Read Mokpwe Kòlòrzìyà 1 Bible Online

Kòlòrzìyà 1 - Mokpwe bible

Kòlòrzìyà 1

¹Imba Pàwolò, ema na hwèlì mɔ̀kɔ wa i àpɔ̀rzìtòlò ja ama Yerzù Krirztò na oma Lohwɛ̀ a kàkɛ̀nɛ, imba ndi na e tìleya ini itita. Tìmòtì ŋmànyàŋgo wa arzu wa ama Krirztò na imba je e omelì ikɔ̀mi.

²Nà è tìleyà ndi inyɔ hwatò hwa ama Lohwɛ̀ ema è hwèlì o mbowà ndɛnɛ yà Kòlòrzìyà ini ìtìtà. Inyɔ è hwèlì ndi nà Krirztò ndeŋgànɛlɛ è mò òŋgamana ndi nà ŋmèma mɔ̀kɔ. È ndèli nà ɛ̀yɔ̀lɛ̀ yà ama Lohwɛ̀ Tatɛ̀ wà arzu è hwɛ nà inyɔ.

³Jè è kanɛ̀lɛ̀lɛ̀ tɔ̀ ima hvonda ò lì eka Lohwɛ̀, Tatɛ̀ yà ama Rzàŋgo wà arzu Yerzù Krirztò.

⁴Irzɔ jè èka Lohwɛ̀ ehwànja, irzɔ i mà hweyà lì hvomɛ̀nɛ̀ lìlòkɛ̀ là anyu là ama Yerzù Krirztò. Nà è ndìŋgɛ yà anyu ema è hwɛ̀nèlì hwatò hwa arzɛ hwa ama Lohwɛ̀.

⁵I hwi nanù ema inyɔ è gbeyà ndi nanù ehwànja è mà rzèkeyà mèèmà mè anyu nanù ema è ò lùwa mònàmɛ̀ ema Lohwɛ̀ à mà è ùteya ò ŋmanyu yà lohwà. Inyɔ è mà màa lì hweya hweyà lì hvomɛ̀nɛ̀ moŋgo mònàmɛ̀, è hvonda ema hwa mà lòme lì è ohweyà ŋmɛ̀ndì mò gbamù.

⁶Mono ŋmɛ̀ndì mò gbamù ema mò jànà mònàmɛ̀ mò ama Lohwɛ̀, mò hwèlì mò ohwahwɛlɛ nà lì nyàla ò è rze ya arzɛ. Wùùnyà wò worzo ema è mà mò hwèye, inyɔ è mà rzɔ̀ŋgìtɛ̀nɛ̀ nanù ema Lohwɛ̀ à hwɛ̀nèlì hwatò hwa wòhwe ŋmèma mo gbamù.

⁷Èpàhvràrzì, è mògbèèlì wà ama Yerzù Krirztò, mɔ̀ ndi à mà è ohweyà moŋgo ŋmɛ̀ndì. À hwèlì ndi mòtò ema i gbeyànɛlɛ èwòlò ndeŋgànɛlɛ ì mò lìŋgàni rzàyi-rzàyi. À gbèeyà ndi Yerzù Krirztò èwòlò nà ŋmèma mɔ̀kɔ. Nà oma à hwèlì nà inyɔ, èwòlò ema ì mà hwɛnɛ lì gbeyà yɔ̀ ndi mɔ̀ à hwèlì à gbeyà nanù.

⁸Ndeŋgànɛ̀lɛ̀ mɔ̀ ndi à jò òhwèlì nanù ema Èlìŋgɛ̀ yà Wòtani è mà gbeyà nanù ema inyɔ è lìŋgàne hwatò hwa ama Lohwɛ̀.

⁹Ò lìni lìtiŋgà rzɔ, irzɔ i hwèlì jè è kànɛ̀lɛ̀lɛ̀ tɔ̀ ima hvonda. Ì kanɛ̀ nanù ema inyɛ Lohwɛ̀ à gbèye inyɔ è rzɔ̀ŋgìtɛ̀nɛ̀ kɔ̀yi-kɔ̀yi eyà ema mɔ̀ à arza nanù ema è gbèyè. Ì kanɛ̀ nanù ema Lohwɛ̀ à è ŋgbe lìhwiyè nà lì rzɔ̀ŋgìtɛ̀nɛ̀ aŋga nanù è rzɔ̀ŋgìtɛ̀nɛ̀ gbamù eyà yà Èlìŋgɛ̀.

¹⁰Èŋge eyà è gbeyà mòŋgɛ mà anyu, mà hwɛ ndi nà oma lòŋgɛ là hwatò hwa ama Lohwɛ̀ là àŋgàmɛ̀nɛ̀yi lì hwɛ. È ò gbeyà ndi hweyà ema hwe ò mò lìŋgirzɛ. Hweyà hwe gbamù nà gbamù mɛnɛ ndi inyɔ è ò gbeyɛ. Lì rzɔ̀ŋgìtɛ̀nɛ̀ là anyu là ama Lohwɛ̀ lì ò ahwàtɛ ndi nanù mɛnɛ.

