Read Mokpwe Kòlòrzìyà 3 Bible Online

Kòlòrzìyà 3 - Mokpwe bible

Kòlòrzìyà 3

¹È hwèlì ndi nàŋgɛ nàa, Lohwɛ̀ à hvùmùlɛ̀ Krirztò, à mà è hvùmùlɛ̀ inyɔ hvɛ. Ò eŋgànɛlɛ rzɔ, è hwɛnɛ è nyɔ̀ŋgi yà hwèèmà hwe è ŋmanyu yà lohwà, èki ema Krirztò à hwèlì à kànèyà ò lìya là momɛ̀ yà ama Lohwɛ̀.

²È ika mèèmà mè anyu ò hwèmà ema hwe hwèlì ò ŋmanyu yà lohwà, è rzi ika mèèmà mè anyu ò hwèmà hwe rze yà mɔ̀nyɛ̀.

³Inyɔ è hwiye nanù ema nà oma Krirztò à ŋwelì è gbèyi ndi nàa inyɔ hvɛ è mà ŋwa.

⁴Krirztò ndi à hwèlì lòŋgɛ là arzu, ndeŋgànɛlɛ mɔ̀ à jelì tɛ ò ene rze, inyɔ hvɛ è hwɛ nà mɔ̀ ò èluhwe yà eni yà arzɛ.

⁵O eŋgànɛ̀lɛ̀ rzɔ, è àŋgàmɛ̀nɛ̀yi lì ulɛ ò mèèmà mè anyu hwèèmà hwe arzɛ hwe è nyo yà è mòtò wà hwènàmà. È ulɛ̀ ò mèèmà mè anyu hwèmà nàa mòrzònje mò lìhwa, hwèèmà hwe mbindo, ìlema jà hweyà hwe è nyo yà è mòtò wà hwènàmà, ò lì hwɛnɛ màlùtèyà mà wòhwe nà è njɔ̀ŋgu. È hwèlì tɛ njɔ̀ŋgu è gbèyi ndi nàa è kanɛ̀ ndi lì hvɛhvɛ lohwà.

⁶Lohwɛ̀ à ò kɔ̀kìrzɛ̀ hwatò ema hwa gbeyà ini tumba ja hweyà. Ini tumba ja hweyà i tàtìrzɛ̀ Lohwɛ̀ ò eŋgànɛlɛ mɔ̀ à hwɛni lì kɔ̀kìrzɛ̀ hwatò ema hwa hwe gbeyà.

⁷Ini tumba ja hweyà ndi e ma hwɛ lì gbeyà o mòlòmɛ, e hvonda ema e nyɔ̀ŋgi ya hweyà hwe rze e ma hwɛ lì e kànèyà.

⁸Ndi ò nàŋgɛ inyɔ è hwɛni lì hwɛmɛ ò lì gbeyà hweyà nàa, hwètàtò, lì hwɛ̀nɛ̀ lìndɛ̀nɛ̀, è kɔ̀ɔ̀wù, ò lì hvàŋga lìinà là mòtò, nà ò lì hwɛnɛ wànà yà wòhwe.

⁹È rza àkɔ̀ɔ̀wɛ̀lɛ̀lɛ̀ hweyà mɔ̀kɔ nà ɔ̀nɛ̀yi. È rzi gbeyà hwene hweyà nà oma è mà hwɛ nanù ema inyɔ è mà hwɛmɛ ò lì gbeyà hweyà hwe wòhwe.

¹⁰Ò nàŋgɛ inyɔ è mà wɔ̀tɔ̀ ndi mòŋgombe mohvènya. Lohwɛ̀ à mà è ika lòŋgɛ lì hvènya ò tenì yà anyu, ndèŋgànɛlɛ mɔ̀ à mà gbeyà ema lì oŋge aŋga nanù è hwɛ ndi nàa mɔ̀, nà ò lì mò hwiya kɔ̀yi-kɔ̀yi nanù ema mɔ̀ ndi à e weki. Lini lòŋgɛ lì hvènya ema è hwɛni, lì mà gbeyà ema

¹¹ò rza enje hwèkàkòwèlì ò hwatò hwa wònyà Yudà nà hwatò ema hwa rza enje wònyà Yudà, tɔ̀ mòtò ema à endàhwì tɔ̀ è mɔ̀ ema à rza endàhwɛ̀. Ò rza enje hwèkakòwèlì ŋga mòtò à hwèlì ndi ŋmɛ̀nì tɔ̀ mòtò wà hwaŋga tɔ̀ mòtò wà wònja. Krirztò ndi à hwèlì hweyà hwe arzɛ, ndèŋgànɛlɛ à hwèlì ò tenì yà inyɔ hwa arzɛ.

¹²È hwèlì ndi nàa hwatò ema Lohwɛ̀ à mà hvɔ̀rzɛ̀, inyɔ è ondi wòtani ndèŋgànɛ̀lɛ̀ à è lìŋgàni rzàyi-rzàyi. Ò èŋgànɛlɛ rzɔ inyɔ è àŋgàmɛ̀nɛ̀yi lì hwɛnɛ mèèmà mè ììlì, è hwɛni lì hwɛnɛ mèèmà mè gbamù, è hwɛni lì arzìirzɛ̀. È hwɛni lì hwɛ hviyayi, ndèŋgànɛlɛ è hwɛni lì àjùlɛ̀.

