Read Mokpwe 1 Tìmotì 3 Bible Online

1 Tìmotì 3 - Mokpwe bible

1 Tìmotì 3

¹Hweyohwèlì hwe jɔ̀kɛ̀ hwe ene. Tɔ̀ ima mòtò ema a arza o lì hwɛ e mòtimbèlì o ŋmèmba, nanù oma a hvɔ̀rzì ndi èwòlò ya gbamù.

²O eŋgànɛ̀lɛ̀, e mòtimbèlì hwa ŋmèmba, a hwɛni ndi lì hwɛ mòtò ema a rza luwahwa màtonà. Ndèŋgàna a hwɛni ndi lì ohva jòjìyɛ̀ hvɔ̀kɔ. A hwɛni ndi lì hwɛ mòtò ema a alɛ̀mbɛ mɔ̀ ŋmìti, mòtò ema a lùtèyà kɔ̀yi-kɔ̀yi, mòtò ema hwatò hwa ŋgba èluhwe, a hwɛni ndi lì hwɛ mòtò ema a kàrzɛ hwàyɛ̀nì o ndawò ya eni, na mòtò ema a hwi o lì okolɛ hwatò.

³Ène nyayi ya mòtò, a rza hwɛni lì hwɛ mòtò wa mboma, tɔ̀ mòtò ema a jànà mòhvùŋgu. Ndi a hwɛni ndi lì hwɛ mòto ema a hwèlì ŋmɛ̀ɛ na mòtò ema a rza tɔ̀wɔ mòtaŋgo, a rza hwɛni lì hwɛ mòtò ema a lìŋgàni wolì.

⁴A hwɛni lì timba e la eni lìtumba gbamù, a hwɛni lì aŋgoweya hwàanà hwa eni ŋgàna ema hwa mo ŋgba èluhwe o hweyà hwe arzɛ.

⁵Nà ohwa ndi nanù èhwanja mòtò a rza tànɛyi tɛ o lì timba e la eni lìtumba gbamù, nɛ rzɔ mɔ̀ à tànɛyi o lì ɔŋgeya ŋmèmba mo hwatò hwa Lohwɛ̀ e?

⁶A rza àŋgàmɛ̀nɛ̀yi ndi lì hwɛ mòtò ema a rzi ku mbɔ, o lì lòkɛ̀ Krirztò, ene e tànɛyi lì mo gbeyà ema, ayèkirzɛ, o lì kpa, na o lì luwa kɔ̀kìrzɛ̀ molemilemi na oma Mòkarzɛ̀ à mà kpe rzìi a luwa kɔ̀kìrzɛ̀.

⁷O lì hwatɛ hvɛ, oŋgo mòtò a hwɛni ndi lì hwɛ mòtò hvɛ ema tɔ̀ hwaŋga hwatò ema hwa rza enje o ŋmèmba hwa mo ŋgba èluhwe. Ène e gbeyà a rza luwa ìrzɔnì ndeŋgànɛ̀lɛ̀ a rza unda o e ŋgùndèli ya ama mòkarzɛ̀.

⁸Hwatò ema hwa oŋgowàna o lì gbèeyà èwòlò ò ŋmèmba hwa hwɛni ndi lì hwɛnɛ ɛ̀ɛ̀mɛ̀ ya gbamù na o lì hwɛ hwatò ema hwa ohwa hweyà na ŋmèma mɔ̀kɔ. Hwa rza hwɛni lì hwɛ hwatò hwa mboma, tɔ̀ lì hwɛ hwatò ema hwa hwèlì njɔ̀ŋgu ya wolì.

⁹Hwa àŋgàmɛ̀nɛ̀yi lì oŋgama e jɔ̀kɛ̀ ema Lohwɛ̀ a gbèeyà ema hwatò hwa hwiye màlùtèyà na ɛ̀ɛ̀mɛ̀ ema a arza nanù ema hwa hwɛnɛ. Hwa hwɛni lì gbeyà nanù na ŋmèma ema mo hwi mamɛ ema e lɔ̀wu.