¹¹Ì kanɛ̀ hvɛ nanù mɛnɛ ema Lohwɛ̀ à è embɛ nà è ŋginyà yà eni ndɛnɛ, aŋga nanù è tànɛ ò lì ajùlɛ̀, è kakè mèèmà mè anyu, ò lì okànà hweyà hwe arzɛ mɔ̀nyɛ̀ŋgì.

¹²Inyɔ è ò eka, Tatɛ̀ ò hweyà hwe arzɛ. Mɔ̀ ndi à gbèyi nanù ema inyɔ è tànɛ lì hwɛ hwatò ema hwa tànɛyi lì lùwa lòŋgo là erzàŋgo ema mɔ̀ à ùtelì hwatò wà eni ò èki ema ŋmàye mò hwèlì.

¹³Mɔ̀ à mà jò ulɛ̀ ò rze yà è ŋginyà yà lìkànèyà là jìtìtì, ndèŋgànà à mà jò jànà ò tenì yà lìkànèyà là ama è ŋmanà wà eni wà ndìŋgɛ yà màlìŋgò.

¹⁴Lohwɛ̀ à mà jò làkìrzɛ̀ wòhwe wò arzu nà oma à mà jò kɔ̀te nà màyija ema è Ŋmanà wà eni à mà kòme ò mbarzà.

¹⁵Tɔ̀ mòtò à rza ɛni Lohwɛ̀ nà mììrzɔ̀ mà eni. Ndi hwatò hwa mà rzɔ̀ŋgìtɛ̀nɛ̀ njɛnɛ Lohwɛ̀ à hwèlì è hvonda ema hwa mà ɛnɛ Krirztò, ehwànja mɔ̀ ndi à akɛ̀nɛ̀ Lohwɛ̀. Mɔ̀ ndi à hwèlì ehvòwà yà ŋmanà ema à tɛmì ò ŋmanyu yà hwèèmà hwe arzɛ ema Lohwɛ̀ à mà wèkɛ.

¹⁶È hwèlì ndi nanù ehwànja ò lì akeyà na Krirztò ɔndi Lohwɛ̀ à mà wèke hwèèmà hwe arzɛ ema hwe hwèlì ò ŋmanyu yà lohwà nà è rze yà mɔ̀nyɛ̀. Mɔ̀ à mà wèka hwèèmà ema hwatò hwa mà ɛnɛ nà è hwèyɔ̀ ema hwa rza ɛnɛ nà mììrzɔ̀ mà awu. Mɔ̀ ndi à wèkì hwàkànèlì, nà ìŋginyà jà arzɛ. Ò lì akeyà nà Krirztò, Lohwɛ̀ à mà wèkà hwèèmà hwe arzɛ, ndèŋgàna ò mɔ̀ ndeŋgatɛ Lohwɛ̀ à mà wèkà hweŋge hwèèmà hwe arzɛ.

¹⁷Ndeŋgànɛ̀lɛ̀ è ohwàhwɛlɛ nanù ema o ò wèkàhwà tɔ̀ yoma anu rze yà mɔ̀nyɛ̀, Krirztò mɔ̀ à mà lòma lì hwɛ ò lòŋgɛ. Ndèŋgànɛ̀lɛ̀ mɔ̀ ndi à gbèyi ɔ̀ndèŋgàtɛ̀ hwèèmà hwe arzɛ hwe hwèlì ndi ò wèkì hwe awu hwe jɔ̀kɛ̀.

¹⁸Mɔ̀ ndi à hwèlì mòòhvò mò hwatò ema hwa mò lòkɛ̀yì, ndèŋgànɛlɛ wɔ̀ hwa hwèlì ndi nàa è nyo yà eni. Mɔ̀ ndi à ŋgba hwaŋga hwatò lòŋgɛ ehwànja mɔ̀ ndi à hwèlì è mòtò wà worzo ema Lohwɛ̀ à hvùmùlɛ̀yi ò kpelì, ndèŋganɛlɛ ema mɔ̀ ndi à ò hwɛ natɛ̀ɛ nà ò gbìndèyà. Ène eyà è mà gbèyɛ̀nɛ̀ ndi nanù aŋga nanù mɔ̀ à hwɛ ò lì kànèyà hweyà hwe arzɛ.

¹⁹Hwene hweyà hwe hwèlì ndi nanù ehwànja nanù ndi Lohwɛ̀ mɔ̀ ŋmitɛ-ŋmitɛ à hwèlì.

²⁰Lohwɛ̀ à mà gbeyà ndi nanù, aŋga nanù hwèèmà hwe arzɛ hwe ò mò jèeyà ò rze yà eni ò lì akeyà nà Krirztò. Hwene hwèmà hwe hwèlì ndi è hweyɔ hwe anu rze yà mɔ̀nyɛ̀ nà è hwè ŋmanyu yà lohwà, ehwànja è ŋmanà wà eni à mà kòma màyija mà eni ò mbàrza. Ò nàŋgɛ nanù hwèèmà hwe arzɛ hwe tànɛyi lì hwɛ ò ɛ̀yɔ̀lɛ̀ nà Lohwɛ̀.

