Read Mokpwe Jèmìrzì 3 Bible Online

Jèmìrzì 3 - Mokpwe bible

Jèmìrzì 3

¹Wònyànyàŋgo wa ami kòkò! Rzayi-rzayi ja anyu e rza hwɛni ndi lì hwɛ hwà-òkòlèlì hwa eyà ya ama Lohwɛ̀, e hwɛni lì hwiya nanù ema, irzɔ hwà-òkòlèlì i hwɛni lì kàyìrzɛ̀hwɛ kɔ̀yi-kɔ̀yi lì aka hwanɛyi hwatò.

²Irzɔ hwa arzɛ i yɔ̀ki lì gbeyà màtona o jòòhwì. È mòtò ema a rza gbeyà tɔ̀ lìtona a hwèlì ndi mòtò ema a tɛmi ehve-ehve a tànɛyi hvɛ lì kànèyà e nyo ya eni ya arzɛ aŋga nanù a rza gbeyà lìtona.

³Inyɛ̀ i wowe embànèlì na e wɔ̀rzi. Èhwànja mòtò arzi tɛ ema e wɔ̀rzi e gbeye nàa oma mɔ̀ à àrzeyà, a àŋgàmɛ̀nɛ̀yi lì ika yoma o tenì ya e wàna ya eni. Èŋge yoma ndi mɔ̀ à gbeyàna o lì timba eŋge wɔ̀rzi o lì ɛndɛ o èki ema mɔ̀ àrza nanù ema e ɛndɛ.

⁴Tɔ̀ e wowe hvɛ embànelì na mèelì me ŋmànja ema me hwèlì o ŋmànja. Tɔ̀ nɛ mèelì me ŋmànja me olo rzàyi-rzàyi, e mbɛ̀hvɛ̀nì ya ŋginyà ndi e me ɛ̀ndɛ̀nɛ̀. È mòtò ema a luka meŋge mèelì me ŋmànja a gbeyàna ndi hwàanà hwewambo ò lì ɛndɛnɛ mèelì me ŋmànja o tɔ̀ ima èki ema mɔ̀ àrza nanù ema mèelì me ŋmànja me ɛndɛ.

⁵Nànù ndi jɛ̀ɛ̀mɛ̀ jɔ hvɛ i hwèlì. Tɔ̀ nɛ i tu o nyo ya mòtò ja àyekìrzɛ o hweyà hwe ndɛnɛ ema i gbeyà. È ɔŋgɔ nɛ ŋmanà èkàando wa mùnya a tanɛyi lì rzɛlɛ lìkomba lì ndɛnɛ la waŋga.

⁶Ndèŋgànɛ̀lɛ̀ jɛ̀ɛ̀mɛ̀ jɔ̀ hvɛ i gbèyi ndi nàa mùnya. I hwèlì ndi enama o e nyo ya mòtò wa hwènàmà, ndeŋgànɛlɛ i gbeyà wòhwe wo kànèyà e nyo ya arzɛ ya e mòtò wa hwènàmà. Jɛ̀ɛ̀mɛ̀ i gbeyà lòŋgɛ la e mòtò wa hwènàmà lì gbeyà ndi o a ɛnɛ oma lì oŋwa ndi mùnya. Moŋgo mùnya mo uwɛ̀lɛ̀lɛ̀yi ndi o yulu ya mùnya ema mo rza lìma.

⁷Mòtò a tanɛyi a kànèyà inyàmà ja arzɛ. A kànèyà inyàmà ja waŋga, a kànèyà hwenɔ̀ni, a kànèyà inyàmà ema i kòòwà màwùŋgà mà awu o rze, a kànèyà hvɛ inyàmà ja màlìhwa ja arzɛ ema i hwèlì o ŋmànja. Ndèŋgànɛlɛ mɔ̀ a wòteyà ndi lì ji kànèyà natɛ̀ɛ na o hwewotelì hwe hvonda.

⁸Ndi tɔ mòtò a rza tanɛyi o lì kànèyà jɛ̀ɛ̀mɛ̀. Jɛ̀ɛ̀mɛ̀ i hwèlì ndi eyà ya wòhwe ema tɔ̀ mòtò a rza tànɛyi lì kànèyà, ndeŋgànɛlɛ jo òndi na kɛmbi ndɛnɛ ema e jànà kpelì.

⁹Jɔ ndi i gbeyàna o lì eka Rzàŋgo Lohwɛ̀ e Tatɛ̀ ya arzu, ndèŋgànɛlɛ jɔ ndi i gbeyàna o lì jema hwatò hwa hwènàmà. Ndeŋgànɛ̀lɛ̀ Lohwɛ̀ a weki ndi e mòtò wa hwènàmà o hweyàkɛ̀nèlì hwe eni.

