Read Mokpwe 2 Tìmotì 1 Bible Online

2 Tìmotì 1 - Mokpwe bible

2 Tìmotì 1

¹Imba Pàwolò ema na hwèlì e àpɔ̀rzìtòlò ya ama Yerzù Krirztò ndi na tilì ini itita. Lohwɛ̀ a arzi nanù ema imba na ohwe ŋmɛ̀ndì mò gbamù lì hvomɛ̀nɛ̀ lìŋgi lòŋgɛ ema a ohwi nanù ema i luwa na oma i hwèlì mòtò mɔ̀kɔ na Yerzù Krirztò.

²Ìi Tìmòtì ò wà ndi nà tìlèlì ini ìtìtà ò hwèlì ndi è ŋmanà wà ami wà ndìŋgɛ yà màlìŋgo. Ndèli, ììlì nà ɛ̀yɔ̀lɛ̀ ema hwe uhwɛlɛ nà Lohwɛ̀ è Tatɛ̀ nà Yerzù Krirztò è Rzàŋgo yà arzu è hwɛ nà ò wà.

³Nà èki Lohwɛ̀ mɔ̀ ndi à hwèlì è mɔ̀ ema imba nà gbèeyà nà ŋmèma mɔ̀kɔ nà oma è nyɔ̀ŋgɔ̀nì yà ami è mà mò gbèeyà. Nà mò èka ihvonda ja arzɛ ò lì ò hvomɛ̀nɛ̀ tɔ̀ ima lìrzako ema nà kanɛ̀ ŋmèrze nà wù.

⁴Nà ɔ̀ŋgɛ̀lɛ̀yi tɛ nà oma ò mà hwɛ rzɔ̀lùù nà lì eyà, nà hwɛni nyɔ̀ŋgi rzayi-rzayi ò lì ò ɛnɛ, aŋga nanù nà oka mɔ̀nyɛ̀ŋgì rzayi-rzayi.

⁵Nà ɔ̀ŋgɛ̀lɛ̀ nanù ema ò mà lòkɛ Yerzù Krirztò nà è jɔ̀kɛ̀. Liŋgi lì lòkɛ̀ mɛnɛ ndi è mbamba yà aŋgɔ̀ wà molanà Lɔ̀yìrzì nà nyɔ̀ŋgɛ wà aŋgɔ̀ Yùnìrzì wɔ̀ hvɛ hwa mà hwɛnɛ. Nà lòkɛ̀ nanù ema ò nàŋgɛ nanù, lìŋgi lìlòkɛ̀ mɛnɛ ndi wà hvɛ ò hwɛni.

⁶Lìtìŋga lɔ̀ lììnì ɔ̀ndeŋgàtɛ̀ imba nà ò ɔ̀ŋgɛ̀lɛ̀nɛ jàhwèyà ema Lohwɛ̀ à mà ò ŋgbe è hvonda ema nà mà ò hwàkɛ̀ màà mà ami ò mòhvo mò aŋgɔ̀ ò hwɛ ndi ò lì ji gbeyàna nanù mɛnɛ.

⁷Lohwɛ̀ à rza jò gbèyi ndi nà nanù ema jò òke wɔ̀ŋgɔ̀ ò lì mò gbèeyà. Ndi èlìŋgɛ̀ ya eni è mà jò ŋgba ŋginyà ò lì mò gbèeyà, è mà jo gbeyà nanù ema irzɔ i lìŋgàne hwatò, è mà jò gbèeyà nanù ema jà alɛ̀mbɛ irzɔ hwiti.

⁸Ò eŋgànɛ̀lɛ̀ ò rza oka ìrzɔ̀nì ò lì ohweyà hwatò lì hvomɛ̀nɛ̀ Rzàŋgo wà arzu Yerzù Krirztò ndeŋgànɛ̀lɛ̀ ò rza nò òkànà ìrzɔ̀nì, tɔ̀ nɛ nà hwèlì ndi mòtò wà hwèwòwà ò nyòla ama Krirztò. Ndi nà è ŋginyà ema Lohwɛ̀ à mà ò ŋgbɛ, emeyà ò lì taka nà imba nà oma jò òhwa Ŋmɛ̀ndì mò Gbamù.

