Read Mokpwe Gàletìyà 5 Bible Online

Gàletìyà 5 - Mokpwe bible

Gàletìyà 5

¹O eŋgànɛ̀lɛ̀ Krirztò à mà jo rzolowa aŋga nanù i rza hwɛ nàa hwàkòmì hvɛ. O eŋgànɛ̀lɛ̀ e ètìrzɛ̀ mataŋgà mà anyu o rze, e rzi keka lì emeyà nanù ema mòtò a e kaka o tenì ya ŋgɔkɔhwi ya hwàkòmì hvɛ.

²È òkànèyà tɛ! Imba Pàwolò, na e ohweyà nanù ema, e aŋgbɛ tɛ nanù ema e endahwe, eŋge ŋgàna e hwèlì ndi nanù ema Krirztò a rza ohvi hvɛ tɔ̀ janda o inyɔ.

³Nà e kòkòwɛ̀lɛ̀ hvɛ ŋgèlì hvɔ̀kɔ nanù ema, tɔ̀ ima mòtò ema aŋgbɛ mɔ̀ ŋmìti nanù ema a endahwe aŋga nanù Lohwɛ̀ a mo emeyà, a àŋgàmɛ̀nɛ̀yi lì ika imbenda ya arzɛ.

⁴Tɔ̀ ima mɔ̀kɔ wa anyu ema a ɔ̀ŋgɛ̀lɛ̀ nanù ema a hwɛni lì atàkìrzɛ̀ o lì ika e mbenda aŋga nanù Lohwɛ̀ a mo emeyà, à mà màa lì awulɛ mɔ̀ ŋmìti o ma Krirztò. Ndèŋgànɛ̀lɛ̀ à mà awulɛ mɔ̀ ŋmìti o e ndèli ya ama Lohwɛ̀.

⁵O irzɔ, Èlìŋgɛ̀ ya ama Lohwɛ̀ e ma jo gbeyà o lì ohva lìhvìtà nanù ema, Lohwɛ̀ a o jo emeyà nàa hwatò ema hwa hwèlì wòtani èhwanja je emelì Krirztò.

⁶Ŋga wà endà mòtò tɔ̀ wà rzi mò endè eŋge è rza ohvi tɔ̀ eyà ò lì gbeyà nà lì hwɛ là arzu nà Krirztò. Mamɛ ema è hwèlì wòlìto è hwèlì ndi ò lì lòkɛ̀ Krirztò. Lìŋgi lì lòkɛ̀ lì àŋgàmɛ̀nɛ̀yi lì àwùlùhwɛ̀ ò è ndìŋgɛ ema jà à àwùŋmɛ̀lɛ̀nɛ̀ mɔ̀kɔ nà ɔ̀nɛyi.

⁷O hwewotelì inyɔ e ma hwɛ lì gbeyà hweyà gbamù. Njɛnɛ rzɔ a e tiko mèèmà nanù ema e rza oŋgama e jɔ̀kɛ̀ ema e hwèlì o tenì ya ŋmɛ̀ndì mò gbamù e?

⁸Hwetikowelì ema e tiko mèèmà me anyu hwe rza uwɛ̀lɛ̀lɛ̀yi ndi o ma Lohwɛ̀, èhwanja Lohwɛ̀ mɔ̀ ŋmìti ndi à e hvɔ̀rzì o lì hwɛ hwàanà hwa eni.

⁹Mòtò mɔ̀kɔ wa wòhwe ema a hwèlì o ìtììtènì ja anyu, mɔ̀ ndi à hwèlì a hvàŋga inɛyi mbunda ja anyu ja arzɛ, nyayi hvɔ̀kɔ hvɛ mɛnɛ na oma lìwu la mbarzi lì hvuhva lì ikawi tɛ ŋmanà ehwindi.

¹⁰Ndi imba na e ohvani kumba nanù mɛnɛ ema, Lohwɛ̀ a gbeyà nanù ema e rza nɔŋgɔ hwèyòkòlèlì hwe hwahvɛhvɛ hwatò ndi e nɔŋgɔ ndi e hwe ami. Lohwɛ̀ a o kɔ̀kìrzɛ̀ tɔ̀ ima mòtò ema a emirzɛ tɔ̀ a hwɛ ndi njɛnɛ.

¹¹Wònyamòwè kòkò, na ɛndi tɛ o worzo ò lì ohwa nanù ema mòtò a kànɛ̀yi lì endàhwà ndèŋgàna Lohwɛ̀ a o mo emeyà nàa mòtò ema a rzaŋgi na oma wònyà Yudà hwa lòkɛ̀yi, mamɛ ndèŋgàtɛ̀ inyɔ e no kàyìrzɛ e? Imba nà mà hwɛ tɛ lì ohwa nanù ema hwa àŋgàmɛ̀nɛ̀yi lì enda mòtò, e rzi hwɛ imba lì ohwa lì hvomɛ̀nɛ̀ e kpelì ya ama Yerzù o mbarza o ma eŋge e rza tàtìrzɛ̀ wònyà Yudà.

¹²Nà àhvìtɛ̀ nanù ema hwaŋga hwatò ema hwa e emirzɛ hwa ɛndɛ ndi o worzo, inyɛ hwa ɛndɛ o worzo hwa a agbɛɛ wɔ̀ hwiti.

