Read Mokpwe 2 Tìmotì 4 Bible Online

2 Tìmotì 4 - Mokpwe bible

2 Tìmotì 4

¹Ìi Tìmòtì, o worzo wo ama Lohwɛ̀ na Yerzù Krirztò, mɔ̀ ema a o jɛ̀ɛ̀ o lì kàyìrzɛ̀ hwatò ema hwà ma ŋwɛ na e wɔ̀ ema hwa hwèlì lòŋgɛ o lìnà la ama e mɔ̀ ema a o jɛ̀ɛ̀ hvɛ rzi a hwɛ e mòkànèlì hwa hwàrzɛ, na o òhwèyà hwene hweyà kɔ̀yi-kɔ̀yi nanù ema:

²O lì ohwa ŋmɛ̀ndì mò gbamù mò ama Lohwɛ̀, tɔ̀ hwatò hwa lìŋgàna o lì mo hweyà tɔ̀ hwa rzi lìŋgàne. O hwa gbeye o lì hwiya nanù ema tɔ̀ mamɛ ema o hwa òhwèyà e hwèlì ndi è jɔ̀kɛ̀, o hwa gbeye hwa hwɛmɛ lì gbeyà wòhwe o hwa kɔ̀mɛ̀lɛ̀, ndèŋgàna o òkolɛ hwatò hwene hweyà hwe arzɛ na lì àjùlɛ̀.

³È hvonda e o jà ema hwatò hwa rza òkànèyà hwèyòkòlèlì hwe jɔ̀kɛ̀, ndi wɔ̀ hwa o gbeyà ndi mamɛ mèèmà me awu me hwa ohweyà o lì gbeyà. Ndèŋgana wɔ̀ hwa o lìŋgàna ndi o lì òkànèyà hwà-òkòlèlì ema hwa o wo òkolɛ mamɛ ema wɔ̀ hwa lìŋgàni lì hweyà.

⁴Hwatò hwa o rzɔ̀rzɔ̀ o lì òkànèyà e jɔ̀kɛ̀ ya ama Lohwɛ̀, ndèŋgàna hwa o ŋgba ndi màatò ma awu o lì òkànèyà màyìtò ma mòlàŋgà.

⁵Ndi o wa Tìmòtì, o hwɛni lì hwiya lì àwòhvɛ̀lɛ̀ la aŋgɔ̀ ihvonda ja arzɛ. O ajùlɛ̀nɛ̀ mòtàkà, o gbèyè èwòlò ya e mòtò ema a ohweyà hwatò Ŋmɛ̀ndì mò Gbamù mò ama Lohwɛ̀, ndèŋgàna o gbeye hvɛ èwòlò ya arzɛ ema Lohwɛ̀ à mà o òhweyà à mà o gbeye.

⁶O imba, lìrzako lì ma màa lì uka ema na hwɛni lì ŋgbàhwà nàa jàhwèyà, ndèŋgàna e hvonda e ma kombɛnɛ ema na hwɛni lì hwɛmɛ lìni lòŋgɛ.

⁷Nàa e mògbèèlì hwa ama Krirztò nà mà ana e njuma gbamù, nà mà kulɛ èwòlò ema Krirztò à mà no ŋgbe ema nà mò gbèeyà. Ndèŋgàna na nɔ̀ŋgɔ lì lòkɛ̀ hwènɔ̀ŋgèlì hwe gbamù.

⁸O nàŋgɛ nanù, mòrzahwèlì mo hwèlì mo no ambɛ̀lɛ̀, èhwanja nà mà gbèeyà èwòlò na oma Lohwɛ̀ a arza nanù ema e gbeyàhwe. Moŋgo mòrzahwèlì ndi e Rzàŋgo ema e kàyìrzɛ̀ hwatò ò jɔ̀kɛ̀ e no ŋgba o wùnyà wo hwèkàyìrzèlì. Rzeketɛ imba mbiti mɛnɛ ndi à ò ŋgbɛ, à ò ŋgba hwatò hwa arzɛ ema hwa àhvitɛ hwèjèelì hwe eni.

⁹Ìi Tìmòtì, ò atàkìrzɛ̀ ò nò jèeya karzi-karzi.

