Read Mokpwe 1 Kɔ̀rintìyà 9 Bible Online

1 Kɔ̀rintìyà 9 - Mokpwe bible

1 Kɔ̀rintìyà 9

¹Nà rza ohvì wònjà nàa tɔ̀ ima mòtò e? Nà rza enjè ndì àpɔ̀rzìtòlò e? Ìmba nà rzì ɛnɛ Yerzù Rzàŋgo wa arzu na e ma amì mirzɔ̀ e? Rzeke inyɔ ndi e hwèlì e mbako ya èwòlò ema na gbèelì Rzàŋgo e?

²Tɔ̀ è hwɛ ndi nanù ema lòŋgo la hwatò hwa rza emelì ema na hwèlì ndì àpɔ̀rzìtòlò, ndi o inyɔ na hwèlì ndi mɔ̀kɔ. Nà oma e hwèlì nà Rzàŋgo, inyɔ hwiti e hwèlì ndi nàa ɛ̀mɛ̀nɛ̀nì yà ami ema nà hwèlì ndi àpɔ̀rzìtòlò.

³Jà alàhwɛ̀ ja amì jɔ inì ò hwàŋgà hwatò ema hwa teŋgɛ̀nɛ̀yi lìkànèyà la ami.

⁴Irzɔ̀ i rza hwɛnì wònjà ò lì lìya o màandà mà anyu o lì làalɛ̀nɛ na lì nyɔ̀lɛnɛ na inyɔ e?

⁵Irzɔ̀ ì rza hwɛnì wònjà ya lì ahwànà jòjìyɛ̀ ema e hwèlì ndì mɔ̀nɔ̀ŋgèlì mɔ̀kɔ wa ama Krirztò na irzɔ e? Nà oma inɛyi àpɔ̀rzìtòlò i gbeyà e? Rzeke nanù ndi wònyanyàŋgò wa ama e Rzàŋgo na Pètrò hwa gbeyà e?

⁶Ŋga Bànàbàrzì na ìmba mɛnɛ ndi i hwɛnì lì gbeyà hwèwòlò ema hwe hwɛnì lì jo tembɛ e?

⁷Ima ŋmànèlì hwa njùma a hwèlì, ema mɔndi à hwɛnì lì gbèeyà èwòlò na lì awòmbɛ̀ mɔ̀ ŋmìti e? Ima mòònèlì wa mbòta a hwèlì ema a òna màyi ma hwehvùma rzi a rzì le lòŋgo la hwèŋge hwehvùma e? Ima mɔ̀ɔ̀ŋgèlì wa mɛ̀lɛ̀ŋgù a hwèlì, ema a tànɛyi lì ɔŋgeya lì hwèmba la mɛ̀lɛ̀ŋgù, rzìi a rzi nyɔ lòŋgo la màŋga mànyɔ̀ŋgɔ̀ ma mèŋge mɛ̀lɛ̀ŋgù ma eni e?

⁸Rzeketɛ o lì rzɔ̀ŋgìtɛ̀nɛ̀ la màlùtèyà ma ami ma mòtò wa hwènàmà, ɔ̀ndeŋgàtɛ̀ na ohwa hwenè hweyà, nanù mɛnɛ ndi e mbenda ya ama Morzè yɔhvɛ e ohwi.

⁹Èhwanja e mbenda ya ama Morzè e ohwa nanù ema, “O rza hwɛnì lì kaka e wàna ya e nyàkà na oma yɔ e hwèlì o lì làalà iŋgi mbarzì, o lì ji nyùŋgùwà.” È hwèlì ndi ema Lohwɛ̀ Mɔ̀ à mà hwɛ ndi lì ohwa nanù èhwanja à mà lùteyà ndi lì hvomɛ̀nɛ̀ i nyàkà mɛnɛ e?

¹⁰Rzèkɛ ìrzɔ̀ ndì Mɔ̀ à mà hwɛ lì ohwìrzɛ̀nɛ nanù e? Ɛ̀ɛ, e ma tìlahwa ndi o gbamù hwa arzu. Aŋga nanù e mòtò ema a rzàrzà e waŋga, na e mɔ̀ hvɛ ema a rzaŋga èŋge mbòtà, hwa arzɛ hwa àhvìtɛ̀ lìkayi o èŋge mbòtà.