¹³Wònyamòwè kòkò, Lohwɛ̀ a e hwɛlɛ o lì anjiya o èki ema hwa e kànɛ̀yi. Kànatɛ e rza kànyɛ̀hwɛ̀ hvɛ, eŋge e rza e ŋgbelì e wònja o lì gbeyà tɔ̀ mamɛ ema e nyàmà ya nyo ya anyu e arza. Ndi ema tɔ̀ ima mɔ̀ wa anyu a gbèeyà ɔ̀nɛyi na ndìŋgɛ.

¹⁴Inyɔ e gbeyà ndi nanù èhwanja hwa lati tɛ imbenda ja arzɛ eyà ema jo òhwa e hwèlì ndi nanù ema, “O lìŋgàne ohvɛhvɛ mòtò na oma wa alìŋgànɛ o wà witi.”

¹⁵Ndi e rza ahweyànɛlɛ tɛ rzi e anana mɔ̀kɔ na ɔ̀nɛyi o a ɛnɛ oma e hwèlì ndi nyàmà ja wàŋga e aŋgowe. È rza aŋgo tɛ nanù oma e hwɛni lì àwòŋwànɛ̀yì mɔ̀kɔ na ɔ̀nɛyi.

¹⁶Mamɛ ema na ohwa e hwèlì ndi ema, inyɛ Èlìŋgɛ̀ ya ama Lohwɛ̀ e kànèyà mòŋgɛ ma anyu. Ène ye e gbeyà ema e rza gbeyà hweyà hwe wòhwe na oma e nyàmà nyo e arza.

¹⁷Èhwanja mamɛ ema e nyàmà ya nyo ya arzu yɔ ya arza, hwe hwèlì ndi o lì teŋgɛ̀nɛ̀ mamɛ Èlìŋgɛ̀ ya arza. Ndeŋgànɛ̀lɛ̀ mamɛ ema Èlìŋgɛ̀ ya arza e teŋgɛ̀nɛ mamɛ ema e nyàmà ya nyo e arza. Hwene hwe ahwakɛ hwe hwèlì ndi hwàkɔ̀yèlì, ene ŋgàna e hwèlì ndi nanù ema, e rza tànɛyi lì gbeyà mamɛ ema e hwɛni lì gbeyà.

¹⁸Èlìŋgɛ̀ ya ama Lohwɛ̀ ye e timbi tɛ, nanù oma e rza enje o rze ya e mbenda hvɛ.

¹⁹Mamɛ hweyàrzèlì hwe e nyàmà ya nyo e gbeyà hwe ɛneya telele. Hwene hweyàrzèlì hwe nyàmà nyo hwe hwèlì ndi mòrzònje, hwe gbèelì hwe hweyà hwe mbindo, e àkpàlà.

²⁰O lì gbèeyà màhvɛ̀hvɛ̀ mohwà, lìyemba, ɛ̀kɔ̀wù, mòtaŋgo, ìnona, hwètàtò, lì aneya la hwèhvolò, o lì hwɛ la hwehvehva, lì akàhwànɛ̀,

²¹ìnòna o hwatò, lì woma la mimba, lì emirzɛ na o lì gbeyà hwehvɛhvɛ hweyà hwe wòhwe na hwene ema nà mà ohwɛ. Nà e kòkòwɛ̀lɛ̀ naŋgɛ na oma nà mà lome lì gbeyà, hwaŋga ema hwa gbeyà hwene hweyà, hwa rza o rzaŋgohwa mònàmɛ̀ ema mo hwèlì o lìkànèyà là ama Lohwɛ̀.

²²Ndi Èlìŋgɛ̀ yà Wòtani e hwèlì tɛ o tenì yà mòtò, e mò gbeyà nanù ema a gbèyè hweyà na e ndìŋgɛ, na mɔ̀nyɛ̀ŋgì, na ɛ̀yɔ̀lɛ̀, na la àjùlɛ̀nɛ̀, na ŋmèma mo gbàamù, na ɛ̀ɛ̀mɛ̀ ya gbamù, a hwɛ hvɛ ndi mòtò ema hwatò hwa tànɛyi lì ika mèèmà me awu.

²³Èlìŋgɛ̀ yà Wòtani yɔ ndi e gbeyà mòtò a arzìirzɛ na lì alɛ̀mbɛ mo ŋmìti. O rza enje tɔ̀ mbenda lì teŋgɛ̀nɛ hwene hweyà.

²⁴Ndèŋgàna hwaŋga hwatò ema hwa hwèlì na Yerzù Krirztò hwa rza enje hvɛ o rze ya e nyɔ̀ŋgi ya e nyàmà nyo. È gbèyi ndi nàa hwa ɛnɛ oma hwà mà wòmeyà eŋge nyɔ̀ŋgi ya e nyàma nyo ò mbarza, ndèŋgàna e ma ŋwèeyà aŋga.

²⁵Nà oma Èlìŋgɛ̀ ya ama Lohwɛ̀ e ma jo ŋgbɛ lòŋgɛ lìhvènya, inyɛ i hwɛmɛ eŋge Èlìŋgɛ̀ o lì jo kànèyà o lì gbeyà tɔ̀ mamɛ ema i hwɛni lì gbeyà.

²⁶I rza hwɛni lì a ekirzɛ, i rza hwɛni lì ahvikowanɛ, tɔ̀ lì a ahwɛnɛnɛ inona.