¹³È hwɛni lì àjùlɛ̀nɛ̀yi mɔ̀kɔ nà ɔ̀nɛyi. È hwèlì tɛ nanù ema mòtò à hwɛni tɛ kàyɛ nà ohvɛhvɛ mòtò inyɛ à mò làkìrzɛ. Nà oma è Rzàŋgo yè è làkìrzɛ, inyɔ hvɛ è hwɛni lì làkìrzɛ mɔ̀kɔ nà ɔ̀nɛyi.

¹⁴Ndeŋgànɛ̀lɛ̀ ò ŋmanyu yà hwene hweyà hwe arzɛ, è alìŋgànɛ mɔ̀kɔ nà ɔ̀nɛyi. È ndìŋgɛ ndi è rzàŋga hweyà hwe arzɛ.

¹⁵Krirztò à mà gbeyà inyɔ è à ohvanɛ ɛ̀yɔ̀lɛ̀ mɔ̀kɔ nà ɔ̀nɛyi. Ò eŋgànɛlɛ rzɔ eŋge ɛ̀yɔ̀lɛ̀ è hwɛni lì è timba ò hweyà hwe arzɛ ema è gbeyà. Inyɔ è àŋgàmɛ̀nɛ̀yi lì eka Lohwɛ̀ ò ihvonda jà arzɛ

¹⁶Inyɛ̀ ŋmɛ̀ndì mò ama Krirztò mò lìya gbamù ò tenì yà mèèmà mè anyu ò ihvonda jà arzɛ. Inyɛ̀ inyɔ è gbeyàne moŋgo ŋmɛ̀ndì nà lìhwiyè lì anyu là arzɛ ò lì okòlɛ nà lì kòkòwɛ̀lɛ̀ mɔ̀kɔ nà ɔ̀nɛyi ò ihvonda ja arzɛ. Inyɔ è à èmbeyà Lohwɛ̀ mɛ̀rzɔ̀kɔ̀ ema mè hwèlì ò tenì yà è kààtì yà mɛ̀rzɔ̀kɔ̀ mè Lohwà. È èmbeyà Lohwɛ̀ mɛ̀rzɔ̀kɔ̀ ema mà eka Lohwɛ̀ nà Krirztò nà mè hvɛhvɛ mɛ̀rzɔ̀kɔ̀ ema mè è jɛ̀lɛ̀lɛ̀yì ò mèèmà mè anyu ò lì eka Lohwɛ̀. Inyɔ è mò èmbeyà ò lì mo eka nà mèèmà mè anyu mè arzɛ.

¹⁷Tɔ̀ mamɛ ema è ohwa tɔ̀ è gbeyà, inyɔ yè è gbeyà ndi o lìnà là ama Rzàŋgo Yerzù. Inyɔ e ŋgbe Lohwɛ̀ Tatɛ̀ jèka ò lìinà là ama Yerzù.

¹⁸Inyɔ ijòjìyɛ̀ e arzìhwìrzɛ̀lɛ̀lɛ̀ mèjòmɛ̀ me anyu. Nànù ndi hwatò ema hwa lòkɛ̀ Lohwɛ̀ hwa àŋgàmɛ̀nɛ̀yi lì gbeyà.

¹⁹Inyɔ mèjòmɛ̀ è lìŋgàne ìjòjìyɛ̀ jà anyu, ndeŋgànɛlɛ è rza jì tàkirzɛ̀ ò ŋgundu.

²⁰Inyɔ hwàànà, è hweyànè irzàŋgo nà inyàŋgo jà anyu ò tenì yà ima eyà ema è gbeyà. Nànù ndi è Rzàŋgo è arza nanù ema è gbèyè.

²¹Inyɔ irzàŋgo nà inyàŋgo, è rzi tàtìrzɛ̀ hwàànà hwa anyu. È hwa tàtìrzɛ̀ tɛ ò mà hwa mà tuweya.

²²Inyɔ hwàkòmì, è hweyàne è wɔ̀ ema hwa è hwɛni ò ihvonda jà arzɛ. È rzi hwa gbèeyà ndi lìrzakò mɛnɛ ema hwa ɛnɛ̀ ò lì arza nanù ema hwa yè èke. Ndi è hwa gbèeyà èwòlò nà ŋmèma mɔ̀kɔ ehwànja è Rzàŋgo ndi inyɔ è ŋgba èluhwe.

²³Tɔ̀ ima èwòlò ema è gbeyà, ye è gbeye nà mèèmà mè anyu mè arzɛ. È hwɛni lì hwiya nanù ema, ye è gbèeyà ndi Lohwɛ̀ rzeketɛ hwatò hwa hwènàmà.

²⁴Inyɔ è hwɛni lì hwiya nanù ema è hwɛni lì lùwa mòrzàhwèlì ema è Rzàŋgo è mà ùtèya hwatò wà eni. Krirztò ndi à hwèlì è mòtò ema inyɔ è gbèeyà nà jɔ̀kɛ̀.

²⁵Lohwɛ̀ à ò kɔ̀kìrzɛ̀ tɔ̀ ima mòtò ema à gbèyi wòhwe ò wòhwe ema oŋgo mòtò à gbèyi. Lohwɛ̀ à kàyìrzɛ tɔ̀ ima mòtò nyayi hvɔ̀kɔ, à rza ò tìmbanà tɔ̀ mòtò mburzà.