⁹Lohwɛ̀ à mà jò rzùŋga ndèŋgànɛlɛ à mà jò hwɛlɛ ò lì hwɛ hwatò hwa eni. Mɔ̀ à gbèyi nanù rzeketɛ ò nyòla eyà ema ì gbèyi, ndi à gbèyi ndi nanù lì hvomɛ̀nɛ̀ hwètɛ̀yirzèlèlì à mà tɛ̀yirzɛ̀ ndèŋgàna hwèwòtelì hwe ene rze. À mà jò ŋgba è ndèli yà eni nà oma à jò òmelì Yerzù Krirztò anu rze.

¹⁰Nàŋgɛ Lohwɛ̀ à mà jò ùŋmɛ̀lɛ è ndèli yà eni ò hwèjèelì hwe ama Yerzù Krirztò è mòrzùŋgèlì hwa arzu. Mɔ̀ à mà tìtòwà è ŋginyà yà è kpelì, ndèŋgàna à mà gbeyàna ŋmɛ̀ndì mò gbamù ò lì jò uŋmɛ̀lɛ̀ lòŋgɛ là gbìndèyà.

¹¹Lohwɛ̀ à mà nò hvɔ̀rzɔ̀ ò lì hwɛ è àpɔ̀rzìtòlò nà è Mòòkòlèlì ò lì ohwa Ŋmɛ̀ndì mò Gbamù.

¹²Lìtìŋga lɔ̀ lìni ɔ̀ndeŋgàtɛ̀ imba nà taka nanù. Ndi nà rza oka ìrzɔnì èhwanja nà hwi è mɔ̀ ema imba nà ikàyi ŋmèma mò amì. Ndèŋgàna nà hwi hvɛ nanù ema à kombɛ̀ mamɛ ema à nò ikelì ò màà natɛ̀ɛ nà ò wùnyà wò hwèkàyìrzèlì.

¹³Ò lɛmbɛ nà ŋginyà è mbɔrzi yà jɔ̀kɛ̀ ema nà mà màa lì okòlɛ̀. È hwɛ ndi nàa ɛ̀mɛ̀nɛ̀nì ema ò àŋgàmɛ̀nɛyi lì nɔ̀ŋgɔ. Ò lòkɛ̀ Yerzù Krirztò ndèŋgàna ò lìŋgàne hvɛ hwahvɛhvɛ hwatò nà oma ò hwèlì mɔ̀kɔ nà Yerzù Krirztò.

¹⁴Èlìŋgɛ̀ yà Wòtani è hwèlì ò tenì yà arzu, ndèŋgàna yɔ̀ ndi è ò oŋgòwànà ò lì lɛ̀mbɛ kɔ̀yi-kɔ̀yi ŋmɛ̀ndì mò gbamù ema Lohwɛ̀ à ò ŋgbelì ò màà mà aŋgɔ.

¹⁵Ò hwiye oma hwatò hwa arzɛ hwa ama Krirztò hwa mà nò rzɔ̀rzɔ̀ ò erzòòkà yà Èrzìyà. Hvìjɛ̀lùrzì nà Hɛ̀mòjɛ̀nìrzì wɔ̀ hvɛ hwa mà hwɛ ò mòndèŋgè mò hwatò ema hwa mà nò rzɔ̀rzɔ̀.

¹⁶Nà kanɛ̀ nanù ema Lohwɛ̀ à ùŋmɛ̀lɛ̀ ììlì jà eni ò lìtumba là ama Ònɛ̀rzìhvɔ̀rùrzì, èhwanja à mà hwɛ lì nò ŋgba etèmbè ihvonda jà arzɛ. Mɔ̀ à rzi nò òkanè tɔ̀ ìrzɔnì nanù ema nà hwèlì ò hwèwòwà,

¹⁷ndi nà oma mɔ̀ à mà ukè ò Romànì, à wòteyà ò lì nò arza natɛ̀ɛ à mà nò lùwa.

¹⁸Nà kanɛ̀ nanù ema Lohwɛ̀ à mò ùŋmɛ̀lɛ̀ ììlì jà eni ò Wùnyà wò hwèkàyìrzèlì. Ndèŋgàna ò wà ò hwi kɔ̀yi-kɔ̀yi lì oŋgowànɛ ema à mà nò ŋgbè ò mbowà yà Ɛ̀hvɛ̀rzɔ̀rzì.