Read Mokpwe 1 Kɔ̀rintìyà 14 Bible Online

1 Kɔ̀rintìyà 14 - Mokpwe bible

1 Kɔ̀rintìyà 14

¹Inyɛ̀ e nyɔ̀ŋgi ya anyu e hwɛ ndi e ndìŋgɛ ya lì lìŋgana hwatò. Ndi e hwɛnì hvɛ lì ohva èŋge nyɔ̀ŋgi ya màhwèyà ema mà uwɛ̀lɛ̀lɛ̀yi o èlìŋgɛ̀ yà wòtani. Rzɛhvɔ̀ni jàhwèyà ja lì ohwà o lì wùlùwà ŋmɛ̀ndì mò ama Lohwɛ̀.

²Èhwanja o òhvi tɛ è ŋgìlì yà lì ohwà o ihvɛhvɛ mbɔrzi, ò wa, ò ohwìrzɛ̀nɛ̀ ndi Lohwɛ̀, rzeketɛ hwatò. Ò jɔ̀kɛ̀ tɔ̀ mòtò tɔ̀ mɔ̀kɔ a rzà tanɛ̀yi lì o rzɔŋgìtɛ̀nɛ̀. Ò wòteyà ndi lì ohwà o è ŋginyà yà èlìŋgɛ̀ yà wòtani. Iŋgi johwì ja arzɛ i hwɛ ndi johwi ja wùndɛ̀ ema hwatò hwa rza rzɔ̀ŋgìtɛ̀nɛ̀.

³Ndi è mòtò ema à ohwa ŋmɛ̀ndì mo ama Lohwɛ̀, mɔ̀ à gbeyà ndi nanù o lì ètìrzɛ̀ hwahvɛhvɛ hwatò, à hwa kɔmɛ̀lɛ̀ o lòŋgɛ, na lì hwa lɔ̀kɔ hvɛ meèmà.

⁴È mòtò ema à ohwa ihvɛhvɛ mbɔrzi, a àyètìrzɛ̀ ndi mɔ̀ ŋmìti. Ndì è mɔ̀ ema à ohwa ŋmɛ̀ndì mo ama Lohwɛ̀, à ètìrzɛ̀ ndi wolìya wo mitèlì me àrzɛ.

⁵Nà lìŋgàni ema inyɔ hwa arzɛ e ohwa o ihvɛhvɛ mbɔrzi. Ndi na lìŋgana rzayì-rzayì ema inyɔ hwa arzɛ e ohwe ŋmɛ̀ndì mo ama Lohwɛ̀. È mòtò ema a ohwa ŋmɛ̀ndì mo ama Lohwà a akayi e mɔ̀ ema a ohwa ihvɛhvɛ mbɔrzi. Èhwanja natɛ̀ɛ nà ohvɛhvɛ mòtò a ohwà o lì tikowa mamɛ ya arzɛ ema a ohwa aŋga nanù oma o ma ètìrzɛ̀ wolìya wo è ndawò yà mitèlì yà arzɛ.

⁶Ìi wònyàmòwe kòkò, imba nà è jɛlɛlɛ tɛ rzi na è ohwàna ihvɛhvɛ mbɔrzi, nɛ imba na tànɛyi lì è òŋgòwàna e? Ndi nà è janelì tɛ hwèwùlùwèlì, ema Lohwɛ̀ a no wuluhwèlì tɔ̀ lìhwiyè ema na ohvi, tɔ̀ lì ohwa la ŋmɛ̀ndì mo ama Lohwɛ̀, tɔ̀ hweyà ema na o e okolɛ̀, iŋgi tumba ja hweyà ndi i tànɛyi lì e òŋgòwàna.

⁷Inyɛ̀ i wowe hwema nàa è hvalìŋga na mòndìndì ema hwe gbeyànɛhwɛ o lì oka mòrzìkì. Nɛ mòtò a tànɛyi lì hwiyà mɔ̀rzɔ̀kɔ̀ ema hwatò hwe emba, e hwèlì tɛ ema hwèyɔ̀ hwe rza okahwi tɛ na oma hweyɔ hwe arzàyɛlɛ e?

⁸Ndeŋgàna è mòtòŋgèlì wà e rzehwa yà njùma, à rza è toŋgì tɛ na oma rzehwa ya njùma a tòŋgahwa, o lì rzaŋga hwatò, nɛ̀ rzɔ hwatò hwa tànɛyi lì wòŋgirzɛnɛ o lì ana e njùmà e?

