Read Mokpwe Hvìlɛ̀mɔ̀nì 1 Bible Online

Hvìlɛ̀mɔ̀nì 1 - Mokpwe bible

Hvìlɛ̀mɔ̀nì 1

¹Imba Pàwolò, mòtò ema nà hwèlì ò hwèwòwà o nyòla lìinà là ama Yerzù Krirztò imba ndi na tilì ini itita. Ŋmànyàŋgo wa arzu wa Krirztò Tìmòtì na imba je e omelì ikɔ̀mi. Hvìlɛ̀mɔ̀nì irzɔ jo ò kɔ̀mi e mbunda ya arzu wa ndìŋgɛ màlìŋgo ema wàhvɛ o gbeyà nyàyi hvɔ̀kɔ ya èwòlò ema irzɔ̀hvɛ i gbeyà.

²I kɔ̀mi hvɛ Ahvìyà, e ndòmɛ ya arzu wa ama Krirztò. I kɔ̀mi hvɛ Achipurzi, ema mɔ̀hvɛ a ohwa ŋmɛ̀ndì mò gbamù na e ŋginyà ya eni ya arzɛ na oma irzɔ hvɛ i gbeyà. Ndèŋgànɛlɛ i kɔ̀mɔ̀ hvɛ wònyànyàŋgo hwa arzu hwa ŋmèmba ema hwa tàneya o ndawò ya aŋgɔ.

³Inyɛ̀ è ndèli nà ɛ̀yɔ̀lɛ̀ yà ama Lohwɛ̀ Tatɛ̀ wà arzu nà Rzàŋgo Yerzù Krirztò, è hwɛ nà inyɔ.

⁴Ŋmanyàŋgò wà ami Hvìlɛ̀mɔ̀nì, tɔ̀ ima hvonda ema nà kanɛ̀, nà eka Lohwɛ̀ ò nyòla aŋgɔ̀.

⁵Nà eka Lohwɛ̀ ehwànja nà hweyà nanù ema ò lìŋgàni hwatò hwa arzɛ hwa ama Lohwɛ̀, ndeŋgànɛlɛ ò mà ika ŋmèma mò aŋgɔ ò mà Rzàŋgo Yerzù Krirztò.

⁶Nà kanɛ̀ nanù ema, là arzàŋgànɛ là arzu nàa hwàlòkèlì hwe gbeyà inyɔ è rzɔ̀ŋgìtɛ̀nɛ̀ kɔ̀yi-kɔ̀yi hweyà hwe gbamù hwe arzɛ ema Lohwɛ̀ à mà jò ŋgbɛ. Ène eyà è gbeyà nanù ema ŋmàye mò ama Krirztò mò ɛneyà.

⁷Ŋmànyàŋgo wà amì kòkò, è ndìŋgɛ ema ò hwɛnelì hwatò ema hwa lòkɛ̀ Krirztò è nò lìŋgìrzɛ rzàyi-rzàyi ndeŋgànɛlɛ è nò kɔ̀mɛ̀lɛ̀. Ò wà ò lìŋgìrzɛ̀yi hwatò hwa ama Lohwɛ̀.

⁸Ò èŋgànɛ̀lɛ̀ rzɔ, tɔ̀ nɛ imba nà hwɛni è wònja ò lì ò kànèyà ò lìnà là ama Krirztò, ò lì gbeyà hweyà ema o àŋgàmɛ̀nɛ̀yi lì gbeyà,

⁹è ndìŋgɛ ema imba nà ò hwɛ̀nèlì, è nò gbeyà nanù ema nà hwɛ ndi ò lì ò rzòrzòmeyà. Imba Pàwolò nà ohwa ndi nanù nàa molùni wà mòtò ema à hwèlì ò hwèwòwà nàŋgɛ ò nyòla lìinà là ama Krirztò.

¹⁰Ò èŋgànɛ̀lɛ̀ rzɔ nà ò rzòrzòmeyà ò nyòla ama Ònɛ̀rzìmùrzì. Mɔ̀ à hwèlì ndi nàŋgɛ nàa è ŋmanà wà ami. Imba ndi nà gbèyi ema à lòkɛ̀ Krirztò è hvonda ema à mà hwɛ nà imba anu ò hwèwòwà.

¹¹O lìrzako lɔ̀kɔ à rzi hwɛnɛ tɔ̀ wòlìtò nà ò wà, ndi ò nàŋgɛ nanù à hwɛni wòlìto o ò wà nà imba.

¹²Nà ò timbirzɛlɛlɛ è mɔ̀ nàŋgɛ, ndèŋgànɛlɛ mɔ̀ à hwèlì ndi mòtò ema imba nà lìŋgàni rzàyi-rzàyi.

