Read Mokpwe 2 Kɔ̀rintìyà 8 Bible Online

2 Kɔ̀rintìyà 8 - Mokpwe bible

2 Kɔ̀rintìyà 8

¹Wònyamòwè kòkò ja arza nanù ema e hwiye nanù ema Lohwɛ̀ à mà ŋgba ììlì ja eni o hwatò hwa Lohwà ema hwa hwèlì o ŋmèmba mo erzòòkà ya Màrzèdonìyà, o lì arza nanù ema hwa hwɛnɛ e enji.

²Tɔ̀ nɛ hwà mà hwɛnɛ mètàkà na ndùtù rzayì-rzayì, màlìŋgò ma awu ma mà akɛ̀lɛ̀nɛ̀, na lìtake lì awu lìndɛnɛ, lì ma awuŋmɛ̀lɛ̀ o enji ya awu.

³Nà hwèlì ndi mboŋgi nanù ema hwà mà ŋgbà mamɛ hwà mà ohve. Hwà mà ŋgba lì aka mamɛ hwà mà hwɛnɛ lì ŋgba. Hwà mà ŋgbà na mèèmà me awu me arzɛ.

⁴Hwà mà jo atɛkɛ rzayì-rzayì nanù ema i hwɛnɛ mɔ̀nyɛ̀ŋgì o lì oŋgòwànà hwatò hwa Lohwà hwa hwèlì o mbowà ya Jèrurzalɛ̀mù, nà oma wɔ̀hvɛ hwa hwèlì hwa gbeyà.

⁵Hwà mà gbeyà lì aka na oma i ma ɔ̀ŋgɛ̀lɛ̀. Hwà mà loma lì ŋgbà mòŋgɛ ma awu oma Rzàŋgo. O mburzà hvonda hvɛ hwà mà ŋgbà mòŋgɛ màa awu o màa marzu na oma Lohwɛ̀ à mà hwa arzane nanù ema hwa gbeye.

⁶Ène ŋgàna e èŋgànɛ̀lɛ̀ i atɛkɛ Tàyìtùrzì à mà wòteya ene èwòlò ema a e òŋgowane ene èwòlò ya enji a e ùkirzɛ̀ o lìrzukù, na lì ŋgba hwatò mamɛ ema hwa arza na ŋmèma mɔ̀kɔ.

⁷Nàŋgɛ nanù ema e gbeyà hwenè hweyà hwe gbamù, e ètìrzɛ̀ hvɛ lìlòkɛ̀ lì anyu. È ohwe Ŋmɛ̀ndì mò Gbamù, e hwiye hweyà hwe ama Lohwɛ̀. È hwɛnɛ mèèmà me lì òŋgòwàna hwatò, ndèŋgàna e jo lìŋgàni hvɛ lì aka lìmɛni. O èŋgànɛ̀lɛ̀ rzɔ, irzɔ hvɛ ja arza nanù ema e gbeyà gbamù. È hwɛnì hvɛ enji o lì ŋgba hwatò mamɛ hwa arza.

⁸Nà rza e kànèyà ndi ema e gbeye ndi nanù. Ndi na oma na ɛnɛ hwatò ema hwa lòkɛ̀ hwa oŋgòhwànà hwanɛ̀yi hwatò, na arza nanù ema inyɔ hvɛ e awuŋmɛ̀lɛ̀ na oma e lìŋgàni hwanɛ̀yi hwatò.

⁹È hwi na oma e Rzàŋgo ya arzu Yerzù Krirztò a e oŋgòhwànà o lì hwɛ enji. Tɔ̀ ima lìtumba la yòma ema Lohwɛ̀ a hwɛnì, mɔ̀ Yerzù ndi à e hwɛni. Ndi tɔ̀ nanù o nyòla ya anyu à mà hwɛmɛ eŋge ehwàŋgì ya eni ya arzɛ o ŋmanyu rzìi a rzihwa anù rze nàa mòtakèlì wa mòtò. A ma gbeyà ndi nanù o lì arza nanù ema inyɔ e luwe mònàmɛ̀ ema Lohwɛ̀ a ŋgbà hwatò.

¹⁰Màlùteyà ma ami ma hwèlì ndi nanù ema, o ŋma mo mburza, inyɔ ndi e ma hwɛ hwatò hwa worzò o lì hwɛnɛ ŋmèma mo lì oŋgòwànà hwatò, ndèŋgànɛlɛ inyɔ ndi ema hwɛ hwatò hwa worzò o lì wòteyà lì oŋgòwànà hwatò.

¹¹O lì ohwa la jɔ̀kɛ̀ e hwɛnì lì kulɛ èwòlò ema e ma wòteyà, èŋge ŋgàna e gbeyà hwatò hwa hwiya nanù ema e wòŋgìrzɛ̀nɛ̀ lì hwɛ na oma e ma hwɛnɛ e nyɔ̀ŋgi ya lì wòteya na lì kulɛ hvɛ nàa e ma wòteyà o hwewòtelì.

