Read Mokpwe Hibrù 4 Bible Online

Hibrù 4 - Mokpwe bible

Hibrù 4

¹Ò èŋgànɛ̀lɛ̀ rzɔ nà oma Lohwɛ̀ à mà jò kàkɛ̀nɛ̀ ema irzɔ ì tànɛyi ò lì kpèeyà ò èki yà eni yà lì arzìyòlɛ̀, jò ò è kpèeyà. Ò eŋgànɛlɛ rzɔ, inyɛ jà aŋgowe nanù ema tɔ̀ mòtò à rzi hvònda ò lì kpèeyà aŋga.

²Ŋmɛ̀ndì mò gbamù mò ama Lohwɛ̀ hvɛ ema mò jò òhwahwɛlɛyi, ì mà mò hweyà ŋgana hvɔ̀kɔ nà oma wɔ̀ hvɛ hwa mà mò hwèye. Ndi moŋgo ŋmɛ̀ndì mò gbamù ema hwa mà hwèye, mò rzi ohve tɔ̀ màanda nà wɔ̀, èhwanja wɔ̀ hwa rzi lòkɛ̀ mamɛ ema hwa mà hwèye.

³Nàŋgɛ rzɔ, irzɔ ema ì lòkɛ̀yì moŋgo ŋmɛ̀ndì mò gbamù, ì mà kpèeyà ò tenì yà eŋge èki yà lì àrzìyòlɛ̀. Ndi ò hwatò ema hwa rza lòkɛ̀ Lohwɛ̀, mɔ̀ à mà hwa ohweyà nanù ema, “Nà mà hwa tàtànà natɛ̀ɛ nà àtɛ̀ɛ̀ yòmbo nanù ema, ‘Hwa rza ò kpèya à kpèeyà hvɛ tɔ̀ ò èki yà ami yà lì àrzìyòlɛ̀.’” Tɔ̀ nɛ mɔ̀ à mà ohwe nanù, à mà màa lì kulɛ èwòlò ya eni, natɛ̀ɛ na e hvonda ema à mà weke e rze ya mɔ̀nyɛ̀ èki ya lì arzìyolɛ e ma loma lì hwɛ.

⁴È tìlahwì o tenì ya e kààtì ya Lohwà o lì hvomɛ̀nɛ̀ wùùnya ema wo ma ùkirzɛ̀ lìrzamba nanù ema, “Lohwɛ̀ à mà kulɛ èwòlò ya eni. O eŋgànɛlɛ rzɔ, mɔ̀ à mà arziyolɛ o wùnyà ema wo ma ùkirzɛ̀ lìrzamba.”

⁵È tìlàhwì ò è kààtì yà Lohwà nanù hvɛ ema Lohwɛ̀ à ohwi nanù ema, “Wɔ̀ hwa rza ò kpèya à kpèeyà hvɛ tɔ̀ ò èki yà ami yà lì àrzìyòlɛ̀.”

⁶È hwèlì ndi è jɔ̀kɛ̀ nanù ema èki yà lì arzìyolɛ è lìhvowahwi nanù mɛnɛ ò lòŋgo là hwatò ò lì kpèeyà, ndi hwaŋga ema hwa mà hweyà ŋmɛ̀ndì mò gbamù ò hwèŋge hweyu rzìi hwa rzi mò lòkɛ̀ hwa rza ò kpèeyà, èhwanja hwa rzi gbeye hweyà ema Lohwɛ̀ à ma hwa ohweyà nanù ema hwa gbeye.

⁷Ò èŋgànɛ̀lɛ̀ Lohwɛ̀ à mà rzèkeyà wohvɛhvɛ wùnyà wò hwɛ̀lɛ̀hwɛ̀ ndi, nanù ema, “Yàwonò.” Ò hvonda ema è mà aka, Lohwɛ̀ à mà ohwa, lì akeyà nà imbɔrzi jà ama Dàhwitì ema imba nà mà màà lì è tìleyà nanù ema, “Yàwonò è hweyi tɛ lìlo là ama Lohwɛ̀, è rzi hwɛ̀neyà Lohwɛ̀ màniya.”

⁸È mà hwɛ tɛ ema Jorzuwà à mà hwa ŋgbà tɛ lì arzìyolɛ ema Lohwɛ̀ à mà hwa kàkɛ̀nɛ̀, oma Lohwɛ̀ à rza ohwe hvɛ lì hvomɛ̀nɛ̀ wòhvɛhvɛ wùnyà wò lì arzìyolɛ.

