Read Mokpwe Hibrù 6 Bible Online

Hibrù 6 - Mokpwe bible

Hibrù 6

¹O eŋgànɛ̀lɛ̀ rzɔ, inyɛ je ɛ̀ndɛ̀nɛ̀ lìlòkɛ̀ la arzu o worzo, nàa hwatò ema hwà mà màa lì hwiya eyà. I rza àŋgàmɛ̀nɛ̀ o lì wowa hvonda hvɛ o lì okowa hweyà ema hwà mà jo okolɛ̀ lì hvomɛ̀nɛ̀ Krirztò o hwèwòtelì. I ma màa lì okowa, ndèŋgànɛ̀lɛ̀ irzɔ i hwi nanù ema hwatò hwa àŋgàmɛ̀nɛ̀ lì àyèŋgowɛ̀ o lì hwɛmɛ lì gbeyà hweyà hwe wòhwe ema hwe jànà e kpelì. Ndeŋgànɛ̀lɛ̀ i ma màa lì hwiya nanù ema hwa àŋgàmɛ̀nɛ̀yi lì lòkɛ̀ Lohwɛ̀.

²Hwa okolɛ hwatò lì hvomɛ̀nɛ̀ lìlùhwìrzɛ̀, na lì hvomɛ̀nɛ̀ lì hwàkɛ la màa o meyohvo me hwatò, ndèŋgànɛ̀lɛ̀ i hwi nanù ema hwa àŋgàmɛ̀nɛ̀yi lì okolɛ hwatò lì hvomɛ̀nɛ̀ hwèhvùmùwèlì hwe kpèelì, na lì hvomɛ̀nɛ̀ hwèkàyìrzèlì ema hwe hwèlì natɛ̀ɛ na o gbìndèyà.

³Inyɛ̀ i rzi hwɛmɛ hwene hweyà. Inyɛ̀ ja ɛndɛ ndi o worzo wo ama Lohwɛ̀ a emelì tɛ.

⁴Nà ohwa ndi nanù ehwànja hwatò hwa rzɔnjɛ̀lɛ̀ tɛ lìlòkɛ̀ la awu, tɔ̀ mòtò a rza tanɛyi o lì hwa tìmbìrzɛ hvɛ o lì hwɛmɛ wòhwe wò awu o lì timbeya Lohwɛ̀. Nà ohwa ndi hwatò ema hwà mà luwɛ ŋmàye, hwa kèkìrzɛ mònàmɛ̀ mo ama Lohwɛ̀, ndèŋgànɛ̀lɛ̀ hwà mà luwa èlìŋgɛ̀ yà wòtani nàa hwahvɛhvɛ hwatò.

⁵Hwanu hwatò ema hwà mà kèkɛ̀ wotɛ̀lu wo eyà ya Lohwà ndèŋgànɛ̀lɛ̀ hwà mà ɛnɛ màyìmbi ema mo o hwɛ e hvonda ema Lohwɛ̀ a o kànèyà.

⁶È hwèlì tɛ nanù ema hwaŋga hwatò hwà mà màa lì ɛnɛ hweŋge hweyà, rzìi hwa kìnyɛ̀lɛ̀ màlòkɛ̀ ma awu, tɔ̀ mòtò a rza tanɛ lì hwa tìmbìrzɛ hvɛ o lì àyèŋgowɛ̀ o wòhwe o lì nɔ̀ŋgɔ̀ Lohwɛ̀. Nà oma hwa rzɔ̀njɛlɛ è Ŋmanà wà Mùnyanà wa ama Lohwɛ̀, e hwèlì ndi o a ɛnɛ oma hwà mà mo wòmeyà hvɛ o mbàrza. Ndeŋgànɛ̀lɛ̀ hwà mà mo gbeyà o lì oka irzɔ̀ni o worzo wo hwatò.

⁷Lohwɛ̀ a nàmìrzɛ̀ mɔ̀nyɛ̀ ema mo yɔ̀yèyà e mbuwà tɔ̀ ima lìrzako rzìi màlìhwà mà kpèeyà o mɔ̀nyɛ̀. Moŋgo mɔ̀nyɛ̀ mo gbeyà hwèèmà hwe oŋga gbamù. Hweŋge hwèèmà hwe oŋgowàna hwatò ema hwa hwe oni.

⁸Ndi mɔ̀nyɛ̀ mo wùrzìrzɛ tɛ ndi hwènyɛ̀ŋgɛ̀yɛ̀ŋgɛ̀ na hwèwùlè hwe wòhwe, nanù oma moŋgo mɔ̀nyɛ̀ mo rza hwɛnì tɔ̀ mɔ̀rzɛ̀ŋgi. Moŋgo mɔ̀nyɛ̀ mo hwèlì o mbèmbè ya lì jemahwa na Lohwɛ̀, rzìi o lìrzukù moŋgo mɔ̀nyɛ̀ mo rzɛlɛhwɛ o mùnya.

