Read Mokpwe 1 Tìmotì 1 Bible Online

1 Tìmotì 1 - Mokpwe bible

1 Tìmotì 1

¹Imba Pàwolò, ema na hwèlì e àpɔ̀rzìtòlò ya ama Yerzù Krirztò, ndi na tilì ene kààtì. Lohwɛ̀ ndi à no kànèlì ema na gbeye ene èwòlò mɔ̀ ema a jo rzùŋgi o wòhwe hwa arzu. Lini lìkànèyà lì uwɛ̀lɛ̀lɛ̀yi hvɛ oma Krirztò Yerzù ema ji ikayi lìhvìta.

²Ìi Tìmòtì, ò wà ndi nà tìleyà ene kààtì. Ò tɛ̀ɛ̀tɛ̀ɛ ò hwèlì ndi nàa è ŋmanà wà ami èhwanja ò lòkɛ̀yì Krirztò. Inyɛ̀ è ndèli, ììlì nà ɛ̀yɔ̀lɛ̀ ema è uwɛ̀lɛ̀lɛ̀yi oma Lohwɛ̀ Tatɛ̀ wà arzu nà Yerzù Krirztò è Rzàŋgo yà arzu hwe hwɛ nà inyɔ.

³Nà arza ema ò lìya ò mbowà yà Ɛ̀hvɛ̀rzɔ̀rzì, molemilemi nà oma nà mà ò kòkòwɛ̀lɛ̀ è hvonda ema nà mà hwɛ lì ɛndɛ ò erzòòkà yà Màrzèdonìyà. Àŋga nanù, ò wà ò kànèyà loŋgo là hwatò ema hwa rza okolɛ hwèyòkòlèlì ema hwe rza hvomɛ̀nɛ̀.

⁴È rzìi emeyà hwaŋga hwatò ò lì ohwa mɛɛndi ema me rza enje jɔ̀kɛ̀ na mɛɛndì ema me ohwa hweyà lì hvomɛ̀nɛ̀ imbamba ja awu ema mòtò a rza tanɛ lì aŋga mɔ̀rzɔ̀ŋgi. Hwa okolɛ tɛ iŋgi nyayi ja mɛɛndì, me jànà hvenda, me rza oŋgowàna hwatò ò lì lìya lòŋgɛ ema e uŋmɛ̀lɛ̀ nanù ema hwa lòkɛ̀ Lohwɛ̀.

⁵Lìtìŋga ndèŋgàtɛ̀ nà mà e ohweyà ema o òkolɛ hwatò hwèyòkòlèlì hwe jɔ̀kɛ̀ hwe hwèlì ndi nanù ema, hwatò hwa alìŋgànɛ mɔ̀kɔ na ɔ̀nɛyi. È hwɛni lì hwɛnɛ ndìŋgɛ ema e uwɛ̀lɛ̀lɛ̀yi o ŋmèma ema me rzaŋgi, ŋmèma ema mo hwi mamɛ e hvomɛ̀nɛ̀ na mamɛ ema e rza hvomɛ̀nɛ̀, na ŋmèma ema mo hwi lì lòkɛ̀ ema lì hwèlì e jɔ̀kɛ̀.

⁶Lòŋgo la hwatò hwà mà rzɔ̀njɛlɛ hwene hweyà o eŋgànɛ̀lɛ̀ e ma hwa gbeyà ema hwà mà eŋgama èhwanja hwa ohwa ndi hweyà hwe ndɔ̀ki.

⁷Hwàŋga hwatò hwa ohvi ndi mèèmà me lì hwɛ hwà-òkòlèlì hwa e mbenda ya ama Lohwɛ̀. Ndi wɔ̀ hwa rza rzɔ̀ŋgìtɛ̀nɛ̀ hweyà ema hwa ohweyà hwatò, ndèŋganɛlɛ wɔ̀ hwa rza rzɔ̀ŋgìtɛ̀nɛ̀ hweyà ema hwa ohwa nanù ema hwa hwi.

