Read Mokpwe Tàyìtùrzì 1 Bible Online

Tàyìtùrzì 1 - Mokpwe bible

Tàyìtùrzì 1

¹Ìmba Pàwolò ema nà hwèlì e mògbèèlì wà ama Lohwɛ̀ nà è àpɔ̀rzìtòlò ya ama Yerzù Krirztò ndi nà tilì ene kààtì. Yerzù ndi à mà nò hvɔ̀rzɔ̀ rzìi à nò oma o lì ɛndɛ lì ètìrzɛ̀ lìlòkɛ̀ la hwatò ema Lohwɛ̀ à mà hvɔ̀rzɛ̀, nà o lì hwa oŋgowàna o lì hwiya e jɔ̀kɛ̀ lì hvomɛ̀nɛ̀ Yerzù, na o lì gbeyà na oma Lohwɛ̀ a àrzeyà.

²Aŋga nanù, hwatò hwa ama Krirztò hwa ò luwa lìhvìta là lì luwa lòŋgɛ la gbìndèyà. Ndèŋgana Lohwɛ̀ à è wèka è rze, a mà kàkɛ̀nɛ̀ nanù ema, hwatò hwa eni hwa o hwɛ na mɔ̀ natɛ̀ɛ nà ò gbìndèyà. Mɔ̀ a rza kɔ̀ hweyà.

³È hvonda ema Lohwɛ̀ à mà ɛnɛ nanù ema e hvomɛ̀nɛ̀, à mà gbeyà hwatò ò lì hwiya ŋmɛ̀ndì mò eni. Lohwɛ̀ à mà no ŋgba moŋgo ŋmɛ̀ndì o màà mà ami, ndeŋgànɛlɛ nà hwèlì nà mò ohwa nà e wònja ema Lohwɛ̀ e Mòrzùŋgèlì hwa arzu a no ŋgbelì.

⁴Ò wà Tàyìtùrzì ndi nà tìlèlì ene kààtì. Ò hwèlì ndi nàa è ŋmanà wà ami wà jɔ̀kɛ̀ ò lìlòkɛ̀ ema irzɔ hwa arzɛ jo ohvi. È ndèli nà ɛ̀yɔ̀lɛ̀ ema è uwɛ̀lɛ̀lɛ̀ ò mà Lohwɛ̀ è Tatɛ̀ nà Yerzù Krirztò è Mòrzùŋgèlì hwa arzu è hwɛ nà ò wà.

⁵Ìi Tàyìtùrzì, nà mà ò lììya ò mbowà yà Krɛ̀tɛ aŋga nanù ò wà ò tànɛ lì tɛ̀yirzɛ mamɛ ema è rzi kulɛ̀hwɛ ò lì gbeyàhwa, ndèŋganɛlɛ ò lì hvɔ̀rzɔ̀ hwàtìmbèlì hwa mèèmbà ò tɔ̀ ima mbowà. Ò rzi hvoŋga ò lì gbeyà nà oma imba nà mà ò ohweyà ò lì gbeyà.

⁶Mòtìmbèlì wa ŋmèmba a àŋgàmɛ̀nɛ̀ ndi lì hwɛ mòtò ema a rza ohvɛ tɔ̀ njɔ̀mi. A àŋgàmɛ̀nɛ̀ ndi lì hwɛ mòjòmɛ̀ mò jòjìyɛ̀ mɔ̀kɔ, ndèŋgànɛ̀lɛ̀ hwàanà hwa eni hwa àŋgàmɛ̀nɛ̀yi lì lòkɛ̀ Yerzù Krirztò. Hwa àŋgàmɛ̀nɛ̀yi lì ohva hwègbèèlì hwe gbamù aŋga nanù tɔ̀ mòtò a rza tànɛ lì hwa hwɛlɛ nanù ema hwa hwèlì maniya tɔ̀ hwa hwèlì bùlubùlu.

⁷Kànàtɛ e mòtimbèlì wa ŋmèmba ndi à kànèyà ewòlo ya ama Lohwɛ̀, a àŋgàmɛ̀nɛ̀yi ndi lì hwɛ mòtò ema a rza ohvɛ tɔ̀ njɔ̀mi. A àŋgàmɛ̀nɛ̀ ndi lì hwɛ mòtò ema a rza enje lìhvàma, na mòtò ema a ambi lì tata. A rza àŋgàmɛ̀nɛ̀ lì hwɛ mòtò ema a aŋgbɛ mɔ̀ ŋmìti o lì nyɔ la mimba, tɔ̀ mòtò ema a jànà mòhvùŋgu. Ndèŋgànɛ̀lɛ̀ a rza àŋgàmɛ̀nɛ̀ lì hwɛ njɔ̀ŋgu.

⁸Ndi tɔ̀ nanù e mòtimbèlì wa ŋmèmba a àŋgàmɛ̀nɛ̀yi ndi lì hwɛ mòtò ema a kàrzɛ hwatò ema hwa jà o lì mo hvɛhvɛ, ndèŋgànɛ̀lɛ̀ a hwèlì ndi mòtò ema a lìŋgàna hwema hwe gbamù. A àŋgàmɛ̀nɛ̀yi ndi lì hwɛ mòtò ema a hwi lì àwòhvɛ̀ la eni na hwahvɛhvɛ hwatò, mòtò ema hwègbèèlì wa eni hwe tɛnɛ̀nɛ̀, ema a hwèlì wòtani, ndèŋgànɛ̀lɛ̀ a hwèlì mòtò ema àkuwɛ̀ɛ mɔ̀ ŋmìti.

