Read Mokpwe Hvìlipìyà 2 Bible Online

Hvìlipìyà 2 - Mokpwe bible

Hvìlipìyà 2

¹Nà oma e hwèlì mɔ̀kɔ na Krirztò e kɔ̀mɛlɛhwɛyi, ndèŋgànɛ̀lɛ̀ e ndìŋgɛ ya eni è e ŋgba etembe, inyɔ e alàtanɛ na Èlìŋgɛ̀ yà Wòtani. È awuŋmɛ̀lɛ̀nɛ mèèmà me gbamù na lì a okànɛ̀lɛ̀ mɔ̀kɔ na ɔnɛyi ììlì.

²Mɔ̀nyɛ̀ŋgì mo ami mo o ondìrzɛ̀hwɛ, e hwèlì tɛ nanù ema e ohvi mɔ̀ŋgɛ̀lɛ mɔ̀kɔ, e awuŋmɛ̀lɛ̀nɛ tɛ mɔ̀kɔ na ɔnɛyi ndiŋgɛ, e ohvi tɛ ŋmèma mɔ̀kɔ ndèŋgànɛ̀lɛ̀ e hwɛ ndi nàa mòtò mɔ̀kɔ o tɔ̀ mamɛ ema e gbeyà.

³È rzi gbeyà hweyà ema hwe uŋmɛ̀lɛ̀ nanù ema e hwe gbeyà ndi o lì hwɛ gbamù. È rzi gbeyà hvɛ hweyà ema hwe uŋmɛ̀lɛ̀ nanù ema e awòwɛ̀. Ndi na lì arzihwirzɛ la anyu la arzɛ inyɛ e ɛnɛ hwahvɛhvɛ hwatò wòlìto lì aka inyɔ hwìtì.

⁴È rzi gbeyà hweyà ema hwe e jàneyà ndi inyɔ hwìtì mɔ̀rzɛ̀ŋgì, ndi e a gbeyà hvɛ hweyà ema hwe oŋgowàna hwahvɛhvɛ hwatò.

⁵Inyɛ̀ màlùtèyà ma anyu ma hwɛ ndi nàa e ma ama Yerzù Krirztò.

⁶A ma hwɛ ndi na oma Lohwɛ̀ à mà hwɛ, ndi tɔ nanù, a rzi ohve tɔ màlùtèyà nanù ema hwa ohwe nanù ema mɔ̀ na Lohwɛ̀ hwa hwèlì ndi nyayi hvɔ̀kɔ.

⁷A rzi awòwɛ̀ mɔ̀ ŋmìti wòlìto, Ndi à mà aŋgbɛlɛ mɔ̀ ŋmìti nàa e mògbèèlì, ndeŋgànɛlɛ hwà mà mo ŋyàa ndi nàa e mòtò wa hwènàmà.

⁸È hvonda ema à mà hwɛ nàa e mòtò wa hwènàmà, à mà arzihwirzɛ mɔ̀ ŋmìti, ndèŋgànɛ̀lɛ̀ à mà emeyà o lì ŋwa. A ma emeyà o lì ŋwèeyà o mbàrza,

⁹Ène ŋgànà o eŋgànɛ̀lɛ̀ Lohwɛ̀ à mà mo ŋgba ehvolò ema e kàrzàmi natɛ̀ɛ na o ŋmanyu, ndèŋgànɛ̀lɛ̀ à mà mo ŋgba hvɛ lìnà ema lì aka mìinà mà arzɛ.

¹⁰Lohwɛ̀ à mà gbeyà ndi ene eyà nanù aŋga nanù o lìna la ama Yerzù, tɔ̀ ima ewèkèlì e hwɛni lì rzumeya Yerzù màwɔ̀ŋgɔ̀ŋgɔ̀, tɔ̀ hwèwèkelì ema hwe hwèlì ndi o ŋmanyu yà lohwà, tɔ̀ anu rze ya mɔ̀nyɛ̀ tɔ̀ o èkomè ya hwatò ema hwà mà ŋwɛɛ.

¹¹Hwàto hwa arzɛ hwa o ohwa nanù ema Yerzù Krirztò ndi à hwèlì e Rzàŋgo. Aŋga nanù Lohwɛ̀ ema a hwèlì e Tatɛ̀ a o luwa èluhwe.