¹⁰Ndeŋgànɛ̀lɛ̀ o wàna hvɔ̀kɔ ndi jòòhwì ja lì eka na lì jema jo uwɛ̀lɛ̀lɛ̀yi. Wònyànyàŋgo hwa ami e rza hwɛni lì hwɛ nanù.

¹¹O rza enje tɔ̀ ituŋgu jɔ̀kɔ ja màlìhwa ema i tànɛyi ì wurzirzɛ màlìhwa ema mà rzàŋgi na e mɔ̀ ema mà kɔ o ŋgèlì hvɔ̀kɔ.

¹²Wònyànyàŋgo hwa ami kòkò! Ŋmanà gbee wo rzàwu wo rza tanɛyi wo ŋya wo piya. Tɔ̀ gbee wo wolanjo wo rza tànɛ wo ŋya rzàwu. Itùŋgu ema i wurzirzɛ màlìhwà mà ikpà mà rza tanɛyi i wurzirzɛ hvɛ malìhwa ema mà rzàŋgi.

¹³O hwèlì tɔ̀ mɔ̀kɔ wa anyu anu ema a ohvi lìhwiyè na lì rzɔ̀ŋgìtɛ̀nɛ̀ e? Mɔ̀ a àŋgàmɛ̀nɛ̀yi ndi lì àwuŋmɛ̀lɛ̀ na lòŋgɛ la eni la gbamù ema mɔ̀ à hwɛni o hweyà hwe arzɛ ema mɔ̀ à gbeyà. Inyɛ̀ mɔ̀ à gbeye nanù o lì arzìirzɛ la eni là arzɛ na o lìhwiyè la eni.

¹⁴Ndi e ohvi tɛ inona ja wòhwe o tenì ya mèèmà me anyu, ndèŋgànɛlɛ e lùteyà ndi o inyɔ hwiti, e rzi gbeyàna lìhwiyè ema e hwɛni o lì gbeyà wòhwe o lì teŋgɛ̀nɛ̀ hwèyòkòlèlì hwe jɔ̀kɛ̀ o lì àyekìrzɛ.

¹⁵Ène nyayi ya lìhwiyè e rza uwɛ̀lɛ̀lɛ̀ ndi o ŋmanyu yà lohwà. Lì hwèlì ndi lìhwiyè ema lì uwɛ̀lɛ̀lɛ̀yi o hwatò hwa e rze ya mɔ̀nyɛ̀. È hwèlì ndi lìhwiyè ema lì uwɛ̀lɛ̀lɛ̀yì oma hwatò ema hwa rza hwɛnɛ èlìŋgɛ̀ ya ama Lohwɛ̀, lìhwiyè la èlìŋgɛ̀ ya wòhwe.

¹⁶Tɔ̀ ima èki ema e hwèlì inona ndèŋgànɛ̀lɛ̀ hwatò hwa lùteyà ndi lì hvomɛ̀nɛ̀ wɔ̀ mɛnɛ mbùnakɛ e hwɛ o tenì, ndèŋgànɛlɛ tɔ̀ ima lìtumbà la wòhwe lì hwèlì aŋga.

¹⁷Ndi lìhwiyè ema lì uwɛ̀lɛ̀lɛ̀yi o ŋmanyu yà Lohwà lì hwèlì e ya eni nyàyi. Tɔ̀ ima mòtò ema a hwɛni lìŋgi lìhwiyè a rza ohvi tɔ̀ lìtɔ̀tì tɔ̀ lɔ̀kɔ o nyo ya eni. Èŋge tumba mòtò e lìŋgàni ɛ̀yɔ̀lɛ̀, a hwèlì hviyàyi, a hwèlì mbunda na hwahvɛhvɛ hwatò ndèŋgànɛ̀lɛ̀ a ohvi ŋmèma mo ììlì rzàyi-rzàyi. A gbeyà hwatò hweyà hwe gbamù e rzi hwɛ lì timbana mòtò mburza, ndèŋgànɛ̀lɛ̀ mɔ̀ à gbeyà ndi nanù na ŋmèma mɔ̀kɔ.

¹⁸È hwèlì tɛ nanù ema hwàgbèèlì hwa ɛ̀yɔ̀lɛ̀ hwa gbeyà èwòlò ema e jànà ɛ̀yɔ̀lɛ̀ o ìtììtènì ja hwatò, eŋge e gbeyà hwatò hwa gbeyà hweyà ema Lohwɛ̀ a arza.