¹²È hwɛnì tɛ nyɔ̀ŋgi ya lì ŋgbà mòtò yoma na oma e ohvi, e emànɛ̀lɛ̀hwɛ̀yì na Lohwɛ̀. Lohwɛ̀ a rza arza nanù ema mòtò a ŋgbe lì aka mamɛ ema a ohvi.

¹³Nà rza ohwa nanù ema lì oŋgòhwànɛ̀ ema e ŋgba hwatò, lì hwa oŋgowane ema inyɔ hwiti e hwèlì o lìtake. Ndi na arza nanù ema inyɔ hwa arzɛ e luwe lìkayi lɔ̀kɔ o mamɛ ema e o tànɛyi hwatò hwa arzɛ.

¹⁴Ndi na oma inyɔ e ohvi rzayì-rzayì nàŋgɛ, o lɔ̀wu nanù ema e òŋgòwane hwaŋga ema hwa hwèlì o hvàrzɛ, aŋga nanù, e hvonda ema inyɔ hvɛ e hwɛ̀ɛ o hvàrzɛ, wɔ̀ hvɛ hwa e òŋgòwàna. Àŋga nanù i mburzà ja ahwakɛ o rza hwɛ ndando.

¹⁵È tìlahwì o kààtì ya Lohwà nanù ema, “Oŋgo mòtò ema a ma ohva rzayì-rzayì a rzi luwe lì aka mamɛ ema à mà arze. Oŋgo èma mɔ̀ hvɛ a rza ohvɛ rzayì-rzayì, mɔ̀ hvɛ à mà lùwa mamɛ ema à mà arze.”

¹⁶Nà èki Lohwɛ̀ nanù ema a ŋgbelì Tàyìtùrzì ŋmèma mo lì e òŋgòwàna, na oma a no ŋgbelì imba hvɛ.

¹⁷Tàyìtùrzì a rza e jèeyà na ŋmɛ̀ni irzɔ ndi i ma mo òma ema a jèe. A ma e jèeyà ndi èhwanja a lìŋgàni.

¹⁸I mo òmani na ɔhvɛhvɛ ŋmanyàŋgo wa arzu wa Krirztò ema a hwiyɛnɛyi o ŋmèmba me arzɛ na oma a ohwa Ŋmɛ̀ndì mò Gbamù.

¹⁹O mburzà nanù hvɛ mɔ̀ à hvɔ̀rzɔ̀hwì na ŋmèmba mo mitelì o lì jo nɔ̀ŋgɔ, o lì hwɛ ŋmèmba na irzɔ o lì gbeyà èwòlò ya lì òŋgòwàna la hwatò. O lì arza nanù ema èluhwe ya ama e Rzàŋgo e ɛneya. Àŋga nanù o ma irzɔ hvɛ ima awuŋmɛ̀lɛ̀ nanù ema i hwɛnì nyìrzɛ̀ o lì hwa òŋgòwàna.

²⁰Irzɔ irza arza nanù ema tɔ̀ mòtò a tɔ̀kirzɛnɛ, o ŋgàna ya èwòlò ya arzu ya eenji ema i gbeyà.

²¹Irzɔ i keka o lì gbeyà mamɛ e ma e lɔ̀wu, o worzò wo ama e Rzàŋgo, na o marzò ma hwatò hwa hwènàmà.

²²O èŋgànɛ̀lɛ̀ rzɔ, je omelì ŋmanyàŋgo wa arzu wa Krirztò na hwa Tàyìtùrzì à mà jo uŋmɛ̀lɛ̀yi nanù ema a hwɛnì nyɔ̀ŋgi ya lì e òŋgòwàna. Tɔ̀ nàŋgɛ nanù à mà ika ŋmèma mo eni na inyɔ, ndèŋganɛlɛ e nyɔ̀ŋgi ya eni ya lì e oŋgòwànà e ma nyàla.

²³Tàyìtùrzì, à mà no oŋgama i hvonda ja arzɛ o lì gbeyà èwòlò ya lì e òŋgòwàna. Hwanɛ̀yi wònyànyàŋgo wa arzu hwa Krirztò, ema hwa ɛ̀ndɛ na Tàyìtùrzì, hwa hwèlì ndi hwatò ema ŋmèmba mo mà omɛ o lìnà la awu, ndèŋgànɛlɛ tɔ̀ ima ekì ema hwa ɛndɛ, na hweyà hvɛ ema hwa gbeyà, hwe jàneyà Krirztò èluhwe.

²⁴O èŋgànɛ̀lɛ̀ rzɔ, e uŋmɛ̀lɛ̀ hwanù hwatò nanù ema e hwa lìŋgàni. È gbèyi tɛ nanù, ŋmèmba ema mo hwa omi, mo rzɔŋgìtɛ̀nɛ̀ nanù ema, eyà ene ɔ̀ndeŋgàtɛ̀ je e gbaana kumba.