Read Mokpwe Hvìlipìyà 1 Bible Online

Hvìlipìyà 1 - Mokpwe bible

Hvìlipìyà 1

¹Imba Pàwolò, mòndeŋgè na Tìmòtì imba ndi na tilì ene kààtì. Nà tìleya ndi hwatò hwa ama Lohwɛ̀, hwatò ema hwa hwèlì mòtò mɔ̀kɔ na Yerzù Krirztò ema hwa hwèlì o mbowà ndɛnɛ ya Hvìlìpì, mondeŋge na hwàtìmbèlì na hwatò ema hwa oŋgowàna èwòlò ya ama Lohwɛ̀ o lì ɛndɛ o worzo.

²Inyɛ̀ è ndèli nà ɛ̀yɔ̀lɛ̀ ema è uwɛ̀lɛ̀lɛ̀ ò mà Lohwɛ̀ è Tatɛ̀ wà arzu, nà Yerzù Krirztò è Rzàŋgo yà arzu è hwɛ nà inyɔ.

³Nà èki Lohwɛ̀ ema imba nà gbèeyà, tɔ̀ ima hvonda nà è ɔ̀ŋgɛ̀lɛ̀ tɛ.

⁴Nà oka mɔ̀nyɛ̀ŋgì tɔ̀ ima hvonda ema nà è kanɛ̀lɛ̀lɛ̀ inyɔ hwa arzɛ.

⁵Nà ŋgbà jèka tɔ̀ ima hvonda ò nyòla jòòŋgwànɛ̀ ema è nò ŋgba ò lì ohwa ŋmɛ̀ndì mò gbamù, lì wòteyà è hvonda ema è mà mò hwèye, rzi è mò lòkɛ̀, nàtɛ̀ɛ nà naŋgɛ.

⁶Nà lòkɛ̀yi nanù ema Lohwɛ̀ ema à mà wòteyà ò lì gbeyà hwene hwèwòlò hwe gbamù ò ìtììtènì ja anyu, à hwɛ ndi ò lì hwe gbeyà natɛ̀ɛ à hwe kulɛ̀ Wùùnyà ema Yerzù Krirztò à ò tìmbɛ̀ ò lì jà.

⁷Imba nà àŋgàmɛ̀nɛ̀yi lì ohva manù màlùtèyà o inyɔ hwa arzɛ èhwanja è hwèlì ò ŋmèma mò ami. Tɔ̀ nà oma nà hwèlì ò hwèwòwà, ndèŋgànɛ̀lɛ̀ nà oma nà ohwa hweyà lì hvomɛ̀nɛ̀ ŋmɛ̀ndì mò gbamù, nà ohwa nanù ema mono ŋmɛ̀ndì mò gbamù mò rza enje mòlaŋgà, mò hwèlì ndi è jɔ̀kɛ̀. Lohwɛ̀ à mà jò uŋmɛ̀lɛ̀ irzɔ hwa arzɛ è ndèli yà eni nà oma i mò gbèeyà.

⁸Lohwɛ̀ ndi à hwèlì è mboŋgi yà ami nanù ema ŋmèma ema nà è hwɛ̀nèlì mò hwèlì ndi nyàyi hvɔ̀kɔ nà oma Yerzù Krirztò mɔhvɛ à è hwɛ̀nèlì.

⁹Nà kanɛ̀ nanù ema, è ndiŋgɛ ema e ohvani Lohwɛ̀ ndèŋgànɛ̀lɛ̀ e yɔ ema e àwòhvànɛ̀lɛ̀yi mɔ̀kɔ na ɔnɛyi e ɛndɛ ndi o worzo nanù mɛnɛ. Ndeŋgànɛ̀lɛ̀ nà kànɛ hvɛ nanù ema inyɛ e hwiye hweyà hwe ama Lohwɛ̀, ndèŋgànɛ̀lɛ̀ e rzɔ̀ŋgìtɛ̀nɛ̀ o lì kakohwa hweyà ema hwe lɔ̀wu na e hweyɔ ema hwe rza lɔ̀wu.

¹⁰Àŋga nanù inyɔ e o hwiya hweyà ema hwe lɔ̀wu rzayi-rzayi. Ène eyà e gbeyà inyɔ e hwɛ wòtani o worzo wo ama Lohwɛ̀, ndèŋgànɛ̀lɛ̀ inyɔ e rza o hwɛnɛ hvɛ tɔ mehwɛlɛ, o Wùnyà ema Krirztò a o jɛ̀ɛ̀ hvɛ.

