Read Mokpwe Hibrù 2 Bible Online

Hibrù 2 - Mokpwe bible

Hibrù 2

¹O eŋgànɛ̀lɛ̀ rzɔ, na oma irzɔ i hwi hwene hweyà, ja àŋgàmɛ̀nɛ̀yi ndi lì ika mèèmà me arzu o tɔ̀ ima eyà ema i hweyi aŋga nanù i rza eŋgama.

²Hweyà ema Lohwɛ̀ à mà ohweyà i aŋgèlì nanù ema hwa ohweyà imbamba ja arzu hwe ma hwɛnɛ màyìmbi. Hwàto hwa arzɛ ema hwa rzi oŋgamɛ hweŋge hweyà, ndèŋgànɛ̀lɛ̀ ema hwa rzi gbeyɛ na oma hweŋge hweyà hwe ma ohwahwɛlɛ, hwa o luwa e kɔ̀kìrzɛ̀ ema hwa àŋgàmɛ̀nɛ̀yi lì luwa.

³Nɛ rzɔ, inyɔ e ɔ̀ŋgɛ̀lɛ̀ nanù ema irzɔ i tànɛyi lì hwaŋga ene e kɔ̀kìrzɛ̀, e hwèlì tɛ nanù ema irzɔ̀ i rza hwɛni tɛ e hvonda na mono ŋmɛ̀ndì mò gbamù e? Mono ŋmɛ̀ndì mò gbamù, mɔ̀ ndi mo jànà ene tumba mòrzùŋgèlì. È Rzàŋgo Yerzù mɔ̀ ŋmitɛ ŋmitɛ ndi à lomi lì ohweyà hwatò lì hvomɛ̀nɛ̀ mono ŋmɛ̀ndì mò gbamù. Ndeŋgànɛ̀lɛ̀ hwatò ema hwà mà hweya hweyà ema mɔ̀ à mà ohwe, hwà mà jo gbeyà irzɔ o lì rzɔ̀ŋgìtɛ̀nɛ̀ nanù ema hweŋge hweyà hwe ma hwɛ ndi e jɔ̀kɛ̀.

⁴Lohwɛ̀ mɔ̀ ŋmìti hvɛ à mà uŋmɛ̀lɛ̀ nanù ema hwene hweyà hwe hwèlì ndi e jɔ̀kɛ̀ na oma à mà gbeyàna hwahvɛhvɛ hwatò ò lì uŋmɛ̀lɛ̀ hwatò hwèmɛ̀nɛ̀nì na hwèèmbànèlì hwe mànyàka. Mɔ̀ à mà uŋmɛ̀lɛ̀ hvɛ na hweyà ema hwatò hwà mà hwɛ lì gbeyà lì akeyà na màyìmbi ma Èlìŋgɛ̀ yà Wòtani ema Lohwɛ̀ à mà hwa ŋgbe. Lohwɛ̀ à mà ŋgba hwatò Èlìŋgɛ̀ yà Wòtani na oma mɔ̀ à mà lìŋgàne.

⁵Rzeketɛ i aŋgèlì ndi Lohwɛ̀ a rzekelì nanù ema i kànèyà e rze ya mɔ̀nyɛ̀ hvènya ema irzɔ jo ohwi nanù ema e o jà.

⁶Ndi e tìlahwì o èki yɔ̀kɔ o è kààti ya ama Lohwɛ̀ nanù ema, “Ìi Lohwà, njɛnɛ hvɛ a hwèlì e mòtò wa hwènàmà, ema o wa o mo aŋgohwèlì e? Tɔ̀ è Ŋmanà wà e mòtò wa Hwènàmà ema o aŋgohwèlì e?

⁷O ŋmanà hvoka ya hvonda o wa o ma mo gbeyà ema a rzi uke i aŋgèlì. Ndèŋgànɛ̀lɛ̀ ò wà ò mò lìilɛyi o konda ya ŋmàye na èluhwe.

⁸Ò wà ò mà mò ŋgbà màyìmbì ò lì kànèyà hwèèmà hwe arzɛ.” O èŋgànɛ̀lɛ̀ nà oma ò mà mò ŋgbɛ màyìmbì ò lì kànèyà hwèèmà hwe arzɛ, è uŋmɛ̀lɛ̀ nanù ema ò rza enje tɔ̀ yoma ò rze yà lìkànèyà là eni. Ndi tɔ̀ nɛ̀ è hwèlì nàŋgɛ nanù, irzɔ i rzi ɛnɛ nàŋgɛ nanù ema hwèèmà hwe arzɛ hwe hwèlì ndi ò rze yà eni.