¹²O eŋgànɛlɛ rzɔ, ìi wònyàmòwe kòkò, na oma e ma hwɛ lì gbeyà hweyà ema Lohwɛ̀ à mà ohwe nanù ema e gbeye e hvonda ema nà mà hwɛ na inyɔ, e o lɔ̀wu nanù ema e gbeye mamɛ ema a ohwi nanù ema e gbeye, nàŋgɛ ema imba na rza enje hvɛ na inyɔ. È àŋgàmɛ̀nɛ̀yi lì hwɛnɛ wɔ̀ŋgɔ̀ wo ama Lohwɛ̀ o mèèmà me anyu na o lì arzihwirzɛ inyɔ hwiti o worzo wo ama Lohwɛ̀. È keke o lì gbeyà hweyà ema Lohwɛ̀ a arza nanù ema e gbeye aŋga nanù lì kɔ̀tɔ̀wɔ̀ ema e o luwɛ e o ondìrzɛ̀hwɛ.

¹³Inyɛ̀ e gbeye nanù, ehwànja Lohwɛ̀ a hwèlì na inyɔ o ihvonda ja arzɛ, aŋga nanù e o ohva mèèmà o lì gbeyà hweyà hwe gbamù ema mɔ̀ à arza nanù ema e gbeye, ndèŋgànɛ̀lɛ̀ e hwe gbèyi.

¹⁴È gbeye hweyà hwe arzɛ e rzi hwɛ lì àyiŋgòwɛ̀ tɔ̀ o lì kɔɔ hvènda.

¹⁵O lì arza nanù ema inyɔ e rza hwɛ̀lɛ̀hwɛ̀ ndèŋgànɛ̀lɛ̀ e rzaŋgi. Ène ŋgànà e hwèlì ndi nanù ema inyɔ e o hwɛ hwàanà hwa ama Lohwɛ̀ ema hwa rza ohvɛ tɔ̀ njɔ̀mi, ema hwa hwèlì o ìtììtènì ja hwatò ema hwa gbeyà wòhwe hvonda tɛ. Inyɛ̀ e hwɛ o ìtììtènì ja awu o e rze ya mɔ̀nyɛ̀ nàa rzombe ndi i hvànya ihvonda ja arzɛ.

¹⁶È ohweyà hwatò ŋmɛ̀ndì mò gbamù ema mo hwa ŋgbàà lòŋgɛ la gbìndèyà. È gbèyi nanù aŋga nanù, na e ohvana kumba o wùnyà ema Krirztò a o jɛ̀ɛ̀. Nà arza lì àyekìrzɛ ehwànja e o uŋmɛ̀lɛ̀ na e jɔ̀kɛ̀ nanù ema lì umbɛlɛlɛ la ami la arzɛ na èwòlò ya ŋginyà ema nà mà gbèèyɛ̀ hwe rza o ɛndɛ ndi ŋgundu.

¹⁷Nà o hwɛ ndi nàa mohvo mo mimba emà mà rzɔ̀lɛhwɛ o nyòla èwòlò ema inyɔ e gbeyà, nàa jàhwèyà o nyòla lìlòkɛ̀ ema inyɔ e hwɛni. Nà tànɛyi lì taka tɔ lì ŋwa ehwànja na ohwa ŋmɛ̀ndì mò gbamù ŋgànà hvɔ̀kɔ na oma inyɔ hvɛ e hwèlì e tàkàà ehwànja e mo lòkɛ̀. Ndi na hwèlì na lìŋgà na lì e okana inyɔ hwa arzɛ mɔ̀nyɛ̀ŋgi.

¹⁸O eŋgànɛlɛ inyɔ hvɛ e hwɛni lì lìŋgà na o lì no okànà mɔ̀nyɛ̀ŋgì.

¹⁹Nà àhvìtɛ̀ nanù ema na e omeya Tìmòtì o lì ehvɛhvɛ ŋmanà mbɔ, e hwèlì tɛ nanù ema Rzàŋgo Yerzù a emelì tɛ, aŋga nanù ŋmɛ̀ndì ema imba na o luwɛ lì e hvomɛ̀nɛ̀, mo o no kɔ̀mɛlɛ.