¹⁰Nà ohwa nanù èhwanja Dɛ̀màrzì à mà no kìnyɛ̀lɛ̀ èhwanja, mɔ̀ à mà ɛndɛ o mbowà yà Tɛ̀rzàlònìkà èhwanja a lìŋgàni lòŋgɛ la ene rze. Klɛrzɛnrzi à mà ɛndɛ o erzòokà ya Gàlerzìyà, Tàyìtùrzì mɔ̀hvɛ à mà ɛndɛ o mbowà ya Dàlmàtìyà.

¹¹Lukàrzɛ̀ mɛnɛ ndi à hwèlì na imba. O jà tɛ o jàne Màkòrzì, èhwanja à ò nò oŋgòwànà o èwòlò ema na hwɛni.

¹²Nà ma oma Tàyìchìkùrzì o mbowà ya Ɛ̀hvɛ̀rzɔ̀rzì.

¹³O jà tɛ o no jàneyà e koti ya ami ema nà mà lìiye o mbowà ya Trɔ̀wàrzì o ndawò ya ama Kapurzi. O no jàneyà hvɛ e kààtì ema e lìŋgɛ̀lɛ̀hwɛ, rzɛ̀hvɔ̀nì iŋgi ja meyowo me nyàmà.

¹⁴Alɛ̀rzàndrìyà ema a hwèlì e mògbèèlì wa èwòlò ya hwɛ̀ɛkɛ̀, à mà no gbeyàna wòhwe wo ndɛnɛ, e Rzàŋgo Yerzù e mo kɔ̀kìrzɛ̀ lì hvomɛ̀nɛ̀ wòhwe ema mɔ̀ à no gbeyànì.

¹⁵Ò wà witi o mo aŋgoweya èhwanja, à mà hwɛ lì jo teŋgɛ̀nɛ o nyòla ŋmɛ̀ndì mò gbamù ema i hwèlì jo òhwa.

¹⁶Tɔ̀ mòtò a rzi no tɛmeya o mburza e ŋgèlì ya worzo ema hwà mà no jàne o hwèkayirzelì. Hwatò hwa arzɛ hwà mà no rzɔ̀rzɔ̀. Nà kanɛ̀ nanù ema Lohwɛ̀ a hwa làkìrzɛ̀.

¹⁷Ndi Rzàŋgo à mà hwɛ na imba à nò ŋgba hvɛ e ŋginyà. O eŋgànɛ̀lɛ̀ nà mà tànɛyi lì ohwa Ŋmɛ̀ndì mò Gbamù mò arzɛ mò ama Lohwɛ̀ nyayi ema hwaŋga hwatò ema hwa rza enje wònyà Yudà hwà mà mò òkànèyà. Rzàŋgo à mà no rzùŋgà ema hwa rzi no akɛ̀lɛ̀lɛ̀ e mbako ya kpelì.

¹⁸Rzàŋgo, à ò nò rzùŋgà lòŋgɛ là ami ò tɔ̀ ima lìtumba là wòhwe ema lì ò nò urzuweyà, à ò nò timba gbamù ò Lìkànèyà là eni là è ŋmanyu yà Lohwà. Èluhwe yà arzɛ è hwɛ nà mɔ̀ ò gbìndèyà nà ò gbìndèyà. Inyɛ̀ wò lìya nanù!

¹⁹Ò nò kɔ̀mèya Prìrzìlà nà Akwìlà nà lìtumba là ama Ònɛ̀rzìhvɔ̀rùrzì.

²⁰Ɛ̀ràrztùrzì à mà lììyà ò mbowà yà Kɔ̀rintò, ndeŋgànɛ̀lɛ̀ nà mà lìya Tròhvìmùrzì o mbowà yà Mìlɛ̀tùrzì èhwanja à mà hwɛ lì ɔ̀kirzɛ̀.

²¹Taka ò lì no jèeyà ndèŋgàna e hvonda ya yùlùlì ndɛnɛ ye e jà. Yubulurzi, Pùdɛ̀nrzì, Làyìnùrzì, Klàwùdìyà na hwanɛyi wònyanyàŋgò hwa arzu hwa arzɛ hwa hwàlòkèlì hwa e kɔ̀mi.

²²Rzàŋgo à hwɛ nà ò wà. È ndèli ya ama Lohwɛ̀ e hwɛ nà ò wà.