⁹Ndi irzɔ ja ɛnɛ nɛ Yerzù a hwèlì. O ŋmanà hvoka hvonda Lohwɛ̀ à mà mo gbeyà ema a rza ukɛ tɔ̀ i aŋgèlì. O nàŋgɛ, Lohwɛ̀ à mà mo ŋgba ŋmàye na èluhwe nàa kìŋgɛ ehwànja o lìtake ema mɔ̀ à lu na e kpelì ema a ŋwelì. Lohwɛ̀ mɔ̀ à mà jo uŋmɛ̀lɛ̀ e ndèli ya eni o e kpelì ya ama Yerzù a ŋwɛlɛlɛyì hwatò hwa arzɛ.

¹⁰Lohwɛ̀ ndi à hwɛni hwèèmà hwe arzɛ ndèŋgànɛ̀lɛ̀ mɔ̀ ndi à hwe ɔ̀ŋgeyà. Nà oma e hwèlì nanù ema Lohwɛ̀ mɔ̀ à arza nanù ema rzayi-rzayi ja hwatò hwa luwe ehvolo o lì hwɛ hwàanà hwa eni ndèŋgànɛ̀lɛ̀ hwa luwe ŋmàye. O ma lɔ̀wu nanù ema mɔ̀ à gbeeye mòtò o lì hwa lìhvoweya e njiya lì akeyà na motàka. Ène eyà e mo gbeyà mɔ̀ o lì hwɛ mòtò ema mɔ̀ à o tanɛ lì gbèya ema hwatò hwa luwe lìrzùŋgàhwa.

¹¹Yerzù ema mɔ̀ ndi mɔ̀ à gbèyi ndèŋgànà hwatò hwa e jà wòtani, ndèŋgànɛ̀lɛ̀ hwatò ema hwa hwèlì wòtani, hwa arzɛ hwa hwèlì ndi hwàanà hwa Tatɛ̀ hvɔ̀kɔ. Ndeŋgànɛ̀lɛ̀ yɔ̀ ndi e gbèyi ndeŋgatɛ Yerzù a rza oka irzɔ̀ni o lì hwa hwɛlɛ nanù ema wònyànyàŋgo wa ami.

¹²È tìlahwì nanù ema mɔ̀ à mà ohweyà Lohwɛ̀ nanù ema, “Nà ohweyà wònyànyàŋgo hwa ami hwèyòlòwèlì hwe lìinà là aŋgɔ. Imba na o eka e hwèlì tɛ nanù ema irzɔ na wɔ̀ ja arzàŋganɛ tɛ o èki yɔ̀kɔ.”

¹³A ma ohwa hvɛ nanù ema, “Nà ika lì lòkɛ̀ la ami na Lohwɛ̀.” A ma ohwa hvɛ nanù ema, “Imba ono na hwàànà ema Lohwɛ̀ a no ŋgbelì.”

¹⁴Nà oma e hwèlì ema hwanu hwànà hwa ama Lohwɛ̀ hwa ohvi e nyàmà ya nyo na màyija, ɔ̀ndeŋgàtɛ̀ Yerzù mɔ̀hvɛ à mà wòwa e nyo ya e mòtò wa hwènàmà nàa wɔ̀. À ma gbeyà ndi nanù, aŋga nanù e kpelì ema mɔ̀ à mà ŋwe e tìtòwà màyimbì ma ama Mòkarzɛ̀, ema a gbèyi ndeŋgàtɛ hwatò hwa ŋwa.

¹⁵È kpelì ema mɔ̀ à mà ŋwe, e ma rzòlohwà hwaŋga hwatò ema hwà mà hwɛ hwàkòmì o lòŋgɛ la awu la arzɛ o nyòla wɔ̀ŋgɔ̀ wo e kpelì.

¹⁶È a uŋmɛ̀lɛ̀ nà è jɔ̀kɛ̀, nanù ema rzeketɛ i aŋgèlì ndi à mà je o lì òŋgòwàna, à mà jà ndi o lì òŋgòwànà hwatò hwa mòtende mo ama Abràhamù.

¹⁷O eŋgànɛ̀lɛ̀ rzɔ̀, e ma àŋgàmɛ̀nɛ̀ lì hwɛ nanù ema Yerzù a hwɛ nàa wònyànyàŋgò hwa eni o hweyà hwe arzɛ, aŋga nanù mɔ̀ à hwɛ e Pìlìrzì e kàrzàmi, ema e ohvi ŋmèma mo ììlì ndèŋgànɛ̀lɛ̀ a hwèlì ndi mòtò ema hwa tanɛyi lì ika mèèmà me awu. Nà oma mɔ̀ à gbèeyà Lohwɛ̀, à mà gbeyà Lohwɛ̀ à mà làkìrzɛ̀ hwatò wòhwe wo awu.

¹⁸Kànatɛ à mà tàkìrzɛ̀hwɛ̀ na lì kèkìrzɛ̀hwɛ̀, o èŋgànɛ̀lɛ̀ mɔ̀ hvɛ a oŋgòwànà hwaŋga ema hwa kèkìrzɛ̀hwɛ̀.