¹¹Ène eyà e gbeyà nanù ema ɛ̀ɛ̀mɛ̀ ya anyu ya gbamù ema e uwɛlɛlɛyi o ma Yerzù Krirztò, e o awuŋmɛ̀lɛ̀ o hweyà hwe gbamù hwe arzɛ ema e gbeyà, aŋga nanù Lohwɛ̀ a o luwa èluhwe ya eni na jeka.

¹²Wònyàmòwe kòkò, na arza nanù ema e hwiye nanù ema hweyà ema hwe no gbèyɛ̀nɛ̀yi anu, hweŋge hweyà hwe oŋgowani rzayi-rzayi nanù ema ŋmɛ̀ndì mò gbamù mo nyàle lì ɛndɛ o worzo.

¹³Ène eyà e gbèyi, hwàanèlì hwa njuma hwa arzɛ ema hwa ɔŋgeya ewoka ya ama e mòkànèlì, na hwahvɛhvɛ hwatò ema hwa hwèlì anu, hwa hwi nanù ema nà aŋgɛhwɛyi o hwèwòwà ehwànja na hwèlì ndi à mògbèèlì wa ama Krirztò.

¹⁴Èhwànja na aŋgɛhwɛyi o hwèwòwà e ŋgànà ema e ma kɔ̀mɛlɛ rzàyi-rzàyi ja hwàlòkèlì o lì ètìrzɛ̀ mèèmà me awu, o eŋgànɛ̀lɛ̀ wɔ̀ hwà mà ètìrzɛ̀ mèèmà o lì ohwa Eyà ya Lohwà e rzi hwɛ lì oka tɔ̀ wɔ̀ŋgɔ̀.

¹⁵O lì ohwa la jɔ̀kɛ̀, lòŋgo la hwatò hwa ohwa lì hvomɛ̀nɛ̀ Krirztò ehwànja hwa no nonelì ndèŋgànɛlɛ wɔ hwa arza lì awuŋmɛ̀lɛ̀ nanù ema wɔ̀ hwa hwɛni wòlìto lì no aka, ndi loŋgo la awu hwa ohwa moŋgo ŋmɛ̀ndì mò gbamù na mèèmà me gbamù.

¹⁶Hwatò ema hwa ohwa eyà ya Lohwà na mèèmà me gbamù, hwa mo ohwa ndi ehwànja hwa no lìŋgàni, ndèŋgànɛlɛ wɔ hwa hwi nanù ema Lohwɛ̀ à mà emeyà nanù ema na hwɛ anu hwèwòwà aŋga nanù imba na ohwa nanù ema ŋmɛ̀ndì mò gbamù mo rza enje mòlàŋgà, mo hwèlì ndi e jɔ̀kɛ̀.

¹⁷Ndi hwaŋga ema hwa no nòneyà wɔ̀ hwa rza ohwa ŋmɛ̀ndì mò gbamù na mèèmà me gbamù, wɔ̀ hwa mo ohwa ndi o lì arzeelɛ wɔ̀ hwiti hwema. Wɔ̀ hwa gbeyà nanù, o màlùtèyà nanù ema imba na o hweyà wòhwe èhwanja na hwèlì o hwèwòwà.

¹⁸Ndi ene ŋgànà e rza enje tɔ eyà. O hwene hwègbèèlì hwe arzɛ, ŋmɛ̀ndì mò gbamù mo ama Krirztò mɔ̀ ndi hwa hwèlì hwa ohwa, tɔ e hwɛ ndi nanù ema hwa gbeyànì màlùtèyà ma gbamù tɔ̀ ma wòhwe. O eŋgànɛ̀lɛ̀ rzɔ, o nyòla ya ene eyà, imba na o oka mɔ̀nyɛ̀ŋgì.

¹⁹Nà oka ndi mɔ̀nyɛ̀ŋgì nanù mɛnɛ ehwànja na hwi nanù ema lì kànɛ ema e no kànɛlɛlɛ ndèŋgànɛ̀lɛ̀ lì oŋgowàna ema Èlìŋgɛ̀ ya ama Yerzù Krirztò e o no ŋgba, hwe o no gbeyà imba o lì luwa lì rzuŋgàhwa.