⁹È hwèlì ndi nanù mɛnɛ nà inyɔ hvɛ. Inyɔ̀ è ohwìrzɛ̀nɛ̀ tɛ hwatò nà mbɔrzi ema hwa rzà hvɔŋgɛ̀, nɛ wɔ̀ hwa tànɛyi lì hwiyà mamɛ ema inyɔ e ohwa e? È hwɛ ndi nàa tɔ̀ mamɛ ema o òhwa e aka ndi o mbɛ̀hvɛ̀nì.

¹⁰È rze e ondi na nyayi na nyayi ja mbɔrzi, tɔ̀ ima mbɔrzi hvɛ e ohvi hwatò ema hwa e rzɔ̀ŋgìtɛ̀nɛ̀.

¹¹Ndi nà rza rzɔ̀ŋgìtɛ̀nɛ̀ tɛ mbɔrzi, nà hwɛ ndi ŋmɛ̀ni nà tɔ̀ njɛnɛ ema à ohwa èŋge mbɔrzi, mɔhvɛ̀ a hwɛ ndi ŋmɛ̀ni na imba.

¹²Ènè eyà yɔ hvɛ̀ e hwèlì hvɛ e jɔ̀kɛ̀ na inyɔ. Nà omà e hwɛnì e nyìrzɛ̀ yà lì hwɛnɛ̀ màhwèyà ema mà uwɛ̀lɛ̀lɛ̀yì o èlìŋgɛ̀ yà wòtani, e kèkè e hwɛ̀nɛ ndi màhwèyà ema mà gbeyà mitèlì me oŋga.

¹³Ò èŋgànɛ̀lɛ̀, tɔ̀ ima mòtò ema a ohwa o ihvɛhvɛ mbɔrzi, a kanɛ̀ hvɛ nanù ema, Lohwɛ̀ a mo ŋgbe e ŋgilì yà lì tikòweyà mamɛ ya arzɛ ema a hwèlì a ohwa.

¹⁴È hwèlì tɛ ema na kanɛ̀ nà ihvɛhvɛ mbɔrzi, èlìŋgɛ̀ ya ami ndi e hwèlì e kanɛ̀, ndi na rza rzɔ̀ŋgìtɛ̀nɛ̀ mamɛ na ohwa.

¹⁵Ò èŋgànɛ̀lɛ̀ rzɔ mamɛ nà hwɛnì lì gbeyà e? Nà o kanɛ̀ na èlìŋgɛ̀ ya ami, rzi na o kanɛ̀ hvɛ o ŋmèma mo ami. Nà o emba jèembò na èlìŋgɛ̀ ya ami, rzi nà o embà hvɛ jèembò na ŋmèma mo ami.

¹⁶Inyɔ̀ ye èkì tɛ Lohwɛ̀ o èlìŋgɛ̀ mɛnɛ, nɛ rzɔ òŋgo mòtò ema a hwèlì o ìtììtènì ja anyu ema a rza rzɔ̀ŋgìtɛ̀nɛ̀, mɔ̀hvɛ a tànɛyi lì ohwa nanù ema, “Amɛ̀nì” e ema mɔ̀ à rza rzɔ̀ŋgìtɛ̀nɛ̀ mamɛ ema e ohwi e?

¹⁷Tɔ̀ o kanɛ̀ gbamù o lì eka Lohwà, e rza òŋgòwàna hwahvɛhvɛ hwatò ema hwa o òkànèyà.

¹⁸Nà èki Lohwà ema imba nà ohwa o ihvɛhvɛ mbɔrzi rzayì-rzayì lì aka tɔ̀ ima mɔ̀ wa anyu.

¹⁹Ndi o tenì ya hwèlìyelì hwe Ndawò yà Lohwà, nà lɔ̀wu lì ohwa hweyà hweta ema hwe òŋgòwànà hwàhvɛ̀hvɛ̀ hwatò ò lì rzɔ̀ŋgìtɛ̀nɛ̀, lì aka lì ohwa, lìyòmè la hwekolì hwe hweyà o mbɔrzi ema tɔ̀ mòtò a rzà rzɔ̀ŋgìtɛ̀nɛ̀.

²⁰Ìi wònyàmowe kòkò, e rzi hwɛ̀nɛ̀ hvɛ màlùtèyà ma hwàna. È hwɛ ndi nàa jùma hwàna ema hwa rza hwiyɛ wòhwe. Ndi o màlùtèyà ma anyu e hwɛ ndi nàa hwàmbaki hwa hwatò.

