Read Mokpwe Ròmànì 7 Bible Online

Ròmànì 7 - Mokpwe bible

Ròmànì 7

¹Wònyàmòwe kòkò, e hwèlì ndi hwatò ema e rzɔ̀ŋgìtɛ̀nɛ̀yi e mbenda. È rza hwi nanù ema e mbenda e kànèyà ndi mòtò e hvònda ema a hwèlì ò lòŋgɛ e?

²Inyɛ̀ i wòwe èmɛ̀nɛ̀nì ò lìhwa. Mòlanà a hwàahwì tɛ mùnyanà, e mbenda e òhwa nanù ema a àŋgàmɛ̀nɛ̀yi ndi lì hwɛ na mòjòmɛ̀ mò eni na òma mò hwèlì ò lòŋgɛ. Ndi mòjòmɛ̀ mò eni mò ŋwelì tɛ, e mbenda ya lìhwa e rza mò kaka hvɛ ò lìŋgi lìhwa.

³O èŋgànɛ̀lɛ̀ rzɔ, a lìyayi tɛ na òhvɛhvɛ mùnyanà ema mòjòmɛ̀ mò eni mò hwèlì lòŋgɛ nanù òma a hwèlì ndi mòlanà ema a gbèyi mòrzònje mò lìhwa. Ndi mòjòmɛ̀ mò eni mò ŋwelì tɛ, nanù òma a hwɛni wònja ò wòrzò wò e mbenda ya lìhwa e hwèlì tɛ nanù ema a hwàahwì hvɛ.

⁴Wònyamòwè kòkò, nanù ndi e hwèlì na inyɔ. È mbenda e rza ò kànèyà hvɛ èhwanja na òma Yerzù à mà ŋwe inyɔ hvɛ e ma ŋwa. O nàŋgɛ nanù, e hwèlì ndi hwatò hwa òhvɛhvɛ mòtò, Yerzù ema Lohwɛ̀ a hvùmùlɛ̀yi aŋga nanù i gbèeyà Lohwɛ̀ gbamù.

⁵Èhwanja e hvònda ema ɛ̀ɛ̀mɛ̀ ya arzu ya e mòtò wa hwènàmà e ma hwɛ lì jò kànèyà, e mbenda e ma hwɛ lì jò kɔ̀mɛ̀lɛ̀ ò màkèkìrzɛ̀nɛ̀ ma hweyàrzèlì hwe e nyàmà nyò. Ène e ma hwɛ ò lì jò gbeyà nanù ema i gbeye hweyà hwe wòhwe ema hwe jànà e kpelì.

⁶O nàŋgɛ nanù, irzɔ i ma anjiya ò tenì ya eŋge mbenda, èhwanja i ma ŋwa. O èŋgànɛ̀lɛ̀ rzɔ e mbenda ema e ma hwɛ lì jò kànèyà nàa hwàkòmì e rza jò kànèyà hvɛ. Ène e ma jò gbeyà ema ò nàŋgɛ nanù i nɔŋgɔ ndi e njiya hvènya mɛnɛ ò lì gbèeyà Lohwɛ̀. I mò gbèeyà ndi na òma èlìŋgɛ̀ ya ama Lohwɛ̀ e jò òhweyà rzeketɛ ò lì nɔŋgɔ e mbòlòwa mbenda ema e tìlahwì.

⁷Mamɛ rzɔ irzɔ i hwɛni ò lì òhwa nàŋgɛ e? Nànù òma jò òhwe ndi nanù ema è mbenda è hwèlì wòhwe e? Jàyɛ̀, i rza tànɛ ò lì òhwa nanù. È rzi hwɛ tɛ è mbenda, ò mà nà rza hwi mamɛ ema wòhwe wò hwèlì. È mbenda è rza òhwe tɛ nanù ema, mòtò à rzi hwɛnɛ nyɔ̀ŋgi nà yòma ya mòtò, òma nà rzi hwiye nanù ema ò lì hwɛnɛ nyɔ̀ŋgi yà lì òkeyà yòma yà mòtò, è hwèlì ndi eyà yà wòhwe.

⁸Ndi eŋge mbenda è mà hwèmìrzɛ̀ màlùtèyà mà ami mà wòhwe, rzìi è nò gbeyà ema nà wòteyà lì hwɛnɛ è nyɔ̀ŋgi yà nyàyi nà nyàyi jà hwema hwe hwatò. Ò rza enje tɛ tɔ̀ mbenda, nanù òma wòhwe wò rza enje tɔ̀.

⁹O ma hwɛ hvònda ema nà mà hwɛ lòŋgɛ na rzi hwiye e mbenda. Ndi e hvònda ema nà mà hwiye e mbenda, ilema ja ami ja lì gbeyà wòhwe i ma hwema ò èŋgànɛ̀lɛ̀ nà mà ŋwa.

¹⁰Nà ma ayembɛ nanù ema, e mbenda ema Lohwɛ̀ à mà ŋgbe ema e ma kanɛ̀ lì jànà lòŋgɛ, eŋge mbenda yɔ ndi e ma nò òŋwa.

¹¹Wòhwe wò mà luwa e njiya ya eni ema e akeyà ò mburza e mbenda, wò ma nò ɔnjɔ rzìi na gbeyà wòhwe. O èŋgànɛ̀lɛ̀ rzɔ wòhwe ndi wò nò òŋwi.

