Read Mokpwe 1 Kɔ̀rintìyà 10 Bible Online

1 Kɔ̀rintìyà 10 - Mokpwe bible

1 Kɔ̀rintìyà 10

¹Wònyamòwè kòkò, nà arza ndi lì e ɔ̀ŋgɛ̀lɛ̀nɛ mamɛ ema e mà gbèyɛnɛ i mbamba ja arzu ema i mà nɔ̀ŋgɔ Morzè e hvonda hwà mà anjiye o Ìjiptò. Hwà mà hwɛ ndi o rze ya lìmbaki ema lì ma hwa tìmba. Hwà mà aka hvɛ ŋmànja mo teya na mataŋga e rzi hwɛ lì inda lìwɔti wɔ̀ɔ.

²Nà oma hwà mà hwɛ o rze yà lìmbàki, ndèŋgàna na oma hwà mà akeyà o tenì ya ŋmanjà mo teyàa, e ma hwa gbeyà wɔ̀ hwa mà lùhwìrzɛ̀hwɛ̀ rzi hwa nɔ̀ŋgɔ Morzè.

³Hwa arzɛ hwa mà làa ndi mòlelì mɔ̀kɔ mo èlìŋgɛ̀ ema mo ma uwɛ̀lɛ̀lɛ̀yi o Lohwà.

⁴Hwa mà nyɔ hvɛ ndi malìhwa mɔ̀kɔ me èlìŋgɛ̀. Hwà mà nyɔ ndi malìhwa ema Lohwɛ̀ à mà gbeye ma mà wurza o èkɔ̀kɔ̀ ya lìŋyàyi. Èŋge èkɔ̀kɔ̀ ya lìŋyàyi e ma hwɛ na wɔ̀ o hwèki hwe arzɛ ema hwà mà ɛ̀ndɛ, e ma hwɛ ndi Krirztò ŋmitɛ-ŋmitɛ.

⁵Ndi tɔ̀ nanù Lohwɛ̀ a rzi okè mɔ̀nyɛ̀ŋgì nà lòŋgo la awu o èŋgànɛ̀lɛ̀ rzɔ hwa mà ŋwa ndèŋgàna hwèèmbè hwe awu hwe èyalɛ̀nɛ̀ mòrzanjɛ̀ mo arzɛ.

⁶O naŋgɛ rzɔ hwenè hwe arzɛ hwe hwèlì ndi nàa èmɛ̀nɛ̀nì o lì jo kòkòwɛlɛ̀ nanù ema è rza okeya lì gbeyà wòhwe nà omà wɔ̀ hwà mà gbeyà.

⁷È rzì keka hvɛ tɔ̀ lìkanɛ̀lɛ̀lɛ̀ hwèrzùmbù na omà lòŋgò la awu hwà mà gbèye. È kààtì ya Lohwà e ohwi nanù ema, “hwaŋga hwatò hwà mà lìya o rze o lì làa na lì nyɔ o ndèma ema è ma tìmba ndi ya lì gbeyà hweyà hwe ndɔ̀ki o worzò wo erzumbu.”

⁸Ì rzì kèka lì gbeyà wòhwe wo mòrzònje nà oma lòŋgò la awu lì ma gbeye, Lohwɛ̀ à mà hwa kɔ̀kìrzɛ̀ ema mbàŋgɛ yà hwèkolì na hweyàwò hwe hwaŋga hwatò hwà mà kùwa lì ŋwa o wùnyà wɔ̀kɔ.

⁹I rzi kèka lìkèkirzɛ Rzàŋgo nà oma lòŋgò la awu hwà mà gbèye rzìi màahwà mà hwa rzòmbà rzìi hwa kùwa lì ŋwa.

¹⁰Ì rzi keka lì àyiŋgòwɛ̀ nà omà lòŋgò la awu hwà mà gbèye rzìi Lohwɛ̀ a oma è aŋgèlì ya kpelì e ja lì kùwà lì hwa oŋwa.