¹³Nà mà lìŋgàna nanù ema à hwɛ ndi nà imba, aŋga nanù à nò òŋgòwànà ò lì hwɛ ò èki yà aŋgɔ nàŋgɛ ema imba nà hwèlì anu hwèwòwà ò lìnà là ŋmɛ̀ndì mò gbamù.

¹⁴Ndi tɔ̀ nanù, nà rza arza lì ò tindɛ̀lɛ̀ ema ò nò òŋgòwane. Ndi, nà ò lìŋgàna nanù ema ò nò òŋgòwane ndi ehwànja ò wà hwìti ò lìŋgàni lì nò òŋgòwàna. Ò èŋgànɛ̀lɛ̀ rzɔ, nà rza tànɛ lì gbeyà tɔ̀ eyà ema ò wà ò rzi imànɛ̀lɛ̀.

¹⁵Ò tànɛyi lì hwɛ nanù ema Lohwɛ̀ mɔ̀ ndi à gbèyi ema Ònɛ̀rzìmùrzì à ò hwɛ̀mɛ̀ ò ŋmanà hvòkà yà hvonda, aŋga nanù à ò tìmbelì tɛ à ò hwɛ nà ò wà ò ihvonda jà arzɛ.

¹⁶Ò nàŋgɛ à rza enje ndi mòkòmè, ndi à hwèlì ndi ŋmanyàŋgò wà arzu wà ama Krirztò. Nà mò lìŋgàni rzàyi-rzàyi, ndèŋgànɛlɛ ò wà hvɛ ò àŋgàmɛ̀nɛ̀yi lì mò lìŋgàna lì aka mamɛ ema imba nà mò lìŋgàni. Ò àŋgàmɛ̀nɛ̀yi lì mò lìŋgàna nàa è mògbèèlì wà aŋgɔ̀ ndèŋgànɛlɛ nàa ŋmànyɔ̀ŋgɔ̀ wà aŋgɔ̀ wà ama Krirztò.

¹⁷Ò èŋgànɛ̀lɛ̀ rzɔ, ono wòwi tɛ nàa mòtò ema irzɔ nà ò wà ì gbèèyɛ̀nɛ̀ èwòlò, ò àŋgàmɛ̀nɛ̀yi lì mò kàrzɛ nyàyi hvɔ̀kɔ nà oma ò hwɛni lì nò kàrzɛ.

¹⁸À mà ò gbeyà tɛ wòhwe tɔ̀ wɔ̀kɔ, tɔ̀ à ò òhvana ndi lìyɛ̀mɛ̀, imba nà ò rzàhweyà.

¹⁹Imba Pàwolò, imba mbiti ndi nà tilì ini ikɔ̀mi nà lìya là ami. Nà ò rzàhweyà. Ndi ò rzi hvoŋga nanù ema nà oma nà ò gbèyi ema ò hwɛnɛ lòŋgɛ lì hvènya, è gbèyi ndi nàa ò wà hvɛ ò nò età.

²⁰Ò èŋgànɛ̀lɛ̀ rzɔ, ŋmanyàŋgò wà ami kòkò, nà ò rzòrzòmeyà ndi nanù ema ò nò òŋgòwànè ò lìnà là ama Rzàŋgo. Ò nò lìŋgìrzɛ̀ ò lìnà là ama Krirztò.

²¹Nà lòkɛ̀ nanù ema, nà oma nà tìlì ini ìtìtà nanù, ò gbeyà tɔ̀ mamɛ ema imba nà ohwi nanù ema ò nò gbèeyà. Ndèŋgànɛlɛ nà hwi nanù ema ò wà ò è gbeyà lì aka mamɛ ema imba nà ohwi nanù ema ò gbèye.

²²Èhvɛhvɛ eyà ema imba nà ohwi nanù ema nà ò òhweyà è hwèlì ndi nanù ema, ò nò rzèkeyà tùù hvɔ̀kɔ ò ndawò yà aŋgɔ̀, èhwanja nà lòkɛ̀yì nanù ema Lohwɛ̀ à ò è hweyànà màkanɛ̀ mà anyu, à ò nò ulɛ̀ ò hwèwòwà oma nà mà è uŋmànɛ̀lɛ̀ hvɛ.

²³Èpàhvràrzì, ema à hwèlì nà imba ò hwèwòwà ò lìnà là ama Yerzù Krirztò, mɔ̀hvɛ à è òmèlì ikɔ̀mi.

²⁴Nànù mɛnɛ hvɛ nà Màkòrzì, Arìrztàkùrzì, Dèmàrzì nà Lukàrzì, hwàgbèèlì ema irzɔ nà wɔ̀ ì gbèeyà èwòlò wɔ̀hvɛ hwa è òmèlì ikɔ̀mi.

²⁵Inyɛ̀ è ndèli yà ama Rzàŋgo Yerzù Krirztò è hwɛ nà inyɔ hwa arzɛ.