Read Mokpwe Tàyìtùrzì 3 Bible Online

Tàyìtùrzì 3 - Mokpwe bible

Tàyìtùrzì 3

¹Ìi Tàyìtùrzì kòkò, o ɔ̀ŋgɛ̀lɛ̀nɛ hwatò nanù ema hwa arzìhwìrzɛ̀lɛ̀lɛ̀ hwàkànèlì nà hwàtìmbèlì hwa awu. È hwa hweyàne, na o lì wòŋgirzɛnɛ o lì gbeyà tɔ̀ mamɛ ema e hwèlì gbamù.

²O hwa ohweyà nanù ema hwa rzi keka lì ohwàna tɔ̀ mòtò eyà ya wòhwe, ndi inyɛ hwa hwɛ o ɛ̀yɔ̀lɛ̀ na hwatò nà ò lìŋgànà hwahvɛhvɛ hwatò, nà o lì arzìhwìrzɛ̀lɛ̀lɛ̀ o hwatò hwa arzɛ.

³O hvonda hvɔ̀kɔ ema e ma aka, irzɔ hvɛ i ma hwɛ hwèèti, i rzi hwɛ lì hweyàna Lohwɛ̀, i ma hvònda e njiya, i ma hwɛ nàa hwàkòmì na oma i ma ohve e nyɔ̀ŋgi ya hweyà hwe e rze ya mɔ̀nyɛ̀, ndèŋgànɛ̀lɛ̀ i ma hwɛ lì arza mɔ̀nyɛ̀ŋgì mo e rze. Mòŋgɛ ma arzu ma mà onda ndi na inona na ɛ̀kɔ̀wù. Hwàto hwà mà jo kɔwu ndèŋgànɛ̀lɛ̀ irzɔ hvɛ i ma kɔwu mɔ̀kɔ na ɔnɛyi.

⁴Ndi Lohwɛ̀, è Mòrzùŋgèlì hwa arzu, à mà jo uŋmɛ̀lɛ̀ ŋmèma mo eni mo ììlì na e ndìŋgɛ ya eni.

⁵Rzeketɛ o hweyà hwe ehve-ehve ema i ma gbeeye ɔ̀ndèŋgàtɛ̀ à mà jo rzùŋgà, ndi à mà jo rzùŋgà ndi o nyòla ììlì ja eni. Lohwɛ̀ à mà oma Èlìŋgɛ̀ yà Wòtani o lì rzorza wòhwe wo arzu, aŋga nanù jo o ŋyàahwà hwahvènya.

⁶Lohwɛ̀ à mà akɛ̀lɛ̀nɛ̀ lì jò ŋgbàà Èlìŋgɛ̀ yà Wòtani lì akeyà na Yerzù Krirztò e Mòrzùŋgèlì hwa arzu.

⁷Lohwɛ̀ à mà gbeyà nanù, aŋga nanù e ndèli ya eni e gbeyà jo o emeyàhwa o worzo wo eni, rzìi irzɔ hvɛ jo o hwɛnɛ lìhvìtà nanù ema jo ò luwa lòŋgɛ la gbìndèyà.

⁸Hwène hweyà hwe arzɛ ema nà mà ohwɛ hwe hwèlì ndi e jɔ̀kɛ̀. Nà arza ema e ùkirzɛ̀lɛ̀lɛ̀ hwene hweyà nɔ̀ke-nɔ̀ke aŋga nanù, hwaŋga ema hwà mà lòkɛ̀ Lohwɛ̀ hwa o aŋgowa o lì aŋgbɛ wɔ̀ hwiti o lì gbeyà mamɛ ema e hvomɛ̀nɛ̀. Nànù ndi i gbeye ndèŋgànɛ̀lɛ̀ nanù ndi hwe jànà hwatò hwa arzɛ mɔ̀rzɛ̀ŋgi.

⁹Ndi inyɔ e rza alɛ̀mbɛ̀nɛ hvenda ya èetì, o lì ohwa nɛ inyɔ̀ŋgɔ̀nì i ma wòteyà. È rzɔ̀njɛlɛ ihvenda, na metàŋgo lì hvomɛ̀nɛ̀ e mbenda ya wònyà Yudà. È rza akakumɛnɛ hwene hweyà ehwànja, hwe hwèlì ŋgandì ndeŋgànɛlɛ hwe rza ohvi tɔ̀ mɔ̀rzɛ̀ŋgi.

¹⁰O kòkòhwɛ̀lɛ̀ tɔ̀ njɛnɛ ema à jànà lùwànje o ìtììtènì ja hwàlòkèlì, a rza o hweyàni tɛ ò mò kòkòhwɛ̀lɛ̀ e ŋgelì ema e ùkirzɛ̀ ihwàkɛ o mburza nanù, a rza o hweyàni hvɛ tɛ, o rzi hwɛnɛ hvɛ tɔ̀ eyà o lì gbeyà na mɔ̀.

¹¹O hwiye nanù ema eŋge nyayi ya mòtò e hwèlì wòhwe ndèŋgànɛ̀lɛ̀ a gbeyà wòhwe. Wòhwe ema a gbeye wo uŋmɛ̀lɛ̀ nanù ema a atùulɛ̀ mɔ̀ ŋmìti ŋmàŋgo.

¹²Nà e omelì tɛ Atɛ̀màrzì tɔ̀ Tàkìkùrzì e keke natɛ̀ɛ e jèe e no uŋma o mbowà ndɛnɛ ya Nìkàpòlìrzì, ehwànja aŋga ndi nà mà kulɛ̀ nanù ema na aakɛ̀lɛ̀lɛ̀ ehvùhvà e hvonda ema yùulùlì e imbami.

¹³È keke natɛ̀ɛ e oŋgòwànè Rzɛ̀nàrzì ema a hwèlì e mòtò wa mbenda na Apòlòrzì na oma hwa wòteyà yɔ̀ndɔ̀ ya awu. O ɛnɛ nanù ema o hwa oŋgòwànè o lì luwa hwèemà hwe arzɛ ema wɔ̀ hwa arza lì hvomɛ̀nɛ̀ yɔ̀ndɔ̀ ya awu.

¹⁴Ndèŋgànɛ̀lɛ̀ o gbeye hwatò hwa arzu o lì okowa o lì gbeyà hweyà hwe gbamù. Wɔ̀ hwa àŋgàmɛ̀nɛ̀yi lì oŋgòwànà o lì gbeyà hweyà ema hwe arzahwa nanù ema mòtò a hwe gbeye. Wɔ̀ hwa rza gbeyà hweyà hwe ŋgàndi.

¹⁵È wɔ̀ hwa arzɛ ema hwa hwèlì na imba hwa e omelì ikɔ̀mi. È kɔmè wònyànyàŋgò hwa arzu hwa arzɛ hwa Krirztò ema hwa jo lìŋgàni. Inyɛ̀ e ndèli ya ama Lohwɛ̀ e hwɛ na inyɔ hwa arzɛ.