Read Mokpwe Ròmànì 5 Bible Online

Ròmànì 5 - Mokpwe bible

Ròmànì 5

¹O èŋgànɛ̀lɛ̀ rzɔ, na òma lìlòkɛ̀ la arzu lì ma gbeyɛ Lohwɛ̀ ò lì jò wòwa nàa hwatò ema hwa tɛmi ehve-ehve ò wòrzò wò eni, i lu ɛ̀yɔ̀lɛ̀ na Lohwɛ̀. È Rzàŋgò ya arzu Yerzù Krirztò yɔ ndi e gbèyi ndèŋgàna Lohwɛ̀ a e jò ŋgba ɛ̀yɔ̀lɛ̀.

²Mɔ̀ ndi à jò lìhvòhwèlì e njiya ya lìlòkɛ̀ aŋga nanù i hwiya e ndèli ya ama Lohwɛ̀. O èŋgànɛ̀lɛ̀ rzɔ jò òki mɔ̀nyɛ̀ŋgì rzayi-rzayi èhwanja i ma ika mèèmà me arzu nanù ema jò ò luwa ŋmàye mò ama Lohwɛ̀.

³Jò òki mɔ̀nyɛ̀ŋgì hvɛ ò nyòla mètàkà ema i luwa, ndèŋgànɛlɛ i hwi nanù ema mòtàkà ndi me jànà lì àjùlɛ̀.

⁴Li àjùlɛ̀ lɔ ndi lì jò ŋgba ɛ̀ɛ̀mɛ̀ ema Lohwɛ̀ a arza. Nà òma Lohwɛ̀ a jò emeyà ò wòrzò wò eni eŋge e jò janelì lìhvìtà ema Lohwɛ̀ a jò gbèeyà mamɛ ema à mà kàkɛ̀nɛ̀ nanù ema a jò gbèeyà.

⁵Jò òhvi tɛ lìhvìtà i rza timbana màa matò. Èhwanja Lohwɛ̀ à mà jò uŋmɛ̀lɛ̀ nɛ mɔ̀ à jò lìŋgàni, na òma a mà gbeyɛ e ndìŋgɛ ya eni ò lì kpèeyà ò mèèmà me arzu. À mà gbeyà ene na òma a jò ŋgbelì Èlìŋgɛ̀ yà eni yà Wòtani.

⁶Ò è hvònda ema i rzi hwɛnɛ ŋginyà ò lì àwòŋgòwànɛ̀ irzɔ hwiti, Krirztò à mà jò ŋwèeyà irzɔ hwatò hwa wòhwe ò e hvònda ema Lohwɛ̀ à mà tɛ̀yirzɛ.

⁷O ambi ò lì ɛnɛ mòtò ema a emeyà ò lì ŋwèeyà mòtò wa ehve-ehve. O tànɛyi lì hwɛ hvɛ nanù ema ò hvɛhvɛ mòtò a tànɛyi lì emeyà ò lì ŋwèeyà ò hvɛhvɛ mòtò wa gbamù.

⁸Ndi Lohwɛ̀ à mà jò uŋmɛ̀lɛ̀ nɛ mɔ̀ à jò lìŋgàni, èhwanja lìrzakò ema irzɔ i ma hwɛ ndi hwatò hwa wòhwe ɔ̀ndi, Krirztò à mà jò ŋwèeyà.

⁹Je imanɛlɛhwɛyi na Lohwɛ̀ èhwanja màyija ema Yerzù a jò kòmelì. È hwèlì tɛ nanù ema màyija ema Yerzù a jò kòmelì mɔ̀ ndi ma jò gbèyi nanù ema Lohwɛ̀ a jò emeyà ò wòrzò wò eni. Rzeke ene e jò uŋmɛ̀lɛ̀ nanù ema Krirztò a ò jò òŋgirzɛ ò hwètàtò hwe ama Lohwɛ̀ e?

¹⁰È hvònda ema i ma hwɛ hwàkɔ̀ɔ̀yèlì hwa ama Lohwɛ̀, e kpelì ema e ŋmanà wa eni à mà ŋwe è mà gbeyà nanù ema jò òhvɛnɛ màrzèèlì na Lohwɛ̀. Nà òma i ma ukɛ màrzèèlì na Lohwɛ̀ na òma e ŋmanà wa eni a hwèlì ò lòŋgɛ, ò lìrzùkù a ò jò rzùŋgà.

¹¹Ndi rzeke hvɛ tɔ̀ nanù mɛnɛ, ndi jò òki mɔ̀nyɛ̀ŋgì èhwanja Lohwɛ̀ à mà jò gbèeyà ema i hwɛ hwatò hwa eni, ò lì akeyà nà e Rzàŋgò ya arzu Yerzù Krirztò, mɔ̀ ema a jò gbèyi ò lì ukɛnɛ màrzèèlì na Lohwɛ̀.

¹²Mòtò mɔ̀kɔ ndi à mà gbeyà ndèŋgàna wòhwe wò jà ò rze, ndèŋgànɛlɛ wòhwe wɔ̀ ndi wò jànà e kpelì. O eŋgànɛ̀lɛ̀ rzɔ tɔ̀ ima mòtò a ŋwa èhwanja hwatò hwa hwènàmà hwa arzɛ hwà mà gbeyà wòhwe.

