Read Mokpwe Hibrù 7 Bible Online

Hibrù 7 - Mokpwe bible

Hibrù 7

¹Ono Mɛ̀lkirzɛ̀dɛ̀ki mɔ̀ ndi àma hwɛ e kiŋgɛ̀ ya Rzàlɛ̀mù. Ndèŋgànɛ̀lɛ̀ à mà hwɛ hvɛ e Pìlìrzì ya ama Lohwɛ̀ ema lì kàrzàmi lì aka. Nà oma Abràhamù à mà hwɛ lì tìmba o njùma ema à mà anane kiŋgɛ̀ inɛ̀yi rzìi a ji rzuwàna, Mɛ̀lkirzɛ̀dɛ̀ki à mà ùŋmanɛlɛ Abràhamù rzìi a mo nàmìrzɛ̀.

²Abràhamù à mà mo ŋgbà lòŋgo lɔ̀kɔ la lìyomɛ la mamɛ ya arzɛ ema à mà uhwane o njùma. Jànda ja worzò ja lìna la Mɛlkirzɛdɛki o mbɔrzi ya Hibrù lì hwèlì ndi nanù ema, “È kiŋgɛ̀ ema e ma tɛ̀mɛ̀ ehve-ehve.” Jànda ema jo ùkirzɛ̀ ihwàkɛ i hwèlì ndi nanù ema, “È kiŋgɛ̀ ya Rzàlɛ̀mu.” Èma e hwèlì ndi, “È kiŋgɛ̀ ya ɛ̀yɔ̀lɛ̀.”

³È rza tìlahwì tɔ̀ èki nanù ema Mɛlkirzɛdɛki à mà ohva rzàŋgo tɔ̀ e nyɔ̀ŋgɔ̀ni. Ndèŋgànɛ̀lɛ̀ e rza tìlàhwi hvɛ na oma mɔ̀ à mà ŋyàahwè tɔ̀ nɛ à mà ŋwèeyà. A hwèlì ndi e pìlìrzì natɛ̀ɛ na o gbìndèyà ŋgana hvɔ̀kɔ hvɛ na oma è Ŋmanà wà e mòtò wa hwènàmà mɔ̀ hvɛ a hwèlì e pìlìrzì o gbìndèyà na o gbìndèyà.

⁴È ɔ̀ŋgɔ nɛ Mɛ̀lkirzɛ̀dɛ̀ki à mà hwɛ ndi yumɛ. Abràhamù e mbamba ya arzu ndɛnɛ à mà mo ŋgbà lòŋgo lɔ̀kɔ la lìyomɛ̀ la mamɛ ya arzɛ ema à mà uhwane o èŋge njùma.

⁵Li hvomɛ̀nɛ̀ e mbenda ema Lohwɛ̀ à mà ŋgbe Morzè, hwaŋga hwatò ema hwà mà uwɛ̀lɛ̀lɛ̀yi o mòtende mo ama Lɛ̀hvì, wɔ̀ ndi hwa hwèlì Ipìlìrzì. È mbenda e ma hwa kànèyà nanù ema, hwa luwe lòŋgo lɔ̀kɔ la lìyomɛ̀ la hwèluhwèlì hwe hwatò hwa awu hwa hwèlì wònyà Yudà tɔ̀ nɛ ema wɔ̀ hvɛ hwa hwèlì ndi membamba me ama Abràhamù.

⁶Mɛ̀lkirzɛ̀dɛ̀ki a rzi uwɛ̀lɛ̀lɛ̀yi o nyɔ̀ŋgɔ̀ni ya wònya Lɛ̀hvì ndi Abràhamù à mà mo ŋgba lòŋgo lɔ̀kɔ la lìyomɛ la hwèèmà. A ma nàmìrzɛ̀ Abràhamù ema Lohwɛ̀ à mà lome lì ŋgba lì kàkɛ̀nɛ.

⁷È hwèlì na e jɔ̀kɛ̀ nanù ema e mɔ̀ à nàmìrzɛ̀ a akayi e mɔ̀ ema a nàmìrzɛ̀hwɛ̀yi.

⁸Nà oma e hwèlì nanù e pìlìrzì ema e uwɛlɛlɛ o e nyɔ̀ŋgɔ̀ni ya ama Lɛ̀hvì, ema e wowa lòŋgo lɔ̀kɔ la lìyome la hwèèmà, wɔ̀ hwa arzɛ hwa hwèlì ndi hwatò hwa hwènàmà ema hwa ŋwa. Ndi Mɛ̀lkirzɛ̀dɛ̀ki ema à mà luwa lòŋgo lɔ̀kɔ la lìyome la hwèèmà, mɔ̀ à hwèlì ndi mòtò ema a rzi ŋwelì na oma e kààti ya Lohwà e uŋmɛ̀lɛ̀.