⁸Irzɔ i hwi nanù ema e mbenda ya ama Lohwɛ̀ e lɔ̀wu, e hwèlì tɛ nanù ema hwatò hwa e gbeyàna tɛ na oma hwa àŋgàmɛ̀nɛ̀yi lì e gbeyàna.

⁹Lohwɛ̀ a rza gbèelì ndi e mbenda o hwaŋga hwatò ema hwa tɛmi ehve-ehve. Lohwɛ̀ mɔ̀ à ika ndi e mbenda o hwaŋga hwatò ema hwa rza hweyàna e mbenda, na o hwatò ema hwa rza gbeyà mamɛ ema mɔ̀ à arza. È mbenda ya ama Lohwɛ̀, e hwèlì ndi o hwaŋga hwatò ema hwa rza ohve Èlìŋgɛ̀ ya Lohwà na o hwaŋga hwatò ema hwa gbèeyà wòhwe. È mbenda ya ama Lohwɛ̀ e hwèlì ndi o hwaŋga hwatò ema hwa rza oka Lohwɛ̀ wɔ̀ŋgɔ̀ na o hwatò hvɛ ema hwa ohwa hweyà hwe wòhwe lì teŋgɛ̀nɛ Lohwɛ̀. Lohwɛ̀ à mà gbeyà e mbenda o hwaŋga hwatò ema hwa oŋwa i tatɛ̀ na i nyàŋgo ja awu, na o hwaŋga hvɛ ema hwa oŋwa hwahvɛhvɛ hwatò.

¹⁰È mbenda ya ama Lohwɛ̀ e hwèlì ndi o hwatò hwa morzonje, o wunyanà ema hwa juwa hwahvɛhvɛ wunyanà na o hwalana hvɛ ema wɔ̀ hvɛ hwa juwa hwahvɛhvɛ hwalana. O hwatò ema hwa hvùma hwahvɛhvɛ hwatò ò lì hwa àhwirzɛ̀ nàa hwàkòmì, o hwatò ema hwa kɔɔ hweyà, na o hwatò hvɛ ema hwa aàtɛ hweyi ja mòlàŋga o hwèkayirzelì, na hwatò hvɛ hwa gbèeyà hweyà ema hwa rza enje o ŋmɛ̀ŋgɛ o lì ohwa mamɛ hwèyòkòlèlì hwe jɔ̀kɛ̀ hwe ohwa.

¹¹Hwene hwèyòkòlèlì hwe jɔ̀kɛ̀, hwe làti na ŋmɛ̀ndì mò gbamù ema Lohwɛ̀ a no ŋgbelì o lì ohweyà hwatò. Moŋgo ŋmɛ̀ndì mò gbamù mo uwɛ̀lɛ̀lɛ̀yi ndi o ma Lohwɛ̀ ema lì karzami ema hwatò hwa eka.

¹²Nà ŋgbelì Yerzù Krirztò Rzàŋgo ya arzu jeka. Mɔ̀ ema a no ŋgbelì e ŋginyà o lì mo gbèeyà. Nà mo èki èhwanja a no wowi ndi nàa mòtò mɔ̀kɔ ema mɔ̀ à tànɛyi lì lòkɛ̀, na lì hvɔ̀rzɔ̀ nanù ema na mo gbèeyà.

¹³A ma gbeyà nanù, tɔ̀ nɛ o hwewotelì nà mà hwɛ lì mo teŋgɛ̀nɛ na ìrzìlàkò, nà mà hwɛ o lì tàkìrzɛ̀ hvɛ hwaŋga hwatò ema hwà mà mo lòkɛ̀ na o lì mo òhwirzɛnɛ hvɛ mbɔrzi ja wòhwe. Ndi o hwene hweyà hwe arzɛ ema nà mà hwɛ lì gbeyà, Yerzù Krirztò à mà no komeya ììlì ja eni èhwanja na rzi ohve lì lòkɛ̀ ndèŋgàna na rzi hwiye mamɛ ema nà mà hwɛ lì gbeyà.