¹³Ndèŋgana Lohwɛ̀ a e ŋgba hwatò e mbenda, hwatò hwà mà hwɛ lì gbeyà wòhwe ò rze. Ndi ò rza enje tɛ tɔ̀ mbenda, tɔ̀ mòtò a rza tànɛyi lì òhwa nanù ema mòtò a undi mbenda.

¹⁴Ndi ò lì wòteya ò e hvònda ya ama Adàmu, natɛ̀ɛ nà ò e hvònda ya ama Mòrzè, e kpelì e ma òhva ŋginyà lì aka e mòtò wa hwènàmà wa arzɛ. Hwatò hwà mà hwɛ lì ŋwa tɔ̀ nɛ hwa rzi undɛ e mbenda ya ama Lohwɛ̀ na òma Adàmu à mà e unde. Adàmu ndi à mà hwɛ embànèlì ya e mɔ̀ ema à mà hwɛnɛ lì jà ema a hwèlì Krirztò.

¹⁵Hwàŋga hwatò hwa ahwakɛ hwa rza enje nyayi hvɔ̀kɔ èhwanja jàhwèyà ema Lohwɛ̀ a ŋgbelì hwatò ò ŋgundu, ema Yerzù Krirztò a jàni, i rza kiti na mamɛ wòhwe wò ama Adàmu wò jàni. È hwèlì ndi e jɔ̀kɛ̀ nanù ema hwatò rzayi-rzayi hwà mà ŋwa ò nyòla wòhwe wò ehvòwa ya mòtò. Ndi e ndèli ya ama Lohwɛ̀ e òlò rzayi-rzayi lì aka wòŋgò wòhwe. Hwatò rzayi-rzayi hwà mà luwa jàhwèyà ja ŋgundu ja ama Lohwɛ̀ tutɛ, lì akeyà na mòtò mɔ̀kɔ ema a hwèlì ndi Yerzù Krirztò.

¹⁶Ndèŋgànɛ̀lɛ̀ hvɛ jàhwèyà ja ŋgundu ja ama Lohwɛ̀ i rza kiti na mamɛ ema wòhwe wò ama Adàmu e jàni. Èŋge ehvòwa yà wòhwe ya ama Adàmu e ma gbeyà tɔ̀ ima mòtò à mà tùuwà ŋmaŋgò ò wòrzò wò ama Lohwɛ̀. Ndi iŋgi jàhwèyà i ma gbeyà Lohwɛ̀ à mà wòwa hwatò nàa hwatò ema hwa tɛmi ehve-ehve ò wòrzò wò eni, tɔ̀ nɛ hwatò hwa hwèlì ndi ò lì hwata wòhwe ò ŋmanyu ya wòhwe.

¹⁷È hwèlì ndi e jɔ̀kɛ̀ nanù ema wòhwe ema ehvòwa ya mòtò Adàmu à mà gbeye, wò ma gbeyà hwatò hwa arzɛ ò lì hwɛ ò rze ya e ŋginyà ya kpelì. Ndi eyà ema enɛyi ehvòwa mòtò ya awɔ̀kɛ Yerzù Krirztò mɔ̀ hvɛ à mà gbeye yɔ e imbami rzayi-rzayi. Ène eyà e gbeyà hwatò hwa arzɛ ema hwà mà luwɛ e ndèli ya ama Lohwɛ̀ ema e òlò, hwa ò imanɛlɛhwɛ ò wòrzò wò ama Lohwɛ̀. Hwa ò hwɛnɛ lòŋgɛ là gbìndèyà na lì hwɛnɛ ŋginyà ò ŋmanyu ya hweyà hwe arzɛ.

¹⁸O èŋgànɛ̀lɛ̀ rzɔ eŋge ehvòwa yà wòhwe ema Adàmu à mà gbeye, e ma gbeyà ema Lohwɛ̀ a tùulɛ̀ hwatò hwa arzɛ. Mòlandakò mɔ̀kɔ hvɛ mɛnɛ nanù ndi eyà ya gbamù ya awɔ̀kɛ ema Krirztò à mà gbèye e ma gbeyà hwatò hwa arzɛ hwà mà emeyàlɛhwɛ ò wòrzò wò ama Lohwɛ̀, rzìi hwa luwa lòŋgɛ.

¹⁹Nà òma Adàmu a rzi hweyàna Lohwɛ̀, e ma gbeyà tɔ̀ ima mòtò ò lì hwɛ mòtò wa wòhwe. Mòlandakò mɔ̀kɔ hvɛ mɛnɛ ema lì hweyànà là ehvòwa mòtò Yerzù Krirztò lì ma gbeye hwatò hwa arzɛ ò lì emeyàlɛ̀hwɛ̀ ò wòrzò wò ama Lohwɛ̀.

²⁰Lohwɛ̀ à mà jànà ndi e mbenda aŋga nanù wòhwe wò ahwatɛ ndi ò lì ɛndɛ ò wòrzò. Ndi tɔ̀ ima èki ema wòhwe wò nyàla, e ndèli ya ama Lohwɛ̀ e nyàla lì aka nanù.

²¹O eŋgànɛ̀lɛ̀ rzɔ, na òma wòhwe wò hwɛni e ŋginyà ò lì jànà e kpelì, nanù mɛnɛ ndi e ndèli ya ama Lohwɛ̀ yɔ hvɛ e hwɛni ŋginyà aŋga nanù hwatò hwa ò emeyàlɛhwɛ ò wòrzò wò ama Lohwɛ̀, na lì luwa lòŋgɛ la gbìndèyà, lì akeyà na Yerzù Krirztò, Rzàŋgò wà arzu.