²¹È tìlahwì o kààti ya Lohwà ema, Rzàŋgo a ohwi nanù ema, “Nà gbeyà hwatò ema hwa ohwa ihvɛhvɛ mbɔrzi, o lì ohwìrzɛ̀nɛ̀ hwatò hwa amì. Nà gbeyà hvɛ mìyùumbù me hwàyɛ̀ni hwa hwatò ò lì ohwirzɛ̀nɛ̀ hwatò hwa ami. Ndi tɔ̀ nanù, hwa rzà o no òkànèyà.”

²²Ò èŋgànɛ̀lɛ̀ rzɔ, e ɛnɛ̀ nanù, ema lì ohwà la ihvɛhvɛ mbɔrzi lì hwèlì ndi embànèlì, o hwaŋga hwatò ema hwa rza lòkɛ̀ Krirztò, ndi rzeketɛ o hwaŋga hwatò ema hwa lòkɛ Krirztò. Li ohwa la ŋmɛ̀ndì mo ama Lohwɛ̀, mo hwèlì ndi embànèlì, o hwaŋga hwatò ema hwa lòkɛ rzeketɛ o hwaŋga hwatò ema hwa rza lòkɛ̀ɛ.

²³Tɔ̀ nɛ e hwèlì nanù, hwatò ema hwa rza lòkɛ̀, tɔ̀ hwatò ema hwa rza rzɔ̀ŋgìtɛ̀nɛ̀ hwenè hweyà, wɔ̀ hwa jelì tɛ o hwèlìyelì hwe anyu hwe ndawò ja Lohwà, rzi hwa hweyà nɛ tɔ̀ imà mòtò a ohwa na èhvɛhvɛ mbɔrzi, wɔ̀ hwa ɔ̀ŋgɛlɛ ndi nanù ema e ma kpanyà.

²⁴Ndi e hwèlì tɛ ema inyɔ̀ hwa arzɛ è ohwà ŋmɛ̀ndì mò ama Lohwɛ̀, rzi hwatò ema hwa rza lòkɛ̀ Krirztò, tɔ̀ hwatò ema hwa rza rzɔ̀ŋgìtɛ̀nɛ̀ hwenè hweyà, hwa jelì tɛ o wolìya wo anyu, wɔ̀ hwa emeyà nanù ema hwa gbeyà wòhwè, ndèŋgànɛ̀lɛ̀ wɔ̀ hwà mà tuwa ŋmaŋgo ò worzò wo ama Lohwà.

²⁵Nà omà hwaŋga hwatò hwa okànèyà mamɛ ema e ohwà, màlùtèyà ma awu ma wùndɛ ma wulùwàhwà, o ma hwà mà rzùma o màwɔ̀ŋgɔ̀ŋgɔ̀ ma awu o lì kànɛ̀ Lohwɛ̀. Rzi hwa wòteyà lì ohwà nanù ema, “Nà è jɔ̀kɛ̀ Lohwɛ̀ à hwèlì anù ìtììtènì ja anyu.”

²⁶Ìi wònyàmowe kòkò, enè eyà ema na ohwa nanù, e hwèlì ndi ema, è arzàŋgànɛ̀yi tɛ o Ndawò yà Lohwà, mòtò mɔ̀kɔ à ohva mɔ̀rzɔ̀kɔ̀ o lì èmba, ohvɛhvɛ mòtò a ohva eyà ya lì okòlɛ̀, ohvɛhvɛ mòtò a ohvà eyà ya lì ohwà ema Lohwɛ̀ a mo wuluhwèlì, ohvɛhvɛ mòtò a ohva eyà yà lì ohwà ò ihvɛhvɛ mbɔrzi. Ohvɛhvɛ mòtò hvɛ a tikòwà mamɛ ema e ohwàhwì o ihvɛhvɛ mbɔrzi. Ndi tɔ̀ mamɛ ema e gbèyɛ̀nɛ̀, e hwɛnì ndi lì è òŋgòwànà ŋmèmba mo arzɛ.

²⁷Hwatò ema hwa hwɛnì lì ohwà o ihvɛhvɛ mbɔrzi, hwa rza hwɛnì lì aka hwàyàwo. Wɔ̀ hwa hwɛnì ndi lì ohwà mɔ̀kɛ-mɔ̀kɛ. Ndèŋgànà mòtò mɔ̀kɔ a hwɛnì lì tikoweya hwatò mamɛ ya arzɛ ema e ohwahwi.

