Read Mokpwe 1 Tìmotì 4 Bible Online

1 Tìmotì 4 - Mokpwe bible

1 Tìmotì 4

¹Èlìŋgɛ̀ yà Wòtani e telɛlɛyi nanù ema o mene mèenyà me lìrzùkù, lòŋgo la hwatò hwa o hwɛmɛ lì lòkɛ̀ la awu la jɔ̀kɛ̀ ndèŋgàna hwa o lòkɛ̀ ndi hwatò ema hwa okolɛ hwèyòkòlèlì hwe mòlàŋga. Hweyokowelì hwene ema èlìŋgɛ̀ ya wòhwe e arza nanù ema hwa lòkɛ̀.

²Hwàŋga hwatò ema hwa okolɛ hwene hweyà hwa o gbeyà ndi nàa wɔ̀ hwa okolɛ ndi na e jɔ̀kɛ̀, ndi o jɔ̀kɛ̀ hwa o kɔ ndi hweyà. Wɔ̀ hwa okolɛ tɛ eyà ema e rza enje gbamù, hwa uŋmɛ̀lɛ̀ ndi nanù ema hwa rza hwi mamɛ ema e hvomɛ̀nɛ̀ tɔ̀ e yɔ ema e rza hvomɛ̀nɛ̀.

³Hwanu hwà-òkòlèlì hwa mòlàŋga wɔ̀ hwa okolɛ hwatò nanù ema hwa rzi keka lì hwaa. Ndeŋgànɛ̀lɛ̀ hvɛ ema hwatò hwa rzi laa tumba ja melelì. Lohwɛ̀ à mà weka ndi meŋge melelì nanù ema hwatò hwa me lee. Ndi hwaŋga ema hwa hwi ŋmɛ̀ndì mò gbamù, hwa mo lòkɛ̀yi na lì eka Lohwɛ̀ o meŋge melelì.

⁴Hwàŋga hwà-òkòlèlì hwa rza hvomɛ̀nɛ̀, èhwanja tɔ̀ mamɛ ema Lohwɛ̀ à mà gbeyɛ, e lɔ̀wu ndèŋgàna o rza enje lìtumba la mòlelì mɔ̀kɔ ema mo hwɛni lì kiyahwa. O eŋgànɛ̀lɛ̀ inyɛ je eke Lohwɛ̀ o lì luwa hwene hwema.

⁵Tɔ̀ mòtò a rzi rzɔ̀rzɔ̀ tɔ̀ mòlelì, èhwanja eyà ya Lohwà na lì kànɛ̀ hwe hwè gbèyi gbamù o lì làahwà.

⁶O òkolɛ tɛ hwatò ema hwa lòkɛ̀ Yerzù hwene hweyà, e hwɛ ndi nanù ema o hwɛ ndi mògbèèlì hwa gbamù hwa ama Yerzù Krirztò. O ètìrzɛ̀hwɛ o èlìŋgɛ̀ èhwanja o ŋmɛ̀ndì ema o lòkɛ̀yi, ndeŋgànɛ̀lɛ̀ hvɛ hwèyòkòwèlì hwe ama Lohwɛ̀ ema o nɔ̀ŋgɔ.

⁷O rza ohva tɔ̀ eyà o lì gbeyàna maŋga màyìtò ema mà uŋmɛ̀lɛ̀ nanù ema hwatò hwa rza lòkɛ̀ Lohwɛ̀ ndèŋgàna o rzi ohva tɔ̀ eyà o lì gbeyàna màyìtò ma èèti. Ndi o hwɛ ndi o lì okowa o ihvonda ja arzɛ na oma Lohwɛ̀ a arza nanù ema o gbeye.

⁸O hwèlì ndi eyà ya gbamù o lì okolɛ e nyàmà ya nyo ya eni o lì eta. Ndi o lɔ̀wu rzayi-rzayi nanù ema mòtò a atàkìrzɛ̀ tɛ o lì gbeyà tɔ̀ ima eyà na oma Lohwɛ̀ a àrzeyà. Inyɛ̀ i gbèyi na oma Lohwɛ̀ a arza èhwanja Lohwɛ̀ à mà ohwa nanù ema a jo ŋgba lòŋgɛ ema lì rza hwɛnɛ lìrzùkù nàŋgɛ na o e hvonda ema e o jɛ̀ɛ̀.

⁹Ène eyà ema na ohwi nanù e hwèlì ndi e jɔ̀kɛ̀, e hwɛni lì e lòkɛ̀.

¹⁰O eŋgànɛ̀lɛ̀ rzɔ ɔ̀ndeŋgàtɛ̀ ja a atàkìrzɛ̀ na lì gbeyà èwòlò ema e imbami èhwanja irzɔ i ma ika lìhvìtà la arzu na Lòohwà ema lì hwèlì lòŋgɛ. Mɔ̀ ndi à ŋgbelì tɔ̀ ima mòtò lì oŋgirzɛ, rzɛhvɔ̀ni hwaŋga ema hwa mo lòkɛ̀yi.

¹¹O keke o gbèyi nanù o òhweyà na lì okolɛ hwatò ema hwa lòkɛ̀yì hwene hweyà.

¹²O rzìi keka lì emeyà nanù ema tɔ̀ mòtò tɔ̀ mɔ̀kɔ a o ndinde èhwanja o hwèlì ndi mberza. Ndi o uŋmɛ̀lɛ̀ hwatò ema hwa lòkɛ̀yì ɛ̀ɛ̀mɛ̀ ya gbamù aŋga nanù wɔ̀ hvɛ hwa gbeyà molemilemi. Hweyohwèlì hwe aŋgɔ̀, ɛ̀ɛ̀mɛ̀ ema o òhvi, hwèlìŋgànèlì hwe aŋgɔ̀ hwe hwatò, lì lòkɛ̀ la aŋgɔ̀ na Lohwɛ̀ ndèŋgàna na oma o rza gbeyà hweyà hwe mbindo hwe hwɛni ndi lì hwɛ nàa embànèlì o hwatò ema hwa lòkɛ̀.

¹³O keke lì gbeyà nanù ema o làŋga eyà ya Lohwà e hwèlì tɛ nanù ema hwatò hwa arzàŋganɛ o ŋmèmba. O hwa nɔ̀ŋgeyà mamɛ eŋge eyà ya Lohwà e ohwa, ndèŋgàna o hwa okolɛ natɛ̀ɛ na jà.

¹⁴O rzi keka o lì tɛmirzɛ èwòlò ema Lohwɛ̀ a o ŋgbelì nàa jàhwèyà ema o gbeye, o lì ohweyà hwatò hweyà ema Lohwɛ̀ à mà ohwe nanù ema o hwa ohweyà, e hvonda ema hwatimbelì hwa ŋmèmba hwà mà o hwàkɛ̀ màà mà awu o mohvo mo aŋgɔ̀.

¹⁵O gbeye hwene hweyà na ŋmèma mɔ̀kɔ, aŋga nanù tɔ̀ ima mòtò a o ɛnɛ nanù ema o hwe gbeyà gbamù na lì hwe ɛ̀ndɛ̀nɛ̀ o worzo.

¹⁶O alɛ̀mbɛ gbamù o tɔ̀ mamɛ ema o òkolɛ hwatò. O ɛ̀ndɛ̀nɛ̀ ndi èwòlò ya aŋgɔ̀ o worzo aŋga nanù Lohwɛ̀ a o rzuŋga lòŋgɛ la aŋgɔ̀, na lì rzuŋga hvɛ mòŋgɛ ma hwatò ema o òkolɛ.