Read Mokpwe Jèmìrzì 4 Bible Online

Jèmìrzì 4 - Mokpwe bible

Jèmìrzì 4

¹Mamɛ e jànà injùmà na mètaŋgo ò ìtììtènì ja anyu e? Rzeke e hwèlì ndi e jɔ̀kɛ̀ nanù ema ilema ja lì hwɛnɛ la hwèèmà ema hwe jo ananà o tenì yɔ̀ ndi e gbeyà i gbeyà hwene hweyà e?

²Inyɔ e nòneyà hwemà ndi inyɔ e rza tànɛyi lì hwe luwà, o eŋgànɛ̀lɛ inyɔ e wòŋgìrzɛ̀nɛyi o lì oŋwa mòtò. È hwɛni nyɔ̀ŋgi ndɛnɛ o tenì ya anyu o lì hwɛnɛ hwema ndi e rza tanɛ e hwe luwa. Èŋge eyà e gbeyà inyɔ e tɔ̀wɔ, na lì ananɛ mɔ̀kɔ na ɔ̀nɛyi. È rza luwa hwèèmà ema ya arza ehwànja e rza hwe ijòwa Lohwɛ̀.

³Ndèŋgànà inyɔ e akòwànì tɛ Lohwɛ̀ yoma, e rza e luwa ehwànja e ijòwa na màlùtèyà mà wòhwe. Inyɔ̀ ya akowana ndi hweemà o lì alìŋgìrzɛ inyɔ mɛnɛ.

⁴Inyɔ e hwèlì ndi nàa hwatò ema hwa hwèlì o ndawò ja màahwa ndi hwa gbeyà mòrzònje. È rza hwi nanù ema e ikayi tɛ mèèmà me anyu o hwema hwe rze, hwe e gbeyà inyɔ e jà ndi hwàkɔ̀ɔ̀yèlì hwa ama Lohwɛ̀ e? O eŋgànɛlɛ rzɔ tɔ̀ ima mòtò ema a lìŋgàni o lì ika ŋmèma mo eni o hwema hwe ene rze, à mà agbeyɛ mɔ̀ ŋmìti mɔ̀kɔ̀yèlì wa ama Lohwɛ̀.

⁵È ɔ̀ŋgɛ̀lɛ nanù ema o ŋgundu ndi e tìlahwì o kààtì ya Lohwà nanù ema, “Èlìŋgɛ̀ ema Lohwɛ̀ a jo ikà o mèèmà me arzu e hwèlì ndi e ya eni, ndeŋgànɛlɛ mɔ̀ à nòneyà eŋge Èlìŋgɛ̀.”

⁶Ndi e ndèli ema, Lohwɛ̀ a jo ŋgbàà e rza hwɛni lìmɛni. Ɔndèŋgàtɛ̀ e tìlahwì o kààtì ya Lohwà nanù ema, “Lohwɛ̀ a kumbɛlɛlɛ hwatò hwa àyekìrzɛ e mburza ndi e wɔ̀ ema hwa arzìhwìrzɛ̀yi a hwa ŋgbàà ììlì ja eni.”

⁷O eŋgànɛ̀lɛ rzɔ e arzìhwìrzɛ̀ inyɔ̀ hwiti o worzo wo ama Lohwɛ̀. È hwɛ màniya o ma Mòkarzɛ̀. Inyɔ e gbèyi tɛ nanù mɔ̀ a e hwaŋga.

⁸È jèe e kombɛ̀nɛ̀ Lohwɛ̀ aŋga nanù mɔ̀ hvɛ a e kombɛ̀nɛ̀. Inyɔ̀ hwatò hwa wòhwe e hwɛmɛ o lì gbeyà wòhwe. Inyɔ̀ hwatò hwa mèhvìlì e ika màlùtèyà ma anyu o lì gbeyà hweyà ema hwe rzàŋgi.