⁹Ìi wònyamòwè kòkò, ndi tɔ̀ nɛ na e ohweyà nanù, na lòkɛ̀yi nanù ema inyɔ e gbeyà hweyà o ŋgana ema è ò luwɛ hwèèmà hwe gbamù hwe lìrzùŋgàhwa.

¹⁰Lohwɛ̀ à mà gbeyà hweŋge hwèma o ŋgana ema e hvomɛ̀nɛ̀. Mɔ̀ a rza hvoŋga tɔ̀ èwòlò yɔ̀kɔ ema mòtò a gbeye ndèŋgànɛ̀lɛ̀ mɔ̀ à rza hvoŋga e ndìŋgɛ ema mòtò a mo uŋmɛ̀lɛ̀ na oma inyɔ e hwèlì o lì gbèeyà hwahvɛhvɛ hwatò hwa ama Lohwɛ̀.

¹¹Irzɔ ja arza ndi nanù ema inyɔ e ɛ̀ndɛ̀nɛ̀ èwòlò e anyu o worzo na kumba, natɛ̀ɛ na o lìrzukù, aŋga nanù e luwa hweyà ema inyɔ e ambɛ̀lɛlɛyi na màhvìta.

¹²Irzɔ i rza arza nanù ema inyɔ e hwɛ rzìŋgà, ndi inyɔ e hwɛ nàa hwaŋga ema hwa lòkɛ̀yi rzìi hwa ohvi la àjùlɛ̀, ndi e hwɛ nàa hwaŋga ema hwa wowa yòma ema Lohwɛ̀ à mà kàkɛ̀nɛ.

¹³È hvonda Lohwɛ̀ à mà kàkɛ̀nɛ Abràhamù, à mà aàtɛ nanù ema mɔ̀ à o ondìrzɛ̀ lìŋgi lìkàkɛ̀nɛ̀. Mɔ̀ à mà gbeyàna ndi lìinà la eni o lì aàtɛ yòombò ehwànja o rzi hwɛ̀ɛ tɔ̀ mòtò ema à mà mo aka mɔ̀ o lì aàtɛ o lìinà la eni.

¹⁴A ma ohweyà Abràhamù nanù ema, “Nà ohwa nanù ema, imba na àŋgàmɛ̀nɛ̀yi lì o nàmìrzɛ̀, ndèŋgànɛ̀lɛ̀ na o gbeyà e nyɔ̀ŋgɔ̀nì ya aŋgɔ e nyàla rzayì-rzayì.”

¹⁵Abràhamù à mà ambɛ̀lɛnɛ na lì wɛ̀lìrzɛnɛ, o eŋgànɛ̀lɛ̀ à mà lùwa mamɛ ema Lohwɛ̀ à mà mo kàkɛ̀nɛ.

¹⁶Lìrzàkò ema mòtò a aàtɛ yòombò, a gbeyàna ndi lìinà la ama e mòtò ema a kàrzàmi lì mo aka. Tɔ̀ ima hvenda ema hwatò hwa ohvi, yòombò ndi ye e kulɛ.

¹⁷O eŋgànɛ̀lɛ̀ rzɔ na oma Lohwɛ̀ à mà arze lì uŋmɛ̀lɛ̀ na e jɔ̀kɛ̀ o hwaŋga hwatò ema hwà mà hwɛnɛ lì luwa mamɛ ema à mà hwa kàkɛ̀nɛ, nanù ema mɔ̀ à rza àyèŋgowɛ̀ o lì kàkɛ̀nɛ la eni, o eŋgànɛ̀lɛ̀ à mà aàtɛ yòombò o lì hwàtɛ o lì kàkɛ̀nɛ la eni.

¹⁸Lohwɛ̀ à mà ŋgbà hwene hweyà hweahwàkɛ ema hwe rza tanɛ lì àyèŋgowɛ̀, ehwànja Lohwɛ̀ a rza kɔ̀ɔ hweyà. A ma jo ŋgba yòombò na lìkàkɛ̀nɛ. A ma gbeyà ndi nanù, aŋga nanù irzɔ ema i lɛmbi lìni lìkàkɛ̀nɛ na màyìmbi jo o rzulɛhwɛ, na o lì àhvìtɛ̀ o hwèèmà ema mɔ̀ à ohwi nanù ema a o jo ŋgba.

¹⁹Lìŋgi lìhvìtà lì hwèlì ndi nàa yòoma ema e gbeyà mòŋgɛ ma arzu o lì ètìrzɛ̀hwɛ o hwetɛmelì. Lìni lìhvìta ndi lì gbeyà irzɔ ja akeyà o lìhwàtù ema lì kekayi lìyohva o lì uka o ekì ema e hwèlì wòtani, ekì ema Lohwɛ̀ a hwèlì.

²⁰Yerzù ndi à mà lòma ò lì kpèeyà ò eŋge èki ò nyòla arzu ò lì jò rzekeya ekì. Ò nàŋgɛ mɔ̀ ndi à mà hwɛ è Pìlìrzì è Kàrzàmi, aŋga ema è hwèlì natɛ̀ɛ nà ò gbìndèyà ŋgàna hvɔ̀kɔ nàa Mɛlkirzɛdɛki.