²⁸Ò rza enje hvɛ tɛ tɔ̀ mòtò tɔ̀ mɔ̀kɔ aŋga ema a tànɛyi lì tikowa mamɛ ema e ohwahwi o ehvɛhvɛ̀ mbɔrzi, e mòtò ema a ohwa o ehvɛhvɛ mbɔrzi, a hwɛnì rzɔ ndi lì lìya ŋmɛ̀ɛ, rzi a ohwirzɛ̀nɛ̀ ndi mɔ̀ ŋmìti na Lohwɛ̀.

²⁹È hwèlì tɛ ema hwatò hwàhwàkɛ̀ tɔ̀ Hwàyàwò hwa ohwa tɛ ŋmɛ̀ndì mo ama Lohwɛ̀, inyɛ hwanɛ̀yi hwatò hwa arzɛ hwa okànèyà kɔ̀yi-kɔ̀yi, o lì hwiya ŋga mamɛ ema hwa ohwà e hvomɛ̀nɛ̀yi.

³⁰È hwèlì tɛ ema mòtò mɔ̀kɔ ema a hwèlì o ŋmèmba, a lu tɛ ŋmɛ̀ndì ema Lohwɛ̀ à mà wuluhwèlì, e mòtò ema a hwèlì a ohwa, a hwɛnì lì hwɛmɛ jòòhwì ja eni.

³¹O ène ŋgàna, hwatò hwa arzɛ ema hwa ohwà ŋmɛ̀ndì mo ama Lohwà, wɔ̀ hwa àrzɛ, hwa hwɛnɛ̀ hvondà o lì ohwà, mɔ̀kɛ-mɔ̀kɛ. Aŋga nanù hwatò hwa àrzɛ hwa okowà na lì kɔmɛ̀lɛ̀hwɛ̀.

³²È hwiye nanù ema è wɔ̀ ema hwa ohwa ŋmɛ̀ndì mo ama Lohwɛ̀ hwa hwɛnì ndi lì kaneyà jàhwèyà ema Èlìŋgɛ̀ yà Lohwà e hwa ŋgbelì.

³³Èhwanja Lohwɛ̀ a rza enje Lohwà la lùwànje, a hwèlì ndi Lohwà la ɛ̀yɔ̀lɛ̀. Nànù ndi e hwɛnì lì hwɛ o hwèlìyelì hwe hwatò hwa ama Lohwà.

³⁴Hwaalanà hwa hwɛnì lì lìya ŋmɛ̀ɛ o tenì yà màndawò ma ama Lohwà. Hwa hwɛnì ndi lì arzìhwirzɛ̀, nà omà e mbenda ya ama Morzè e ohwì.

³⁵Hwalanà hwa a rzi tɛ ò lì ijòlɛ̀lɛ̀ eyà, hwa ijowè ndi mejomè me awu, o màandà mà awu. Èhwanja e hwèlì ndi eyà ya ìrzɔnì ema molanà a ohwe eyà o tenì yà e Ndawò yà Lohwà.

³⁶Inyɔ hwatò hwa e mbowà ya Kɔ̀rintò, eyà ya ama Lohwɛ̀ e ma uwɛ̀lɛ̀lɛ̀yi ndi nà inyɔ e? Ŋgà inyɔ mɛnɛ ndi è hwèlì hwatò ema eyà yà Lohwà e ùkelì e?

³⁷È hwèlì tɛ ema o hwèlì mòtò mɔ̀kɔ ema à ɔŋgɛ̀lɛ ema mɔ̀ à hwèlì ndi Mòòhwèlì wà Èlìŋgɛ̀ tɔ̀ mòtò ema a ŋgbàahwì jàhwèyà ema jo uwɛ̀lɛ̀lɛ̀yi o hwèlìŋgɛ̀, inyɛ a hwiye nanù ema, mamɛ ya arzɛ̀ ema na hwèlì na e tìleya nanù, hwe hwèlì ndi hweyà ema Rzàŋgo A ohwi ama e gbeye.

³⁸Mɔ̀ a rzɔ̀rzi tɛ enè eyà, inyɔ hvɛ e mo rzɔ̀rzè.

³⁹O èŋgànɛ̀lɛ̀, wònyànyàŋgò hwa ami, e hwɛnɛ̀ e nyɔ̀ŋgi ya lì ohwà ŋmɛ̀ndì mò ama Lohwɛ̀, ndèŋgànà e rzi aya hwahvɛhvɛ hwatò ò lì ohwà là ihvɛhvɛ mbɔrzi.

⁴⁰Ndi e hwɛnì ndi lì gbeyà hweyà hwe arzɛ rzilìlìlì na oma hwe hwɛnì lì gbeyà hwa.