⁹I tànɛyi tɔ̀ lì ohwa nanù ema, ipìlìrzi ema i ma hwɛ ndi o mòtendè mo ama wònya Lɛ̀hvì wɔ̀ hvɛ hwà mà taŋga lìŋgi lòŋgo lɔ̀kɔ la lìyomɛ̀ o ma Mɛ̀lkirzɛ̀dɛ̀ki lì akeyà na e mbamba ya awu Abràhamù.

¹⁰I tanɛyi lì ohwa nanù ehwànja, e hvonda ema Mɛ̀lkirzɛ̀dɛ̀ki à mà ùŋmanɛlɛ Abràhamù, eŋge hvonda oma Lɛ̀hvì a rzi ŋyahwì a ŋyahwa hvɛ tɔ̀.

¹¹È hvonda ema hwatò hwa mòtende mò ama Lɛ̀hvì hwa mà hwɛ ipìlìrzì ò èkòmè ya Irzàyɛ̀lì ɔ̀ndi imbenda ì mà ŋgbàahwe wònyà Irzàyɛ̀lì. È hwèlì tɛ ema èwòlò yà Ipìlìrzì jà wònyà Lɛ̀hvì è mà tɛ̀mɛ̀ tɛ ehve-ehve oma ò rzi hwɛ hvɛ tɔ̀ jànda ema ehvɛhvɛ Pìlìrzì è wurza nàa Mɛ̀lkirzɛ̀dɛ̀ki ema à rzi hwɛ ò mòtèndè mò ama Arɔ̀nì.

¹²È mà hwɛ tɛ nanù ema mòtèndè mò Ipìlìrzì mò mà eŋgòwahwa, nanù oma e mbenda hvɛ e àŋgàmɛ̀nɛ̀ lì eŋgòwahwa.

¹³È mòtò ema hwenè hweyà hwe ma òhwàhwɛ̀lɛ à mà hwɛ ndi wà lìhvɛhvɛ lìtumba ndèŋgànɛlɛ o rzi wurze tɔ̀ mòtò o lìtumba la eni ema à mà gbeyà èwòlò ya Pìlìrzì.

¹⁴È ma hwiyàhwà gbamù nanù ema Rzàŋgo wa arzu e ma uwɛlɛlɛ ndi o lìtumba là Yudà. Ndèŋgànɛlɛ Morzè a rzi tùwe lìinà là lìni lìtumba e hvonda ema à mà ohwe lì hvomɛ̀nɛ̀ Ipìlìrzì.

¹⁵Eyà ema jò ohwi lì hvomɛ̀nɛ̀ lì eŋgòwahwa là è mbenda, è ɛ̀neyà lì akeyà nà hwèjèelì hwe ehvɛhvɛ pìlìrzì nàa Mɛ̀lkirzɛ̀dɛ̀ki.

¹⁶Rzeketɛ imbenda ema i tɛ̀yirzɛhwɛ na hwatò jɔ ndi i ma mo gbeyà ema a hwɛ pìlìrzì. Ndi a hwèlì e pìlìrzì ehwànja mɔ̀ à ohvi màyìmbi ma lì hwɛ o lòŋgɛ natɛ̀ɛ na o gbìndèyà na o gbìndèyà.

¹⁷È tìlàhwì ò tenì yà è kààtì yà Lohwà nanù ema, “Ò hwèlì ndi pìlìrzì natɛ̀ɛ nà ò gbìndèyà, nàa Mɛ̀lkirzɛ̀dɛ̀ki.”

¹⁸Nà è jɔ̀kɛ̀, imbenda ema ì mà lòma lì ŋgbàahwa lì hvomɛ̀nɛ̀ Ipìlìrzì ja kòhwà, ì mà tindahwa èhvàrzù yɔ̀kɔ ehwànja ì rzi hwɛnɛ hvɛ tɔ̀ ŋginyà nà wòlìtò.

¹⁹Ì hwi nanù ema è mbenda è rza è gbeyà ema eyà è hwɛ nà oma è àŋgàmɛ̀nɛ̀yi lì hwɛ. Jò ɔ̀ŋgɔ tɛ ò ɛnɛyi ehvàrzu, eyà yà gbamù è mà jà ema è jò gbèyi jò ohvi màhvìta. Ndeŋgànɛ̀lɛ̀ yɔ̀ ndi è mà jò jànà ò lì kombɛ̀nɛ̀ Lohwɛ̀.

