Read Mokpwe 1 Tìmotì 5 Bible Online

1 Tìmotì 5 - Mokpwe bible

1 Tìmotì 5

¹O rzi keka lì lomeya mòmbaki wa mòtò. O mo wowe wòlìto na oma o wowi e tatɛ̀ ya aŋgɔ̀. O wowe hvɛ hwaŋga hwarzàlì ema o wa akayi ŋmèmba wòlìto ò a ɛnɛ oma hwa hwèlì ndi wònyanyàŋgo wa aŋgɔ̀.

²O wowe hvɛ hwàmbaki hwa hwalana wòlìto na oma o wowi e nyàŋgo ya aŋgɔ̀. O wowe hvɛ hwàanà hwa ŋgɔndɔ wòlìto ò a ɛnɛ oma hwa hwèlì ndi i ndomɛ ja aŋgɔ̀. O rzi keka lì lùtèyà o lì hwa gbeyàna tɔ̀ wòhwe.

³Mekurze me hwalana ema me rza ohvɛ hwatò ema hwa hwà oŋgowàna o hwa oŋgowane.

⁴Ndi mokurze mo molanà mo òhvi tɛ hwàanà tɔ̀ membamba, hwa hwɛni lì mo ɔŋgeya. Eyà ya worzo ene ema hwatò ema hwa gbeyà na oma Lohwɛ̀ a arza ema hwa gbeye hwa àŋgàmɛ̀nɛ̀yi lì gbeyà. Irzàŋgo na inyàŋgo ja awu i ma hwa ɔŋgeya, o eŋgànɛ̀lɛ̀ rzɔ wɔ̀ hvɛ hwa hwɛni lì hwa ɔŋgeya. Hwa gbèyi tɛ nanù Lohwɛ̀ a oka mɔ̀nyɛ̀ŋgì.

⁵Mokurze mo molanà ema mo hwèlì ŋmìti ndèŋgàna mo rza ohvɛ mòtò ema a mo ɔŋgeya, mo ika ndi ŋmèma mo eni na Lohwɛ̀. Mono mokurze mo molanà mo lìmeya ndi o lì kanɛ̀ ŋmerze na wuu o lì akowana ema Lohwɛ̀ a mo òŋgowane.

⁶Ndi mokurze mo molanà ema mo ŋgbàà e nyo ya eni o hweyà hwe e rze ya mɔ̀nyɛ̀ à mà màa lì ŋwa o èlìŋgɛ̀ tɔ̀ nɛ a hwèlì lòŋgɛ.

⁷O òhweyà hwatò hwa ŋmèmba hwene hweyà aŋga nanù tɔ̀ mòtò a rza tànɛyi lì ohwa tɔ̀ eyà ya wòhwe lì hwa teŋgɛ̀nɛ.

⁸Tɔ̀ ima molokelì ema a rza woŋgohwa e mbiya ya eni, rzɛhvɔ̀ni hwàŋgà hwa lìtumba ema hwa mo kombɛnɛ, e uŋmɛ̀lɛ̀ nanù ema mɔ̀ à rza lòkɛ̀ Krirztò na e jɔ̀kɛ̀. Èŋge ŋgàna e hwèlì ndi nanù ema, mɔ̀ à gbeyà wòhwe lì aka e mòtò ema a rza lòkɛ̀yi Krirztò.

⁹Mokurze mo molanà ema mo tànɛyi lì aŋgànà o mɔ̀rzɔ̀ŋgì mo mekurze me hwalana ema hwa arza lìwoŋgo mo hwèlì ndi mokurze mo molanà ema mo ma aka meni mòtòhwa me meya. A àŋgàmɛ̀nɛ̀yi hvɛ ndi lì hwɛ molanà ema à mà hwaa ndi mùnyanà mɔ̀kɔ.

¹⁰Moŋgo mokurze mo molanà mo hwɛni ndi lì hwɛ molanà ema a hwiyɛnɛyi o hwègbèèlì wa eni hwe gbamù. A àŋgàmɛ̀nɛ̀yi ndi lì hwɛ molanà ema à mà màa lì woŋgohwa hwàànà gbamù, a kàrzɛ hwàyɛ̀nì gbamù o ndawò ya eni, a hwɛni lì arzìirzɛ, ema à mà gbèeyà hwatò hwa Lohwɛ̀ nyayi ema à mà hwɛ lì rzorza matàŋgà mà awu. A hwɛni hvɛ ndi lì hwɛ molanà ema à mà oŋgowanɛ hwatò ema hwà mà hwɛ o ndùtù, ndèŋgàna a hwɛni hvɛ lì aŋgbɛ ŋmìti o hwègbèèlì hwe gbamù.

¹¹Li hvomɛ̀nɛ̀ Hwèrzɔ̀mbɛ̀ hwe mekurze me hwalana, o rzi keka lì hwa aŋgànà o Mɔ̀rzɔ̀ŋgi mo mekurze me hwalana ema me hwɛni lì luwa lìwoŋgo. O rzi hwa ika o Mɔ̀rzɔ̀ŋgi èhwanja wɔ̀ hwa hwɛni tɛ e nyɔ̀ŋgi ya lì hwaahwa hvɛ hwa rza o tànɛyi lì gbèeyà Krirztò hvɛ.

¹²Ndeŋgànɛ̀lɛ̀ wɔ̀ hwa hwàahwi hvɛ tɛ, hwa àŋgàmɛ̀nɛ̀yi lì luwa kɔ̀kìrzɛ̀ èhwanja hwa rza ondìrzɛ̀ lìkàkɛ̀nɛ̀ ema hwà mà tɛ̀yirzɛyi nanù ema wɔ̀ hwa gbèeyà Krirztò.

