Read Mokpwe 1 Tɛ̀rzàlonìyà 4 Bible Online

1 Tɛ̀rzàlonìyà 4 - Mokpwe bible

1 Tɛ̀rzàlonìyà 4

¹Ìi wònyamòwè kòkò, jo òhwa hvɛ nanù ema, i ma e okolɛ nɛ e àŋgàmɛ̀nɛ̀yi lì lìya o lì òkìrzɛ̀ Lohwɛ̀ mɔ̀nyɛ̀ŋgi. Ndeŋgànɛ̀lɛ̀ o jɔ̀kɛ̀ nanù ndi hwèlìyelì hwe anyu hwe hwèlì o nàŋgɛ. O nàŋgɛ nanù, je e akowana, na lì e ohweyà o lìna la ama Rzàŋgo Yerzù nanù ema, e hwɛ ndi o lì lìyàna ene nyayi ya ɛ̀ɛ̀mɛ̀.

²Èhwànja inyɔ e ma màa lì hwiya mamɛ Rzàŋgo Yerzù à mà jo kànèyà nanù ema je e okolɛ.

³È hwèlì ndi lì emeyà la ama Lohwɛ̀ nanù ema inyɔ e hwɛ ndi nàa hwatò hwa wòtani. Ène ŋgànà e hwèlì ndi nanù ema, e rzi keka lì àyinɛ̀lɛ̀ o tenì ya tɔ̀ ima lìtumba la mòrzònje.

⁴Tɔ̀ ima mɔ̀kɔ wa anyu a hwiye nɛ a alɛ̀mbɛ̀nɛ. È gbeye nanù nyayi ema e hvomɛ̀nɛ̀ ndèŋganɛlɛ nyayi ema ye e ŋgba èluhwe o ìtììtènì ja hwatò.

⁵Inyɛ̀ inyo ja anyu i rzi hwɛnɛ ilema ja rzayi-rzayi o hweyàrzèlì hwe ŋgundu hwe e nyàma nyo nàa hwatò ema hwa rza hwiyɛ Lohwɛ̀ hwa hwɛni.

⁶O ene eyà rzɔ, tɔ̀ mòtò a rza àŋgàmɛ̀nɛ̀ o lì tònana ŋmanyàŋgò wa eni tɔ̀ o lì mo wowàna yòoma ya eni. I ma loma lì e ohweyà hwene hweyà, ndèŋgànɛ̀lɛ̀ i ma e kòkòwɛ̀lɛ̀ towotowo nanù ema Lohwɛ̀ a kɔ̀kìrzɛ̀ hwatò ema hwa gbeyà nanù.

⁷Lohwɛ̀ a rzi jo hvɔ̀rzè o lì hwɛnɛ ɛ̀ɛ̀mɛ̀ ya èèti, ndi mɔ̀ à mà jo hvɔ̀rzɔ̀ o lì hwɛnɛ ɛ̀ɛ̀mɛ̀ ya wòtani.

⁸O eŋgànɛ̀lɛ rzɔ tɔ ima mòtò ema a rzɔ̀rzi hwene hwèyòkòlèlì, a rza rzɔ̀rzi ndi e mòtò wà hwènàmà ndi à rzɔ̀rzi ndi Lohwɛ̀ ema a e ŋgbelì èlìŋgɛ̀ yà wòtani.

⁹O nàŋgɛ nanù lì hvomɛ̀nɛ̀ e ndìŋgɛ ema e ahwɛ̀nɛ̀nɛ̀yi mɔ̀kɔ na ɔ̀nɛyi nàa hwàlòkèlì hwa ama Lohwɛ̀ i rza aŋgàmɛnɛ lì atàkìrzɛ o lì e tìleya, ehwànja Lohwɛ̀ mɔ̀ ŋmìti à mà màa lì e okolɛ nɛ e àŋgàmɛ̀nɛ̀yi lì lìŋgàna mɔ̀kɔ na ɔ̀nɛyi.

¹⁰Ò jɔ̀kɛ̀ nanù ndi e lìŋgàni wònyànyàŋgo hwa anyu hwa arzɛ hwa ama Krirztò ema hwa hwèlì o erzòokà ya arzɛ ya Màrzèdonìyà. O eŋgànɛ̀lɛ ìi wònyàmowe je e rzòrzòmeyà nanù ema inyɔ e hwa lìŋgàne lì aka nanù o ihvonda ja arzɛ.