¹¹Nà oma ima lome lì ona hweyà hwe hwèlìŋgɛ̀ hwe eyà ya Lohwà o ìtììtènì ja anyu, e hwɛ ndi wòhwe e hwèlì tɛ ema irzɔ ji ijòwa tɛ hwèèmà hwe ene rze ya mɔ̀nyɛ̀ e?

¹²È hwèlì tɛ ema lòŋgo la hwatò hwa hwɛnì wònjà ya lì e ijòwa hwèèmà, rzeke irzɔ i hwɛnì wònjà rzayì-rzayì o lì e ijòwa hwèèmà lì hwa aka e? Ndi irzɔ i rzi gbeyànì a gbeyàna enè wònjà tɔ̀ wùnyà. Irzɔ ima àjùlɛ̀nɛ̀ mètàkà me arzɛ aŋga nanù, ene e rza hwɛ ndi ekèkànì na oma jo òhwa Ŋmɛ̀ndì mò Gbamù lì hvomɛ̀nɛ̀ Krirztò.

¹³Inyɔ è rza ayèmbɛ nanù ema hwaŋga hwatò ema hwa gbeyà èwòlò ò Ndawò yà Lohwà, hwa lùhweyà ndi mòlelì mò awu ò mòrzànjɛ ema mò jànɛ̀lɛ̀hwɛ̀ ò Ndawò yà Lohwà e? Ndeŋga hwaŋga hwatò hvɛ ema hwa gbèeyà o ètàwò yà màhwèyà wɔhvɛ hwa lùwa ndi lòŋgo là lì kàyi ema lì jànɛ̀lɛ̀hwɛ nàa jàhwèyà.

¹⁴Molandako mɔ̀kɔ mɛnɛ ndi e Rzàŋgo à mà kòkòwɛlɛyì nanù ema, hwaŋga hwatò ema hwa ohwa Ŋmɛ̀ndì mò Gbamù, mo ama Lohwɛ̀, hwa hwɛnì ndi lì wòŋgòwahwa na hwaŋga hwatò ema hwa lùwa mòŋgo Ŋmɛ̀ndì mò Gbamù.

¹⁵Ndì tɔ̀ nanù, imba na rzi gbeyànì ini wònjà tɔ̀ wùnyà. Ndèŋgana, na rza tìla naŋgɛ nanù, o lì lùtèyà ema na arza lì wòteya naŋgɛ o lì ji gbeyàna. Ò jɔ̀kɛ̀, na emelì lì ŋwa, lì aka ema tɔ̀ mòtò tɔ̀ mɔ̀kɔ a no gbeyà nanù ema imba na rza hwɛnɛ kumba ya lì àyekìrzɛ o èwòlò ya ami.

¹⁶Ndi tɔ̀ nanù, o lì ohwa Ŋmɛ̀ndì mò Gbamù mo òma Lohwɛ̀, mo rza enje ndi eyà ema na hwɛnì lì ayèkìrzɛ̀lɛ̀lɛ̀. Nà kɔ̀mɛ̀lɛ̀hwɛyi ndi na Lohwɛ̀ o lì ohwa Ŋmɛ̀ndì mò Gbamù mo ama Lohwɛ̀. È hwèlì ndi èwoma na imba e hwèlì tɛ ema imba na rza ohwi mono Ŋmɛ̀ndì mò Gbamù mo ama Lohwɛ̀!

¹⁷Èma hwɛ tɛ nanù ema imba ndi nà mà ahvɔ̀rzɛ̀ o lì gbeyà ene èwòlò, o ma na lùwa mòrzàhwèlì. Ndi na rza e hvɔ̀rzì, Lohwɛ̀ mɛnɛ ndi à no ŋgbelì ene èwòlò ò lì gbeyà.

¹⁸Màmɛ rzɔ̀ e hwèlì etàŋgì ya amì e? Ètaŋgi ya ami e hwèlì ndi, o lì ohwa Ŋmɛ̀ndì mò Gbamù mo ama Lohwɛ̀, e rzi hwɛ tɔ̀ mòtò tɔ̀ mɔ̀kɔ lì no taŋgeya. Èya èŋge ndeŋgatɛ na rza gbeyàna è wònjà ya ami na ohwa tɛ Ŋmɛ̀ndì mò Gbamù mo òma Lohwɛ̀.