⁹Ò eŋgànɛ̀lɛ̀ rzɔ, ekì yà lì arzìyolɛ ema è hwèlì ndi nàa lì arzìyolɛ ema Lohwɛ̀ à mà arzìyolɛ ò mbùrzà ema mɔ̀ à mà wèke è rze yà mɔ̀nyɛ̀, è ambɛ̀lɛ̀ hwaŋga hwatò nanù mɛnɛ.

¹⁰È mɔ̀ ema à kpèèlì ò èŋge èki yà lì arzìyolɛ ema Lohwɛ̀ à kàkɛ̀nɛ̀, mɔ̀ hvɛ à ò arzìyolɛ ehwànja mɔ̀ hvɛ à mà kùlɛ̀ èwòlò yà eni, ŋgana hvɔ̀kɔ nà oma Lohwɛ̀ mɔ̀ à mà arzìyolɛ è hvonda ema à mà kùlɛ̀ ewòlo yà eni.

¹¹Ò èŋgànɛ̀lɛ̀ inyɛ i gbeye nanù ema, irzɔ hvɛ jò ò kpèeyà èŋge èki yà lì arzìyolɛ, aŋga nanù tɔ̀ mɔ̀kɔ wa arzu a rza o hvònda o lì kpèeyà aŋga. I rzi nɔ̀ŋgɔ̀ màtaŋgà mà hwatò ema hwa rzi hwɛ lì gbeyà na oma Lohwɛ̀ à mà ohwe nanù ema hwa gbeye.

¹²È hwèlì e jɔ̀kɛ̀ nanù ema, Eyà ema e uwɛlɛlɛyi o ma Lohwɛ̀, e hwèlì lòŋgɛ, ndèŋgànɛ̀lɛ̀ e hwɛni màyìmbi. È èeyà lì aka rzɔ̀lɔ̀ ema ye hwàhwì ò hwèhvarzù hwe ahwàkɛ. Eyà yà ama Lohwɛ̀ è kpèeyà mòtò natɛ̀ɛ nà ò tenì yà eni nà ò èlìŋgɛ̀ yà eni. È kpèeyà mòtò natɛ̀ɛ nà ò tenì yà matìŋga nà ò tenì yà hwèèrzè. Èŋge eyà è emba màlùtèyà mà mòtò nà tɔ̀ ima eyà ema mòtò à arza lì gbeyà.

¹³Ò worzo wò ama Lohwɛ̀, ò rza enje tɔ̀ eyà ema è utami. Ndi hweyà hwe arzɛ hwe enyɛ̀lɛ̀lɛ̀yi ò worzo wò ama Lohwɛ̀. Ndeŋgànɛ̀lɛ̀ ò mà Lohwɛ̀ ndi irzɔ ì hwɛnì lì ohwa hweyà hwe arzɛ ema ì gbeyà.

¹⁴Ò èŋgànɛ̀lɛ̀ rzɔ nà oma ì hwɛnì è Pìlìrzì è Kàrzàmi Ndɛnɛ, Yerzù è Ŋmanà wà ama Lohwɛ̀, ema à mà lòmɛ lì ɛndɛ ò ŋmanyu yà lohwà ò worzo wò ama Lohwɛ̀, inyɛ ì lɛ̀mbɛ lìlòkɛ̀ là arzu kɔ̀yi-kɔ̀yi.

¹⁵Ì hwɛnì è Pìlìrzì è kàrzàmi ema è jò òkeya ììlì. Èhwànja mɔ̀ à mà kèkìrzɛ̀hwɛ̀ ŋgana hvɔ̀kɔ nà oma irzɔ hvɛ ì mà kèkìrzɛ̀hwɛ̀, tɔ̀ nɛ mɔ̀ à rzìi gbèyɛ tɔ̀ wòhwe tɔ̀ wɔ̀kɔ.

¹⁶Ò eŋgànɛ̀lɛ̀ rzɔ̀, inyɛ ì hwɛnɛ lìhvìtà, inyɛ je ɛndɛ o e konda ya lìkànèyà la ama Lohwɛ̀, ema e ŋgbàà e ndelì. Inyɛ̀ je ɛndɛ aŋga e rzi hwɛ tɔ̀ wɔ̀ŋgɔ̀. Inyɛ̀ i gbeye nanù aŋga nanù Lohwɛ̀ a jo uŋmɛ̀lɛ̀ ììlì, rzìi a jo ŋgbà e ndèli ya eni ema e jo oŋgowàna tɔ̀ ima hvonda ema ja arza lì oŋgowanɛ.