¹¹Je e rzorzomeya hvɛ nanù ema, inyɛ tɔ̀ ima mòtò a hwɛnɛ lòŋgɛ la wɔ̀ti-wɔ̀ti, inyɛ tɔ̀ mòtò a rza ɔŋgɔ mamɛ ema ŋmanyàŋgò a gbeyà, ndèŋgànɛlɛ inyɛ tɔ̀ ima mòtò a gbeye èwòlò ya eni. Nànù ndi i ma e ohweyà nanù ema e a gbeyà.

¹²Irzɔ i ma e kòkòwɛ̀lɛ̀ o lì gbeyà hwene hweyà hwe arzɛ aŋga nanù, e luwa èluhwe ya hwahvɛhvɛ hwatò ema hwa rza lòkɛ̀ɛ Lohwɛ̀, ndèŋgànɛ̀lɛ̀ tɔ̀ ima mɔ̀kɔ wa anyu a hwiya lì àwòhvɛ̀ la eni.

¹³Ìi wònyàmòwe kòkò, ja arza nanù ema e hwiye e jɔ̀kɛ̀ lì hvomɛ̀nɛ̀ hwaŋga ema hwà mà ŋwɛɛ, aŋga nanù e rza ɛhwɛ nàa hwatò ema hwa rza hwɛnɛ lìhvìtà.

¹⁴Nà oma irzɔ i lòkɛ̀ nanù ema Yerzù à mà ŋwa rzìi a hvùmùwà o kpelì, o eŋgànɛ̀lɛ rzɔ̀ i lòkɛ̀ nanù ema e hvonda ema Yerzù a o timbɛ o rze, Lohwɛ̀ a o gbeyà hwaŋga hwàlòkèlì hwa arzɛ hwa ama Krirztò ema hwà mà lomɛ lì ŋwa o lì hvùmùwà rzìi hwa hwɛ na Krirztò.

¹⁵Hwèyòkolelì ema je e okòlɛ nàŋgɛ hwe hwèlì ndi hwèyòkòlèlì hwe ama Rzàŋgo. Hweŋge hwèyòkòlèlì hwe hwèlì ndi nanù ema, irzɔ ema jo ò hwɛ o lòŋgɛ o wùnyà ema Rzàŋgo à ò jɛ̀ɛ̀, i rza tànɛ lì hwɛ o worzo rzìi hwatò ema hwà mà ŋwɛɛ rzìi hwa hwɛ o mbùrza.

¹⁶Rzàŋgo Yerzù mɔ̀ ŋmìti à ò rzihwa o ŋmanyu yà lohwà ndèŋganɛlɛ hwatò hwa o hweyà mòrzeyà mo ndɛnɛ, ndèŋgànɛ̀lɛ̀ hwatò hwa o hweyà na oma e aŋgèlì ema e kànèyà e ohwa na lìlo lì kàrzàmi, ndèŋgànɛ̀lɛ̀ hwatò hwa o hweyà na oma e aŋgèlì e o tòŋgɛ lìyɔ̀mi la ama Lohwɛ̀. Rzìi eyà ya worzo e o hwɛ ndi nanù ema hwaŋga hwàlòkèlì hwa ama Krirztò ema hwà mà ŋwɛɛ hwa o hvùmùwà.

¹⁷O mburza nanù, irzɔ ema i hwèlì lòŋgɛ o rze yà mɔ̀nyɛ̀, jo ò hwa làta, ndèŋgànɛ̀lɛ̀ jo ò agba o ŋmanyu o tenì ya lìmbàki o lì uŋmànɛlɛ Krirztò o yulùlì. Ndèŋgànɛ̀lɛ̀ nanù ndi jo ò hwɛ na Rzàŋgo natɛ̀ɛ nà ò gbìndèyà.

¹⁸O eŋgànɛ̀lɛ rzɔ̀, e gbeyàne hwene hwèyòkòlèlì o lì kɔ̀mɛlɛ mɔ̀kɔ na ɔ̀nɛyi.