Read Mokpwe 1 Kɔ̀rintìyà 4 Bible Online

1 Kɔ̀rintìyà 4 - Mokpwe bible

1 Kɔ̀rintìyà 4

¹È aŋgàmɛ̀nɛ̀yi lì jo lùtèyà nàa hwàgbèèlì hwa ama Krirztò, ema Mɔ̀ a ikayi o lì telɛlɛ hwatò e wùndɛ̀ ya ama Lohwɛ̀ ya jɔ̀kɛ̀ ema e utami.

²Mamɛ ema e arzàhwà na hwanù hwàgbèèlì e hwèlì ndi nanù ema hwa hwɛ jɔ̀kɛ̀ na èwòlò ya awu, ema Rzàŋgo wa awu a hwa ŋgbelì.

³O imba mbiti, na rza hwɛnì hvonda e hwèlì tɛ ema inyɔ tɔ̀ hwahvɛhvɛ hwatò hwa no kàyìrzɛ̀ o èwòlò ema na gbeyà. Nà rza tànɛyi lì àkàyìrzɛ̀ tɔ̀ imba mbiti o èwòlò ema na gbeyà.

⁴Ŋmèma mo ami mo rzaŋgi o tenì, ndi èŋge e rza no ŋgbelì wònjà o lì ohwa nanù ema na hvomɛ̀nɛ̀yi. Rzàŋgo Mɔ̀ ŋmìti ndi à no kàyìrzɛ̀.

⁵O èŋgànɛ̀lɛ̀ rzɔ, o rza akɛlɛ hwèkàyìrzèlì o tɔ̀ ima mòtò, natɛ̀ɛ e hvonda ya jɔ̀kɛ̀ e uka. Hwèkàyìrzèlèlì hwe o jà, e hvonda e ma e Rzàŋgo Yerzù Krirztò a o jɛ̀ɛ̀. A jelì tɛ, a jànà o ŋmàye hwèŋge hwema ema hwe e utami o jììtìtì, rzi a hvulùwa hvɛ màlùtèyà ema mà utami o mèèmà me hwatò. O èŋge hvonda ndi Lohwɛ̀ a eka tɔ̀ ima mòtò o mamɛ ema a gbèyi.

⁶Wònyanyàŋgò nà ìndòmɛ̀ jà ami è, ò hwenè hweyà hwe arzɛ ema nà ohwa, hwe hwèlì ndi ò nyòla ama Apòlòrzì nà imba, ò lì è òŋgòwàna ò lì rzɔ̀ŋgìtɛ̀nɛ̀. Nà tùhwi ndi irzɔ hwahwàkɛ nà ɛ̀mɛ̀nɛ̀nì, aŋga nanù, è okowa è mbɔrzi ema e ohwa nanù ema, “Moto à gbeyàna ndi hweyà ema hwe tìlàhwì.” Tɔ̀ mɔ̀kɔ wa anyu arza ayèkirzɛ ema o no mòtò mɔ̀ ndi à rzilɛ ɔ̀nɛyi.

⁷Njɛnɛ mɔ̀ à ò kàrzàmìrzɛ̀hwɛ̀ lì aka hwanɛ̀ hwatò e? Mamɛ ema ò wà ò òhvi ema Lohwɛ̀ à rza ò ŋgbèlɛ ndi lì ŋgba e? Rzeke Lohwɛ̀ Mɔ̀ ndi à è ŋgbelì hwema hwe arzɛ ema e hwɛnì e?

⁸Inyɔ e ɔ̀ŋgɛ̀lɛ̀yi nanù ema e ma màa lì lùwa mamɛ ya arzɛ ema e ɔ̀ŋgɛ̀lɛ̀ ema e arza e? È ɔ̀ŋgɛ̀lɛ̀yi nanù ema e ma màa lì nàmà e? È ma tìmba ndi i kiŋgɛ̀, tɔ̀ nɛ irzɔ i rza enje kiŋgɛ̀ e? Nà àhvìtɛ̀ ema e hwèlì ndi kiŋgɛ̀, aŋga naŋgɛ, oma irzɔ hvɛ ima hwɛ ndi kiŋgɛ̀ na inyɔ.

⁹Ène eyà yɔ ndi Lohwɛ̀ a jo ŋgbelì irzɔ I àpɔ̀rzìtòlò o lì hwɛ nàa hwatò ema i rza ohvɛ wòlìtò. I hwèlì ndi nàa hwatò ema hwa akɛ̀lɛ̀hwɛ̀yì e mbako nanù ema hwa ŋwa o ewòkà. Nà ohwa ndi ene eyà nanù, èhwanja hwatò hwa arzɛ nà i aŋgèlì hwa jò inja ò lì ɔ̀ŋgɔ mamɛ è ò jò gbèyɛ̀nɛ.