²⁰Èhvɛhvɛ eyà ema i hwi e hwèlì ndi nanù ema, Lohwɛ̀ à mà aàtɛ yòombò ema Krirztò a o hwɛ ndi pìlìrzì natɛ̀ɛ na o gbìndèyà na o gbìndèyà. Ndi o mòtende mo ama Arɔ̀nì Lohwɛ̀ a rzi aàtɛ tɔ̀ yombò na wɔ̀ o lì hwɛ pìlìrzì.

²¹Ndi lìrzàkò ema Lohwɛ̀ à mà hvɔ̀rzɔ̀ Yerzù ò lì hwɛ è pìlìrzì, mɔ̀ à mà ohwa nanù ema, “Rzàŋgo à mà ààtɛ̀ yombò, ndèŋgànɛ̀lɛ̀ mɔ̀ à rza unda yòòmbò yà eni, nanù ema, ‘O hwèlì ndi Pìlìrzì natɛ̀ɛ na o gbìndèyà na o gbìndèyà.’”

²²O lì hvomɛ̀nɛ̀ ene yombò rzɔ, Yerzù mɔ̀ ndi à hwèlì eembànelì ema e jo uŋmɛ̀lɛ̀ nanù ema, yòombò ya ama Lohwɛ̀ e rza àyèŋgowɛ̀.

²³Ipìlìrzì ja koohwa i ma koka, ehwànja e kpelì e ma gbeyà ema hwa rzi tanɛ o lì ɛ̀ndɛ̀nɛ̀ èwòlò o worzo.

²⁴Ndi o nàŋgɛ nanù èhwanja Yerzù a hwèlì lòŋgɛ natɛ̀ɛ na o gbìndèyà, mɔ̀ à o hwɛ e Pìlìrzì natɛ̀ɛ na o gbìndèyà na o gbìndèyà.

²⁵O eŋgànɛ̀lɛ̀ rzɔ, Yerzù a tanɛyi o lì rzùŋgà mòŋgɛ ma hwatò ema hwa jà o ma Lohwɛ̀ lì akeyà na mɔ̀. Mɔ̀ a tanɛyi o lì hwa rzùŋgà mòŋgɛ ma awu ehwànja mɔ̀ à hwèlì lòŋgɛ ihvonda ja arzɛ o lì hwa kànɛlɛlɛ.

²⁶Yerzù mɔ̀ ndi à hwèlì èŋge tumba ya Pìlìrzì e Kàrzàmi ema a jo lɔ̀ɔ̀nì, èhwanja mɔ̀ à ondi na wòtani, a rza ohvi hvɛ tɔ̀ mehwɛlɛ, tɔ̀ wòhwe tɔ̀ wɔ̀kɔ wo rzi mo rzɔ̀ki. Mɔ̀ à mà akakowɛ o hwatò ema hwa gbeyà wòhwe, ndèŋgànɛ̀lɛ̀ a ikahwi o ŋmanyu ya e konda ndɛnɛ ya lìkànèyà o ŋmanyu yà lohwà.

²⁷Mɔ̀ a rza enje nàa ihvɛhvɛ Pìlìrzì i Kàrzàmi ema ja àŋgàmɛ̀nɛ̀yi lì ŋgbà màahweyà wùnyà tɛ. Iŋgi pìlìrzì i loma lì ŋgbà màhwèyà o lì hvomɛ̀nɛ̀ wòhwe wo awu, ndèŋgàna hwe e ŋgbà o lì hvomɛ̀nɛ̀ wòhwe wo hwahvɛhvɛ hwatò. Ndi Yerzù mɔ̀ à mà ŋgba e nyo ya eni nàa làhweyà, o wòhwe wo hwatò. Mɔ̀ à mà gbeyà ndi nanù o ŋgelì hvɔ̀kɔ o iŋgèlì ja arzɛ.

²⁸È mbenda e hvɔ̀rzɔ̀ hwatò hwa hwènàmà o lì hwɛ Ipìlìrzì i Kàrzàmi. Hwàto hwa hwènàmà hwa gbeyà màtònà. Ndi Lohwɛ̀ à mà hvɔ̀rzɔ̀ è Ŋmanà wà eni na yombò o mburzà ema mɔ̀ à mà ŋgbe e mbenda. Ndeŋgànɛ̀lɛ̀ mɔ̀ à mà gbeyà oŋgo Ŋmanà à mà emeyàhwɛlɛ o gbìndèyà na o gbìndèyà.