Read Mokpwe 1 Kɔ̀rintìyà 6 Bible Online

1 Kɔ̀rintìyà 6 - Mokpwe bible

1 Kɔ̀rintìyà 6

¹È hwèlì tɛ ema mɔ̀kɔ wà ànyu à ohvi mòhvùŋgu nà ŋmànyàŋgò wà èni wà Krirztò, a rza ɛ̀ndɛ o hwatò ema hwa rza enje wònyà Krirztò, o lì e kàyìrzɛ̀. È rzi hwɛ ema è ɛndì ndi o hwatò ema hwa rza lòkɛ̀ Krirztò.

²È rza hwi nanù ema o ò hwɛ hvonda ema hwatò hwa Lohwà hwa o kàyìrzɛ̀ hwatò hwa ene rze e? È tànɛyi tɛ o lì kàyìrzɛ̀ hwatò hwa ene rze. È rza tanɛ lì kàyìrzɛ̀ hwanù hwàànà meyàŋgo ò ìtììtènì ja anyu e?

³È rza hwi nanù ema jo ò kàyìrzɛ̀ i aŋgèlì ja ama Lohwɛ̀ e? Ŋgelì iti nà hwenè hweyà hwe rzàlì hwe lìni lòŋgɛ e!

⁴È ohvì tɛ meyàŋgo lì hvomɛ̀nɛ̀ hwenè hweyà, mamɛ ndeŋgatɛ è me ɛ̀ndɛ̀nɛ̀ ndi o hwatò ema hwa rza ohvɛ̀ɛ èluhwe o mitèlì e?

⁵Nà ohwà ndi nanù o lì è o òkirzɛ ìrzɔnì. Ò jɔ̀kɛ̀ o hwèlì mòtò mɔ̀kɔ o mitèlì me ànyu ema à ohvi lìhwiyè, ema à tànɛyi lì è rzɛŋgɛnɛ meyaŋgo me anyu me hwatò hwa Krirztò.

⁶Ndi mòtò wa Krirztò a ɛ̀ndɛ̀nɛ̀ ŋmànyàŋgò wà èni wà ŋmèmba o kotì yà hwàkàyìrzèlì ema hwa rza hwiyɛ Lohwɛ̀ o lì hwa kàyìrzɛ̀.

⁷È ɛnelì ndi nanù ema è àwòhvànɛ rzɔ̀mɔ̀nì inyɔ nà inyɔ, ene è uŋmɛ̀lɛ̀ ndi nanù ema è tòni rzayì-rzayì. O lɔ̀wu ema ŋmànyàŋgò wà aŋgɔ a o arzarzɛ, lì aka ema ò mò ɛ̀ndɛnɛ o hwèkàyìrzèlì. Mamɛ ndeŋgatɛ è rza hwɛ̀mi ema hwanù hwatò hwa è ɔnje e?

⁸Ndi inyɔ nà inyɔ ndi è atonanɛ̀yi nà lì àwɔnjɛ mɔ̀kɔ nà ɔ̀nɛ̀yi natɛ̀ɛ na, hwà ŋmànyàŋgò na indòmɛ̀ ja anyu ja Lohwɛ̀.

⁹Ò jɔ̀kɛ̀-jɔ̀kɛ̀ è hwi nanù ema hwatò ema hwa gbeyà wòhwe hwa rzà o hwɛ ò lìkànèyà là ama Lohwɛ̀. È rzà alùkɛ̀lɛ̀nɛ̀, hwaŋga hwatò ema hwa gbeyà mòrzònje. Hwàto ema hwa kanɛ̀ mòohwà ema mà wèkàhwì nà è mòto wà hwènàmà, hwatò hwa mòrzònje mò lìhwà, nà wunyanà ema hwa naŋgànà hwahvɛhvɛ wunyànà, hwanù hwatò hwa arzɛ hwa rza ò hwɛ ò Likànèyà là ama Lohwɛ̀.

¹⁰Hwàyihwɛ, è wɔ̀ ema hwa hwèlì wɔ̀ɔ, è wɔ̀ hwa mboma, è wɔ̀ hwa mèhvìlì, tɔ̀ hwaŋga ema hwa hvùmana hwatò hwema hwe awu. Tɔ̀ mɔ̀kɔ wà hwanù hwatò à rza hwɛnɛ èkì ò lìkànèyà là ama Lohwɛ̀.

