Read Mokpwe 1 Kɔ̀rintìyà 13 Bible Online

1 Kɔ̀rintìyà 13 - Mokpwe bible

1 Kɔ̀rintìyà 13

¹Nà tànɛyi tɛ lì ohwa i mbɔrzi jarzɛ ja hwatò hwa hwènàmà anù rze na e jɔ jà i aŋgèlì rzìi na rzì ohve ndìŋgɛ e mbɔrzi ya amì è hwɛ ndi nàa èhwèlèlè ya mokèŋge ema e gbeyà mɔ̀tɔ̀wù mo ŋgundu, tɔ̀ ŋgɛ̀ŋgi e ma yo òkahwa.

²Tɔ̀ na hwɛnɛ hvɛ ndi jàhwèyà ja lì ohwa ŋmɛ̀ndì mo Lohwɛ̀ nɔke-nɔke, tɔ̀ na hwɛnɛ hvɛ ndi lìhwiyè la lì rzɔ̀ŋgìtɛ̀nɛ̀ la ìwùndɛ̀ ja arzɛ. Nà tànɛyi hvɛ tɛ lì hwɛnɛ̀ lì lòkɛ̀ ema lì no gbeyà ema na ohweyà e hvàko, ema e tikowe hwetɛmelì hweni. Rzi na rzi uŋmɛ̀lɛ̀ hwatò e ndìŋgɛ, nanù oma na rza enje tɔ̀ eyà.

³Nà tànɛyi tɛ lì ŋgbà hwatò hwema hwe ami hwe arzɛ ema na hwɛnì rzìi na hwɛ̀meyà hvɛ hwatò e nyo ya ami ema hwa è rzɛ̀lɛ̀ rzi na rzi uŋmɛ̀lɛ̀ hwatò e ndìŋgɛ. Ima gbamù ene eyà e no gbèeyà e?

⁴È mòtò ema a uŋmɛ̀lɛ̀ hwatò e ndìŋgɛ, a ohvi lì àjùlɛ̀, a enji, a rza ohvi inona, a rza ayèkirzɛ.

⁵È mòtò ema a uŋmɛ̀lɛ̀ e ndìŋgɛ a rza ambirzɛnɛ, a rza enje wɔ̀, a rza tata, a rza uta mawurze o ŋmèma mo eni.

⁶È mòtò ema a uŋmɛ̀lɛ̀ hwatò e ndìŋgɛ, e rza oka mɔ̀nyɛ̀ŋgì o hweyà hwe wòhwe ndi à okana hweyà hwe jɔ̀kɛ̀ mɔ̀nyɛ̀ŋgì.

⁷È mòtò ema a uŋmɛ̀lɛ̀ hwatò e ndìŋgɛ, a rza kìnyɛ̀lɛ̀, a ohvi lì lòkɛ̀ ihvonda ja arzɛ. A hwɛnì lìhvìtà ihvonda ja arzɛ, a kakànà hvɛ hwèèmà hwe arzɛ mèèmà ihvonda ja arzɛ.

⁸È ndìŋgɛ e rza kùwa. Ndi hweyohwèlì hwe ŋmɛ̀ndì mo ama Lohwɛ̀, hwe kùwa. Li ohwa la ihvɛhvɛ mbɔrzi lì ohvɛ lì kùwa. È hwɛ ndi lìhwiyè, lɔhvɛ lì kùwà.

⁹Li hwiya la arzu la hweyà, lì rza uki lìmɛni. Li ohwa la ŋmɛ̀ndì mo ama Lohwɛ̀ lɔhvɛ lì rza uki tɔ̀ èki.

¹⁰Ndi eyà ema e ondi o ŋmanyu, e jelì tɛ, e yɔ ema e rza ondɛ e nyɔ̀ŋgɔ̀.

¹¹È hvonda nà mà hwɛ ŋmanà, nà mà ohwa ndi nàa ŋmàna, màlùtèyà ma ami ma mà hwɛ ndi nàà mà ŋmanà ndèŋgàna nà mà lùtèyà ndi nàa ŋmanà. Nàŋgɛ rzɔ ema nà mà kòkɛ nà mà hwɛmɛ hweyà hwe àrzɛ hwe ŋmanà.

¹²Mamɛ ema jɛ̀ɛ̀ ɛnɛ̀ naŋgɛ̀ e hwèlì ndi nàa lìmbaki ndi o mburzà hvonda ja o ɛnɛ Lohwɛ̀ wòrzo na wòrzo. Tɔ̀ naŋgɛ nanù, imba na rza rzɔ̀ŋgìtɛ̀nɛ̀ Lohwɛ̀ kɔ̀yi-kɔ̀yi, Ndi o e hvonda ema e o jɛ̀ɛ̀, na o mo rzɔ̀ŋgìtɛ̀nɛ̀ na oma mɔhvɛ a no rzɔ̀ŋgìtɛ̀nɛ̀ kɔ̀yi-kɔ̀yi.

¹³O hwèlì hweyà hweyàwò ema hwe hwèlì, ndi lì lòkɛ̀, lìhvìtà, nà e ndìŋgɛ, ndi eyɔ ema e akayi hwe arzɛ e hwèlì ndi e ndìŋgɛ.