Read Mokpwe 1 Kɔ̀rintìyà 8 Bible Online

1 Kɔ̀rintìyà 8 - Mokpwe bible

1 Kɔ̀rintìyà 8

¹Nàŋgɛ rzɔ, imba na ohwa lì hvomɛ̀nɛ̀ mòlelì ema mo ŋgbahwa hwèrzùmbu nàa jàhwèyà. Ɛ̀ɛ, i hwi nanù ema, e ohwahwi nanù ema, “Irzɔ hwa arzɛ i hwɛnì lìhwiyè.” Lini lìhwiyè rzɔ, lì jo gbeyà irzɔ hwa arzɛ i hwɛnì kumba. Ndi e ndìŋgɛ e jo ètìrzɛ̀.

²Tɔ̀ ima mòtò ema a ɔ̀ŋgɛ̀lɛ̀ ema a hwi eyà, nanù oma mɔ̀ à rza hwi tɔ̀ eyà na oma a àŋgàmɛ̀nɛyi lì hwiya.

³Ndi tɔ̀ ima mòtò ema a lìŋgàni Lohwɛ̀, òŋgo mòtò ndi Lohwɛ̀ a hwi.

⁴O èŋgànɛ̀lɛ̀, inyɛ na ohwe lì hvomɛ̀nɛ̀ lì làa la mòlelì ema mo ŋgbàahwì nàa jàhwèyà o hwèrzùmbu. Irzɔ hwa arzɛ i hwi nà è jɔ̀kɛ̀ nanù ema, hweŋge hwèrzùmbu hwe rza enje ndi Lohwɛ̀, ndeŋga nanù hvɛ ema, ò rza enje lìhvɛ̀hvɛ̀ Lohwà lì aka tɛ Lohwà lɔ̀kɔ lìti mɛnɛ.

⁵Ò jɔ̀kɛ̀, tɔ̀ è hwɛ ndi nanù ema, hwatò hwa ohwa nanù ema ò hwèlì màhvɛhvɛ mohwà, ò ŋmanyu yà Lohwà, nà anù rze yà mɔ̀nyɛ̀, ndèŋgàna nà è jɔ̀kɛ̀, ò hwèlì rzayì-rzayì jà mohwà nà rzayì-rzayì jà rzàŋgo anù rze yà mɔ̀nyɛ̀.

⁶Ndi irzɔ i hwi nanù ema, ò hwèlì ndi Lohwà lɔ̀kɔ. Tatɛ̀ ema à wèki hwema hwe arzɛ, Mɔ̀ ndeŋgatɛ irzɔ i hwèlì lòŋgɛ. Ò hwèlì hvɛ ndi Rzàŋgo hvɔ̀kɔ, Yerzù Krirztò, lì akeyà nà Mɔ̀ ndi Lohwɛ̀ à wèki hwèmà hwe arzɛ, Mɔ̀ ndeŋgatɛ irzɔ i hwèlì lòŋgɛ.

⁷Ndi tɔ̀ nanù, rzeketɛ hwatò hwa arzɛ ndi hwa hwi ene jɔ̀kɛ̀. Lòŋgò la hwàlòkèlì hwa ama Krirztò ema hwà mà nyàmɛ̀lɛ lì kànɛ hwèrzùmbu, hwa hwèlì hwa lùtèyà natɛ̀ɛ na naŋgɛ ema hwa lelì tɛ iŋgi nyayi ja melelì, nanù oma wɔ̀ hwa hwèlì ndi o lì kànɛ hweŋga hwèrzùmbu. Mèemà me awu me rza imbami o èŋgànɛ̀lɛ̀ hwa ɔ̀ŋgɛ̀lɛ̀ ndi ema mòŋgo mòlelì mo ma hwa rzɔ̀kɔ̀.

⁸Mòlelì mò rza tànɛyi lì jo rzaŋgirzɛ o mirzɔ̀ ma ama Lohwɛ̀, irzɔ i rza tànɛyi lì hwɛ hwatò hwa wòhwe e hwèlì tɛ nanù ema i rza mo lelì tɛ. Tɔ̀ lì hwɛ hwatò hwa gbamù e hwèlì tɛ nanù ema i mo lelì tɛ.

⁹È aŋgowe nɛ e gbeyàna è wònjà ya anyu ema ye ŋgbàahwì. È gbeyàne enè wònjà nyayi ema wònyànyàŋgo hwa anyu ema mèèmà me awu me rza imbamɛ o màlòkɛ̀, wɔ̀ hwa rza unda o wòhwe.

¹⁰O hwèlì tɛ mòtò ema ŋmèma mo eni mo rza imbamɛ, a ye ɛnɛ tɛ inyɔ ema e ohwa nanù ema e ohvi lìhwiyè e lèeyà o mòokà mo hwèrzùmbu, e rza ɛnɛ nanù ema èŋge nyayi eyà e tànɛyi lì mo kɔ̀mɛ̀lɛ̀ ema a lee mòlelì ema hwa ŋgbelì nàa jàhwèyà o hwèrzùmbu e?

¹¹O èŋgànɛ̀lɛ̀ rzɔ, ono ŋmànyɔ̀ŋgɔ̀ wa aŋgɔ wa ama Krirztò ema mèèmà mo eni mo rza imbamɛ, ema Yerzù ama ŋwèeyà, o nyòla lì hwiye lì aŋgɔ lì ndɛ̀nɛ̀ mɔ̀ à hvàŋgahwè e?

¹²O gbèyi tɛ wònyànyàŋgò nà indòmɛ̀ ja aŋgɔ ja Krirztò wòhwe, ene ŋgàna rzi e hwèlì ndi ema, Krirztò ndi o gbèyi wòhwe. Aŋga nanù oma, o ma hvaŋga mèèmà mè hwaŋga wònyànyàŋgò nà indòmɛ̀ ja aŋgɔ.

¹³O èŋgànɛ̀lɛ̀, e hwèlì tɛ nanù ema mòlelì imba nà làa mɔ̀ ndi mò gbeyà ema ŋmànyàŋgò wà ami wà Krirztò a unde o wòhwe, imba nà rza làa mòŋgo mòlelì hvɛ. Aŋga nanù nà rza gbeyà ema ŋmànyàŋgo wà ami à rzi unda hvɛ ò wòhwe.