⁹È hwɛ̀nɛ ndùtù o ŋmèma o wòhwe ema e ma gbèyɛ. È ɛhwɛ ndeŋgànɛlɛ e eyèe. Inyɛ̀ ɛyɔ̀ɔ̀ ya anyu e hwɛ ndi nàa e ɛhwɛ, e hwɛmɛ o lì hwɛ mɔ̀nyɛ̀ŋgi o lɔ̀ɔ ndi nanù ema e arzùumɛ̀.

¹⁰È arzìhwìrzɛ o worzo wo ama e Rzàŋgo. Inyɔ e gbèyi tɛ nanù mɔ̀ à e kàrzɛ̀ o ŋmanyu.

¹¹Ìi wònyànyàŋgo wa ami kòkò, e rzà àwòhwànɛlɛ hweyà hwe wòhwe mɔ̀kɔ na ɔ̀nɛ̀yi, tɔ̀ njɛnɛ ema a ohwi eyà ya wòhwe o lì teŋgɛ̀nɛ̀ ŋmanyàŋgò wa eni, tɔ̀ lì mo kàyìrzɛ̀, nanù oma a ohwa ndi hweyà hwe wòhwe lì teŋgɛ̀nɛ̀ e mbendà ya ama Lohwɛ̀ ndèŋgànɛlɛ mɔ̀ à ohwi nanù ema e mbenda e rza lɔ̀wu. O òhwi tɛ nanù ema e mbendà ya ama Lohwɛ̀ e rza lɔ̀wu, eŋge ŋgànà e hwèlì ndi nanù ema e gbeyà hweyà ema e mbendà ya ama Lohwɛ̀ e ohwi nanù ema e rza gbeyà. Nànù oma o ma awòwɛ̀ o wà witi o lì hwɛ e mòkàyìrzèlì.

¹²Lohwɛ̀ ndi à ŋgbàà e mbenda, ndèŋgànɛ̀lɛ̀ mɔ̀ ŋmìti hvɛ ndi à kàyìrzɛ̀. Mɔ̀ ŋmìti ndi à tànɛyi lì rzùŋga mòŋgɛ ma hwatò ndèŋgana mɔ̀ ŋmìti ndi à tànɛyi lì ma hvàŋga. Ndi njɛ̀nɛ o wa o ɔ̀ŋgɛ̀lɛ nanù ema o hwèlì o lì kàyìrzɛ̀ hwatò e?

¹³O nàŋgɛ nanù, e no òkànèyà, inyɔ ema e ohwa nanù ema, “Yàwono tɔ̀ ŋmɛlɛ ema wo jà i hwɛni lì ɛndɛ yɔ̀ndɔ o enɛyi mbowà irzɔ̀ i hwɛ aŋga ŋma mɔ̀kɔ i gbeyà nyòŋga aŋga ndèŋgànɛ̀lɛ̀ i yalɛ mɔ̀rzɛ̀ŋgì rzàyi-rzàyi.”

¹⁴Inyɔ e rza hwi tɔ̀ nɛ ema lòŋgɛ la anyu la ŋmɛlɛ ema wo o jɛɛ lì o hwɛ̀ɛ. Mòŋgɛ ma anyu ma gbèyi ndi nàa lìmbàki ema lì ɛneyà o ŋmanà hvoka wa hvondà rzìi lì nyɔ̀ŋgɔ.

¹⁵Mamɛ ema e hwɛni lì ohwa yɔ ene, “È hwèlì tɛ nanù ema Lohwɛ̀ a emelì tɛ nanù ema i hwɛ o lòŋgɛ ndèŋgànɛ̀lɛ̀ jo ò gbeyà ene eyà tɔ̀ enɛyi.”

¹⁶Ndi o nàŋgɛ inyɔ e ondi na kumba na lì àyekìrzɛ lìŋgi lì àyekìrzɛ la arzɛ lì rza lɔ̀wu.

¹⁷O eŋgànɛ̀lɛ rzɔ̀, tɔ̀ njɛnɛ ema a hwi eyà ya gbamù ema àŋgàmɛ̀nɛ̀yi lì gbeyà, rzìi a rzi e gbeye, nanù oma a gbèyi wòhwe o worzo wo ama Lohwɛ̀.