Read Mokpwe 2 Kɔ̀rintìyà 4 Bible Online

2 Kɔ̀rintìyà 4 - Mokpwe bible

2 Kɔ̀rintìyà 4

¹Ìilì ja ama Lohwɛ̀ jɔ ndi i gbèyi ema jo òhwe mono ŋmɛ̀ndì o èŋgànɛ̀lɛ̀ i rza kpa mèèmà.

²I rzɔnjɛ̀lɛ̀ hwègbèèlì hwe arzu hwe wùndɛ̀ ja wòhwe, na hweyà ema hwe jànà ìrzɔnì. I rza e lùkɛ̀lɛ̀ na jòòhwì ja arzu ja wàna tɔ̀ lì tìkòwà e mbɔrzi ya Lohwà o lì e ɔnjɔ. Ndi jo òkolɛ hwatò Eyà ya Lohwɛ̀ nyayi ema hwa e rzɔŋgìtɛ̀nɛ̀. Nà oma jo òkolɛ Èya yà Lohwà na ŋmèma mɔ̀kɔ, tɔ̀ mòtò a rza tànɛyi lì ohwa o ŋmèma mo eni nanù ema i mo lukɛlɛ ndi lì lukɛlɛ. Irzɔ i hwi nanù ema Lohwɛ̀ a hwi tɔ̀ mamɛ ema i gbeyà.

³È hwèlì tɛ ema ŋmɛ̀ndì mo Lohwà mo gbamù ema jo òhwa mo rza kpèelì o mèèmà me lòŋgo la hwatò, e hwɛ rzɔ ndi nanù èhwanja hwaŋga hwatò hwa rza e lòkɛ̀yi. Nà oma hwa rza lòkɛ̀yi Lohwɛ̀, hwa rza o hwɛ na mɔ̀.

⁴Mòkarzɛ̀, e mòkànèlì wa ene rze mɔ̀ ndi à kànèyà màlùtèyà ma hwatò ema hwa rza lòkɛ̀yì Krirztò. Wɔ̀ hwa rza tànɛyi lì rzɔ̀ŋgìtɛ̀nɛ̀ nanù ema ŋmɛ̀ndì mò gbamù e uŋmɛ̀lɛ̀ nɛ Krirztò a hwɛni wòlìto. Krirztò mɔ̀ ŋmìti a hwèlì ndi nàa Lohwɛ̀.

⁵Ɔ̀ndeŋgàtɛ̀ i rza ohwa ndi o lì ayèkirzɛ̀ irzɔ hwiti. Ndi irzɔ je e ohweyà nanù ema Yerzù ndi à hwèlì e Rzàŋgo. O nyòla ama Yerzù irzɔ i hwèlì ndi hwàgbèèlì hwa anyu.

⁶Lohwɛ̀ ema à mà ohwa nanù ema, “Ŋmàye mo hvanye o èki ema e ma loma lì hwɛ jìtìtì,” Mɔ̀ ndi à gbèyi moŋgo ŋmɛ̀ndì mo ama Yerzù o lì hwɛ nàa ŋmàye ema mo hvànya o mèèmà me arzu. Lohwɛ̀ à mà jo gbeyà ene o irzɔ hwa arzɛ ema i lòkɛ̀yi Yerzù ene eyà. Lohwɛ̀ à mà gbeyà ndi nanù, aŋga nanù hwatò hwa hwiya nanù ema mɔ̀ à hwèlì wòlìto ò ma hwatò hwà mà hwiya nanù ema Yerzù Krirztò a hwèlì ndi nàa mɔ̀.

⁷Ndi ŋmɛ̀ndì ema Lohwɛ̀ a jo ŋgbelì o lì ohwa, mo hwèlì ndi eyà ema e ohvi wòlìto rzayi-rzayi. Irzɔ i hwèlì ndi nàa lìhwànya ema eŋge yoma e hwèlì o tenì. Ène eyà e ma gbèyɛ̀nɛ ndi nanù, aŋga nanù hwatò hwa hwiya nanù ema e ŋginyà ndɛnɛ e uwɛ̀lɛ̀lɛ̀yi ndi na Lohwɛ̀, rzeketɛ na irzɔ.

⁸Hwa jo tàkirzɛ i hvonda ja arzɛ, ndi i rzi nyɔ̀kɔhwi. Manɛyi marzako hvɛ i rza hwiya tɔ̀ mamɛ ema i gbeyà, ndi irzɔ i rza ohwa ndi nanù ema Lohwɛ̀ a rza jo uŋmɛ̀lɛ̀ eyà ema i hwɛni o lì gbeyà.