¹⁹Nà hwèlì ndi imba mbiti, na rza enje o rze ya tɔ̀ mòtò tɔ̀ mɔ̀kɔ. Nà ma ayèŋgowɛ̀ ndi mokome mo hwatò hwa arzɛ, o lì jànà rzayì-rzayì ja hwatò òma Krirztò.

²⁰È hvonda ema nà mà hwɛ na hwatò hwa wònyà Yudà, nà mà gbeyà hweyà hwe ami nàa imba hvɛ na hwèlì ndi mɔ̀kɔ wa awu, aŋga nanù hwa lòkɛ̀ Krirztò. È hvonda ema nà mà hwɛ na hwaŋga hwatò ema hwa ika i mbenda ja hwatò hwa wònyà Yudà, imba hvɛ nà mà ika ndi iŋgi mbenda. Tɔ̀ nɛ na rzi hwɛ o rze ya iŋgi mbenda. Nà ma gbeyà ndi nanù, aŋga nanù hwaŋga hwatò hwa lòkɛ̀ Krirztò.

²¹È hvonda ema na hwèlì na hwaŋga hwatò ema hwa rza ènje o rze ya e mbenda ya ama Morzè, imba hvɛ na gbeyà hweyà hwe ami nàa wɔ̀, o lì arza nanù ema hwa lòkɛ̀ Krirztò. Ndi ene e rzi hwɛ nanù ema na rzi ika imbenda ja ama Lohwɛ̀. Ò jɔ̀kɛ̀ na hwèlì ndi o rze ya e mbenda ya ama Krirztò.

²²Nà hwèlì tɛ na hwaŋga hwatò ema hwa rza imbamɛ o lì lòkɛ̀, imba hvɛ na hwɛ ndi nàa mɔ̀kɔ hwa awu ema a rza imbamɛ o lì lòkɛ̀, èhwanja na arza ema wɔ̀ hwa lòkɛ̀ Krirztò. Ɛ̀ɛ, na hwèlì na keka o lì arza ema na hwɛ nàa tɔ̀ ima mòtò ema na ùŋmanɛlɛyi. O lì gbeyà hvɛ hweyà hwe arzɛ ema na tànɛyi lì gbeyà o lì rzùŋgà lòŋgo la hwatò.

²³Nà gbeyà hweyà hwe arzɛ nanù, ò lì nyàlìrzɛ̀ Ŋmɛ̀ndì mò Gbamù mò ama Lohwɛ̀, aŋga nanù imba hvɛ na lùwa mònàmɛ̀ ema mo hwèlì o monò Ŋmɛ̀ndì mò gbamù.

²⁴È rza hwi nanù ema o lìhwaŋgi tɔ̀ ima mòtò a hwaŋga, ndi mòtò mɔ̀kɔ mɛnɛ ndi à rzuwa rzi a lùwa morzawelì e? O èŋgànɛ̀lɛ̀ e hwaŋge lìhwaŋgi e luwe morzawelì.

²⁵Tɔ̀ ima mohwaŋgelì ema a hwɛnì lì hwaŋga lìhwaŋgi, à àjùlɛ̀nɛ̀ mètàkà me arzɛ. Hwa wòŋgirzɛnɛ ndi nanù, o lì wɔ̀tìrzɛ̀hwɛ ekooto ya èluhwe ya mbonji ema e rza hwɛ natɛ̀ɛ na o mòlìkɛ̀, ndi irzɔ i gbeyà ndi èwòlò ema i lùwàna morzawelì mò mòlìkɛ̀.

²⁶Ɔ̀ndeŋgàtɛ̀ na rza hwaŋga tɔ̀nɛtɔ̀nɛ. Nà rza enje ndi nàa mò uŋma hwerzilawo ema à ùŋma mùulù mo ŋgundu.

²⁷Nà òkòlɛ̀yi e nyo ya ami ò lì ajùlɛ̀nɛ̀ mètàkà me lìhwaŋgi. Ène ŋgàna e èŋgànɛ̀lɛ̀ imba na oka wɔ̀ŋgɔ̀ ema nà mà òhwèyà tɛ hwahvɛhvɛ hwatò eyà yà Lohwà, rzìi imba na tìmba eyoyo.