛ ema e mbenda e òhwa. È mbenda e hwèlì ndi ò lì uŋmɛ̀lɛ̀ hwatò nanù ema hwà mà gbeyà wòhwe.

²¹O nàŋgɛ nanù Lohwɛ̀ à mà jò uŋmɛ̀lɛ̀ nɛ hwatò hwa tɛmi ehve-ehve ò wòrzò wò eni. Èŋge ŋgàna e rza hwɛnì tɔ̀ eyà ya lì gbeyà na e mbenda ya ama Mòrzè. Iŋgi mbenda na hwà-òhwèlì hwa hwèlìŋgɛ̀ hwà mà òhwa lì hvòmɛ̀nɛ̀ eŋge ŋgàna natɛ̀ɛ na ò mòlòmɛ̀.

²²Èŋge ŋgàna e hwèlì ndi nanù ema, tɔ̀ ima mòtò ema a lòkɛ̀ Yerzù Krirztò mɔ̀ ndi à tɛmi ehve-ehve. O rza enje tɔ̀ tìŋgɛ̀ ema mòtò a hwèlì ndi wònyà Yudà tɔ̀ a rza enje wònyà Yudà.

²³Hwatò hwa arzɛ hwà mà gbeyà wòhwe, tɔ̀ mòtò a rza kànɛ lì luwa èluhwe ya ama Lohwɛ̀.

²⁴È ndèli ya ama Lohwɛ̀ e ma gbeyà Lohwɛ̀ ò lì wòwa hwatò nàa hwatò ema hwa emàyilɛ̀hwɛ̀yi ò wòrzò wò eni. A ma ŋgbàà e ndèli ya eni ò ŋgundu. A ma gbeyà nanù lì akeyà na Yerzù Krirztò mɔ̀ ema à mà rzuŋga hwatò ema hwa mò lòkɛ̀yì.

²⁵Lohwɛ̀ à mà ŋgbà Yerzù nàa jàhwèyà ò lì e ŋwèeyà. Ndèŋgana hwatò hwa ò làkìrzɛ̀hwɛ̀ èhwanja hwa mò lòkɛ̀yì. Lohwɛ̀ à mà gbeyà ndi nanù ò lì uŋmɛ̀lɛ̀ hwatò hwa arzɛ kɔ̀yi-kɔ̀yi nanù ema, a gbeyà hweyà ŋgàna ema e hvòmɛ̀nɛ̀. O e hvònda kòhwa Lohwɛ̀ à mà àjùlɛ̀ na hwatò, a rzi kɔ̀kìrzɛ̀ hwatò ema hwa gbeyà wòhwe.

²⁶Ndi ò ene hvònda ya nàŋgɛ, a uŋmɛ̀lɛ̀ hwatò nanù ema a gbeyà hweyà wa eni ŋgàna ema e hvòmɛ̀nɛ̀yi. Ndèŋgana à mà uŋmɛ̀lɛ̀ hwatò nanù ema a ò emeyà tɔ̀ ima mòtò ema a lòkɛ̀yì Yerzù.

²⁷Nà òma e hwèlì nanù, mamɛ rzɔ irzɔ ja ayekirzɛnɛ e? Tɔ̀ eyà. Ima mbenda e òhwa nanù e? Ja ayèkìrzɛ̀ ndi èhwanja ji ikayi e mbenda e? Jàyɛ̀, ja ayèkìrzɛ̀ ndi èhwanja i lòkɛ̀ Yerzù ɔ̀ndeŋgàtɛ̀ i ma luwa mòrzùŋgèlì.

²⁸O èŋgànɛ̀lɛ̀ irzɔ i kulɛyi ndi nanù ema mòtò a tɛ̀mɛ̀ ndi ehve-ehve na Lohwɛ̀, èhwanja a lòkɛ̀ Yerzù Krirztò, ndi rzeketɛ èhwanja a ikayi e mbenda.

²⁹Ŋga e lùtèyà ndi nanù ema, Lohwɛ̀ a hwèlì ndi Lohwà la wònyà Yudà mɛnɛ e? Rzeke a hwèlì hvɛ ndi Lòohwà la hwatò ema hwa rza enje wònyà Yudà e? Ò jɔ̀kɛ̀ a hwèlì hvɛ ndi Lòohwà la awu.

³⁰Lohwɛ̀ a hwèlì ndi Lohwà lɔ̀kɔ. O èŋgànɛ̀lɛ̀ rzɔ a ò wòwa hwatò ema hwà mà endàhwɛ̀ nàa hwatò ema hwa tɛmi ehve-ehve hwa lòkɛ̀ tɛ Yerzù Krirztò. Ŋgana hvɔ̀kɔ hvɛ mɛnɛ nanù ndi à ò wòwɛ hwatò ema hwa rza endàhwɛ̀ wɔ̀ hwa lòkɛ̀yì tɛ Yerzù Krirztò.

³¹Mamɛ rzɔ irzɔ jò òhwa nàŋgɛ e? Jò òhwa ndi nanù ema na òma Lohwɛ̀ à mà wòwɛ hwatò ò lì hwɛ ehve-ehve, èhwanja hwa lòkɛ̀yì Yerzù Krirztò, ene ŋgàna e òhwa ndi nanù ema hwa rza òŋgama e mbenda hvɛ e? Jàyɛ̀ rzeketɛ nanù. Ndi mamɛ ema e mbenda e òhwa yɔ ndi irzɔ i gbeyàna.