¹⁰Ndèŋgàna hwatimbelì hwa e hvɔ̀rzɔ̀ hwà-òŋgòwànèlì hwa ŋmèmba hwa àŋgàmɛ̀nɛ̀yi lì loma lì e injàneyà kɔ̀yi-kɔ̀yi hwatò ema hwa arza lì hvɔ̀rzɔ̀. Hwa ayembɛ tɛ nanù ema e mòtò ema hwa kèkirzɛ hwa rza mo lùwànì tɛ tɔ̀ njɔ̀mì, nanù o ma a kànɛ̀yi lì gbeyà eŋge èwòlò.

¹¹Tɔ̀ hwàalanà hwa hwànu wunyanà, wɔ̀ hvɛ hwa àŋgàmɛ̀nɛ̀yi lì hwɛnɛ ɛ̀ɛ̀mɛ̀ ya gbamù. Wɔ̀ hwa rza hwɛni lì hwɛ hwalana ema hwa inda hwatò, hwa hwɛ hvɛ lì alɛ̀mbɛnɛ, hwa hwɛ hvɛ ndi hwalana ema hwatò wa hwɛni lì lòkɛ̀ tɔ̀ mamɛ ema hwa gbeyà.

¹²È mòoŋgowanelì wa ŋmèmba, a hwɛni ndi lì hwɛ munyanà ema a hwa ndi molanà mɔ̀kɔ. A hwɛni ndi lì hwɛ mòtò ema a ɔ̀ŋgeyà hwàanà na lìtumba la eni kɔ̀yi-kɔ̀yi.

¹³Nà ohwa ndi nanù èhwanja, hwatò ema hwa oŋgowàna o lì gbeyà èwòlò ò ŋmèmba hwa gbeyà tɛ èwòlò ya gbamù, hwatò hwa hwà ŋgba èluhwe. Ène e hwa gbeyà o lì ohva ŋmèma mo lì ohwa lì hvomɛ̀nɛ̀ lì lòkɛ̀ ema hwa ohvani Yerzù Krirztò.

¹⁴Ìi Tìmòtì tɔ̀ nɛ imba na hwɛni ŋmèma mo lì o jèeyà ŋmanà mbɔ, ndi na o tìlèlì ini itita nanù mɛnɛ.

¹⁵Nà e tìleya hwene hweyà ema e hwɛyi o lì hwe gbèeyà aŋga nanù na rza akɛlɛ tɛ lì jà, e hwɛni lì hwiya ɛ̀ɛ̀mɛ̀ ema hwatò hwa Lohwà hwa àŋgàmɛ̀nɛ̀yi lì hwɛnɛ. Hwatò hwa Lohwà wɔ̀ ndi hwa hwèlì ŋmèmba mo ama Lohwɛ̀ ndèŋgàna Lohwɛ̀ ndi à hwa ɔŋgeya. Hwatò hwa Lohwà wɔ̀ ndi hwa hwèlì ŋmèmba mo ama Lohwɛ̀ ndèŋgàna Lohwɛ̀ a hwèlì lòŋgɛ. Moŋgo ŋmèmba mo hwèlì ndi nàa lìwondi na ɛ̀ɛkɛ̀ ema hwe rzulɛ gbamù eyà ya Lohwà.

¹⁶Lohwɛ̀ à mà jo gbeyà o lì hwiya nanù ema ŋmɛ̀ndì mo eni mo hwɛni wòlìto rzayi-rzayi. Nànù ndi mo hwèlì: Krirztò à mà jà, ndèŋgàna mɔ̀ à mà hwɛ ndi mòtò wa hwènàmà, Èlìŋgɛ̀ yà Wòtani e ma jo uŋmɛ̀lɛ̀ nanù ema a hwèlì ndi è Ŋmanà wà Mùnyanà wa ama Lohwɛ̀, ndeŋgànɛ̀lɛ̀ i aŋgèlì i ma mo ɛnɛ. Hwà mà ohweyà hwatò hwa arzɛ hwa ene rze ya mɔ̀nyɛ̀ ndèŋgànɛ̀lɛ̀ hwà mà mo lòkɛ̀. Lohwɛ̀ à mà mo hvùmùlɛ̀, à mà ɛndɛ o ŋmanyu ya Lohwà o tenì ya ŋmàye.