⁹Hwatò hwa jo tàkirzɛ i hvonda ja arzɛ ndi Lohwɛ̀ a rzi jo hwɛmi. Tɔ̀ nɛ hvɛ marzako hwa jo hwenirzɛ, ndi Lohwɛ̀ a rza emeyà nanù ema hwa jo òŋwe.

¹⁰Tɔ ima èki ema i ɛndɛ o lì ohwa ŋmɛ̀ndì mò gbamù, i e ohvi o mèèmà me arzu nanù ema hwatò hwa arza ndi lì jo òŋwa na oma hwà mà oŋwe Yerzù. Àŋga nanù hwatò hwa hwiya nanù ema, Yerzù a hwèlì lòŋgɛ. Mo ndi à hwèlì e mo ema a jo ika e ŋginyà o tenì, na oma i rzɔ i hwèlì lòŋgɛ.

¹¹Irzɔ i hwi nanù ema tɔ̀ nɛ i hwèlì lòŋgɛ nàŋgɛ, i kombɛnɛ e kpelì, èhwanja i gbeyà ndi Yerzù. Ène eyà e hwèlì ndi nanù, o lì gbeyà nanù ema hwa hwiye nanù ema Yerzù a hwèlì lòŋgɛ. Mo ndi à hwèlì e mo ema a jo ikayi e ŋginyà o tenì na oma irzɔ i hwèlì lòŋgɛ.

¹²O èŋgànɛ̀lɛ̀ irzɔ i emelì o lì ŋwa aŋga nanù inyɔ, e luwa lòŋgɛ la gbìndèyà.

¹³I hwèlì ndi nàa e mòtò ema à mà ohwa o kààtì ya ama Lohwɛ̀ nanù ema, “Nà o Lokɛ, o èŋgànɛ̀lɛ̀ na ohwa lì o hvomɛ̀nɛ̀.” Molemilemi na oma oŋgo mòtò a lòkɛ̀ Lohwà, irzɔhvɛ i lòkɛ̀ Lohwà, o èŋgànɛ̀lɛ̀, i hwèlì o lì ohwa ŋmɛ̀ndì mo eni.

¹⁴Irzɔ i hwi nanù ema Lohwɛ̀ ema mo ndi à mà hvùmùlɛ̀ Rzàŋgo Yerzù, a o jo hvùmùlɛ̀ irzɔhvɛ, o lì hwɛ o lòŋgɛ na Yerzù. Ndèŋgana, Lohwɛ̀ a o jo jànà irzɔ na inyɔ o èki ema a hwèlì.

¹⁵Mene Metaka me arzɛ ema i hwèlì i luwa nanù, me hwèlì ndi o lì e oŋgòwànà. Àŋga nanù rzayi-rzayi ja hwatò hwa hweyi tɛ eyà ya ama Lohwɛ̀, ììlì ja ama Lohwɛ̀ i hwa gbeyà hwa luwa lì làkìrzɛ̀ o wòhwe, ndèŋgànà hwa mo eka rzayi-rzayi. Ène eyà e gbeyà rzayi-rzayi ja hwatò hwa o eka Lohwɛ̀.

¹⁶Lìtìŋga lìinì ɔ̀ndeŋgàtɛ̀ i rzi tu mèèmà o lì ohwa ŋmɛ̀ndì mò gbamù. Tɔ̀ nɛ i ŋginyà ja arzu e hwèlì lì ɔ̀ndeyà, ndi Lohwɛ̀ a jo ŋgbà ŋginyà o tenì ja arzu.

¹⁷Hwanu hwàna hwa mètàkà rzɔ ema i taka nàŋgɛ, rzeketɛ e meyɔ ema i tàkìrzɛ̀ mèèmà o lùuŋga. I taka o nàŋgɛ, ndi èluhwe ema e o hwɛ na irzɔ e o koka nyàyi ema i rza o ɔ̀ŋgɛ̀lɛ tɔ̀ mene mètàkà ema i luwa nàŋgɛ anu rze. Ndèŋgànà ene èluhwe e o hwɛ na irzɔ o gbìndèyà.

¹⁸Ɔ̀ndeŋgàtɛ̀ irzɔ i rza ɛnɛ mene mètàkà ema i luwa nàŋgɛ na tɔ̀ eyà. Ndi i ma ika mèèmà me arzu o hwèèmà ema Lohwɛ̀ à mà jo ùteyà, tɔ̀ nɛ i rzi hwe ɛni na mìirzɔ̀ ma arzu. Hweema ema i ɛnɛ nàŋgɛ, hwe hwèlì ndi o ŋmana hvoka wa hvonda, ndi hweŋge hwèèmà ema i rza tànɛyi o lì ɛnɛ nàŋgɛ, hwe o hwɛ natɛ̀ɛ nà ò gbìndèyà.