¹¹Hwenè hweyà hwe arzɛ hwe mà hwa gbèyɛ̀nɛ ndi nàa èmɛ̀nɛ̀nì o hwahvɛhvɛ hwatò. Hwenè hweyà hwe àrzɛ hwe tìlahwì ndi nàa mayowà mà ŋginyà o lì jò kòkòwɛ̀lɛ̀. Irzɔ i hwèlì ndi o hvonda ema lìrzukù la ene rze lì ma kombɛ̀nɛ̀ o lì jà.

¹²Hwàŋga ema hwa lùteyà nanù ema hwa tɛmì ehve-ehve o lì lòkɛ̀ hwa aŋgòwè hwa rzi ja lì undeya.

¹³Tɔ̀ ima lìkèkìrzɛ ema ò lu lì hwèlì ndi maŋga ema mà nyàmɛ̀hwɛlɛ nà hwatò. Ndi Lohwɛ̀ à ika lìkàkɛ̀nɛ là eni nyàyi ema ò rza hwɛnì lì kèkìrzɛhwɛ lì akà mamɛ e ŋginyà yà àŋgɔ è rzà tanɛ̀yi lì hwanɛ̀. Ò èŋge hvonda yà lìŋgi lìkèkìrzɛ̀ à ò ŋgba ŋginyà ò lì ajùlɛ̀nɛ̀ lìŋgi lìkèkìrzɛ̀ nanù rzìi à ò lùhweyà hvèyò yà lì li àrzòlòhwɛ̀.

¹⁴Ò èŋgànɛ̀lɛ̀ rzɔ wònyamòwè kòkò e rzi keka lì kànɛlɛlɛ hwèrzùmbu.

¹⁵Imba na e ohwìrzɛ̀nɛ̀ ndi nàa hwatò ema e hwi wotumba e àkàyìrzɛ̀ inyɔ hwiti o mamɛ ema Nà è ohweyà.

¹⁶Lìwòndè ema i gbeyàna o lì nyɔ̀ɔnɔ lìrzako la lì làa la Rzàŋgo lì hwèlì ndi o lì ŋgbaà Lohwɛ̀ jèka o nyòla e kpelì ya ama Krirztò. Èhvòòtò hvɛ ema i kanda. Je lelì tɛ oma i rzɔ na Krirztò i hwèlì ndi mɔ̀kɔ o nyo ya eni.

¹⁷Kànatɛ o hwèlì ndi ehvòòto yɔ̀kɔ, tɔ̀ nɛ i koki, irzɔ hwa arzɛ ì hwèlì ndi nyo hvɔ̀kɔ èhwanja ikahwa ndi ehvòòto yɔ̀kɔ o lì làa.

¹⁸È lùteyà hwatò hwa Irzàyɛ̀lì, hwaŋga ema hwa làa mamɛ e ŋgbàahwi nàa màahweyà rzeke hwa aŋgbàànɛ mamɛ e wurzà o èwòlò ya ama Lohwɛ̀ ya lììyɔ̀ là màkanɛ̀.

¹⁹È ɔ̀ŋgɛ̀lɛ̀ rzɔ nanù ema nà ohwa ndi ema hwèrzùmbù tɔ̀ mòlelì mò hwèrzùmbù mò hwèlì ndi eyà e?

²⁰Jàyɛ̀! Mene melelì me arzɛ me ŋgbààhwà ndi nàa jàhwèyà o hwèlìŋgɛ̀ hwe wòhwe, rzeketɛ o ma Lohwà. Nà rza arza nanù ema e hwɛ hwèyòrzà nà hwèkùmùtì.

²¹È rza tànɛ̀yi lì nyɔ̀yeyà o lìwonde la ama Rzàŋgo rzi è nyɔ̀yeyà hvɛ o lìwònde la hwèlìŋgɛ̀ hwe wòhwe! È rza tànɛyi lì leeya o tewèlì ya hweleelì ya ama Rzàŋgo rzi e leeya hvɛ o tewèlì ya hwèlìŋgɛ hwe wòhwe.

