Read Mokpwe Jèmìrzì 5 Bible Online

Jèmìrzì 5 - Mokpwe bible

Jèmìrzì 5

¹O eŋgànɛlɛ rzɔ, o naŋgɛ, inyɔ hwatò ema e nàmi e no òkànèyà tɛ! È eyèe na lì ahvàhvɛ̀ o nyòla mètàkà ema me e jèeyà.

²Mònàmɛ̀ mo anyu ema e ma awɔ̀rzɔ̀nɛ̀ mo ma màa lì rzɔ̀mbɔ̀. Ndèŋgànà mààtu ma anyu ma mà làahwà na lìrzìyɛ̀yi.

³Màŋgàaŋgo ma mà lɛmbɛ e gòòlù na e rzìlìhwà ya anyu ema e imelì o mɔ̀nyɛ̀. Maŋga màŋgaaŋgo ema mà lɛmbɛ hweŋge hwema mɔ̀ ndi ma gbèeyà Lohwɛ̀ à è kɔ̀kìrzɛ̀, ndèŋgànɛ̀lɛ̀ maŋga maŋgaaŋgo me e laa inyo ja anyu nàa mùnya. O mene mèenyà ema lìrzùkù lì ma kombɛ̀nɛ̀, inyɔ e ma àwɔ̀rzɔ̀nɛ̀ mònàmɛ̀.

⁴Ɔŋgɔ tɛ, e rzi rzàhwèlì hwatò ò èwòlò ema hwa e gbèelì o wàŋga ya anyu. E hwèlì ndi o lì hwa lukɛlɛ, ene eyà e ma gbeyà hwaŋga hwatò ema e rzi rzàhwèlì luuwa la awu lì hweyàhwì na Tatɛ̀ Lòohwà là Ngiŋya.

⁵Lòŋgɛ la anyu la anu rze ya mɔ̀nyɛ̀ e hwèlì ndi o lì okà lòŋgɛ na o lì gbeyà tɔ̀ mamɛ ema inyɔ e lìŋgàni. Inyɔ e àwòlòhwìrzɛ̀ ndi inyɔ hwiti, tɔ̀ nɛ inyɔ e hwi nanù ema wùnyà ema Lohwɛ̀ a kɔ̀kìrzɛ̀ hwàkɔ̀ɔ̀èlì hwa eni wo ma kombɛ̀nɛ̀.

⁶Inyɔ e ohwa nanù ema hwatò ema hwa gbeyà hweyà ema hwe hvomɛ̀nɛ̀yi o worzo wo ama Lohwɛ̀ hwa hwèlì ndi hwatò hwa wòhwe, ndeŋgànɛlɛ inyɔ e hwa oŋwa. Hwa rza tànɛyi lì tɛ̀mɛ̀ o lì e teŋgɛ̀nɛ̀.

⁷Ìi wònyànyàŋgo hwa ami kòkò, e àjùlɛ̀ natɛ̀ɛ na o hwèjèelì hwe ama e Rzàŋgo. È embàneyà e mo gbeyà mbota. Mɔ̀ a ambɛ̀lɛ̀ natɛ̀ɛ na e hvonda ema a rzàŋga e mbota ya gbamù. Mɔ̀ a kaka ŋmèma natɛ̀ɛ na e hvonda ema e mbuwà ya worzo e yɔ̀ɔ̀, na e hvonda ema e rzukana o lì yɔ̀ɔ̀.

⁸Inyɔ hvɛ e àjùlɛ̀, e kake mèèmà, e ambɛlɛlɛ hwejèelì hwe ama e Rzàŋgo.

⁹Ìi wònyamòwè kòkò, e rza arzàrzòwànɛ̀ mɔ̀kɔ na ɔ̀nɛyi e rzi jà lì hwɛ Lohwɛ̀ a ohwa nanù ema e hwèlì ndi hwatò hwa wòhwe. È hwiye nanù ema e mòkàyìrzèlì a e hwɛlɛlɛ̀yi ndi o toŋgoŋgo.

¹⁰Ìi wònyànyàŋgo wa ami kòkò, e wowe hwe embànelì hwe hwà-òhwèlì hwa hwèlìŋgɛ̀. Hwà mà hwɛ lì ohwa ŋmɛ̀ndì o lìna la ama e Rzàŋgo, hwà mà hwɛ lì taka, ndèŋgànɛ̀lɛ̀ hwà mà àjùlɛ̀nɛ̀ meŋge mètàkà.

¹¹Nà oma e hwi, hwaŋga hwatò ema hwa hwi o lì àjùlɛ̀ irzɔ i hwa hwɛlɛ ndi nanù ema hwa hwèlì ndi hwatò ema hwa nàmìrzɛ̀hwɛ̀yi. Inyɔ e ma hweyà lì hvomɛ̀nɛ̀ lì àjùlɛ̀ la ama Jɔ̀bi e hvonda ema à mà luwe mètàkà, ndèŋgànɛ̀lɛ̀ e ma ɛnɛ nàa oma Lohwɛ̀ à mà mo gbèeyà gbaamù o lìrzùkù. È Rzàŋgo e ohvi ŋmèma mo gbamù ndèŋgànɛlɛ e ondi na ììlì.