¹³Ndeŋgànɛ̀lɛ̀ hvɛ Hwèrzɔ̀mbɛ̀ hwe mekurze hwe nyàmɛ̀lɛ lì lìya nanù e rzi hwɛ lì gbeyà tɔ̀ eyà na o lì hvɛhvɛ hwahvɛhvɛ hwatò ò mandawò ma awu. Rzeketɛ ema hwa rza hwɛ ndi rziŋga mɛnɛ, ndi hwa inda hwatò na o lì ohwa hweyà ema hwe rza hwa hvomɛ̀nɛ̀. Wɔ̀ hwa ohwa lì hvomɛ̀nɛ̀ hweyà ema hwa rza àŋgàmɛ̀nɛ̀yi lì ohwa.

¹⁴Ɔ̀ndeŋgàtɛ̀ imba na kòkòwɛ̀lɛ̀ Hwèrzɔ̀mbɛ̀ hwe mekurze me hwalana o lì hwaahwa hvɛ na lì hwɛnɛ hwàna na o lì ɔŋgeya hvɛ i ndawò ja awu. Aŋga nanù wɔ̀ hwa rza ŋgbà hwàkɔ̀yèlì hwa arzu tɔ̀ lìtiŋga o lì ohwa wòhwe o lì jo teŋgɛ̀nɛ.

¹⁵Imba na ohwa ene eyà nanù èhwanja lòŋgo la mene mekurze me hwalana wɔ̀ hwà mà wòteyà lì gbèeyà hweyà ema mòkarzɛ̀ a arza nanù ema hwa gbeye.

¹⁶Tɔ̀ ima molanà ema a lòkɛ̀ Krirztò a ohvi tɛ mekurze me hwalana o lìtumba la eni, mɔ̀ à hwa woŋgohwe. A rzi hwànìrzɛ̀ ŋmèmba moŋgo muna. Ène e ŋgba ŋmèmba mo hwàlòkèlì, ehvolo ò lì oŋgowàna mene mekurze me hwalana ema me rza ohvɛ tɔ̀ mòtò ema a tànɛyi lì hwa oŋgowàna.

¹⁷Hwambaki hwa ŋmèmba ema hwa timba ŋmèmba gbamù hwa àŋgàmɛ̀nɛ̀yi lì ŋgbààhwà èluhwe na mòrzawèlì. Rzɛhvɔ̀ni hwaŋga ema hwà mà ŋgbahwɛ èwòlò ya lì ohwa na lì okolɛ ŋmɛ̀ndì mo ama Lohwɛ̀.

¹⁸Nà oma e tìlàhwì o e kààtì ya Lohwà nanù ema, “O rza kaka e wàna ya e nyàkà ema e nyùŋgùwà i mbarzi.” È tìlàhwì hvɛ nanù ema, “Hwàgbèèlì hwa àŋgàmɛ̀nɛ̀yi lì lùwà mòrzàhwèlì mo awu.”

¹⁹O rzi keka lì emeyà hweyà hwe wòhwe ema hwatò hwa e ohweyà lì teŋgɛ̀nɛyi hwàmbaki hwa ŋmèmba, natɛ̀ɛ hwatò hwahwakɛ tɔ̀ hwàyàwo hwa tɛ̀mɛ̀ mboŋgi lì ohwa nanù ema màmɛ ema hwa ohwi e hvomɛ̀nɛ̀yi.

²⁰Mòmbaki wa ŋmèmba a toni tɛ, o mo kanje o worzo wo ŋmèmba, aŋga nanù hwanɛyi hwàmbaki hwa ŋmèmba hwa oka wɔ̀ŋgɔ̀ o lì gbeyà wòhwe.

²¹Nà o òhweyà ndi o worzo wo ama Lohwɛ̀, Yerzù Krirztò, na o worzo wo i aŋgèlì ema i hvɔ̀rzɔ̀wì, nanù ema e gbèeyà mamɛ ema e hwɛni lì gbeyà e rzi hwɛ ndando tɔ̀ lì timbana mòtò mburza.

²²O rzi keka lì ahwèŋgɛ̀ o lì hwàkɛ hwatò màà mà aŋgɔ̀ o lì hwa nàmìrzɛ̀ o lì hwɛ hwàmbaki hwa ŋmèmba. Èhwanja o gbèyi tɛ nanù rzi oŋgo mòtò ayeŋgòwɛ̀ a gbeyà wòhwe, nanù oma o wa hvɛ o gbèyi wòhwe. O aŋgowe aŋga nanù o wà witi o rza gbèeyà hweyà hwe mbindo.

²³O rzi lìmeya ndi o lì nyɔ la malìhwa mɛnɛ, o nyɔ hvɛ hwàna mimba aŋga nanù luuŋga la aŋgɔ̀ ema lì yɔki lì o anana lì kuwa.

²⁴Lòŋgo la hwatò wɔ̀ hwa gbeyà wòhwe o mote ndèŋgàna hwa kàyìrzɛ̀hwɛ. Hwanɛyi hvɛ hwa gbèeyà wòhwe o jututa, ema hwatò hwa rza hwiyɛ, hwa hwiya ndi natɛ̀ɛ hwà mà arzìirzɛ̀ tɛ.

²⁵Nànù mɛnɛ hvɛ ndi loŋgo la hwatò hwa gbeyà hweyà hwe gbamù ema hwe hwiyɛnɛyi na hwatò hwa arzɛ. Loŋgo la hwatò hvɛ hwa gbeyà hweyà hwe gbamù o jututa ema hwatò hwa rza hwiya natɛ̀ɛ hwa arzìirzɛ̀.