²⁰Nà hwɛni e nyɔ̀ŋgi na màlìŋgo ma arzɛ, ndèŋgànɛ̀lɛ̀ na àhvìtɛ̀ nanù ema na rza o ohva irzɔ̀ni, ndi na o hwɛnɛ lì kɔ̀mɛ̀lɛhwɛ ihvonda ja arzɛ rzɛhvɔ̀ni o nàŋgɛ. Ène eyà e o gbèeyà nanù ema tɔ̀ mamɛ ema na gbeyà naŋgɛ, e o gbeyà èluhwe ya ama Krirztò e awuŋmɛ̀lɛ̀, tɔ̀ na hwɛ lòŋgɛ tɔ̀ na ŋwa.

²¹O imba, na oma imba na hwèlì lòŋgɛ, e hwèlì ndi o lì gbèeyà Krirztò, ndeŋgànɛlɛ e hwèlì tɛ nanù ema na ŋwelì tɛ e hwɛ gbamù na imba.

²²È hwèlì tɛ nanù ema na hwèlì lòŋgɛ, na hwɛni ndi lì gbèeyà èwòlò mɛnɛ ema e hwɛni wòlìto. O naŋgɛ na rza hwi ehvàrzu ema na àŋgàmɛ̀nɛ̀ lì hvɔ̀rzɔ̀.

²³Hwene hweyà hweahwakɛ hwe no tɛmelì o worzo, ndèŋgànɛ̀lɛ̀ e no ambani o lì hwiya e yɔ ema na hvɔ̀rzɔ̀. Nà lìŋgàni lì o hwɛmɛ lìni lòŋgɛ rzìi na hwɛ na Krirztò, ehwànja eŋge eyà e lɔ̀wu lì aka lì hwɛ anu rze.

²⁴Ndi o nyòla inyɔ o lɔ̀wu nanù ema na hwɛ o lìni lòŋgɛ.

²⁵Nà lòkɛ̀yi ene eyà, ndèŋgànɛ̀lɛ̀ na hwi nanù ema na o hwɛ o lòŋgɛ. Nà o hwɛ na inyɔ hwa arzɛ nanù mɛnɛ aŋga nanù lìlòkɛ̀ ema e hwɛnelì Krirztò lì àŋgàmɛ̀nɛ̀ lì oŋga ndèŋgànɛ̀lɛ̀ inyɔ e o oka mɔ̀nyɛ̀ŋgì ehwànja e mo lòkɛ̀.

²⁶Ène eyà e gbeyà nanù ema na oma na e hwèlì na inyɔ, e o hwɛnɛ lìtiŋga o lì eka Krirztò o nyòla ami.

²⁷O nàŋgɛ, ɛ̀ɛ̀mɛ̀ ya anyu e àŋgàmɛ̀nɛ̀ ndi lì hwɛ na oma Krirztò o ŋmɛ̀ndì mò gbamù mo eni a ohwi. Ène eyà e gbeyà nanù ema tɔ̀ imba na jà o lì e ɛnɛ tɔ̀ na rzi e ɛnɛ, na hwiya nanù ema inyɔ e tɛmi gbamù nàa mòtò mɔ̀kɔ, ndèŋgànɛ̀lɛ̀ e hwɛni hvɛ ndi mɔ̀ŋgɛ̀lɛ mɔ̀kɔ o lì ana lì kombɛ mamɛ ema inyɔ e lòkɛ̀.

²⁸È rzi keka lì oka hwaŋga hwatò ema hwa e teŋgɛ̀nɛ̀ wɔ̀ŋgɔ̀. Inyɛ̀ ètìrzɛ̀ mèèmà me anyu o ihvonda ja arzɛ. Ène eyà e o uŋmɛ̀lɛ̀ nanù ema, wɔ̀ hwa rza o luwa lìrzùŋgàhwa ndi inyɔ e o lì luwa. Lohwɛ̀ ndi à rzekelì hwene hweyà hwe arzɛ.

²⁹Lohwɛ̀ a gbeyànì ŋmèma mo eni mo gbamù nanù ema inyɔ e gbèeyà Krirztò, rzeketɛ o lì lòkɛ̀ Krirztò mɛnɛ, ndi o lì tàkirzɛhwɛ o nyòla ama Krirztò.

³⁰O naŋgɛ inyɛ ja aneya ŋmɛ̀ndì mò gbamù. Èŋge nyayi ya njuma ema e ma ɛnɛ nà mà ane yɔ mɛnɛ hvɛ ndi na hwèlì lì ana naŋgɛ.