¹²O eŋgànɛ̀lɛ̀ rzɔ irzɔ i ma ɛnɛ nanù ema e mbenda yɔ yiti e hwèlì wòtani, ndèŋgànɛlɛ mamɛ ema e mbenda e òhwa e hwèlì wòtani, e hvòmɛ̀nɛ̀yi ndèŋgànɛlɛ e lɔ̀wu.

¹³Èŋge e uŋmɛ̀lɛ̀ rzɔ ndi nanù ema màmɛ ema e hwèlì gbamù e ma nò jàneyà ndi e kpelì e? Jàyɛ̀ rzeketɛ nanù. Rzeketɛ e mbenda ndi e nò janelì e kpelì, e hwèlì ndi ema wòhwe ndi wò akelì ò mburza ya e mbenda ema e lɔ̀wu, ò lì nò jàneyà e kpelì. Ène eyà e ma gbèyɛ̀nɛ ndi nanù aŋga nanù hwatò hwa ɛnɛ na òma wòhwe wò hwèlì. O èŋgànɛ̀lɛ̀ rzɔ e mbenda ya ama Lohwɛ̀ e ma gbeyà wòhwe wò ma uŋmɛ̀lɛ̀ e ŋginyà ya eni rzayi-rzayi.

¹⁴I hwi nanù ema e mbenda ema jò òhwa nanù e hwèlì ndi eyà ya hwèlìŋgɛ̀ ndi imba nà hwèlì ndi e mòtò wa hwènàmà ema na àhwirzɛ̀hwɛ̀ nàa mòkòmì ò wòhwe.

¹⁵Nà rza rzɔ̀ŋgìtɛ̀nɛ̀ ɛ̀ɛ̀mɛ̀ ya ami, èhwanja na rza gbeyà mamɛ ema na lìŋgàni ò lì gbeyà. Hweya ema na kɔwu hweyɔ ndi na gbeyà.

¹⁶Nàŋgɛ ema na gbeyà hweyà ema na rzà arza lì gbeyà, e uŋmɛ̀lɛ̀ nanù ema, nà mà emeyà nanù ema e mbenda e lɔ̀wu.

¹⁷Nà òma e hwèlì nanù ò jɔ̀kɛ̀ rzèketɛ imba ndi na gbeyà nanù, wòhwe ema wò hwèlì ò tenì ya ami wɔ̀ ndi wò nò kɔ̀mɛ̀lɛ̀ ò lì gbeyà nanù.

¹⁸Imba na hwi nanù ema ò rza ènje tɔ̀ eyà yɔ̀kɔ ya gbamù ò tenì ya ami. Ŋmèma mò e mòtò wa hwènàmà mòŋgò ema na hwɛni. Tɔ̀ nɛ na hwɛni ŋmèma mò lì gbeyà eyà ya gbamù ndi na rza tanɛ lì e gbeyà.

¹⁹Imba rzɔ nà rza gbeyà gbààmù ema na àrza lì gbeyà ndi eyà ya wòhwe ema na rzà lìŋgànɛ lì gbeyà yɔ ndi na gbeyà.

²⁰Nà gbèyi rzɔ tɛ mamɛ ema na rza lìŋgànɛ lì gbeyà rzeketɛ imba ndi nà e gbeyà ndi wòhwe ema wò lìya ò tenì yà ami wɔ̀ ndi wò nò kɔ̀mɛ̀lɛ̀ ò lì e gbeyà.

²¹O èŋgànɛ̀lɛ̀ rzɔ, nà mà ayembɛ nanù ema ò hwèlì mbenda ema e nò kànèyà. Tɔ̀ ima hvònda ema na arza lì gbeyà eyà ya gbamù, wòhwe ndi wò akɛlɛ lì jà ò ŋmèma mò ami.

²²O tenì ya ŋmèma mò ami, e mbenda ya ama Lohwɛ̀ yɔ ndi imba na lìŋgàni lì nɔŋgɔ ihvònda ja arzɛ.

²³Ndi na ɛnɛ ehvɛhvɛ mbenda ema e kànèyà e nyò ya ami ya mòtò wa hwènàmà. Èŋge mbenda e anana e mbenda ema ŋmèma mò ami mò lìŋgàni, eŋge mbenda e ma nò nyàmà ndèŋgàna e ma nò gbèeyà ndi ò lì hwɛ e mòkòme wa wòhwe. Ndèŋgana wòŋgò wòhwe wɔ̀ ndi wò kànèyà e nyò ya ami ya e mòtò wa hwènàmà.

²⁴Nà ma timba ndi yòma chachukɛ̀ ya mòtò! Njɛnɛ a nò kɔ̀tɔ̀ ò màà mà ene nyàmà nyò ema e nò jàneyà e kpelì e?

²⁵Nà èki Lohwɛ̀. A nò rzùŋgi lòŋgɛ la ami lì akeyà na Ŋmanà wa eni Yerzù Krirztò e Rzàŋgò ya arzu. O èŋgànɛ̀lɛ̀ rzɔ imba mbiti na hwèlì hwèhvàrzù hwehwakɛ, ŋmèma mò ami mò nò òhweyà ò lì òŋgama e mbenda ya ama Lohwɛ̀ ndi e nyò ya ami ya mòtò wa hwènàmà e òŋgama ndi wòhwe ema wò hwèlì ò tenì ya ami.