²¹Ò lìrzàkò lɔ̀kɔ, inyɔ è mà rzɔ̀lɛ̀nɛ̀ Lohwɛ̀ ndèŋgànɛ̀lɛ̀ è mà hwɛ ndi hwàkɔ̀ɔ̀yèlì hwa eni ò nyòla hweyà hwe wòhwe ema è mà hwɛ lì gbeyà nà lì lùteyà.

²²Ndi ò naŋgɛ, Lohwɛ̀ à mà gbeyà nanù ema inyɔ è mò tìmbeyà ò lì akeyà nà è kpelì yà ama è ŋmanà wà eni Krirztò ò mbàrza ema à mà ohva è nyo yà mòtò wà hwènàmà. Lohwɛ̀ à mà gbeyà ndi nanù aŋga nanù inyɔ è hwɛ ò èki ema mɔ̀ à hwèlì, inyɛ inyɔ è hwɛ hwatò ema hwa rzàŋgi, è rza àŋgàmɛ̀nɛ̀ lì hwɛnɛ tɔ̀ lìtɔ̀ti tɔ̀ lɔ̀kɔ là wòhwe ò nyo yà anyu, inyɛ hwa rza è lɛ̀mbɛ nà tɔ̀ lìtònà tɔ̀ lɔ̀kɔ.

²³Inyɛ̀ è hwɛ ndi nanù ema lì lòkɛ̀ là anyu lì àŋgàmɛ̀nɛ̀yi lì imbama, è inyàmɛ̀nɛ̀ hwètɛ̀mèlì hwe matàŋga mà anyu ò mɔ̀nyɛ̀, ndèŋgànɛ̀lɛ̀ è ika mèèmà mè anyu ò ŋmɛ̀ndì mò gbamù ema è mà hwèyɛ. Moŋgo ŋmɛ̀ndì mò gbamù ema inyɔ è mà màa lì hweyà, mò hwèlì ndi ŋmɛ̀ndì mò gbamù ema mò mà nyàlɛ̀ ò è rze yà arzɛ, ndeŋgànɛlɛ mɔ̀ ndi imba Pàwolò nà atìmbìrzɛ̀yi è mògbèèlì wà ama Lohwɛ̀ ò lì gbeyà.

²⁴Ò naŋgɛ nanù nà oka mɔ̀nyɛ̀ŋgi ò nyòla mòtàkà ema nà lùwa ò lì è hvomɛ̀nɛ̀. Nà oma nà lùwa mono mòtàkà nanù, nà mà kulɛ̀ mòtàkà mò ama Yerzù ema mò àŋgàmɛ̀nɛ̀yi lì hwɛ, ò nyo yà eni, eŋge ŋgànà è hwèlì ndi nanù ema hwatò ema hwa mò lòkɛ̀yì Krirztò.

²⁵Ndeŋgànɛ̀lɛ̀ Lohwɛ̀ à mà nò gbeyà ò lì hwɛ è mògbèèlì à gbèeyà hwatò ema hwa lòkɛ̀yì Krirztò. Mɔ̀ à mà nò òma nanù ema nà è ohweyà ŋmɛ̀ndì mò gbamù kɔ̀yi-kɔ̀yi.

²⁶Ò mòlòmɛ̀ ŋmɛ̀ndì mò eni mò mà hwɛ ndi eyà ema hwatò hwa rzi rzɔ̀ŋgìtɛ̀nɛ̀, ndi ò nàŋgɛ mɔ̀ à mà gbeyà hwatò wà eni ò lì mò hwiya.

²⁷Lohwɛ̀ à arza nanù ema hwatò hwa eni hwa hwiye nanù ema mònàmɛ̀ nà è ndèli yà ama Krirztò è hwèlì hvɛ nanù mɛnɛ ò hwatò ema hwa rza enje wònyà Yudà. È wùndɛ̀ ema è hwèlì ò tenì è hwèlì ndi ema inyɔ e ika mèèmà mè anyu nanù ema, inyɔ è lùwa è ndèli ema Lohwɛ̀ à ohwi nanù ema à ŋgba hwatò wà eni.

²⁸Ɔndèŋgàtɛ̀ irzɔ jò òhweyà hwatò lì hvomɛ̀nɛ̀ Krirztò tɔ̀ ima èki ema jè ɛndɛ. I hwa kòkòwɛ̀lɛ̀, nà lì hwa okòlɛ nà lìhwiyè là arzɛ ema Lohwɛ̀ à mà jò ŋgbɛ. Irzɔ i gbeyà ndi nanù ehwànja ja arza ndi nanù ema wɔ̀ hwa èmàyɛ̀lɛ̀ ò worzo wò ama Lohwɛ̀ nàa hwatò ema màtàŋga mà awu ma mà màa lì imbami ò tenì yà lì lòkɛ̀.

²⁹Ò lì gbeyà ene èwòlò, imba nà atàkìrzɛ̀ rzàyi-rzàyi ò lì è gbeyà, è ŋginyà yà ama Krirztò ema è hwèlì ò tenì yà ami yɔ̀ ndi è nò ŋgba è ŋginyà è mà nà atàkìrzɛ̀nɛ̀.