¹¹Nànù ndi lòŋgo là hwa inyɔ è mà hwɛ. Ndi inyɔ è mà rzàŋgìrzɛ̀hwɛ̀ ò wòhwe wò anyu, è emànɛ̀lɛ̀hwɛ̀yì nà Lohwɛ̀, è tɛmìrzɛ̀hwɛ̀yi ehve-ehve nà Lohwɛ̀ lì akeyà nà Rzàŋgo Yerzù Krirztò nà Èlìŋgɛ̀ yà Lohwà là arzu.

¹²Mɔ̀kɔ wà anyu à tànɛyi a ohwa nanù ema, “Nà hwɛnì wònjà lì gbeyà tɔ̀ mamɛ ema na lìŋganì.” Nà è jɔ̀kɛ̀! Ndi nà ohwi ema rzeketɛ tɔ̀ ima eyà ndi ye è lɔ̀ɔni. Nà tànɛyi lì ohwa nanù ema mɔ̀kɔ wà anyu a tànɛyi hvɛ lì ohwa nanù ema, na ohvì wònjà o lì gbeyà tɔ̀ mamɛ ema na lìŋgàni, ndi o rza enje tɔ̀ eyà ema e tànɛyi lì no gbeyà ema na timbeya mòkòmì.

¹³Ohvɛhvɛ mòtò a tànɛyi lì ohwa nanù ema, “Molelì mò gbeyàhwi ndi ò lùuŋga, rzìi lùuŋga lɔ̀hvɛ lì gbeyàhwi ndi o mòlelì.” È jɔ̀kɛ̀, ndi o ò jà wùnyà ema Lohwɛ̀ a hwe hvaŋga hwe ahwàkɛ. È nyo ya arzu e rzi wèkahwì ndi ò lì gbeyà mòrzònje. Ndi è nyo yà àrzu è mà wèkahwà ndi lì gbèeyà Rzàŋgo; Rzìi Rzàŋgo a ɔ̀ŋgeyà è nyo yà àrzu.

¹⁴Lohwɛ̀ à mà hvùmùlɛ̀ Rzàŋgo ò kpelì, à ò gbeyàna e ŋginyà ya eni o lì jo hvùmùlɛ̀.

¹⁵È hwi nanù ema i nyo ja anyu i hwèlì ndi hwèhvàrzù hwe hwènàmà ema hwe gbèyi è nyo yà ama Krirztò. Nà tànɛyi lì wowa èhvàrzù ya ènàmà ya nyo yà ama Krirztò rzìi nà è lata na e hwe èhvàrzù yà ènàmà ya nyo ya ama e molanà wà àkpàlà e? È rzà tanɛ̀ lì hwɛ nanù.

¹⁶Ŋgà è rza hwi nanù ema è mòtò ema à lati è nyo yà èni na molanà wà mòrzònje, à hwèlì ndi nyo hvɔ̀kɔ nà mɔ̀ e? È tìlàhwì o kààtì yà Lohwà nanù ema, “Inyo ja ahwàhwàkɛ̀ i hwɛ ndi nyo hvɔ̀kɔ.”

¹⁷Ndi è mòtò ema a hwèlì mɔ̀kɔ na Rzàŋgo à o jà ndi lì hwɛ mɔ̀kɔ nà mɔ̀ o èlìŋgɛ̀.

¹⁸È rzɔ̀rzè mòrzònje. Tɔ̀ ima nyayi ya wòhwe ema mòtò a gbeyà mo rzà mò hvàŋga è nyo yà eni nàa wòhwe wo mòrzònje wo gbeyà ndi è mòtò ema à gbeyà ndi mòrzònje, à gbeyà wòhwe lì teŋgɛ̀nɛ̀ e nyo yà èni.

¹⁹È rza hwi nanù ema è nyo ya anyu è hwèlì ndi hwèlìyelì hwe Èlìŋgɛ̀ yà Wòtani e? Èma e lìyayi o tenì yà nyo yà anyu, ema Lohwɛ̀ a mà è ŋgbè e? Rzèketɛ inyɔ ndi e ohvi i nyo ja anyu, i hwèlì ndi nyo ja ama Lohwɛ̀.

²⁰À mà è àndana nà wolì wo ndɛnɛ, o èŋgànɛ̀lɛ e gbeyànè inyo ja anyu o èluhwe ya ama Lohwɛ̀.