²⁰O rza enje tɔ̀ mòtò tɔ̀ mɔ̀kɔ anu na imba nàa Tìmòtì, a e ohvanelì nyɔ̀ŋgi ya gbamù lì hvomɛ̀nɛ̀ hwèlìyelì hwe anyu.

²¹Nà ohwa ndi ene eyà nanù ehwànja tɔ̀ ima mòtò a lùteyà ndi lì hvomɛ̀nɛ̀ mamɛ ema mɔ̀ à arza, hwa rza gbeyà na oma Yerzù Krirztò mɔ̀ à arza nanù ema hwa gbeye.

²²Ndi inyɔ hwiti hvɛ e hwi na oma Tìmòtì à mà awuŋmɛ̀lɛ̀ nanù ema a tànɛyi lì lòkɛ̀hwɛ, ehwànja irzɔ na mɔ̀ i gbeeyɛnɛ èwòlò ya lì ohwa ŋmɛ̀ndì mò gbamù nàa ŋmanà na rzàŋgɛ.

²³O eŋgànɛlɛ rzɔ, na àhvìtɛ̀ o lì e omeya e mɔ̀, e hvonda na ɛnɛ na oma hweyà hwe o hwɛ na imba.

²⁴Nà lòkɛ̀yì nanù ema e Rzàŋgo e o emeyà nanù ema imba hvɛ na o ehvɛhvɛ ŋmanà mbɔ.

²⁵Ndi nà mà kulɛ nanù ema o lɔ̀wu nanù ema imba na e omeya ŋmanyàŋgò wa arzu Èpàhvrɔ̀dìtùrzì. A mà gbeyà èwòlò ya ama Krirztò na imba, ndèŋgànɛ̀lɛ̀ à mà oŋgowàna o lì teŋgɛ̀nɛ̀ hwatò ema hwa anana ŋmɛ̀ndì mò gbamù. Ndeŋgànɛ̀lɛ̀ mɔ̀ ndi à hwèlì nàa e rzùwɛlɛ̀ ema inyɔ e ma òme o lì no oŋgowàna.

²⁶A hwɛni e nyɔ̀ŋgi o lì e ɛnɛ inyɔ hwa arzɛ, ndèŋgànɛ̀lɛ̀ à mà kpa ŋmèma na oma mɔ̀ à mà hweye nanù ema inyɔ e ma hweyà nanù ema mɔ̀ à mà ɔ̀kirzɛ.

²⁷Nà e jɔ̀kɛ̀ a mà ɔ̀kirzɛ̀ natɛ̀ɛ à mà hvɛ lì ŋwa. Ndi Lohwɛ̀ à mà mo òkeya ììlì rzeketɛ mɔ̀ mɛnɛ, ndi na imba hvɛ. Lohwɛ̀ a rzi emeyà nanù ema a ŋwe aŋga nanù, imba hvɛ na rza o hwɛnɛ ndùtù.

²⁸Nà hwɛni nyɔ̀ŋgi ndɛnɛ o lì e omeya e mɔ̀ àŋga nanù inyɔ e mo ɛni hvɛ tɛ, e oka mɔ̀nyɛ̀ŋgì ndèŋgànɛ̀lɛ̀ imba hvɛ na rza o ohva metàkìrzɛ̀nɛ o lì e hvomɛ̀nɛ̀.

²⁹O eŋgànɛlɛ rzɔ, e mo kàrzɛ na màlìŋgo ehwànja e lòkɛ̀yì e Rzàŋgo na oma mɔ̀ ŋmìti a mo lòkɛ̀yi. È mo ŋgbe èluhwe na oma e ŋgbàà hwatò.

³⁰È mo ŋgbe èluhwe ehwànja mɔ̀ à mà arza lì ŋwa, ndèŋgànɛ̀lɛ̀ a hvànji e kpelì, ehwànja a gbèeyà Krirztò. A ma gbeyà ndi nanù aŋga nanù a o no oŋgòhwànà o lì gbeyà èwòlò ema inyɔ hwiti e rzi tanɛ lì gbeyà.