¹²Ìi wònyànyàŋgo wa ami kòkò, o ŋmanyu ya hweyà hwe arzɛ, e rzi aàtɛ tɔ̀ o lìna la e ŋmanyu yà lohwà, tɔ̀ o e lɔ la ene rze, tɔ̀ o tɔ̀ mamɛ ya ene rze. Ndi e ohwi tɛ nanù ema, “Ɛ̀ɛ” eŋge ŋgànà e hwèlì ndi ɛɛ, ndèŋgànɛ̀lɛ̀ e ohwi hvɛ tɛ nanù ema, “Jàyɛ̀” eŋge ŋgànà e hwɛ ndi jàyɛ̀. È gbèyi tɛ nanù, Lohwɛ̀ a rza e kɔ̀kìrzɛ̀.

¹³Tɔ̀ ima mɔ̀ wa anyu ema a hwèlì o mòtàkà inyɛ a kànɛ. Tɔ̀ ima mɔ̀ wa anyu ema a ohvi mɔ̀nyɛ̀ŋgì inyɛ a embeya Lohwɛ̀ mɛ̀rzɔ̀kɔ̀ me jeka.

¹⁴Tɔ̀ ima mɔ̀ wa anyu ema a ɔkìrzɛ inyɛ a hwɛlɛ hwàtimbèlì hwa ŋmèmba hwa mo kànɛlɛlɛ, hwa mo kànɛlɛlɛ tɛ inyɛ hwa mo nyàlɛ lìyɔ̀ki o lìna la ama e Rzàŋgo.

¹⁵Hwa mo kànɛlɛlɛ tɛ na ŋmèma mɔ̀kɔ, Lohwɛ̀ a hwa hweyàna màkanɛ̀ ma awu, ndeŋgànɛlɛ eŋge e gbeyà e mòokelì a wɔ̀wɔ. È Rzàŋgo e gbeyà ema oŋgo mòtò a anjiye o lìnɔ̀ŋgɔ la eni la nyàmbɛ a hwɛ gbamù, ndèŋgànɛ̀lɛ̀ tɔ̀ wòhwe ema mɔ̀ à gbèyi Lohwɛ̀ a mo làkìrzɛ e lɔ̀ɔ.

¹⁶O eŋgànɛ̀lɛ rzɔ, e àpùrzɛ̀lɛ̀nɛ̀ wòhwe hwa anyu mɔ̀kɔ na ɔ̀nɛyi ndèŋgànɛ̀lɛ̀ inyɛ tɔ̀ ima mòtò a kànɛlɛlɛ ŋmanyàŋgò wa eni, aŋga nanù inyɔ hwa arzɛ e wɔ̀wìrzɛ̀hwɛ. Màkanɛ̀ ma e mòtò ema a gbeyà hweyà hwe jɔ̀kɛ̀ o worzo wo ama Lohwɛ̀ hwe imbami rzàyi-rzàyi, ndèŋgànɛlɛ ma ɛndeya.

¹⁷Èlàyijà à mà hwɛ ndi mòtò wà hwènàmà na oma irzɔ hvɛ i hwèlì. O hvonda hvɔ̀kɔ, à mà kànɛ nanù ema e mbuwà i rzi yɔ̀ɔ, ndèŋgànɛ̀lɛ̀ e rzi yɔ̀ɔ̀ o tenì ya meya meyàwo na ehvàrzu.

¹⁸Èlàyijà rzìi a kànɛ hvɛ, Lohwɛ̀ a gbeyà e mbuwà e yɔ̀ɔ, rzìi hwèèmà hwe wòteyà lì oŋga.

¹⁹Wònyànyàŋgo wa ami na indomɛ ja ami, e hwèlì tɛ nanù ema mɔ̀kɔ wa anyu a hwɛmi tɛ o lì oŋgama e njiya ya jɔ̀kɛ̀ ya ama Lohwɛ̀, rzìi o hvɛhvɛ mòtò a mo tìmbirzɛ hvɛ,

²⁰inyɛ mɔ̀ à hwiye nanù ema, tɔ̀ ima mòtò ema a gbèyi ema mòtò ema a gbeyà wòhwe a hwɛmɛ o lì gbeyà wòhwe, aŋga nanù oma à mà rzùŋgà lòŋgɛ la e mòtò ema a gbèyi wòhwe. Ndèŋgànɛlɛ ene eyà e gbeyà wòhwe rzàyi-rzàyi ema ono mòtò à mà gbeye Lohwɛ̀ a mo làkìrzɛ.