Read Mokpwe 2 Kɔ̀rintìyà 13 Bible Online

2 Kɔ̀rintìyà 13 - Mokpwe bible

2 Kɔ̀rintìyà 13

¹È ŋgèlì ema e ùkirzɛ̀yi iyàwò yɔ ene, ema na jà o lì ehvɛhvɛ. È tìlahwì o kààtì ya Lohwà nanù ema, “Hwa kàyìrzɛ̀ tɛ mòtò, hwa hwɛni lì òkànèyà mboŋgi ihwakɛ tɔ̀ iyàwò.”

²È hvonda ema nà mà e jèeya o ŋgèlì ema e ùkirzɛ̀ ihwakɛ, nà mà e ohweyà nanù ema na o kɔ̀kìrzɛ̀ hwatò ema hwa gbeyà wòhwe o ìtììtènì ja anyu. Nà hwèlì na hwa ohweyà hvɛ nàŋgɛ, ndèŋgànɛlɛ na ohweyà hvɛ hwahvɛhvɛ hwatò ema wɔ̀ hvɛ hwa gbeyà wòhwe tɔ̀ nàŋgɛ ema na rza enje na inyɔ. È hvonda ema na o jɛ̀ɛ̀ hvɛ na rza o òkeya tɔ̀ mòtò tɔ̀ ììlì.

³O eŋge hvonda ndi e o hwiyɛ nanù ema, tɔ̀ mamɛ ema na ohwa e uwɛ̀lɛ̀lɛ̀yi ndi oma Krirztò. Rzeketɛ ema Krirztò a rza imbami o hweyà hwe arzɛ ema a gbeyà, ndi à uŋmɛ̀lɛ̀ ndi e ŋginyà ya eni o ìtììtènì ja arzu.

⁴È hwèlì ndi e jɔ̀kɛ̀ nanù ema Krirztò nàa mòtò wa hwènàmà a rzi hwɛnɛ ŋginyà e hvonda ema hwà mà no wòmeyà o mbarza. Ndi tɔ̀ nanù a hwèlì lòŋgɛ o nàŋgɛ, ndi tɔ̀ na oma a hwèlì lòŋgɛ nanù, èhwanja Lohwɛ̀ à mà gbeyàna e ŋginyà ya eni o lì mo timbirzɛhwɛ o lòŋgɛ. Nà oma i hwèlì ndi mɔ̀kɔ na Krirztò, irzɔ hvɛ nàa hwatò hwa hwènàmà i rza imbami. Ndi irzɔ hvɛ jo ò hwɛ o lòŋgɛ na Krirztò o ŋginyà ya ama Lohwɛ̀, ndèŋgànɛlɛ jo ò e gbeyà hweyà hwe arzɛ ema i hwɛni lì e gbèeyà.

⁵Inyɛ̀ tɔ̀ ima mɔ̀ wa anyu a àyijànè lòŋgɛ la eni kɔ̀yi-kɔ̀yi o lì hwiya ŋga a lìya ndi nàa hwatò ema hwa lòkɛ̀yì. Imba na hwi nanù ema e hwi nanù ema tɔ̀ ima mɔ̀ wa anyu a hwi nanù ema Yerzù Krirztò a hwèlì o tenì ya eni. È hwèlì tɛ nanù ema tɔ̀ ima mɔ̀ wa anyu a àyijànè mɔ̀ ŋmìti ɔ̀ndi e hwiya o jɔ̀kɛ̀ nanù ema e hwèlì na Krirztò.

⁶Nà lòkɛ̀ nanù ema inyɔ e embi nanù ema èwòlò ema i gbeyà, e uŋmɛ̀lɛ̀ nanù ema i hwèlì ndi àpɔ̀rzìtòlò ja jɔ̀kɛ̀.