²²Ja àrzà ndi lì gbeyà ema Rzàŋgo a hwɛnɛ lìrzìŋga e? Irzɔ jo ɔ̀ŋgɛ̀lɛ̀ ndi nanù ema ji imbamì lì mò akà e?

²³È ohwahwi nanù ema, “I hwɛnì wònjà o lì gbeyà tɔ̀ mamɛ.” Aŋga mɔ̀ e jɔ̀kɛ̀ ndi rzeketɛ hwèèmà hwe arzɛ ndi hwe lɔ̀wu. “I hwɛnì wònjà o lì gbeyà tɔ̀ mamɛ” ndi rzeke hwèèmà hwe arzɛ ndi hwe lɔ̀yìrzɛ̀.

²⁴Tɔ̀ mɔ̀kɔ wà anyu à rzi keka ndi lì arzɛlɛ e hwe eni hweyà mɛnɛ. Ndi a ɔ̀ŋgɔ hwèèmà ema hwe lɔ̀ɔ̀nɔ̀ hwahvɛhvɛ hwatò.

²⁵È hwɛnì wònja o lì làa tɔ̀ mamɛ ema ya ahwìrzɛ̀hwɛ o e lùwa e rzi hwɛ lì ijòwa mìijowelì ema me o jàneyà mètàkìrzɛ̀nɛ o ŋmèma, lì hvomɛ̀nɛ̀ mamɛ o andi.

²⁶È tìlahwì o kààtì ya Lohwà nanù ema, “È rze na hwèemà hwe arzɛ ema hwe hwèlì o tenì hwe hwèlì ndi e hwe ama Rzàŋgo”

²⁷O yohwɛhwɛ tɛ na mòtò ema à rza hwiyɛ Yerzù o lì làa mòlelì rzi o kàmanɛlɛ nanù ema ò ɛ̀ndɛ̀, làa tɔ̀ mamɛ ema e o rzèkahwɛlɛ e rzi hwɛ miijowelì lì hvomɛ̀nɛ̀ mòlelì, aŋga nanù o rza tàkirzɛ mèèmà mo aŋgɔ.

²⁸Ndi mòtò a o òhwèlì tɛ nanù ema “monò mòlelì mo ma ŋgbààhwà ndi na jàhwèyà o hwèrzùmbu.” O rzi mo làa, o èhwanja òŋgo mòtò a o hwèlì, na metàkirzɛnɛ me ŋmèma.

²⁹Nà rza ohwa ndi o ŋmèma mo aŋgɔ, ndi mèèmà mo ɔ̀nɛyi mòtò. Mamɛ e gbeyà ema mèèmà mo òhvɛhvɛ mòtò ema mo mò tàkirzɛ, mo no gbeyà ema na rza gbeyàna è wònjà ya ami.

³⁰Nà hwɛnì tɛ mòlelì mo ami ema na ŋgbàanà Lohwɛ̀ jeka, njɛnɛ òŋgo ema a no òhwana hweyà hwe wòhwe lì hvomɛ̀nɛ̀ mòŋgo mòlelì e?

³¹Ène ŋgàna e hwèlì ndi nanù ema, tɔ̀ mamɛ ema o làa tɔ̀ o nyɔ̀, tɔ̀ mamɛ ema o gbeyà, o hwe gbeyàne nà èluhwe ya ama Lohwɛ̀.

³²È lìya nyayi ya ŋgàna ema e rza gbeyà mòhvùŋgu nà wònyà Yudà, hwaŋga ema hwa rza enje wònyà Yudà tɔ̀ na miitelì me ama Lohwɛ̀.

³³È gbèyè ndi nà oma imba nà gbeyà. Nà kèka lì okìrzɛ̀ tɔ̀ ima mɔ̀ mɔ̀nyɛ̀ŋgì o hweyà hwe arzɛ ema na gbeyà, na rza ɔ̀ŋgɛ̀lɛ̀ ndi hweyà hwe ami mɛnɛ ndi o gbamù wo hwatò hwa arzɛ aŋga nanù Lohwɛ̀ a hwa rzùŋgà wɔ̀ hwa arzɛ.