¹⁴Rzàŋgo ya arzu a ma no ŋgba e ndèli ya eni ema e rza ohvɛɛ lìmɛni. A no gbèyi hvɛ nanù ema na mo lòkɛ̀ na o lì lìŋgana hwahvɛhvɛ hwatò èhwanja i hwèlì mɔ̀kɔ na Yerzù Krirztò.

¹⁵Hwèyòhwèlì hwe jɔ̀kɛ̀ hwène, ema irzɔ i hwɛni lì èmeyà nà lì lòkɛ̀ kɔ̀yi-kɔ̀yi. Yerzù Krirztò à mà jà ò rze ò lì rzùŋga hwatò hwa wòhwe. Imba ndi nà hwèlì è mɔ̀ ema wòhwe wò eni wò koki lì aka wòhwe wò hwahvɛhvɛ hwatò.

¹⁶Ndi Lohwɛ̀ à mà nò òkeya ììlì ò lì arza nanù ema, Yerzù Krirztò à ò nò uŋmɛ̀lɛ̀ lì àjùùlɛ̀ là eni là arzɛ ò lì nò làkìrzɛ̀ imba ema nà ohvi wòhwe ema wò koki lì aka wòhwe wò hwànɛ̀yì hwatò. Ène eyà, è mà hwɛ ndi nanù ò lì ŋgba ɛ̀mɛ̀nɛ̀nì ò hwatò ema hwa ò mò lòkɛ̀ nà lì lùwa lòŋgɛ là gbìndèyà.

¹⁷Ŋmàye nà èluhwe hwe hwɛ nà Lohwɛ̀ ò gbìndèyà nà ò gbìndèyà. Mɔ̀ ndi à hwèlì è kiŋgɛ ò gbìndèyà nà gbìndèyà. Mɔ̀ ndi à hwèlì è mɔ̀ ema hwatò hwa rza ɛni nà mììrzɔ̀ mà awu ndeŋgànɛ̀lɛ̀ à rza ŋwa. Mɔ̀ ŋmìti mɛ̀nɛ ndi à hwèlì Lohwɛ̀. Inyɛ̀ wò lìya nanù.

¹⁸È ŋmanà wà ami, Tìmòtì kòkò hweyà ema nà ohweyà ema ò gbèye, hwe hwèlì ndi hweyà ema Lohwɛ̀ à mà òhweyà hwatò nanù ema e hwa òhweyà ema màmɛ è hwɛni lì gbèyɛ̀nɛ nà ò wà. Inyɛ̀ eŋge mbɔrzi è ò ètìrzɛ̀. Nà oma ò gbeyànà hwèyòkòlèlì hwè jɔ̀kɛ̀ inyɛ hwe ò gbèye ò hwɛ ndi nàa mòtò ema à ana gbamù.

¹⁹Ò lɛ̀mbɛ kɔ̀yi-kɔ̀yi ò lì lòkɛ̀ Krirztò nà lì gbeyà hweyà gbamù nà oma ŋmèma mò aŋgɔ̀ mò òhweyà. Lòŋgo là hwatò hwa rza gbeyà hweyà nà oma mèèmà mè awu mè hwa ohweyà ò lì gbeyà. Ène eyà ema hwa gbeyà ema hwa mà rzɔ̀njɛlɛ lìlòkɛ̀ là awu ndeŋgànɛ̀lɛ̀ hwa rza hwi òne hwa tànɛyi lì ɛndɛ.

²⁰Ò ìtììtènì ja hwatò ema nà ohwa nanù, mɔ̀kɔ à hwèlì ndi Hìmɛ̀nàyèyùrzì ɔ̀nɛyi hvɛ Àlɛ̀rzanda. Hwanu hwatò nà hwa lìyèlì mòkarzɛ̀ ò màà. Àŋga nanù hwa hwiya nanù ema ò rza lɔ̀wu lì ohwàna Lohwɛ̀ ìrzìlàkò.