¹⁰Hwatò hwa jo ɔ̀ŋgɔ ndi nàa i hwèlì ndi hwèèti hwe hwatò èhwanja i gbeyà Krirztò, ndi ò inyɔ è ɔ̀ŋgɛ̀lɛ̀ nanù ema è ohvi màhwìyè ehwànja e hweli mòtò mɔ̀kɔ nà Krirztò. Hwàto hwa ɔ̀ŋgɛ̀lɛ̀ nanù ema irzɔ i rza ohvi ŋginyà ya lì gbeyà tɔ̀ eyà, ndi inyɔ è ɔ̀ŋgɛ̀lɛ̀ nanù ema è ohvi e ŋgìnya ema è uhwɛ̀lɛlɛ ò mà Lohwɛ̀. Hwatò hwa rza jo ŋgbaà èluhwe, ndi hwa è ŋgbaà inyɔ èluhwe.

¹¹O lìni lìrzako irzɔ i ɛ̀ndɛnɛ ndi na e njàwò na e nyìrzɛ̀ ya malìhwa, i rza ohvi hvɛ tɔ̀ màatù ema mà jo kànɛ̀yi. Hwatò hwa jo anana hvɛ ndi i hvonda ja arzɛ. I rza hwɛnì hvɛ tɔ̀ èki ya lì lìya.

¹²Irzɔ i gbeyà èwòlò ya imbami na màà mà arzu, ò lì lùwa lì làa la arzu la wùnyà. Hwatò hwa jò jemi tɛ ì hwa nàmìrzɛ̀, hwatò hwa jò tàkirzɛ tɛ i hwa àjùlɛ̀nɛ̀.

¹³Hwatò hwa jo òhwìrzɛ̀nɛ̀ tɛ hweyà hwe wòhwe, irzɔ i hwa tìmbìrzɛ̀lɛ̀ ndi nà hweyà hwe gbamù. Ndi tɔ̀ nanù, natɛ̀ɛ nà naŋgɛ, hwatò hwa jò ɛnɛ ndi nàa mbìndo ò mìrzɔ̀ mà awu.

¹⁴Nà rza tilì ndi hwenè hweyà o lì e òkìrzɛ̀ ìrzɔnì. Nà hwe tilì ndi o lì e kòkòwɛ̀lɛ̀ o hweyà ema e hwɛnì lì hwiya. Èhwanja e hwèlì ndi nàa hwàna hwa ami hwa ndìŋgɛ.

¹⁵Tɔ̀ e ohva ndi lìyomɛ̀ la hwekolì hwe hwahvɛhvɛ Hwà-òkòwèlì hwa ama Krirztò, e hwɛnì ndi rzaŋgo hvɔ̀kɔ. Nà oma nà mà e jàneyà Ŋmɛ̀ndì mò Gbamù na hwèlì ndi nàa e rzaŋgo ya anyu o ma Krirztò.

¹⁶O èŋgànɛ̀lɛ̀ rzɔ na e kɔ̀mɛ̀lɛ̀ nanù ema e gbeye hweyà ema imba na gbeyà.

¹⁷Ène ŋgàna ndeŋgatɛ imba, na e omeya Tìmòtì. Mɔ̀ ema a hwèlì ndi nàa e ŋmanà wa ami, wa ndìŋgɛ ya màlìŋgò o lìnà la ama Rzàŋgo. Mɔ̀ a gbeyà ndi mamɛ ya arzɛ ema e hwɛnì lì gbeyàhwa. Mɔ̀ a e ɔ̀ŋgɛ̀lɛ̀nɛ hwɛ̀ɛndèli hwe ami, hwe lòŋgɛ là ami na Yerzù Krirztò. Èŋge tumba lòŋgɛ e ɛ̀ndɛ̀nèlì na mamɛ ema imba na okolɛ̀ o ndawò ja mitelì.

¹⁸Lòŋgò la anyu e ma onda na kumba, e ɔ̀ŋgɛ̀lɛ̀ nanù ema na rza e jèeyà hvɛ tɔ̀ wùnyà.

¹⁹Ndi na o jà, na akɛlɛ hvɛ lì jà, e hwèlì tɛ nanù ema Rzàŋgo a emelì. Nà jelì tɛ o ma nà mà hwiya mamɛ hwanù hwatò hwa kumba hwa gbeyàna e jɔ̀kɛ̀ ndèŋgàna na hwiya hvɛ ŋga hwa gbeyàna ndi e ŋginyà ema e uwɛ̀lɛ̀lɛ̀yi na Lohwɛ̀, ŋga hwa kɛ ndi wàna ja ŋgundu.

²⁰Lìkànèyà là ama Lohwɛ̀ lì uŋmɛ̀lɛ̀ ndi o lòŋgɛ la hwatò ò mamɛ ema hwa gbeyà rzeketɛ o mamɛ ema hwa ohwa.

²¹Mamɛ inyɔ e hvɔ̀rzì e? Nà jelì tɛ na e kɔ̀kìrzɛ̀ èhwanja e ondi kumba, ŋga na jàne ndi e ndìŋgɛ, na èlìŋgɛ̀ ema ya arzirzɛ e?