⁷I Kànɛlɛ Lohwɛ̀ nanù ema inyɔ e rzi gbeyà tɔ̀ lùurzè tɔ̀ lɔ̀kɔ. Irzɔ i rza kanɛ̀ ndi nanù aŋga nanù hwatò hwa ɛnɛ nanù ema irzɔ i hwèlì ndi àpɔ̀rzìtòlò ema i gbeyà èwòlò ya gbamù. Ndi tɔ̀ nanù irzɔ i kanɛ̀ ndi nanù ema inyɔ e hwɛni ndi lì gbeyà hweyà hwe hvomɛ̀nɛ̀, tɔ̀ nɛ lòŋgo la hwatò hwa o òhwa ndi nanù ema irzɔ i rza uŋmɛ̀lɛ̀ tɔ̀ yoma ema e uŋmɛ̀lɛ̀ nanù ema i hwèlì ndi i àpɔ̀rzìtòlò ema i gbèeyà hwèwòlò hwe awu gbamù.

⁸È hwèlì ndi nanù èhwanja irzɔ i rza tànɛyi lì gbeyà tɔ̀ eyà ema e teŋgɛ̀nɛ̀ ŋmɛ̀ndì mo jɔ̀kɛ̀ mo gbamù. Ndi tɔ̀ nanù eyà ema i gbeyà, e hwèlì ndi o lì oŋgòwànà hwatò ò lì hwiya na o lì gbeyà mamɛ ema ŋmɛ̀ndì mò gbamù mo òhwa.

⁹Jo ò oka mɔ̀nyɛ̀ŋgì, je e ɛni tɛ na oma e gbeyà hweyà ema hwe gbeyà lì lòkɛ̀ la anyu lì andàmà, tɔ̀ e hwɛ ndi nanù ema irzɔ je ɛni nanù ema i rza imbami, èhwanja i rza ɛni tɔ̀ lìtiŋga o lì e kɔ̀kìrzɛ̀. I kanɛ̀ ndi nanù ema Lohwɛ̀ a e òŋgwànɛ̀ ɛ̀ɛ̀mɛ̀ ya anyu e hwɛ ndi e ya gbamù.

¹⁰Ɔ̀ndeŋgàtɛ̀ na tìla hwene hweyà tɔ̀ nɛ na rza enje na inyɔ. Nà e tìleya ndi nanù, aŋga nanù na e jɛlɛlɛ tɛ, na rza o gbeyàna e ŋginyà ema e Rzàŋgo e no ŋgbelì, o lì e lomeya. Lìkànèyà ema e Rzàŋgo e no ŋgbelì lì hwèlì ndi nanù ema imba na e oŋgowane o lì e ètìrzɛ̀, rzeketɛ o lì li gbeyàna o lì e rzuulɛ.

¹¹O lì umba ene kààtì, wònyamòwè kòkò, e oke mɔ̀nyɛ̀ŋgì. Nà e ohweyà ndi nanù ema e tikowe, ɛ̀ɛ̀mɛ̀ ya anyu e hwɛni lì lɔ̀wu, na arza nanù ema e òkànèyà mayowà mà ami. È hwɛnɛ ndi lì lùtèyà lɔ̀kɔ. È hwɛ o ɛ̀yɔ̀lɛ̀ mɔ̀kɔ na ɔ̀nɛyi. È gbèyi tɛ hwene hweyà hwe arzɛ, Lohwɛ̀ ema a e gbèyi ema e alìŋgànɛ na lì hwɛ o ɛ̀yɔ̀lɛ̀ mɔ̀kɔ na ɔ̀nɛyi, a o e nàmìrzɛ̀.

¹²È arzàŋgànɛ̀lɛ̀ mɔ̀kɔ nà ɔ̀nɛyi ò lìnà là ama Yerzù. Hwatò hwa arzɛ hwa Lohwɛ̀ hwa è omelì ikɔ̀mi.

¹³Nà kànɛ nanù ema, è ndèli yà ama è Rzàŋgo Yerzù Krirztò, è ndìŋgɛ yà ama Lohwɛ̀, nà là arzàŋgànɛ̀yi ema Èlìŋgɛ̀ yà Wòtani è jànà hwe hwɛ nà inyɔ.