⁹A àŋgàmɛ̀nɛ̀yi ndi lì hwɛ mòtò ema a ika ŋmɛ̀ndì mò gbamù kɔ̀yi-kɔ̀yi, ŋmɛ̀ndì mò gbamù ema hwatò hwa àŋgàmɛ̀nɛ̀yi lì ika mèèmà me awu aŋga ndèŋgànɛ̀lɛ̀ a lòkɛ̀yì na oma hwà mà mo òkolɛ. Ène e gbeyà nanù ema a tanɛ lì oŋgowàna hwahvɛhvɛ hwatò o lì oŋgama ŋmɛ̀ndì mò gbamù nyayi ema e hvomɛ̀nɛ̀. À ò tanɛ hvɛ lì uŋmɛ̀lɛ̀ o mòte màtònà ma hwatò ema hwa teŋgɛ̀nɛ̀ moŋgo ŋmɛ̀ndì mò gbamù.

¹⁰Nà ohwa ndi ene eyà nanù ehwànja, rzayi-rzayi ja hwatò hwa rzɔ̀rzɔ̀ o lì ika lìkànèyà la ama hwàtimbèlì wa ŋmèmba. Hwanu hwatò hwa okolɛ hwahvɛhvɛ hwatò na e mbɔrzi ema e rza ohvɛ janda ndèŋgànɛ̀lɛ̀ hwa lukɛlɛ hwatò. Rzayi-rzayi ja hwanu hwatò ema hwa okolɛ ene nyàyi ya hwèyòkòlèlì, hwa hwèlì ndi hwatò ema hwa hwèlì o eŋge ehvehva ema e ohwa nanù ema, hwa àŋgàmɛ̀nɛ̀ o lì endà hwatò.

¹¹O rzi keka lì emeyà nanù ema hwaŋga hwatò hwa okolɛ ehwànja wɔ̀ hwà mà hvuŋguhwa rzayi-rzayi ja màtumbà mà hwatò hwa ama Krirztò na oma wɔ̀ hwa okolɛ hweyà ema hwa rza ohvɛ e wònja o lì hwe okolɛ. Wɔ̀ hwa okolɛ ndi ini nyayi ja hweyà aŋga nanù wɔ̀ hwa luwa wolì.

¹²Mòòhwèlì mɔ̀kɔ wa èlìŋgɛ̀ wa kowàa o èkomè ya Krɛ̀tɛ à mà ohwa nanù ema, “Hwàto hwa Krɛ̀tɛ hwa kɔɔ hweyà ihvonda ja arzɛ. Wɔ̀ hwa hwèlì wɔ̀ɔ̀ na ɛkɔ̀ni, hwa hwèlì ndi hwatò hwa rziŋga ema hwa ondi na njɔ̀ŋgu.”

¹³Hwene hwèyohwèlì hwe ama ono mòòhwèlì wà èlìŋgɛ̀ lì hvomɛ̀nɛ̀ hwatò hwa èkomè ya Krɛ̀tɛ, hwe hwèlì ndi e jɔ̀kɛ̀. O eŋgànɛ̀lɛ̀ rzɔ, hwatò ema hwa lòkɛ̀ Yerzù rzi hwa a ika hweŋge hwèyòkòlèlì hwe mòlàŋgà, o hwa kànje na ŋginyà o lì hwa ohweyà nanù ema hwa toni, aŋga nanù wɔ̀ hwa lòkɛ̀ hwèyòkòlèlì hwe jɔ̀kɛ̀ lì hvomɛ̀nɛ̀ Yerzù.

¹⁴Àŋga nanù wɔ̀ hwa rza o lòkɛ̀ mèndèŋga me ŋgundu me wònyà Yudà ndèŋgànɛ̀lɛ̀ hwa rza oŋgama hweyà ema hwatò ema hwa rzɔ̀rzɔ̀ hwèyòkòlèlì hwe jɔ̀kɛ̀ hwa ohwa.

¹⁵O hwatò ema hwa rzàŋgi, hwèèmà hwe arzɛ hwe rzàŋgi, ndi o hwaŋga hwatò ema hwa rza rzàŋgɛ, ndeŋgànɛlɛ hwa rza lòkɛ̀, tɔ̀ eyà o màlùtèyà mà awu nà ò mèèmà me awu e rza rzàŋgi.

¹⁶Hwàto ema hwa okolɛ hweŋge hwèyòkòlèlì hwe mòlàŋgà wɔ̀ hwa ohwa nanù ema hwa hwi Lohwɛ̀, ndi hwègbèèlì hwe awu hwe uŋmɛ̀lɛ̀ nanù ema hwa rza hwi Lohwɛ̀. Hwa gbeyà hweyà ema hwatò hwa rza lìŋgànɛ, wɔ̀ hwa rza gbeyà hweyà na oma Lohwɛ̀ a hwe àrzeyà ndeŋgànɛlɛ hwa rza tànɛ lì gbeyà tɔ̀ eyà yɔ̀kɔ ya gbamù.